मत्ती 18
18
स्यिहङगामकी क्याहल्सीला थाम्ज्यी म़ेदी छ्यिम्बु सु यिहम्बा?
(मर्क ९:३३-३७; लूक ९:४६-४८)
1ओहजे काहङला स्याहप्च्यीया़ ओहङदी येशूला टी़हसीन, “किन्ज्योगी क्याहल्सीला थाम्ज्यी म़ेदी छ्यिम्बु सु यिहम्बा?”#लूक २२:२४ 2ओहले येशूगी पेहजा च्यी़ला क़े क्याहप नाङदी खुङया़गी पाहरक्यीला लाहङ च्य़ूदी 3सुङ नाङसीन, “तेहम्बाराङ ङाह ख्याया़ला माएँ, राहङगी सेम ग्युर्ती दि पेहजा ल़ेहमु मेहयोङसीमाना ख्याया़ च्यि पेहतीॱआङ स्यिहङगामकी क्याहल्सीला स्य़ूह ङ्युहङज्ये म़ेह।#मर्क १०:१५; लूक १८:१७ 4दि पेहजा ल़ेहमुराङ ङ्येम्ज्युङ ओहङगे मिहराङ स्यिहङगामकी क्याहल्सीला थाम्ज्यी म़ेदी चा़ छ्युम्बु ओहङगे यिहम्बा। 5ओहले ङाहगी मिहनला दि ल़ेहमु पेहजाला फेप स्युहगेन्दीगी ङाहलाराङ फेप स्युहएँ।”
तिहक्पाला छ्यि च्य़ूगेन्गी से़हया़
(मर्क ९:४२-४८; लूक १७:१-२)
6 “यिहॱनाङ सुगी ङाह थो़ला यिह-छ्य़े पेहकेन दि फेमा पेहजाया़ला तिहक्पाला छ्यि च्य़ूगे, खोलानी ज्यिङबाला ला़हवोर च्याङदी तिहङ रिहङबु छो-क्याहम्जोला क्युर चाहङना या़हबु ओहङज्ये येहकें। 7काहजे छा़ तुहवा दि जाम्बुलीङ! च्यिबेमाना दि जाम्बुलीङला मिहया़ला तिहक्पाला छ्यि च्य़ूगेन्गी से़हया़नी माहङबुराङ येह। दि ल़ेहमु तिहक्पाला छ्यि च्य़ूगेन्गी से़हया़नी ओहङॱराङ ओहङगे, यिहॱनाङ ओ़ह मिहला का़हन्दीगी तिहक्पाला छ्यि च्य़ूगे खोला छा़ तुहवा।”
8 “का़हलेॱआङ ख्येगी लाहक्पा क्यिनी काङबागी ख्येला तिहक्पाला छ्यि च्यू़सीमाना ओ़हदीला तुप्ते क्युर चोहङ। लाहक्पा काङबा ङ्यिकाराङ थो़दी नाहमॱआङ मिहस्यीएँगी मेहला छ्यिकें म़ेदीनी लाहक्पा डुँडे दाङ काङबा कुच्या पेहती नाहमॱआङ मिहस्यीएँगी मिहली ज़ाङबु थोप्केनॱराङ काहवा। #
मत्ती ५:३०
9ओहले ओ़ह ल़ेहमुराङ ख्येगी मी़गी ख्येला तिहक्पाला छ्यि च्यू़सीमाना ओ़हदीलाङ तेन्दी क्युर चोहङ। मी़ ङ्यी़ थो़दी ङ्याल्वाकी मेहला छ्यिकें म़ेदीनी स्याहर्ना पेहती नाहमॱआङ मिहस्यीएँगी मिहली ज़ाङबु थोप्केनॱराङ काहवा यिहम्बा।”#मत्ती ५:२९
तोरक्यो ल़ूहगी पे
(लूक १५:३-७)
10 “जेम्बु पेहतोङ, दि फेमा पेहजाया़ का़हन्दीॱलाङ ख्याया़गी ङ्येन्ज्येन माहबे। ङाह ख्याया़ला माएँ, खुङया़ला ताएँगी स्यिहङगामकी स्याहप्च्यीया़ स्यिहङगामला ज़्य़ू नाङगे ङाहगी किन्ज्यो याहपकी दिनलाराङ येह। #
लूक १९:१०
11[च्यिबेमाना मिहगी स़ेबु तोरक्योया़ला थार च्य़ूज्येला ओहङग्यो यिहम्बा।”]#१८:११ काहजे ग्रीक बाइबलला दि आङ-टा़हङ म़ेह।
12 “ख्याया़गी नोम्साङ च्यि येहबा? ल़ूह क्याह च्यी़ येहकें मिहगी ल़ूह च्यी़ तोर्सीमाना खोगी च्यि पेहटो? खोगी लेहमेन क्याह च्यी़ला च्यी़ छ्याक्पा ल़ूहया़ला ओ़ह पाङगाला क्युर ज़्या़दी तोरक्यो ल़ूहला छोल मेहन्डोएँ ले? 13का़हलेॱआङ खोगी ओ़ह ल़ूहला च्य़ेह सिहन्सीमाना, तेहम्बाराङ ङाह ख्याया़ला माएँ, ओ़ह माहर्तोपागी क्याह च्यी़ला च्यी़ छ्याक्पा ल़ूहला म़ेदीॱआङ ओ़ह च्य़ेह सिहन्ग्योगी ल़ूह च्यी़गी तेहन्दाला खो ज्यिबुराङ क़ेहनाङ पेहच्ये येह। 14ओ़ह ल़ेहमुराङ पेहती स्यिहङगामला ज़्य़ू नाङगेन ख्याया़गी किन्ज्यो याहपगी दि फेमाया़ नाहङला सुज्यीॱआङ माहतोर्च्यु म़ेदी थु-सेम जे नाङगे।”
तिहक्पा पेहकेन्गी नो़ह
(लूक १७:३)
15 “का़हलेॱआङ ख्येगी नो़हगी ख्येला टाह पेहती तिहक्पा पेहक्यो येहसीमानानी खोला राहङ च्यी़राङ काहल्दी लोप्ताम क्याहप्तोङ। खोगी ख्येगी ताम ङ्यिहन्सीमाना, येहपाराङ ख्येगी नो़हगी सेम ग्युर्ती ख्या पिन ङ्यी़गी ता़हनाङ-ताहम्जी आदा नो़हदी ल़ेहमुराङ डोज्ये येह। #
लूक १७:३
16यिहॱनाङ खोगी ख्येगी ताम मिहङ्यीहन्सीमाना लेहमेन मेहन्दा च्यी़ क्यिनी मेहन्दा ङ्यी़ ङ्याम्बुराङ काहल्दी खोला लोप्ताम क्याहप्तोङ च्यिबेमाना सुङरापला प्रुहक्यो ल़ेहमुराङ थाम्ज्यी ठू़स्यीया़ ताहक्स्यार पेहच्येला मेहन्दा ङ्यी़ क्यिनी मेहन्दा सुम थु मिहया़ पाङबु ज़्या़ज्येला क़े क्याहप कोहएँ।#व्य १९:१५ 17ओहजे पेहतीॱआङ खोगी ताम मिहङ्यीहन्सीमाना छेन्छोकला काहल्दी ख्येगी ताम थाम्ज्यी प्रा साल तेर ओहले खुङगी तामॱआङ खोगी मिहङ्यीहन्सीमाना खोला किन्ज्योला ङोह मे़हस्येएँगी मिहया़ दाङ घूस लेहन्गेन्गी ठाल तुहएँगी तिहक्च्येम्बा मिहया़ ल़ेहमुराङ यिहन म़ेदी सेमला ने़दोङ।”
18 “तेहम्बाराङ, ङाह ख्याया़ला माएँ, ख्याया़गी दि जाम्बुलीङला च्यि ताहम्ग्ये, ओ़ह स्यिहङगामलाॱआङ ताहम्ज्ये येह। ओहले ख्याया़गी दि जाम्बुलीङला च्यि खा फ़ेगे, ओ़ह स्यिहङगामलाॱआङ खा फ़ेज्ये येह। #
मत्ती १६:१९; यूह २०:२३ 19ओहले तेहम्बाराङ ङाह ख्याया़ला येहपाराङ माएँ, दि जाम्बुलीङला ख्या ङ्यी़गी च्यि लाङगे, ओ़हदी डी़दी लाङसीमाना स्यिहङगामला ज़्य़ू नाङगेन्गी ख्याया़गी किन्ज्यो याहपगी ख्याया़ला ओ़ह नाङज्ये येह 20च्यिबेमाना, ङाह मिहनला का़हला मेहन्दा ङ्यी़, सुम जोम्गे ङाह ख्याया़गी पाहरक्यीला ओहङज्ये येह।”
ल़े मेहताङगे योक्पुकी पे
(लूक १७:४)
21ओहले पत्रुसगी ओहङदी येशूला टी़हसीन, “चो़वो, ङाहगी नो़हगी ङाहला टाह पेहती तिहक्पा पेहतीराङ तेहसीमाना ङाहगी खोला लेहमा काहजे थु ल़े ताङ कोहएँ यिहम्बा? लेहमा तिहन थु?”#लूक १७:३,४
22येशूगी सुङ नाङसीन, “लेहमा तिहन थु च्यी़राङ मिहम्बा, यिहॱनाङ लेहमा तिहन-च्यु थेङ तिहन थु!#उत ४:२४#१८:२२ तिहन-च्यु थेङ तिहन थु : दि माक्योती काहजे तिहक्पा पेहॱनाङ ओहजेराङ कोहङदा तेर्तोङ म़ेदी माक्यो यिहम्बा। 23ओ़ह सोङबे किन्ज्योगी क्याहल्सीनी क्याहल्बु च्यी़गी राहङगी योक्पु ङ्याम्बु चिदुङ लेहन्ग्यो ल़ेहमुराङ यिहम्बा। 24ओ़ह क्याहल्बुगी राहङगी चिदुङ लेहन्ज्ये छोल्गेमु सेर-टाङ तोङरा च्युजे पेहलेन सेहक्योगी योक्पु च्यी़ खोसाला ख्योङसीन। 25यिहॱनाङ ओ़ह मिह ङ्याम्बु पेहलेन च्याल्ज्येला दाङज्ये थु टाङगा म़ेहबा येहकें। ओ़ह सोङबे ओ़ह क्याहल्बुगी ‘खोला का़ह येहकेन्दी क्युह नोहर, पी़हमी, पुह-पोहमो दाङ राहङगी राहङलाराङ चोङदी पेहलेन च्याल्दोङ’ म़ेदी का नाङसीन। 26ओ़ह योक्पुगी क्याहल्बुगी स्याहपला खेप्चु क्याहप्ती मासीन, ‘ताहक्पु लाह, ङ्यिहमा तोबाज्यी क़ूह नाङदोङ, ङाह राहङगी थाम्ज्यी पेहलेन च्याल तेर्कें।’ 27क्याहल्बुला निङ च्येहसीन ओहले क्याहल्बुगी ओ़ह योक्पुला खोगी पेहलेन ल़े ताङदे खोॱलाङ ताङ चाहङसीन।”
28 “ओहले ओ़ह योक्पु काहल्सीन ओहले खोगी राहङ ङ्याम्बुराङ ल़ेह पेहकेन्गी लेहमेन रो़ह च्यी़ला थ़ूसीन। ओ़ह रो़हगी खोसाले ङुल-टाङ क्याह च्यी़ पेहलेन लेहन्दी येहकें। खोगी फिर छ्योङ काहल्दी रो़हगी ज्यिङबाला च्यिर्ते मासीन, ‘ल़ू, ख्येगी साहक्योगी पेहलेन नाहरेराङ च्याल्दोङ!’ 29ओ़ह रो़हदीगी खोगी काङबाला खेप्चु क्याहप्ती मासीन, ‘ङ्यिहमा तोबाज्यी क़ूह नाङदोङ, ङाह राहङगी पेहलेन थाम्ज्यीराङ च्याल तेर्कें।’ 30यिहॱनाङ खोगी माहङ्यीहन। पेहलेन माहच्याल थु खोगी रो़हला चोन-खाङला ल़ू तेर्सीन।”
31 “ओ़ह मिह ङ्यी़ ङ्याम्बुराङ ल़ेह पेहकेन्गी लेहमेन रो़हया़गी दि थाम्ज्यीराङ थोङदी येहकें। खुङया़ला ज्यिबुराङ तुहक्पु ऩेसीन। खुङया़गी काहल्दी क्याहल्बुला का़ह येहकेन्गी ताम थाम्ज्यी स्ये तेर्सीन। 32ओहले क्याहल्बुगी ओ़ह योक्पुला क़े क्याहप्ती मासीन, ‘ए मिह ङ्येहम्बा! ख्येगी ताम थे़दी ङाहगी ख्येला पेहलेन थाम्ज्यीराङ ल़े ताङ तेर्ती येहकें। 33ङाहगी ख्येला निङज्यी पेहक्यो ल़ेहमुराङ ख्येगीॱआङ राहङ ङ्याम्बुराङ ल़ेह पेहकेन्गी रो़हला निङज्यी पेह मेहकोहएँ ले?’ 34ओहले क्याहल्बु स्यिहताङकी मेहॱराङ पाहर्ती खोगी टाङगा रे़ह-रे़ह माहच्याल थु खोला चोन-खाङला लू़दी तुहङदा तेर्तोङ म़ेदी का तेर्सीन।”
35ओ़ह तिङले येशूगी स्याहप्च्यीया़ला सुङ नाङसीन, “ख्याया़गी राहङगी सेम तिहङ यिहन्ज्युराङ राहङगी आदा-नो़हया़ला ल़े मेहताङसीमानानी स्यिहङगामला ज़्य़ू नाङगे ङाहगी किन्ज्योगीॱआङ ख्याया़ला ओ़ह ल़ेहमुराङ जे नाङज्ये येह।”
موجودہ انتخاب:
मत्ती 18: HYLM
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023 (Active), Wycliffe Bible Translators, Inc. All rights reserved.
