Yʉanɨ 10
10
Yeso u꞉nzo isisinio yɨ mʉpɨmakɨa wʉ ɓakɔndɔlɔ
1Yeso ambuɓusigio ɓɔ: « Maninu kusigio tʉkʉ kingono ɓɔ, mombi ukumunieni akʉ ikumba yɨ ɓakɔndɔlɔ chʉkɔmʉ 'upi akʉ umongu wɔngɔ, ɨkyɛmɨngana ambuɗito 'upi ekoo, ambʉ a tʉkʉ agandiɓo, nʉ a mombi ɔɔ hinyoe kumbo wʉ ɓombi. 2Ɨkyɛmɨngana, mombi ngia aakumunio 'upi akʉ umongu, a yangɔ mʉpɨmakɨa wʉ ɓakɔndɔlɔ. 3Mʉpɨmakɨa wʉ umongu waamʉganɨa umongu, kija ɓakɔndɔlɔ ɓaakɔ iyo ngia yɨ mʉpɨmakɨa wʉ ɓakɔndɔlɔ. Nʉ aasoko ɓakɔndɔlɔ ngiɓangɔ kʉkpatanakɨa nʉ muno kʉndaɓʉ naɓɔ kuɓuiso aɓei. 4Iya aapipo naɓɔ kuɓuiso kʉ ɓuɓomu aɓei ɓʉ gba, ambufaniso kɨnda apɛɛ ʉndaɓʉ, ɓakɔndɔlɔ ngiɓangɔ ɓambufaniso nayɔ kpata mbise, jʉ ɓaambɨa iyo ngiangɔ mbɨaa. 5Ɓakɔndɔlɔ ngiɓʉnanɨ ɓambʉkʉkpata mombi nga kɔmɔ gʉkʉ ɗɛkɛkɛ, ɨkyɛmɨngana ɓa꞊nanzana nʉ ɓangʉ tʉkʉ ɓʉ waa jʉ ɓambukuɓio kupimiso iyo ngiangɔ. »
6Yeso a꞉ɓunzo isisinio ngiakɛ, ɨkyɛmɨngana chʉkɔmʉ ɓambupimiso inyi yɛngɔ.
Yeso a mʉpɨmakɨa wʉ ɓakɔndɔlɔ ngua wɔɔ uɗo
7Kija Yeso a꞉matɨa ɓata ɓɔ: « Tʉkʉ kingono maninu kusigio ɓɔ, ɛmɛ ma umongu wʉ ikumba yɨ ɓakɔndɔlɔ. 8Ɓombi ngiɓa ɓa꞉ka jɛnɛ pɛɛ mambʉɓwanɨenikɔmʉ ɓa ɓagandiɓo nʉ ɓa ɓombi ɓɔɔ ɓuhinyoe kumbo wʉ ɓombi. Ʉna tɔ, ɓakɔndɔlɔ ɓa꞉ɓʉkɔkɔmʉ. 9Ɛmɛ ma umongu. Mombi ukumunieni 'upi akʉ ɛmɛ, a꞊nyɨa nʉ ɓʉhɨa. Iya a꞊kumunio, ambʉɓʉa, kija a꞊nyɨa nʉ idyo. 10Agandiɓo aakumunio yangɔ ambɛnɨ tʉkʉ kuɓo, kʉnɨwa nʉ kʉtambiso. Ɛmɛ ma꞉ka yɨsɛmɛ aka ekoo ngia ɓɔ ɓombi ɓʉ꞊nyɨa nʉ ʉɓɨɨ, nʉ ɓa꞊nyɨa nawɔ ʉja kingono.
11Ɛmɛ ma mʉpɨmakɨa wʉ ɓakɔndɔlɔ wɔɔ uɗo. Mʉpɨmakɨa wʉ ɓakɔndɔlɔ wɔɔ uɗo waanzo ʉɓɨɨ nguangɔ aka ekoo ɓakɔndɔlɔ ngiɓangɔ. 12Ɨkyɛmɨngana, mombi ʉ kuu ngia aakyɨa kuu tʉkʉ aka ekoo nyɨa nʉ falanga ambʉkɔmʉ mʉpɨmakɨa, nʉ ɓakɔndɔlɔ ɓambʉkɔmʉ ɓangɔ kʉ ɓwanɨ. Iikwa ndʉ aana kwei kʉka ambʉgʉa bangʉ nʉ kʉsɨa ɓakɔndɔlɔ. Kija kwei aaɓufio nʉ naɓɔ kʉpanza. 13Mombi ʉ kuu ngia aakyɨa kuu tʉkʉ aka ekoo nyɨa nʉ falanga, ambakanapɨa 'ʉtʉma ekoo ʉ ɓakɔndɔlɔ. 14Ɛmɛ ma mʉpɨmakɨa wʉ ɓakɔndɔlɔ wɔɔ uɗo. Maambɨa ɓakɔndɔlɔ ngiɓʉsɛmɛ mbɨaa, nʉ ɓakɔndɔlɔ ngiɓʉsɛmɛ ɓaanambɨa ɛmɛ kʉ mbɨaa. 15Ngbanga kʉndʉ iya Tidoo aanambɨa‑ɔɔ ɛmɛ, nʉ aka ɛmɛ maambɨa‑ɔɔ Tidoo, kʉ ɓwanɨ ɛmɛ makunzo ʉɓɨɨ nguʉsɛmɛ aka ekoo ɓakɔndɔlɔ ngiɓʉsɛmɛ. 16Ɛmɛ ma kʉ nʉ ɓakɔndɔlɔ nga ɓɔmɔ iɓa ɓambʉkɔmʉ amati ʉ ikumba ngiakɛ. Mʉkwanana kʉ kʉka naɓɔ, nʉ ɓakwanana kʉ kʉkɔ iyo ngiisɛmɛ, ɓaɓio tʉkʉ imbi mɨngana nʉ mʉpɨmakɨa kʉ mungono. 17Tidoo aanakʉnda kʉndaa, jʉ ɛmɛ makʉɔngɔ maanzo ʉɓɨɨ nguʉsɛmɛ kuwo, aka ekoo ngia ɓɔ mʉnyɨa ɓata nawɔ kʉtɔ. 18Yambʉkɔmʉ nʉ mombi gʉkʉ mʉngana iya a꞊kwanana nɛmɛ kuungwisio ʉɓɨɨ nguʉnanɨ, kyɛmɨngana tʉkʉ ɛmɛ makʉɔngɔ kʉ makwanana nawɔ kunzo, Jʉ kʉ ɛmɛ makʉɔngɔ manʉ ʉpanʉ nawɔ kuungwiso, nʉ kʉ ɛmɛ ma ɓata nʉ ʉpanʉ nawɔ kʉchɨka kʉtɔ. Ʉpanʉ nguʉnanɨ wa ʉwa Tidoo ngiasɛmɛ a꞉titio ɓɔ mʉʉkyananakɨa. »
19Aka ekoo ʉ moni ngika Yeso a꞉sigo, dyokono yambʉkwa ɓata kʉ ati ʉ Ɓayuda. 20Ɓombi ɓaja ati ʉndaɓʉ ɓambusigo ɓɔ: « Anʉ 'ʉtʉma wʉ abɨa! A tʉkʉ mombi ʉ ɓaumu! Na‑zʉ nayɔ kʉkɔ jʉtanɨ? »
21Ɨkyɛmɨngana, ɓombi nga ɓɔmɔ ɓambusigo ɓɔ: « Mombi ngia aakyɨa nʉ 'ʉtʉma wʉ abɨa ambakayaka ikanzi yɨ moni ngika. Ajʉ 'ʉtʉma wʉ abɨa wakwanana kʉgana mesu kʉ mombi ngia ambakana ɓiɛ? »
Ɓayuda ɓʉ꞉yaa baya Yeso
22Ɓisi mʉngana, ʉmbɔ wɔɔ ʉja wi꞉nye anʉ Yelusalɛma, kutunguo ɓisi ngiɓa ɓa꞉gana jɛnɛ‑ɔɔ ɨkáa yɨ Asʉɓɨɨ. Yi꞉nye akʉ wati wʉ vɛvʉ yɛɛ ɨja nadɨndɨ. 23Yeso i꞉nye kʉkɨndaka amati ʉ ɨkáa yɨ Asʉɓɨɨ akʉ izi ngia ɓi꞉nye isoko ɓɔ basa ʉ Sɔlɔmɔnɔ. 24Kija Ɓayuda ɓa꞉mukunguo ɓʉ kuu nʉ nayɔ kusigio ɓɔ: « Wati tɨmanɨ‑zʉ uwa wa꞊sɨa sina‑ɔɔ nisu kʉnagbiso 'ʉtʉ? Ndʉ yaɓio‑zʉ ɓɔ wa Klisito, tɨɓɨa akʉ ɓingono. » 25Yeso ambʉɓʉɓɨa ɓɔ: « Abana ndʉ maanɨɓɨa kititi, ɨkyɛmɨngana nambakabaya. Ɨkyɛmɛ ngia maakyɨa akʉ ino ngia yɨ Tidoo yanɛmɛ kʉɓʉɨya ɓʉtɛmʉ. 26Ɨkyɛmɨngana, inu nambʉkɔmʉ nɛmɛ kʉbaya jʉ nambʉkɔmʉ akʉ undindo wʉ ɓakɔndɔlɔ ngiɓʉsɛmɛ. 27Ɓakɔndɔlɔ ngiɓʉsɛmɛ ɓaakɔ iyo ngiisɛmɛ kɔɔ. Nʉ ɛmɛ maaɓʉmbɨa mbɨaa kija ɛɓɔ ɓaanakpata kpataa. 28Kʉ ɓwanɨ, ɛmɛ ma꞊ɓunzo ʉɓɨɨ ngua wʉ mɨtʉ yɨ ɨpá nʉ mɨtʉ yɨ ɨpá, nʉ ɓambʉkʉyangaa sina gʉkʉ ɗɛkɛkɛ. Nʉ mombi gʉkʉ mʉngana ambʉkʉɓʉhɨnɨa akʉ lɨkɔndɔ lʉsɛmɛ. 29Tidoo ngiasɛmɛ a꞉nanzo ɛmɛ ɓakɔndɔlɔ ngiɓʉnanɨ a ekoo ʉ moni kʉ muɓomu. Nʉ yambʉkʉ nʉ mombi gʉkʉ mʉngana iya akwanana naɓɔ kʉhɨnɨa akʉ lɨkɔndɔ lʉ Tidoo. 30Isu nʉ Tidoo ngiasɛmɛ ka tʉkʉ ɨkyɛmɛ mɨngana. » 31Kʉ ɓwanɨ, Ɓayuda ɓambugwio ɓata mukopi ɓɔ ɓʉmʉɓɛnda nakɔ. 32Yeso ambuɓusigio ɓata ɓɔ: « Mʉpaa pananiso lɨkyananakɨa lɔɔ manzanza lɨja kʉʉngwa ɔɔ Tidoo. Ɨkyananakɨa tɨmanɨ iya na‑ɔɔ kʉkʉnda nɛmɛ kʉɓɛnda nʉ mukopi aka ekoo ɔngɔ? »
33Ɓayuda ɓambutisio ɓɔ: « Kambʉkɔmʉ kʉkʉnda nɔwɛ kʉɓɛnda nʉ mukopi aka ekoo ɨkyananakɨa yɛɛ iɗo, ɨkyɛmɨngana ya tʉkʉ jʉ waazɨaka Asʉɓɨɨ. Ɔwɛ wa tʉkʉ mombi, ɨkyɛmɨngana wakʉnana tiga ndʉ wa Asʉɓɨɨ! »
34Yeso ambuɓutisio ɓɔ: « Ajʉ ɓa꞉tɨndakɨakɔmʉ‑zʉ amati ʉ ʉpanʉ nguʉndɛnʉ ɓɔ Asʉɓɨɨ a꞉sigo ɓɔ: ‹ Inu na ɓamʉngʉ ɓʉ yakanaka. › » 35Moni ngika Mubio kʉ Asʉɓɨɨ kaayaka ka tʉkʉ kingono. Ɓombi ngiɓa Asʉɓɨɨ a꞉ɓusoko jɛnɛ ɓɔ ɓamʉngʉ ɓʉ yakanaka, ya ɓombi ngiɓa ɓa꞉ɓʉɓɨakɨa jɛnɛ ɨsaʉ ngiangɔ. 36Kʉ Asʉɓɨɨ a꞉nachwa ɛmɛ, nʉ ɓata kʉ ɛyɔ a꞉natʉma ya akʉ ɨtaka. Yɨkwa tiga‑zʉ tanɨ iya ndʉ masigo ɓɔ Ɛmɛ ma Mwana angɔ, gʉ inu ɓɔ manayɔ kʉzɨaka? 37Ndʉ mambukuɓio kʉkyɨa moni ngika Tidoo ngiasɛmɛ a꞉natitio kʉkyɨa engo, inu nɔɔnabayakɔmʉ. 38Ɨkyɛmɨngana, ndʉ maɓio kʉkyananakɨa tʉkʉ moni ngika kakʉʉngwa ɔɔ Tidoo, abana ndʉ nʉnabayenikɔmʉ ɛmɛ makʉɔngɔ, ɨkyɛmɨngana bayeni gʉtʉ tʉkʉ lɨngbaa lʉ moni ngila ɛmɛ makʉkyɨa engo. Mbɨeni nʉ pimiseni kusigo ɓɔ Tidoo a amati asɛmɛ, nʉ ɛmɛ ma amati ʉ Tidoo. 39Ɓambʉkanyo ɓata kʉfa Yeso, ɨkyɛmɨngana ambʉɓʉɓwanakɨa. 40Kija Yeso a꞉tʉa ɓata kʉ mbise ambʉtapʉa amondu ʉ Yɔlɔdanɨ, nʉ wagba ngua Yʉanɨ i꞉nye ɓatiso‑ɛɛ ɓombi pɛɛ. Ambuwulo ɨkʉmbʉ nani. 41Ɓombi ɓaja ɓambʉka aka i꞉nye‑ɔɔ, ɓambusigo ɓɔ Yʉanɨ a꞉kyɨakɔmʉ moni kɔɔ mʉmbangɛ gʉkʉ mʉngana, ɨkyɛmɨngana moni kʉ muɓomu ngika a꞉sigo aka ekoo mombi ngiakɛ ki꞉nye tʉkʉ moni kingono. 42Nʉ nani, ɓombi ɓaja ɓambʉbaya Yeso.
موجودہ انتخاب:
Yʉanɨ 10: BudKoya
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2021, Wycliffe Bible Translators, Inc.
