Thodŏpho 2

Spirito Tcahtĭ Adèlela

1B́ĕ Pèntèkò̆stè Pwè̆ b́ôhtîgè nu, cè tòcò ladēplo lōwa d́ŏ dè ale dokhlo. 2Gôlô̄gele dè alē thèhtagè d́ŏ Mò̄kholè̄ dèdè̆. Mè acab́ô̆ gīllimob́ĭ kî apĕhtagè hibu b́ĕ za sanălăò alle nu. 3Kîd́ò̆ d́ŏ zu mūkă bu nu, mègè acab́ô̆ hmî ablî nu, asò̆la d́ŏ cè dèbwè dèbwè ladū akho nu. 4Cò ò pĕhtakî Spirito Tcahtĭ kî jî̄b́ègè dèlēdèhwè amŏamo acab́ô̆ Kib́ĭcè Atha icè tòcò agī jî̄b́è adĕ nu.

5Hlĕnu Jŭdapho aò d́ŏ htĭge alewe tòcò htè aòi dèthub́uthèb́è̆ tòcò nu ge ògè d́ŏ Jerŭsalèm u bu nu. 6B́ĕ bija aboahò thîhè̆b́è dèlē ajo d́ō, cè tòcò le ladēplogè b́ĕnu. Kî cè tòcò htèniwĭniwa lōgè, manè̄ bija tòcò thîhè̆b́è cè tòcò jî̄b́èhta zi htĭ ze ge dege dege ladū adèjî̄b́è akhoacè̆ nu. 7Bija tòcò htèdômô̄dahmă kî d́ògè, “Tcabò̄ bija ajî̄b́è tòcò jo, zî ḿî lŏ Galilĕapho lò tè b́è ńò ā? 8Ḿî khŏnujo wa dèbwè dèbwè ladū thîhè̆b́è ma wò òla htĭge tòcò adèjî̄b́è cadè̄? 9Pathiănopho, Mĭdiapho, Elamĭtapho, Mèsopotĕmiapho, Jŭdapho, kî Kapadŏkhiapho, Pò̆ntupho kî Ăsiapho, 10Phrĭgiapho, Pamphĭliapho, Izî̆tpho kî Libĕapho, htè aòb́ôhtî Cerenĕopho nu. Kî wa aò d́ŏ Rŏma u we le 11kî wî ḿî Judĕage pho, kî wa ab́udè aòi Jŭdapho Adèthèb́è̆ abu nu. Wa tòcò ḿîgè Krîtănopho kî Arĕbiapho, nòthò̆ hnò̆nu, wa lŏcăcè wî thîhè̆b́è cè tòcò adèd́ò̆htôla ab́èkja Kib́ĭcè adèmè còklî tòcò d́ŏ we lē wè hwè lò hŏ!” 12Bija lŏcăcè htèdômô̄dahmă, htèniwĭniwa kî cò d́ò, “Ajo ḿî danè̄?”

13Barasă alewe tòcò sòlŭsò̆jè̄ kî cò d́ò, “Cè tòcò ò̆hmugè,” cò d́ò lōwa do.

Petru Adèd́ò̆htô

14Barasă Petru sò̆htoòplo hwă bōhmubicè alewe scidèbwè, zo htŏhta ze lē kî jî̄b́èhtîgè bija tòcò gōjo, “Ŏ Jŭdapho kî bija aò d́ŏ Jerŭsalèm u gŏ abwè, thĭ kî thîhè̆ d́ò̆bò̄è kî sòkhĕńebò̄ jè tîkî. 15Bija ajo tòcò tò ò̆hmu acab́ô̆ thĭ gomo cè akhò̆ nu ńò. Manè̄ khŏnujo ḿî Lumuwò lwīthô danare kòlò̆. 16Barasă ajo ḿî acab́ô̆ Prò̆fèt Jŏèl d́òdòlò nu lò.

17B́ĭcè d́ò, ‘D́ŏ muni agudulă dini nu, Jò gò̄ hlòlakò̆ Jî Spirito Tcahtĭ d́ŏ bija lŏcăcè akho,

kî thĭ phomu phokhŏ tòcò kò d́ò̆sa dòlòkò̆ dè,

kî thĭ pho ab́òĺò tòcò gā tcahtîkò̆ dètcahtî,

kî athobwethabwe tòcò gò̄ sòḿĭb́akò̆ dè.

18Ab́èhŏ! Dokhlŏlĭ anu, Jò kò hlòlakò̆ Jî Spirito Tcahtĭ d́ŏ Jô zôpho amihmuhmu amikhŏkhŏ tòcò akho nu,

kî cè tòcò kò d́òdòlòkò̆ dè.

19Jè kè d́è̆lî̄hta dè acòklîcòhjè̆ d́ŏ Mò̄kho nu,

kî dè ahô̆agèlè d́ŏ Lākho nu,

dèthwi kî hmî, htĭkhu kî hmîkhu aklè̆ nu.

20Lumu gī khila

kî hlè̆ gē pĕhtakîkò̆ dèthwi,

dukhlŭkî B́ĭcè adòathe amunido do dole hnî̆ńò nu.

21Mèhwă d́ō, gajă bija ajohta B́ĭcè ami tòcò gô̄ hlô̆htakò̆,’ ad́ò do nu.

22“Ŏ jò khò̆ Israè̆lpho tòcò! Sòkhĕńebò̄ dèjî̄b́è ajo tòcò jo. Dèd́è̆lî̄hta ni thuŭthèè thĭ d́ŏ Jezŭ, Nazarè̆thpho b́è ila dècô̆thèlè̆ agè̄ d́è̆lî̄hta Kib́ĭcè mègè dècòklîcòhjè̆, dèbòdèba lŏcăcè tòcò nu. Thĭ thè̆ne thîhè̆gè, manè̄ aphî̆htagè d́ŏ thĭ kho thĭ klè̆ acè̆ nu. 23Acab́ô̆ Kib́ĭcè kŏhtakjala dòlò kî thîhè̆ hnè aè̆ abu, Cè b́è ilaphlòḿĭgè d́ŏ bija akî̆kkè tòcò acukhòbu nu, kî htalaglogè Cè d́ŏ Krusu alò. 24Barasă Kib́ĭcè b́awè̄htogegè Cè, Kib́ĭcè b́ăplè gòthògè Larrā adèothootha, manè̄ Cè tè b́è cŏglo hme Larrā acukhòbu ńò akhoacè̆ nu. 25Ab́èkja Cè nu Dăvid adèd́òdòlò ògè gōjo;

‘Ja tcahtî jî B́ĭcè ò thèjô̆ jò hlò̆mò̄,

Cò ò d́ŏ Ju cudèhtwè dòkhò̆ cab́ô̆htè je de gleglābò̄ ńò nu.

26Mègōnu d́ō, ja tha dèmè̆ thalōthalaigè,

kî Jî blî thaganāigè;

jè jo, Jî ḿî nòthò̆ phehî hnò̆nu,

jò gò̄ sòd́è̆ b́è d́ŏ dèsascĭi abu,

27manè̄ Nè dè lè̄ òda ja tha d́ŏ Larrā abu ńò acè̆ nu.

Ni gī ti ikò̆ Ni Bija Atcahtĭ dèbwè gō thŏ gô ô̆b́è ńò.

28Nè mèthîhè̆ htŏ jè Dèò aklèthòò̆.

Nè gè̄ mè pĕhtakò̆ jè kî dèthaganāi d́ŏ Ńò òkô ja kă acè̆ nu,’ ad́ògè do.

29“Thè̆buthè̆we tòcò, ibò̄ jò d́ò̆sa hlî̆htaphlò̆hta thĭ htè Wa Pa Patriăka Dăvid nu, zi thĭ hwă bija b́ŭlăgè cè nu, zu lūkho òwe tèpwè htô̆ dola khŏdini jo nu. 30Zî ḿî Prò̆fèt dèbwè akhoacè̆, Kib́ĭcè mèthîhè̆gè Cè htè d́ŏ Zè dèhôd́ă abu, Kib́ĭcè aḿăkhai cè d́ŏ Zo pho Zi li aklè̆ agā sańălăòb́èkò̆ d́ŏ Za na akho dèbwè, acab́ô̆ Cè nu. 31Dăvid tcahtî d́òdòlògè Kib́ĭcè adèmè akhoacè̆, cò d́ò̆sagè Jezŭ Krĭstu adèhtaboge dèthĭklè̆ awîakè̆, kî cò d́ò;

‘Cè tè b́è bāphlòmĭ d́ŏ Larrā abu ńò,

Zi neb́î̆cè to thŏ tô ô̆b́è ńò,’ nu.

32Jezŭ ajo dèbwè nu Kib́ĭcè b́awè̄htoge Cè kî wî ḿî lŏ akhathè̆thî tòcò nu. 33Cè b́è bè̄htajîgè d́ŏ Ca Pa Kib́ĭcè acudèhtwè dòkhò̆ kîd́ò̆ Zi nib́è Kib́ĭcè adèaḿăkhai agī nib́è Spirito Tcahtĭ akhoacè̆, Zò hlòlagè Spirito Tcahtĭ htè thĭ tcahtî kî thîhè̆ htŏ nu. 34Manè̄ Dăvid de gehta d́ŏ Mò̄kho ńò, ḿî cò d́òlagè ze ne gōjo;

‘B́ĭcè d́ògè Jî B́ĭcè;

Sańălăòbò̄ d́ŏ Ju cudèhtwè dòkhò̆,

35htô̆do Jè b́è̆lă Ne d́ĕd́òròkhè tòcò d́ŏ Na khajāla nu.’

36“Mègōnu d́ō, Israè̆lpho thèd́è̆thara gî̄ thîhè̆ ladîlase d́ò̆è htè Kib́ĭcè mèphî̆hta htŏ thĭ htalaglothĭgè Jezŭ htè Mèssĭah dèbwè nu.”

37Bija tòcò thîhè̆b́è dè ajo d́ō, mè acab́ô̆ dèdūphlò̆gè ca tha nu d́ō, cò d́ògè Petru kî bōhmubicè tòcò, “Thè̆buwe tòcò, wè gè̄ mèb́è danè̄?” cè d́è̆gè lōwa do.

38Ḿî Petru d́ò cè tòcò, “Bajalage thĭ ne, kî khabò̄ dèŭsab́ăhtĭ gŏ abwè d́ŏ Jezŭ Krĭstu ami abu nu cab́ô̆htè thĭ gī nib́èbò̄ thĭ dèkhòwè adèb́ăplè, kî thĭ gî̄ phînikò̆ Spirito Tcahtĭ. 39Manè̄ thĭ nib́è htŏ dèaḿăkhai thĭ nikhĭ kî thĭ pho thĭ li htè aòjîòzo tòcò kè̄ b́è jolekò̆ d́ŏ Kib́ĭcè thè̆ne ò nu,” cò d́ò lōwa tòcò do.

40Petru kha thè̆thî d́ŏ dèjî̄b́è alewe pwĕdimi abu kî ci ikhoiă lōwa, cò d́ò, “Mèhlô̆htabò̄ thĭ ne d́ŏ bija asèphròklè khŏnujo dôzô aò nu,” cò d́ò lōwa do. 41Bija aphîni zè dèjî̄b́è tòcò khagè dèŭsab́ăhtĭ d́ō, b́ĕnu dini lò, ab́èlè̄plo cè ògè thŏhtò. 42Alekă bija tòcò òhmeòglogè d́ŏ bōhmubicè tòcò adèthôdèthò̆ abu, kî òplosò̆jī, b́îpha toko, kî thub́uhtathèb́è̆hta jīplogè lōwa.

Ab́udè tòcò Adèòthôḿô̆

43Bija tòcò scisăj́ab́è zî̄ bōhmubicè tòcò, òè̆bwè htèdômô̄dahmă d́ŏ bōhmubicè tòcò mè dècòklîcòhjè̆ kî dèbòdèba d́ŏ Jerŭsalèm u bu akhoacè̆ lò. 44Ab́udè lŏcăcè òplosò̆jī lōwa kî mèploaplogè. 45Cè tòcò sè̆kè̆ hwă adî̄adè, zè lè̄lani tèpwè aè̆ tò ò ńò tòcò nu. 46Bija tòcò ladēplo lōwa d́ŏ Zarādo bu gŏ ani d́ŏ dèb́îpha toko abu nu. Ca a plo ò̆ plo mòmòmama òkî dèsalatha d́ŏ lōwa tòcò ahibu nu. 47Cè tòcò htăhtai Kib́ĭcè ahluată d́ŏ Zè dèb́èlò̄hmòb́è akhoacè̆ kî nib́è tèpwè bija adèb́èmēb́èhnè, b́èthob́ètha. Gŏ lumu ani nu Kib́ĭcè mè òèhtagè bija d́ŏ agī nib́è dèhlô̆htage tòcò nu.

موجودہ انتخاب:

Thodŏpho 2: GRNT21

سرخی

شئیر

کاپی

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

Geba Roman New Testament کے بارے میں مزید معلومات حاصل کریں

Thodŏpho 2

Thodŏpho 2
سے مشہور بائبلی آیات

بائبل:

Karen, Geba

ترجمہ: Geba Roman New Testament - GRNT21

Thodŏpho 2

Thodŏpho 2

Thodŏpho 2 سے مشہور بائبلی آیات

بائبل:

Karen, Geba

ترجمہ: Geba Roman New Testament - GRNT21

Thodŏpho 2

Thodŏpho 2
سے مشہور بائبلی آیات