Yʉanɨ 9
9
Yeso u꞉hiiso mombi ngia ambikinye na
1Ati ngia Yeso i꞉nye‑ɔɔ kʉɓaa anɨngbaa, ambʉna mombi mʉngana ngia ambikinye na kʉʉngwa nʉtanɨa yangɔ. 2Kija ɓakpataka ngiɓangɔ ɓa꞉muɓukuo ɓɔ: « Mʉpananakɨa, jʉtanɨ mombi ngia ambakana kʉʉngwa nʉtanɨa yangɔ? Ajʉ ya aka ekoo ɓʉɓɨɓɨ ɓangɔ makʉɔngɔ, gʉ ɓɔ iɓa ɓʉ ɔɔ ɨsɛ nʉ inye? »
3Yeso ambutisio ɓɔ: « Mombi ngiakɛ ambakana, chʉkɔmʉ jʉ a꞉kyɨa ɓʉɓɨɓɨ gʉ ɓɔ jʉ ɔɔ ɨsɛ nʉ inye ɓa꞉kyɨa ɓʉɓɨɓɨ. Ɨkyɛmɨngana, a꞉nʉtanɨa ɓwanɨ tʉkʉ aka ekoo ngia ɓɔ kuu ngia yɨ Asʉɓɨɨ yɨpananɨa 'upi akʉ ɛyɔ. 4Kʉkwanana kʉkyɨa kuu yɨ mombi ngia a꞉natʉma ati ngia ɓisi ɓa zʉ‑ɔɔ kʉ ɓʉyɛ, jʉ nuɓutu akʉka aka mombi ambʉkʉkwanana‑ɔɔ kʉkyɨa kuu. 5Ɛmɛ ma wanga wʉ ɨtaka, ati ngia ma‑zʉ‑ɔɔ kʉ ya akʉ ɨtaka. » 6Iya Yeso a꞉pipo yaka moni ngikʉnanɨ, ambutoko mukoi akɛsɨ, ambukukpolo nʉ ɨtaka, ambʉɗɨa mombi ngiinanɨ ambikinye na akʉ mesu. 7Kija a꞉musigio ɓɔ: « Sa kʉjaɓana mesu akʉ yapuu yɨ Siloamu. » Inyi yɨ ino ngiinanɨ ya ɓɔ: « Mombi ngia ɓa꞉mʉtʉma. » Kʉ ɓwanɨ, mombi ngiinanɨ ambikinye ambʉsa kʉjaɓana mesu, ambʉtʉa inyeni kʉna tii tʉkʉ ɓʉ ngbɛlɛ ngbɛlɛ.
8Ɓombi ngiɓa ɓa꞉nabanakɨa naɓɔ nʉ ɓombi ngiɓa ɓi꞉nye mʉna aka i꞉nye kyɨa‑ɔɔ kʉtakanaka ɓambusigo ɓɔ: « Ajʉ chʉkɔmʉ‑zʉ mombi ngia i꞉nye kyɨa ɓuwei kʉtakanaka iyakɛ ɓiɛ? » 9Ɓombi ngana ngana ati ʉndaɓʉ ɓambusigo ɓɔ: « Tʉkʉ ɛyɔ. ». Ɓɔmɔ ɓi꞉nye kusigo ɓɔ: « Chʉkɔɔ, chʉkɔmʉ ɛyɔ, ɓa꞉zɨana nayɔ. »
Ɨkyɛmɨngana, ɛyɔ makʉɔngɔ ambusigo ɓɔ: « Tʉkʉ ɛmɛ iinanɨ. » 10Ɓambumukuo ɓata ɓɔ: « Mesu ngikʉsɔɔ kʉ꞉gananɨa‑zʉ ɨkyɨkyɨɓʉmʉ tanɨ? » 11Ambuɓutisio ɓɔ: « Mombi ngia ʉnʉ ɓɔ Yeso u꞉kpolo tʉkʉ 'ukpondo ambʉnaɗɨa akʉ mesu ngikʉsɛmɛ, kija u꞉nasigio ɓɔ mʉsa kʉjaɓana mesu akʉ yapuu yɨ Siloamu. Mambʉsa, mambʉjaɓana, kija mʉ꞉faniso kʉna. » 12Ɓambumuɓukuo ɓata ɓɔ: « Mombi ngiinanɨ a ti‑zʉ gbanɨ? » Ambuɓutisio ɓɔ: « Mambʉkʉmbɨa ɛmɛ. »
Ɓafalisayɔ ɓakʉkpɨngba mombi ngia mesu ka꞉mʉgananɨa
13Ɓambʉka nʉ mombi ngia mesu ka꞉mʉgananɨa apɛɛ ʉ Ɓafalisayɔ. 14Jʉ Yeso a꞉kpolo 'ukpondo nʉ kuhiiso mesu kʉ mombi ngia ambikinye na akʉ ɓisi ɓʉ humuo ngiɓa ɓʉ Ɓayuda. 15Kʉ ɓwanɨ, Ɓafalisayɔ ɓambumuɓukuo ɓɔ u꞉faniso kʉna ɨkyɨkyɨɓʉmʉ tanɨ. Kija a꞉ɓʉɓɨa ɓɔ: « Ʉnaɗɨa 'ukpondo akʉ mesu, mambʉjaɓana mesu, iiya ɨtakɨ‑takɨ ngiakɛ ma tiga kʉna. » 16Ɓafalisayɔ ngana ngana ɓambusigo ɓɔ: « Mombi ngiakɛ a꞉ʉngwakɔmʉ ɔɔ Asʉɓɨɨ jʉ uɓundo mapanʉ ngika kʉ ɓisi ɓʉ humuo ngiɓa ɓʉ Ɓayuda. » Ɨkyɛmɨngana, iɓa ɓɔmɔ ɓambusigo ɓɔ: « Ajʉ mombi ʉ ɓʉɓɨɓɨ akwanana kʉkyɨa ɓakɔkɔ ɓɔɔ ɓʉmbangɛ ikanzi ngiakɛ ɓiɛ? » Kɔnɔ yambikinye tii ati ʉndaɓʉ. 17Ɓafalisayɔ ɓambuɓukuo ɓata mombi ngia mesu kamʉgananɨa ɓɔ: « Ti‑zʉ ɔwɛ, wakusigo tanɨ ekoo ʉ mombi ngia u꞉nahiiso mesu? » Kija a꞉ɓutisio ɓɔ: « Akʉ ɛmɛ, a ɨgbɛ yɨ Asʉɓɨɨ. »
18Ɨkyɛmɨngana, Ɓayuda ɓa꞉bayakɔmʉ kusigo ɓɔ mombi ngiinanɨ ambikinye na ɓɔ a tiga kʉna. Kija ɓa꞉soko ɔɔ ɨsɛ nʉ inye. 19Ɓambuɓuɓukuo ɓɔ: « Ajʉ mwana ʉ ɓandambʉ ngiakɛ a tʉkʉ mwana ʉndɛnʉ ɓiɛ, iya nakʉɓakana kusigo ɓɔ ambikinye na kʉʉngwa nʉtanɨa yangɔ? Ɨtakɨ‑takɨ ngia u꞉faniso kʉna tiga ɨkyɨkyɨɓʉmʉ tanɨ? » 20Ɔɔ ɨsɛ nʉ inye ɓambutisio ɓɔ: « Kakʉmbɨa iɗo ɓɔ a mwana ʉndɛsʉ nʉ ɓɔ a꞉nʉtanɨa ambikinye neni. 21Ɨkyɛmɨngana, isu kambʉkɔmʉ kumbɨa ɓɔ yɨ꞉kyɨanɨa tanɨ ɛyɔ ku꞉faniso kʉna. Kambʉkɔmʉ ɓata kʉmbɨa ɓɔ anɨ kʉ ʉ꞉mʉgana mesu. Ambʉ́ numuɓukuo‑zʉ kʉ ɛyɔ makʉɔngɔ, jʉ a tiga kʉ iti yɨ gue ngia ʉkwanana kʉyaka moni kangɔ makʉɔngɔ. » 22Ɔɔ ɨsɛ nʉ inye ɓa꞉sigo ɓwanɨ jʉ ɓi꞉nye kukumo ɓangama ɓʉ Ɓayuda. Ɓangama ngiɓʉnɨ ɓi꞉nye ɓumaiseni ʉpanʉ ɓɔ mombi kʉ uɓomu ngia a꞊baya kusigo ɓɔ Yeso a Masɨa, ɓa꞊mukpinyo ɓɔ ɔɔkumuniokɔmʉ amati ʉ ɨkáa yɨ nɨta ngiindaɓʉ. 23Iikwa ɓɔ ɔɔ ɨsɛ nʉ inye ɓa꞉tisio‑ɔɔ ɓɔ: « A tiga kʉ iti yɨ gue, muɓukueni tʉkʉ ɛyɔ. »
24Kija Ɓafalisayɔ ɓa꞉soko ɓata mombi ngiinanɨ, ɓambumuɓukuo ɓɔ: « Kumo‑zʉ tʉkʉ mesu kʉ Asʉɓɨɨ, nʉ yaka tʉkʉ ingono! Isu kakʉmbɨa ɓɔ mombi ngiinanɨ a mombi ʉ ɓʉɓɨɓɨ. » 25Kija a꞉ɓutisio ɓɔ: « Ndʉ aɓio mombi ʉ ɓʉɓɨɓɨ, mambʉkʉmbɨa ɛmɛ. Ɨkyɛmɛ ngia ɛmɛ makʉmbɨa engo ya tʉkʉ kusigo ɓɔ ɛmɛ mambikinye na pɛɛ, ɨkyɛmɨngana ɨtakɨ‑takɨ ngiakɛ ma tiga kʉna. »
26Ɓambumuɓukuo ɓata ɓɔ: « Ʉ꞉nakyɨa‑zʉ ɨmanɨ? Ʉ꞉nagana‑zʉ mesu tanɨ? » 27Kija a꞉ɓutisio ɓɔ: « Kʉndʉ aka mu꞉faniso‑ɔɔ ninu kusigio, nambʉkɔmʉ kʉkɔ. Na‑zʉ kʉkʉnda mʉtʉya kʉyaka moni ngikakɛ akʉ moni kʉ ɨmanɨ? Ajʉ nakʉkʉnda kʉ kʉnɨtanaka ɓakpataka ɓangɔ ɓiɛ? » 28Ɓambʉmʉzɨaka, nʉ nayɔ kʉyakɨa ɓɔ: « Ɔwɛ kʉ wa 'ʉkpataka wʉ mombi ngiinanɨ! Isu ka yɨndɛsʉ ɓakpataka ɓʉ Mʉsa. 29Kaambɨa ɓɔ Asʉɓɨɨ ɓa꞉yakanaka nʉ Mʉsa yakanakaa, ɨkyɛmɨngana, kambʉkɔmʉ kʉmbɨa ɓɔ mombi ngia a꞉ʉngwa‑zʉ gbanɨ. »
30Kija mombi ngiinanɨ a꞉ɓutisio ɓɔ: « Moni ngikakɛ kʉnambangɨa ɛmɛ mbangɨaa. Inu nambʉkɔmʉ kʉmbɨa ɓɔ a꞉ʉngwa gbanɨ, ɨkyɛmɨngana kʉ ɛyɔ kʉ ʉ꞉nagana mesu. 31Kaambɨa kusigo ɓɔ Asʉɓɨɨ ambakakɔ nɨta yɨ ɓombi ɓʉ ɓʉɓɨɓɨ, ɨkyɛmɨngana aakɔ nɨta yɨ mombi ngia aamukumo nʉ iya aakyɨa tʉkʉ ɓʉkʉnda ngiɓangɔ. 32Isu kambʉkɔkɔmʉ sina gʉkʉ ɓisi mʉngana ɓɔ, ɓʉpagana mesu kʉ mombi ngia ambakana kʉʉngwa nʉtanɨa yangɔ. 33Ndʉ yaɓio ɓɔ mombi ngia a꞉ʉngwakɔmʉ ɔɔ Asʉɓɨɨ, ambʉ́ ʉkyɨakɔmʉ ikanzi yɨ moni ngikakɛ. » 34Ɓambumutisio ɓɔ: « Ɔwɛ wa tʉkʉ mombi ʉ ɓʉɓɨɓɨ kingono kʉʉngwa nʉtanɨa ngiisɔɔ! Wa‑zʉ kʉhata nisu kʉpanɨa moni tɨmanɨ? » Ɓambumukpinyo ɓɔ ʉɓʉa aɓei.
Chwiyo mesu ngia yɨ 'ʉtʉma
35Iya Yeso a꞉kɔ nayɔ ɓɔ Ɓafalisayɔ ɓu꞉kpinyo mombi ngia a꞉mʉgana mesu kpinyoni, kija a꞉sa nayɔ kʉgbʉka, ambumuɓukuo ɓɔ: « Ajʉ wʉbaya Mwana ngia ʉ Mombi bayanɨ ɓiɛ? »
36Mombi ngiinanɨ ambumutisio ɓɔ: « Makʉʉɓɨɨ, Mwana ngia ʉ Mombi a ti‑zʉ anɨ? Naɓɨa iɗo ambʉ ɛmɛ mʉ꞊mʉbaya tʉkʉ bayanɨ. » 37Yeso ambumusigio ɓɔ: « Wʉ꞉mʉna nanɨ, nʉ ɛyɔ iya nakʉyakanaka nayɔ ɨtakɨ‑takɨ ngiakɛ. » 38Mombi ngiinanɨ ambusigo ɓɔ: « Oo! Makʉʉɓɨɨ, mʉ꞉baya bayaa. » Kija a꞉gbʉkʉmɨa nʉ muwuu apɛɛ ʉ Yeso. 39Mbise ngiinanɨ, Yeso ambusigo ɓɔ: « Ɛmɛ ma꞉ka akʉ ɨtaka aka ekoo tɨna 'ʉkɔmbɔ. Yakusigo ɓɔ ɓombi ngiɓa ɓambakana ɓʉkwanana kʉna, nʉ ɓombi ngiɓa ɓakʉna ɓambʉnɨtanaka ɓombi ngiɓa ɓambakana. » 40Iya Ɓafalisayɔ ngana ngana ngiɓa ɓi꞉nye naɓɔ ɓa꞉kɔ nayɔ moni ngikʉnanɨ, ɓambumuɓukuo ɓɔ: « Ajʉ iinanɨ yakusigo ɓɔ isu ka kʉ ɓombi ngiɓa ɓambakana ɓiɛ? »
41Yeso ambuɓutisio ɓɔ: « Ni꞉nyeni piɛ ɓombi ngiɓa ɓambakana kingono ambʉ́ nambʉkɔmʉ nʉ ɓʉɓɨɓɨ. Ɨkyɛmɨngana, jʉ nakʉkwanaka ɓuu ɓɔ nakʉna, ɓʉɓɨɓɨ ngiɓʉndɛnʉ ɓa tʉkʉ akʉ izi yɛngɔ. »
موجودہ انتخاب:
Yʉanɨ 9: BudKoya
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2021, Wycliffe Bible Translators, Inc.
