Joon 9

Jesus mvə́ʼ sí wìr wo vé‑eè dzəən, a sì mfìr

1Jesus dù, e lòo kaarí, e yèn wír wùmòʼ, aá kù‑uù dzə̀ə́, a sì mfìr. 2Wón və́ lìme nèn dzə̀r shó jii, «Ŋgaà Yèʼey, lǒn wìr və̀ne dzə̀ a dzə̀ e wùn kiwo mo wú lò fo tàr wov wùn yè wov á?» 3Wù bìnèr jii, «Bó yòʼ dzə̀ ji lòné lò fo wìr və̀n, kìn fo tàr wov wùn yè wov. Vé‑eè dzə̀ə́, a sì mfìr bèn ji Nyùy fiʼ wìy dìn vitaáví və́ é wùn wó. 4Kí nén a dzə jii, vèsən kér fó a yiì lim ye Tàr wor wo wù‑uù tumen mo foon ji á wáa yiì, a ghán sí dzə̀ə́ sho. Ghán sí yíi mày moo ndzə ye yì loòn, e sàsìn, e sə̀n, é la wìr yòʼ dzəə yiì kinyo. 5Mo m dzə̀ə́ e ndzə fèn, m dzə̀ rán ye yí kaʼày wír veé ndzə.» 6Wù suúy bey, e nèn cù mentíy fo nsay, e tòvtí, e làr, e tsəə̀ e mfìr və̀y si, 7e sùúy sho jii, «Dù é kisə̀m ke á yoŋ ji Siloam, e sù sí yée fó.» A nsàv yìr yee Siloam rə̀n dzə̀ ji Lontum. Wù dù, e sù, a kfən e mvə̀mlaʼ, a wù sí yén virə́ʼ. 8Wír vee wùn kiliŋ, wùn à ve vé‑eè sí yén, a wù rə́si dzə́, lón viloòneé nèn a ghaynín jii, bó və̀n sà yòʼ dzə̀ mfìr wo wù‑uù rə́si dzə́ fèn, lón vifá a? 9Aámóʼó suuy jii, dzə̀ á wun. Aámóʼó kinèn ji wù shwìnín a shwínmén. Wìr və̀y yú bey, e bìnsí jii, «Dzə̀ mo woo shó.» 10Á nèn dzə̀r shó jii, «À ghàn é le, e bó a yen virə́ʼ lèn?» 11Wù bìnèr jii, «Wìr wo á yoŋ ji Jesus kì tòvtí nsay, e tsəə̀ e mǒ si, e sùúy ji m du, e sù e kisə̀m ke á yoŋ ji Siloam. Mo m duùn, e sù, e nèn a yen virə́ʼ.» 12Á nèn dzə̀r shó jii, «Wìr woo shó bèé?» Wù bìnèr jii, «Bó m yòʼ kì fo wù dzəə̀n lèn.»

Vé wòŋe kinèn vitaáví ve Nyùy fó e Jesus

13Á nèn lò, e lì wír və̀y, e dù, e yèn wír veé mbìv *Farasi sho. 14A Jesus kì tòvtí nsay, e mvə̀ʼ sí wìr və̀y a dzə̀ é *kishiíy ké bam. 15Wír vee Farasi vìyi nèn kfə̀n dù, a dzər e wìr və̀y mo wù kì ghanen, e bó a yen virə́ʼ. Wù suúy jii, «Jesus kì tsəə̀ nsay e mǒ si, m dú, e sù, e nèn a yen virə́ʼ.» 16Wír Farasi vìy ámóʼó nèn sàyín jii, «Bó Jesus və̀n yòʼ dzə̀ wír wo wù lo ntum Nyùy gheéy, wù shóʼor nsər kishìíy ké bam.» Aámóʼó dzə́r kév jii, «A dzə̀ wír, a bó Nyùy yòʼ kì wun, wù wàa yiì viŋgaʼnìn ve vinyò vee ben à?» Á bìʼ bèy, e bvəə̀rí. 17Á kfən lò, e dzə̀r e wìr və̀y jii, «Wò wo wù mvə̀ʼə̀n a dzə̀ sí yé, à yèn ké, a dzə̀ wír woó le?» Wù bìnèr jii, «M yén ji dzə̀ *ŋgaà ntum Nyùy.»

18Atǎr wír veé Juda vìyi wáa dzətí sho bèy, e làa yòʼ fə̀m a biimé ji wù‑uù dzə̀ rú á mfìr, e bóo kfə̀n a yen virə́ʼ. Á nèn lò, e jàŋ tàr wov wùn yè wov, e dzə̀r aáwune, e bóo biimé. 19A vé‑eè dzə́ti jii, «Və̀n dzə̀ rú wán won wo á yoŋ ji vé‑eè dzəə, a sì mfìr à? Kí ghàn é le, bo wù wáa yen virə́ʼ lèn?» 20Á bìnèr jii, «Vèr kì ji dzə̀ wán wor féyì feyì, e kfə̀n kìíy ji vèr‑iì dzəə, a sì mfìr. 21Yii bèy, a bó vèr yoʼ kìíy mo kí ghanen, bo wù wáa yen virə́ʼ lèn, a bó vèr yòʼ kì sá wír wo wù mvə̀ʼə̀n sí rə́. Vèn wáa dzər a dzə̀ shó, sí rəə́ ràn ne, dzə̀ wù bìnèr fo wùn kinyò.» 22Aá ndzə́v lám bey, a vé‑eè fan a dzə̀ vé wòŋe, bìʼ fo vé‑eè sìysìn ne jii, a wìr bìnsí ji Jesus dzə̀ *Mfə̀ə́r wo Nyùy‑iì kàʼàn, á jùm á ŋgaàŋ fo kintatì keé ŋgày bùnrì. 23Á fo kí‑iì loòn, é bo tàr à wìr və̀y wùn yè wov wáa suúy ji sí wané ràn ne, á wáa dzər a dzə̀ á sho.

24Vé wòŋe kfən lò, e jàŋ wír wo yì‑iì siìn mfìr woo shooy fo akàŋ vee abaà, a suúy sho jii, «Lìʼ yír Nyùyi, e sùúy kinyo ke ru kí. Vèr kì féyì ji Jesus və̀n dzə̀ á wír wo bi.» 25Wù nèn bìnèr jii, «Kìn dzə̀ wír wo bi, bo bó yòʼ dzə̀ m kìíy. Kém ke m kiìn kí dzə̀ jii, mò‑oò dzə̀ mfìr, a m sí yén virə́ʼ lèn.» 26Á kfə́n a dzətí sho jii, «Wù kì yèe e wò, e bóo mvə̀ʼ sí yé?» 27Wù bìnèr jii, «M kì sí suuy, la vèn yòʼ a tàʼ ji á yú. Vèn kfə̀n taʼ, e yu lèn, e yèe le? Vèn taʼ a jùmrì sa kinyo ke wìr woo shooy à?» 28Á nèn kèʼ, a kuùrì kuùrìn jii, «Kù biíme wò kinyo ke wìr woo shooy. Vèr tíy kér a dzə̀ vèr à Mooser. 29Vèr kì jii, Nyùy‑iì lo sùŋnín wùn Mooser, yii bèy, fo ké wìr və̀n ki, vèr yòʼ kì fo wù loòn.» 30Wìr və̀y nèn sùúy jii, «Kinyo kìn ki tárir mo féyì. Vèn suuy ji bó vèn yòʼ kì fo wìr və̀n loòn, a wù mvə́ʼ ne sí yém, 31a vèsən kì kijuŋ ji bó Nyùy yòʼ yii yuúri kinyo ke wìr wo bi, wù kù yii yuúri kinyo a dzə̀ ké wìr wo wù ghvə́m wun, yii mo wù taʼà. 32Kèʼ mo ndzə‑əə̀ kèʼèn, bó á yòʼ‑oò yù ne ji wìr kì mvə̀ʼ sí wìr wo vé‑eè dzəən, a sì mfìr. 33A wìr və̀n kì bùŋ fó wìr Nyùy, bo bó yòʼ dzə̀ wù yiì kinyo kee ben.» 34Á nèn a kuùrì kuùrìn jii, «À dzə́, a vé‑eè dzə̀ə́ wò e kikun ké lòn kí, aà taʼ ji à yéʼéy ver a?» Á nèn jùm fo kintatì keé ŋgày bùnrì.

Wír wo dzəə̀n mfìr fo Nyùy mbìv

35Jesus yú kinyo ke kí kooyin, e nèn tàʼ wír və̀y, e dzə̀r shó jii, «À wày ne shilív e wìr wo yírí dzəə̀n *Wanwìr wùn a?» 36Wù bìnèr jii, «Taàtá, ku dìn ŋgaàŋ, é m wáy shilív é wùn wó.» 37Jesus bìnèr jii, «À yèn ne ŋgaàŋ, a súŋnin vèn ŋgaàŋ lèn.» 38Wù nèn yòŋ jii, «Tàr, bo m biìmé ne,» e tsə̀m é si wo, a fo ghvə́m sho. 39Jesus lò, e sùúy jii, «M wìy e ndzə fèn ji m sáyrí wíri, é wír ve dzəə̀n amfìri wáa yen virə́ʼ, é ve á kwaʼ ji á yén virə́ʼə́ kfə́n ji amfìr.» 40Wír veé mbìv Farasi ámóʼó wáa tiy e Jesus ghaŋ. Á yú bey, e sàyín jii, «À taʼ, a yòŋ ver ji amfìr à?» 41Wù bìnèr jii, «A vèn kì dzə̀ amfìr, bo bó á yòʼ kì kér njò. Mo vèn kù táv tavín ji vèn yén virə́ʼ, bo njò yen kù dzə̀ə́ e vèn.»

موجودہ انتخاب:

Joon 9: LNB

سرخی

شئیر

کاپی