Jã 4
4
Jeju jaal Galile dɩɩra
1Jɔfʋ bʋ dʋdara nɩɛrɛ dɩ Jeju n cʋʋrɛ tɩbɩla dɩ wa‐n do kpãkpãadara dɩ kpɛɛ wɩ nyʋɔnɔ, dɩ wa‐n jɔ Jãa too, 2sɩɩ dorakɛ ga do Jejuu thɛthɛ n kpɛa tɩbɩla nyʋɔnɔaˈ, sɩ ɔɔ kpãkpãadara wɛ. 3Dɩ ɔbɔɔkɛ Jeju Kɔ̃tɩn nɩɛnɩ gelela, a faarɛ Jude dɩɩ sa ɩɩr a kɛr bir Galile.
Jeju na Samarɩ khɛr
4Sɩ dɔ Jeju n the Samarɩ dɩɩra sɩ a jal. 5Dɩ a kɔɔ daan Samarɩ dɩ bɩɛlɩkɛ wɩ‐n wenɩ Sɩsaarɩkɛ wɔrɔnanɩ lɩɛɛkɛ Jakɔbɩ kɔɔ hanɩ ɔɔ bikuun Jojɛfɩ.#Jən 33:19; Joj 24:32 6Dɩ liirrə Jakɔbɩɩ bi kɔɔ ha. Sɩ mɔ̃ Jeju kɔɔ vɔɔnɩ ɔɔ kpaar pa, a toore bi nʋɔra; sɩɩ do ʋlkhɔ khʋra gɩ kɔɔ do.
7Dɩ Samarɩ khɛ bɩɛl pɔ da‐n cɛ nyʋɔn. Dɩ Jeju sʋʋraa: Ha mɩ nyʋɔn ɩ̃ yɔ. 8Sɩ ɔɔ kpãkpãadara wer kɔɔ jaal dɩɩra dɩko thɩɩ. 9Dɩ Samarɩ khɛrɩle sʋʋraa ayɩ: Mɔ̃ gɩ fʋ sɩ fɛrkɛ dɔnɩ Juifi bɩɛl mɛr Samarɩdaarra nyʋɔn fɩ yɔ? Gɩdonɩ Juifisɔ na Samarɩdara na‐n bɔ kha ga.#Ɛsɩd 4:1–5; Neh 4:1–2 10Dɩ Jeju birsee: Ado fɩ kɔɔ jɩrɛra Thãgbaa khaarda na ʋrɛɛkɛ n bɩɛlnɛ farnɩ gɩrɛ fɩ ha nɩ nyʋɔn ɩnɩ‐n yɔ, ga dor fɛr na kɔɔ kara na bɩɛlaa a ha fɩ nyʋɔnɩkɛ n ˈlaanɛnɩ yire. 11Dɩ khɛrɩle sʋʋraa: Kɔ̃tɩn, fa hana thɩ̃ɛ a na cɛna ga, sɩ dɩ bire hulono. Ka fa yɩ nyʋɔnɩkɛra n ˈlaanɛnɩ yire? 12Fɛr kɔ̃tɩna a jɔ asɩ mama thɩ kɔ̃tɩ̃ Jakɔbɩɩkɛ kɔɔ hana sɩnɩ bireekɛra, kɛ ɔɔ thɛthɛra kɔɔ yɔnɩnakɛ na ɔɔ bikona na ɔɔ nʋ̃sɔ ya? 13Dɩ Jeju birsee: Tibil wo tibilikɛ n yɔnɩ nyʋɔnɩkɛ, yɔlkhaa na fʋʋrɛ wo. 14Sɩ ʋrɛɛkɛ na yɔnɩ nyʋɔnɩkɛ ma haanɩ, yɔlkhaa na fʋʋ kpɩɩ bã; sɩ nyʋɔnɩkɛ ma haanɩ ga debire na do ɔɔ bɩnɔ yɔ bu kaarɩkɛ na‐n buonni gɩ haa yire khorr. 15Dɩ khɛr sʋʋraa: Kɔ̃tɩn, dɩ ha mɩ yɔ caakɛra dɩ yɔlkhaa na fʋ mɩ bã, dɩ ma ɩ̃ kɩɛr ɩ̃ cɛ nyʋɔn bã. 16Dɩ Jeju sʋʋraa: Jala wɛ afɩ ko sa birə ɩna kɩɛr. 17Dɩ khɛr sʋʋraa: Ma hana kuunaˈ; dɩ Jeju birsee: Sobɔr fɩ so fa hana kuunaˈ; 18gɩdonɩ kona yemɔɩ fɩ kɔɔ he, sɩ ʋrɛɛkɛ fɩ hananɩ nɛnɛ̃kɛ, ga do afɩ ko ga, dɩ sobɔr ha gɩrɛ fɩ sonɩ. 19Dɩ khɛr sʋʋraa: Kɔ̃tɩn, mɩ yɩɛrɛ dɩ Thãgbaa bobon ha fɩ. 20Asɩ mama thɩ kɔ̃tɩ̃sɔ kɔɔ fʋɔrɛ Thãgba gɔ̃gʋɔnaakɛ ƴũ, sɩ dɩ ne wer n yɩ: Paarɩkɛ teananɩ Thãgba fʋɔrɛ dʋɔn Jerujalɛm. 21Dɩ Jeju sʋʋraa: Khɛr pɛ mɩ haar, gɩdonɩ bɔɔ n daan, kɛ na fʋɔrnɩ Thɩrɛ gɔ̃gʋɔnaakɛ dɩ Jerujalɛmna gɩrakɛ woaˈ. 22Nɛrɛ, nɩ‐n fʋɔrɛ gɩrɛɛkɛ na jɩnaˈ, sɩ sɛrɛ, sɩ‐n fʋɔrɛ gɩrɛɛkɛ sɩ jɩnɩ, gɩdonɩ Juifii caarra Taadaar the. 23Sɩ bɔɔ n daan, dɩ gɩ ˈlire daan pɩ, kɛ fɔfʋɔrda bɔsɔ na fʋɔrnɩ Thɩrɛ, gɩ do Thu Phuurə gɩ‐n the mɔ̃ a hanɩ thʋ̃bɔr, gɩdonɩ wa fɔfʋɔrda casɔɔle Thɩrɛ n ƴaal. 24Thu Phuu Thãgba do, dɩ dɔ ɔɔ fʋɔrɩkɛ wa‐n fʋɔrʋʋnɩ gɩ do Thu Phuurə gɩ‐n the mɔ̃kɛ a hanɩ thʋ̃bɔr. 25Dɩ khɛr sʋʋraa: Mɩ jɩrɛ dɩ Mesɩ na ɩnɛ, ʋrɛɛkɛ wɩ‐n wenɩ Kirisiti. Ɔbɔɔkɛ a na ɩnɩ a na mɩɛ sɛr thɩ̃ɛ fɛʋ. 26Dɩ Jeju sʋʋraa: Mɛrkɛra n mɩana fɩnɩ, mɛrra gɩ.
27Dɩ ɔbɔɔlera ɔɔ kpãkpãadara bir pɔ dã, dɩ nʋɔ kɔɔ kpaa wɩ mɔna a‐n mɩɩnanɩ kha khɛr. Sɩ tibil bɩɛl na‐n bulelakɛ, anye a‐n bule khɛrɩle, agɩbo anye a‐n mɩɩnaa yaa ga. 28Dɩ le khɛr faa ɔɔ yɔ cɛ da sa kɛr bir dɩɩra, a so tɩbɩlala: 29Nɩ ɩna hɩnɛ kũu bɩɛlɩkɛ sɔ marnɩ thɩ̃ɛ fɛʋʋkɛ mɩ kɔɔ cʋʋnɩ, gɩ ba do ɔr dʋɔn Kirisitira yaa? 30Dɩ wɩ ther dɩɩraale dɩ wa‐n pɔ Jejura.
31Bɔ bɩɛllaalera kpãkpãadara n phʋʋr Jeju thakɛ ayɩ: Dɩɩrdaar, khɔ dɩkor mɛ̃. 32Dɩ so war: Mɩ hananɛ dɩkorɩkɛ na jɩnaˈ. 33Dɩ kpãkpãadara na‐n bule kha bɩɛlbɩɛl: Tibil ba ɩnana dɩkor a haa yaa? 34Dɩ Jeju so war: Ɩ̃ dɩko dʋɔn ma‐n cʋɛ ʋrɛɛkɛ thɔna mɩnɩɩ tuur a na cʋɛna dakha ɔɔ thɔ̃ gɩ pɩ. 35Nɛrɛ, na‐n so dɩ nɩ yɩ: Pora yenã sɛ wo sɩ jʋ kha bɔɔ n dã gaa? Nɩ hɩnɛ, mɩ so narɛ: Nɩ gba ƴɩɛ ƴũ a hɩnɛ jɔɔkɛ bɩnanɩ pɩ a dã kha bɔɔ. 36Dɩrakɛ ʋrɛɛkɛ n khanɩ ˈlire ˈlɛr ɔɔ lɩmɩ pɩ, dɩ khana tɩbɩla jʋ khaa wa‐n ˈlɛ yire khorr, dɩ mɛ̃ ʋrɛɛkɛ n direni na ʋrɛɛkɛ n khanɩ na gbɛbɩ kha wa‐n kãka. 37Dɩ gɩ har mɔna wɩ‐n sonɩ ger dɩ wɩ yɩ aa: Ʋ n diire dɩ ʋ n kha. 38Mɩ thɔ̃ nɛr nɩ kha gɩrɛɛkɛ na kɔɔ vɔɔrɔnaˈ, ɩkhasɔ kɔɔ vɔɔ dɩ nɩ lõ awɩ thɔna.
Jeju na Samarɩdara
39Dɩ Samarɩdara jɔɔjɔɔ dɩɩraale kɔɔ pɛrɛ Jeju haar dɩɩ the khɛrɩ sobɔ so jɩ thɩmɩɩraakɛ a kɔɔ mɩɩnɩ ayɩ, a so narɛ thɩ̃ɛ fɛʋʋkɛ ɩnɩ kɔɔ cʋʋnɩ. 40Dɩ ɔbɔɔkɛ Samarɩdara pɔnɩ a yɩɩ, wɩ bɩɛlʋʋlɛ a tɔɔna nɩ kha, dɩ Jeju toona wɛr wire yenyɔ. 41Dɩ Samarɩda jɔjʋɔ bir jɩɩ pɛr haar wo dɩɩ do Jejuu thɩmɩɩ dɔ nɔɔ, 42sɩ dɩ wa‐n so khɛrraale: Ga do gɩrɛɛkɛ fɩ mɩɩ sɩnɩ gɛr cʋɛ sɩ dɩ sɩ pɛr haar bã, sɩ gɩdonɩ sɩ nɩɛrɛ asɩbara a jɩ dɩ ɔr dʋɔn tɩbɩla fɛʋ thɩɩraa Taadaar sobɔr.
43A wire yenyɔɔle ka pɩ, Jeju ther le da‐n jal Galile. 44Gɩdonɩ Jejuu thɛthɛ kɔɔ sor ayɩ: Thãgbaa bobon bɩɛl na‐n ˈlɛ cʋrɛ ɔɔ thɛthɛɛ dʋɔaˈ.#Mat 13:57; Mar 6:4; Lu 4:24 45Dɩ ɔbɔɔkɛ Jeju danɩ Galile, Galiledara teguure gɩdonɩ wɩ kɔɔ yɩrɛ thɩ̃ɛ fɛʋʋkɛ a kɔɔ cʋʋnɩ Jerujalɛm fɛtɩ bɔɔ. Gɩdonɩ wɛr dakha kɔɔ jaal fɛtɩraale.#Jã 2:23
Jeju kpɛɛrɛ fãgadaarɩ thɔ̃daar kɔ̃tɩ̃ bɩɛlɩ bikuun
46Dɩ Jeju kɛr bir Galile Kana, kãkɛ a kɔɔ debini nyʋɔn dɩɩ do dɩvɛ̃. Dɩ fãgadaarɩ thɔ̃daar kɔ̃tɩ̃ bɩɛl gɩ, a hale Kapɛrnayʋm dɩ ga‐n kho ɔɔ bikuun.#Jã 2:1–11 47Dɩ ɔbɔɔkɛ a nɩɛnɩ dɩ Jeju ther Jude a bir ɩ̃ Galile, a jaalaalɛ a bɩɛlʋʋ a pɔ a kpɛɛnɛ ɩnɩ bikuunikɛ gɩ‐n khonɩ, dɩɩ sɩ gbe sɩ a ɓɔr. 48Dɩ Jeju sʋʋraa ayɩ: Ado na‐n yɩ nɔ kpaa thɩ̃ɛsɔ na ma kʋ thɩ̃ɛsɔaˈ, na‐n pɛr haar kpɩɩrakaˈ. 49Dɩ fãgadaarɩ thɔ̃daar kɔ̃tɩ̃ɩle sʋʋraa: Kɔ̃tɩn, ɩna ɓo sɩ ɩ̃ bɩsã na ɓɔr na paˈ. 50Dɩ Jeju sʋʋraa: Kɔna, afɩ bikuun na khəˈ. Dɩ kuunile pɛrɛ thɩmɩɩrɩle Jeju sʋʋraanɩ haar, a gba jal da‐n kɔ̃. 51Dɩ mɔ̃ a ˈlini gba hʋɛ pɩ da‐n kɔ̃, ɔɔ thɔ̃dara caanʋʋnɛ hʋɛra a sʋʋraa: Afɩ bɩsã kpɛɛrɛ. 52Dɩ bule wi: Ʋmɔ̃ bɔra gɩ kɔɔ baaraanɩ? Dɩ wɩ sʋʋraa: De gɩ wire n ganɩ gbe, gɛr tomɩ kporre ɩɩraa. 53Dɩ le thɩrɛ jɩ dɩ ɔbɔɔkɛra Jeju kɔɔ sʋʋraanɩ ayɩ, ɔɔ bikuun kpɛɛrɛ wa bɔɔlera gɩ, dɩ ɔr na ɔɔ cɔdara fɛʋ pɛr haar. 54Gɛr dʋɔn balanyɔ nɔ kpaa thɩ̃ɛɛkɛ Jeju cʋʋnɩ wo, ɔbɔɔkɛ a thenɩ Jude a kɛr bir Galile.
موجودہ انتخاب:
Jã 4: LOBIRI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Burkino Faso 1985.
