MARKU 8

Yesu Byu Byid Taung Re Zho" Ra" Khyo

(Mathe 15.32-39)

1Ai: thao mataung" myao" re byu phung: mo" zang dam: zang" phaung: na: ako". Yao: bam zo: nae" zo:ve maqo" gelao"- Yesu wa yao" mho"zo: qere yao: jhao" khai: yu mung: 2Ce: mo, byu qe ngo we' daga" na: ru sam ba ngad va". Ana" yao: bam zo:ve maqo" lo ge, ngad: ra"- amung: ngo ce: mo, byu qere nhag' khyag' ra". 3Yao: bam re vae: moe; zang yham khyo phao nhao: ke' ngad: re yao: bam khyole; mae moe; myad genae"- pe"mung:ga"re yao: bam mae" damyo" wa mug: va: mae" li" mo, ngad: ako" ga: yao: bam re ta" ra".

4Alao" yao" mho"zo: qe wa yao: re tau: mung:- ceru: din"pyad' yo mae mo, byu alhab' re zho: nae" qhi" zo:ve khai: mae" qo" nae" i? ga: ta" ako".

5Yesu wa yao: bam re- mug khonho" khai" qo" ko" i? ga: myid' ra". Yao: bam wa- mug nhad' khai" qo" ga: tau" ako".

6Yesu wa mo, byu qere myid gaung mae zaung: jo, nae" qhid' mae" amyin" byid' ra". Ai: mug nhad' khai" re yu: yu mung: Mao"So: jeju re bin: caung: lao" khyoe' phai" mung: mo, byu qere gae byid: nae" qhid' mae" yao" Mho" Zo: qere: byid' ke' ra". mho"zo: qe wa mo, byu qere gae byid' ako". 7Amung: yao: bam wa ngo: nau" re: dajhid' zo: qo" ko" ra". Yesu wa Mao"So re jeju bin: caung: lao" ngo rere: mo, byu qere gae byid: nae" qhid' mae" yao" mho"zo: qere ta" ra". 8Yaug khao: ngo" nyang" za: gyi: sho' qo" zo" ako". mho"zo: qe wa zo" tang" to" ra" aje, abai" jham nhad' gyan byang" sho' qo" gaug: zhang: yu: ako". 9Mug zo" ra" mo, byu byid taung ko ngad: ako". Ai: thao Yesu wa mo, byu qere aitau mae" phao nhao: ke' ra". 10Ailao" jao" yao" mho"zo: qe we' daga" lha khug khyo ye: vao: zaung mung:- Dalmanutha mung" khyo ye" lo" ra".

Pharishe Qe Ve, Lho Qhu" Byid: Nae" Mho' Ko" Ra" Khyo

(Mathe 16.1-4)

11Pharishe qe damyo" Yesu jhao" li" mung: yao: we' li" jho" ngag: ako". Yao: re jham" qu" nug: ra" khyo" Mao"So yao: re o ngaui: rure sagse: qhu" nae" qhid' mae" ve, lho dalam: kad' qhu" la,- ga: yao: re mho' ako". 12Yesu wa so' mo" she mung:- ceqae" mae" byu qe pe"mung: ve, lho re mho' ko" i? Ngo naonhaung" re ta" geli"- cebam re airu" ra" ve, lho kad' qhu" nae" mangad:- ga: ta" ra".

13Alao" Yesu wa yao: bam re nha: to: co' mung: lha khug khyo dam: do; zaung yang: tham: thoete' khyo gau" de; ye" lo" ra".

Herod we' Pharishe Qe: Man"

(Mathe 16.5-12)

14Mho"zo: qe wa mug vin nae" to" myhid' pye' ko" ra". Lha khug mae mug dakhai" za: bo: ra". 15Alao" Yesu wa yao: bam re Pharishe qe: man" we' Herod nho: man" re lha" yang: jao" ge, ga: ta" peim" ra".

16Mho"zo: qe wa Yao: ceru: ta" ru wa ngonhaung" mug mavin yang: ta" ru ngad: ra" ga: yao: cao: yao: jho" ta" na: ako".

17Yao: bam airu: jho" ta" na: rure Yesu ba lao" yao: wa yao: bam re- Naonhaung" pe"mung: mug mavin: ra" khyo re jho" ta" na ko" i? Ana" joe" sho' maba: gyo: shi:ko" i? Naonhaung" ai: qhi" myid: vhao: na shiko" i? 18Naonhaung" myo,jid' de, geqere: mamyao ge i? Naonhaung" nokhye' de, geqere: magyo: ge i? 19Ngo wa byu ngo" taung re mug ngo" khai" za: cug' phai" zho" rure naonhaung" mabeim: ge i? Zo" tang" ra" aje, aman" jham khonho" gyan byang" sho' naonhaung" gaug: zhang: yu ko" i? ga: myid' ra"- Yao: bam wa- daxe: shid' gyan ngad:- ga: tau" ako".

20Ai mae" byu byid taung re mug nhad' khai" za: cug' phai" zho" ra" au: zo" tang" ra" aje, aman" jham khonho" gyan byang" sho' naonhaung" gaug: zhang" yu ko" i? ga: myid' ra".

Yao: bam wa- nhad' gyan ga: tau" ako".

21Alao" Yesu wa yao: bam re- Naonhaung" ana" joe" sho' pe"mung: maba: gyo: ge i? ga: ta" ra".

Betsaida Mae" Myo, Jid Dayaug Re Gai Byid' Ra" Khyo

22Yesu we' yao" mho"zo: qe wa Betsaida vogaung: khyo joe" ye" ako". Byu damyo" wa myo, jid dayaug re Yesu jhao" jhui" li" mung: aiyaug re tin: byid: nae" qhid' mae" yao: re mho' ako". 23Yesu wa myo, jid yaug re lo; yang she mung: voyae khyo jhui" thug' lo" ra". Yao" myo,jid' mae khata: bin: tag' byid: lao" Yesu wa aiyaug: dao mae lo, kai: mung:- Daja: ja: re nao myao: i? ga: yao: re myid' ra".

24Ailao" myo, jid wa tau: mung:- Byu jham re ngo myao:- ngadqere: yao: bam wa sag' gae jham ru" ru su" lhau: ako"- ga: ta" ra".

25Yesu wa aiyaug: myo,jid' dao mae yao" lo, dam: kai: byid' ra"- celhang re yao: wa qam: ke' yang: qu" ke' ra". Ailao" jao" myo, dam: myao: lo mung: ja: khao: ngo" re qang: qang: za: myao: ra". 26Alao" Yesu wa yao: re- vogaung: khug khyo davao lo" ga: amyin" byid: mung: yao" yham khyo phao nhao: ke' ra".

Yesu Khag' Ngad: Ru Re Petru Ta" Thug' Ra" Khyo

(Mathe 16.13-20; Luka 9.18-21)

27Ai: thao re Yesu we' yao" mho"zo: qe wa Kesarea Philipi vogaung: jham khyo ye" lo" ako". Khyole; mae yao" mho"zo: qere- Su bam wa ngore khag' ngad: ra" ga: ta" ako" i? ga: myid' ra".

28Alao" yao: bam wa yao: re- Damyo" wa qid nyhab' byid: yaug Yohan ngad: ra" ga:- damyo" wa Elia ngad: ra"- amung: damyo" wa lapa qemae" dayaug ngad: ra" ga: ta" na: ako"- ga: tau" ako".

29Yesu wa yao" mho"zo: qere- aire naonhaung" wa ngore khag' ngad: ra" ein: jho ko" i? ga: myid' ra".

Ailao" Petru wa tau: mung:- Nao wa Meshia ngad: ra"- ga: ta" ra".

30Yesu wa yao" mho"zo: qere- ngo khag' ngad: ga" rure naonhaung" khag' rere: data" kyo: ge,- ga: zug' nhao: ra".

Yesu Yao: Shid Kham: Nae" Ru We' Khyag' Qhui Kham Zo: Nae" Khyo Re Ta" kyo" Ru

(Mathe 16.21-28; Luka 9.22-27)

31Yesu wa yao" mho"zo: qere- Byu: Yao: Zo: wa khyag' qhui: ru myo: sho' ja: re kham zo: ca" nae"- zug: ade, qe- khinjaung qi: qe we' Tung" pho" qeyang ha: pye' ru qhug' ru we' se' pye' ru qhug' nae". Ngadqere: sam ba lao" dam: daui: to" li" nae"- ga: mho" shid' ra". 32Yesu wa cekhyo re de: de: za: yao: bam re ta" kyo" ra". Aimung: Petru wa Yesu re gatau khyo jhui" ye: mung: qobo vhin: ra" khyo" qeim: ra". 33Yesu wa mho"zo: qere lhang: qu" mung: Petru re- Satan we" ngo mae" phao: lo" wa,- nao wa Mao"So shad' khyo" mamyid- byu: shad' khyo" za: myid: ra"- ga: qeim: ra".

34Ai: thao Yesu wa mho"zo: qere we' mo, byu qere yao: jhao" khai: yu mung: yao: bam re- Nga" thao cao" nug yaug wa yao: yao" qhid' mae" ha: pye' yang: yao" pyao: zang vo, mung: nga" thao cao" vashao:- 35Pe"mung:ga"re yao: yao" kao so' re khyad' yu nug: ra" yaug khag' ngadqere: kao so' jeim: nae"- nga" mathao mae we' Ngaui Bau" Lau Dao" mathao: yang kao so' jeim: yaug kam" wa yao" kao so' khyad' yu: ru qhug' nae". 36Alao" byu wa mug: myid geim" alhab' re qo" sang: yu ngadqere: yao: yao" kao so' jeim" byaug: ngad: re wa pe" akyu" bo: i? 37Byu wa yao" kao so' re pe" ja" yang tha" mung: dam: qo" tug' yu nae" i? 38Pe"mung:ga"re Mao"So re malam: ru we' makhyang: mashab: ra" ceqae" mae ngore we' nga" mho" dao: re qho' ra" yaug khag' re ngadqere: Byu: Yao: Zo: wa yao: pho" phungbao we' gyang" lho" ra" mug: lagyo: jham we' mung: daga" joe" li" ra" au: re Byu: Yao: Zo: re: yao: re qho' pye' nae"- ga: ta" ra".

موجودہ انتخاب:

MARKU 8: LHCL

سرخی

شئیر

کاپی