Jã 18
18
Jejuu fʋ
(Mat 26:47–56; Mar 14:43–50; Lu 22:47–53)
1Ɔbɔɔkɛ Jeju mɩɩnɩ thale pɩ, a ther na ɔɔ kpãkpãadara a jal Sedʋrɔ̃ iiro kãkɛ nãkʋɔr hanɩ, dɩ a lʋʋn le ɔr nakha ɔɔ kpãkpãadara. 2Judasɩɩkɛ na lirenaanɩ kɔɔ jɩrɛ paarɩle, gɩdonɩ liir Jeju na ɔɔ kpãkpãadara na‐n pɩ laˈ. 3Dɩ Judasɩ kpar sɔrasɛsɔ, na gardɛsɔɔkɛ bonɩ jidaar kɔ̃tɩnasɔ na jɔfʋ bʋ dʋdarasɔ kɔɔ thɔnɩ, dɩ wɩ kɔɔ pɔr le na lãphãsɔ, na hɔ̃ lesɔ, na ko ke thɩ̃ɛsɔ.
4Mɔ̃ Jeju jɩnɩ gɩrɛ fɛʋʋkɛ na danaanɩ a tɔr thɔɔ sa bule wi: Amɛ nɩ‐n ƴaal? 5Dɩ wɩ birsee: Najarɛtɩ Jeju gɩ. Dɩ so war: Dɩ mɛrra ha ʋ. Dɩ Judasɩɩkɛ na lirenaanɩ kɔɔ har kha na wɛr. 6Ɔbɔɔkɛ Jeju so warnɩ pɩ aa, ɩnɛrra ha ʋ, wɩ tɔr birnə khiru a jiir thʋnɔ.
7Sɩ a bire bule wi wo: Amɛ nɩ‐n ƴaal? Dɩ wɩ birsee: Najarɛtɩ Jeju gɩ. 8Dɩ Jeju birse wi: Ma kɔɔ so nar ayɩ: Mɛrra ha ʋaˈ. Dɩ ado mɛr nɩ‐n ƴaal, nɩ sɩɛr wɩrɛɛkɛ n jal. 9Dɩ mɛ̃ thɩmɩɩrɩkɛ a kɔɔ mɩɩnɩ na dã oti. Gɩ sor ayɩ: Wɛkɛ fɩ kɔɔ ha mɩnɩ, ma kɔɔ faa bɩɛllakɛ dɩ buəˈ.
10Dɩ Sɩmɔ̃ Pɩɛrɩkɛ hananɩ bajɩna, a kɔɔ pher a cɩna gbõdaarɩ thɔ̃daar nyɔ̃bɔ nũu a kur. Thɔ̃daarɩlee irə n dʋɔn Malkusi. 11Dɩ Jeju so Pɩɛrra: Birəna afɩ bajɩna a tʋɔr khal kpara. Thɩ̃ yɔnanɛɛkɛra Thɩrɛ ha mɩnɩ ɩ̃ yɔ, ma bor yʋɔr kã?#Mat 26:39; Mar 14:36; Lu 22:42
Wɩ kpar Jeju a jalna Anɩ pa
12Le sɔrasɛsɔ na awɩ sɛfʋ, na Juifisɔɔ gardɩsɔ kɔɔ fʋ Jeju a li, 13a kpaa jalna Anɩ pa ɓo, gɩdonɩ Kaɩfɩɩkɛ kɔɔ dɔnɩ gbõdaar ga yɛɛlee thɛɛ a do. 14Kaɩfɩ dɔ ʋrɛ kɔɔ dɩrɛnɩ Juifisɔ fɩlɛ ayɩ: Gɩrɛ baannɩ dʋɔn, dɔ tɩɩ bɩɛl n khi tɩbɩla fɛʋʋ sora.#Jã 11:49–50
Mɔ̃ Pɩɛr bananɩ ɩna jɩ ntɛ Jeju donaˈ
(Mat 26:69–70; Mar 14:66–68; Lu 22:55–57)
15Sɩ Sɩmɔ̃ Pɩɛr na kpãkpãadaar kpɩɩ kɔɔ kpaanɛ Jejura. Gbõdaarra kɔɔ jɩrɛ kpãkpãadaar kpɩɩlera, dɩ ɔr kɔɔ lona kha na Jeju gbõdaarɩ gbayara. 16Sɩ Pɩɛr wer jɩɩl phiilo lõfonʋɔra. Dɩ kpãkpãadaar kpɩɩle gbõdaarɩle jɩnɩ ther a mɩɩna khɛrɩkɛ dɔnɩ lo bɛrdaar, dɩ sɩ Pɩɛrra dɩ lõ. 17Dɩ thɔ̃daar khɛrɩlera n bɛranɩ loo bule Pɩɛr: Fɛrɛ dakha, ga do kuunikɛɛ kpãkpãadaar ha faa? Dɩ birsee: Ma do ɔɔ kpãkpãadaaraˈ. 18Dɩ gɩdonɩ ie kʋ bɔɔ gɩ, thɔ̃dara na gardɛsɔ kɔɔ gbɔɔrɛ dɔɔ a too le dɩ wa‐n ɩɩr, dɩ Pɩɛr dakha kɔɔ toore kha na wɛr da‐n ɩɩr dɔɔra.
Mɔ̃ gbõdaar buleni Jeju thɩ̃ɛ
(Mat 26:59–66; Mar 14:55–64; Lu 22:66–71)
19Dɩ gbõdaar kɔɔ bulele Jeju thɩ̃ɛ, mɔ̃ gɩ hanɩ na ɔɔ kpãkpãadara na mɔ̃ ɔɔ dɩɩr hanɩ. 20Dɩ Jeju birseere ayɩ: Casɩ mɩ‐n kɔɔ mɩɩ thɩ̃ɛ tɩbɩlala fɛʋ, dɩ mɩ‐n kɔɔ dɩɩrɛ thɩ̃ɛ wire wire Juifisɔɔ Thãgba fʋɔr cɔsɔra, na Juifisɔɔ Thãgba fʋɔr cɔ kɔ̃tɩɩna, ka Juifisɔ n gbɛbɩnɩ kha fɛʋ, dɩ ma kɔɔ mɩɩ thɩ̃ɛ wolonena ga. 21Mɔ̃ dɔ kɩrʋ dɩ fa‐n bule mi? Bulene wɩrɛɛkɛ kɔɔ pɛ mɩnɩ nũu gɩrɛɛkɛ mɩ kɔɔ mɩɩ wɩnɩ. Wɛr thɛthɛ jɩɛn gɩrɛɛkɛ mɩ mɩɩnɩ. 22Mɔ̃ Jeju mɩɩnɩ thale, gɛr gardɩ bɩɛlɩkɛ hanɩle ɓaaraa sa so: Thale fa birse gbõdaar bɛɛ? 23Dɩ Jeju birsee: Ado puure mɩ mɩɩ, nɛ mar puurera mɩ mɩɩnɩ ɩ̃ hɩɩn. Sɩ ado dabʋɔ mɩ mɩɩ, anyeraakɛ fɩ ɓa mɩ? 24Le An lii a thɔna Kaɩfɩraakɛ dɔnɩ gbõdaar.
Mɔ̃ Pɩɛr birni bana wo ɩna jɩ ntɛ Jeju donaˈ
(Mat 26:71–75; Mar 14:69–72; Lu 22:58–62)
25Sɩ Sɩmɔ̃ Pɩɛr wer toore lerakɛ da‐n ɩɩr dɔɔ. Dɩ wɩ bulee ayɩ: Fɛrɛ dakha, ga do ɔɔ kpãkpãadaar bɩɛl ha faa? Dɩ bana sa so: Ma do ɔɔ kpãkpãadaaraˈ. 26Dɩ tibilikɛ Pɩɛr kɔɔ kurni nũu, ɔɔ tibil bɩɛl hale a do gbõdaarɩ thɔ̃daar, ɔr sɔ Pɩɛrra: Sɩ ma kɔɔ yɩ fɩ nakha Jeju nãkʋɔrra gaa? 27Dɩ Pɩɛr bir bana wo, dɩ dapaara yɔl kʋʋ khɩɩ.
Jeju Pɩlatɩɩ ƴɛra
(Mat 27:1–2, 11–14; Mar 15:1–5; Lu 23:1–5)
28Dɩ Juifisɔ kɔɔ thenanɛ Jeju Kaɩfɩɩ pa a kpaa jalna gobanɛrɩ cɔ. Sɩ duuro gɩ kɔɔ do. Ga do wɛr thɛthɛ kɔɔ lona gobanɛrɩ cɔ, gɩ ho wa bisere gɩ tɔ̃ wɩ Pakɩ dɩko khoraˈ. 29Dɩ gɛr gɩ Pɩlatɩ the a jal awɩ pa a bule wi ayɩ: Anye dɔ sorɩkɛra nɩ‐n pɛnɩ kuunnaakɛra thaa? 30Dɩ wɩ birsee: Ado puu cʋʋdaar a kɔɔ doaˈ ga do sa kɔɔ fʋʋrɛ na ha faˈ. 31Dɩ gɛr gɩ dɩ Pɩlatɩ so war: Dɩ a thale gɩ, nɛrɛɛ thɛthɛ n gbaanɛɛ anɩbara a kɩlɛnaa mɔ̃ anɩ jɔfʋ hanɩ. Dɩ Juifisɔ sʋʋraa: Sa hana hʋɛ a na kʋ tibiləˈ. 32Dɩ mɛ̃ thɩmɩɩrɩkɛ Jeju kɔɔ sonɩ na dã oti, gɩ do gɩ nɩnanɛ khi ca gɩrɛ a na khini.#Jã 3:14; 12:32
33Dɩ Pɩlatɩ bir lõ gobanɛrɩ cɔ a we Jeju a bulee: Sɩɩ do fɛr dʋɔn Juifi fãgadaarɩ? 34Dɩ Jeju birsee: Afɩbara fɩ jɩ gɩ mɩɩ yaa, agɩbo ɩkhasɔ ba gbaan ɩ̃da a mɩɩ fɩ? 35Dɩ Pɩlatɩ birsee wo ayɩ: Fɩ yɩ mɛr dɩ ɩ̃ do Juifi ya? Mee, afɩ ca na bonɩ jidaar kɔ̃tɩna fʋɔn fɩ a ha mɩ. Anye fer kɔɔ cʋʋ? 36Dɩ Jeju birsee: Ɩ̃ fãgadaarɩ dɩ, ga do thɩɩkɛɛda ga. Ado ɩ̃ fãgadaarɩ dɩ kɔɔ dor thɩɩkɛɛda, ga dorra ɩ̃ thɔ̃dara na kɔɔ kɛ̃kɛrɛnɛ na pɛ mar, gɩ dora wa kɔɔ puno na fʋ mɩ na ha Juifisɔaˈ. Sɩ ga ha thalaˈ, ɩ̃ fãgadaarɩ dɩ na do thɩɩkɛɛda ga. 37Dɩ Pɩlatɩ bulee: Fãgadaar ka ha fɩ ya? Dɩ Jeju birsee: Gɛrra fɩ soo le, fãgadaar ha mɩ. Dɩ gɛrra dɔ nɔɔ dɩ wɩ kɔɔ kɔ̃ mɩ, gɛrra dɔ nɔɔ dɩ ɩ̃ ɩ̃ kɛ thɩɩra ɩ̃ mɩɩ sobɔ so jɩɩr ma‐n pɛ sobɔrra. Dɩ tibil wo tibilikɛ dɔnɩ sobɔdaar, a‐n pɛr ɩ̃ nɔ nũu. 38Dɩ Pɩlatɩ bulee: Anye n dɔ sobɔr?
Mɔ̃ wɩ heennɩ Jeju so kʋnanɛ
(Mat 27:15–31; Mar 15:6–20; Lu 23:13–25)
Ɔbɔɔkɛ Pɩlatɩ mɩɩnɩ thale pɩ, a ther wo a jal Juifisɔɔ pa a so war: Mɛrɛ, ma yɩɩraa thɩ̃ɛɛkɛ teananɩ wɩ heenuu soraˈ. 39Sɩ gɩdonɩ nɩ mɩlna gɛr dɩ ɩ̃ faa khaɩdaar bɩɛl dɩ ɩ̃ ha nɩ Pakɩ fɛtɩra fɛʋ, nɩ‐n ƴaalɛ ɩ̃ faa Juifi fãgadaarra a ha nɩ yaa? 40Sɩ wɩ bire hulẽ wo ayɩ: Kpei, ga do ɔr ga, sɩ Barabasɩ. Sɩ yu hɔ̃hʋɔldaar Barabasɩ kɔɔ do.
موجودہ انتخاب:
Jã 18: LOBIRI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Burkino Faso 1985.
