Yʉanɨ 2
2
Ʉmbɔ wʉ chɨkana akʉ gʉlʉ ʉ Kana
1Tiga mbise ʉ makwaa kapɨnɨ, ʉmbɔ wʉ chɨkana wi꞉nye akʉ gʉlʉ ʉ Kana, akʉ gɨpa ʉ Galilaya. Inye ʉ Yeso i꞉nye kʉ ananɨ. 2Ɓi꞉nye ɓusokeni ɔɔ Yeso ɨzɔ nʉ ɓakpataka ngiɓangɔ akʉ ʉmbɔ wʉ chɨkana nguʉnanɨ. 3Tiga wati mungono ɓɔmʉ, vinyo ambusio. Gʉ inye ʉ Yeso nʉ mwana angɔ ɓɔ: « Ɓombi ɓambʉkʉ tii nʉ vinyo. » 4Ɨkyɛmɨngana, Yeso ambumutisio ɓɔ: « Inoo, iya yɨsɛmɛ nɔwɛ yɨ꞉kwa tanɨ? Wati nguʉsɛmɛ wambʉndanakɔmʉ. » 5Kija inye ʉ Yeso a꞉sigio ɓombi ɓʉ kuu ɓɔ: « Moni kʉ muɓomu ngika aɓio ninu kusigio, kyɨeni tʉkʉ kyɨaa. » 6Lɨkɔchɔ lʉ mukopi li꞉nye nanɨ ʉmalɨa, ila Ɓayuda ɓi꞉nye jaɓanakɨa‑ɔɔ kʉkpatanakɨa nʉ mapanʉ ngika kʉndaɓʉ. Ɨkɔchɔ mɨngana ngiinanɨ yi꞉nye kumunio ɓalitɛlɛ ndʉ mɨa mʉngana. 7Yeso ambusigio ɓombi ɓʉ kuu ɓɔ: « Huikiseni lɨkɔchɔ ngilalɛ nʉ mepo. » Ɓambulihuikiso tʉkʉ ɓʉ kyɛɛ kyɛɛ. 8Kija Yeso a꞉ɓusigio ɓɔ: « Tʉkeni‑zʉ mepo ngikʉnanɨ ɗɛkɛkɛ, nambunzo mambɨnyɨ wʉ ʉmbɔ. » Ɓambʉmɨkyɨa nakɔ. 9Mambɨnyɨ ʉ ʉmbɔ ambʉmwanana mepo ngikʉnanɨ. Ki꞉nye kʉnɨtanakeni tiga vinyo. Chʉkɔmʉ ambʉmbɨa ɓɔ vinyo ʉka gbanɨ. Ɨkyɛmɨngana, ɓombi ɓʉ kuu ngiɓa ɓa꞉tʉka mepo ɓi꞉nye pɛpɛ tʉkʉ kʉmbɨa ɓɔ vinyo ʉka gbanɨ. Kija a꞉soko gue ngia i꞉nye kʉchɨkana. 10Kija a꞉ɓusigio ɓɔ: « Mombi kʉ 'uɓomu aakpanga‑zʉ pɛɛ tʉkʉ nzo ɓombi vinyo ngia ɔɔ ɓʉkaɨ. Tiga ndʉ ɓombi ngiɓa ɓaaɓusoko ɓaachwa damʉa, ambunzo tiga jalamba. Ɨkyɛmɨngana, ɔwɛ winye‑zʉ kuɓoso vinyo ngia ɔɔ ɓʉkaɨ tʉkʉ ananɨ kʉɓʉya ɨtakɨ‑takɨ ngia. » 11Kɔkɔ ɔɔ mbangɛ ngia wʉ pɛɛ Yeso a꞉kpanga kyɨa engo ɛyɔ iinanɨ, iya a꞉kyɨa akʉ gʉlʉ ʉ Kana amati ʉ gɨpa ʉ Galilaya. A꞉pananiso imbangumba ngiangɔ, ɓakpataka ɓambʉmʉbaya. 12Mbise ngiinanɨ, ambʉsa anʉ Kapelenaumu ɨzɔ nʉ ɔɔ inye nʉ ɓamanye ɓɔɔ gue, nʉ ɓakpataka ngiɓangɔ. Ba꞉kyɨa nanɨ tʉkʉ makwaa ɗɛkɛkɛ.
Yeso ukpinyo ɓombi ɓʉ magabʉ amati ʉ ɨkáa yɨ Asʉɓɨɨ
(Mat 21:12-13; Mak 11:15-17; Luk 19:45-46)
13Ati ngia ʉmbɔ wʉ Pasɨka wi꞉nye tiga‑ɔɔ kʉ tinene, Yeso ambʉsa anʉ Yelusalɛma 14Tiga na amati ʉ Ɨkáa yɨ Asʉɓɨɨ, a꞉gbʉka ɓombi ɓi꞉nyeni kʉgaba ɓangɔmbɛ, ɓakɔndɔlɔ, nʉ ɓapizo. Ɓombi ɓɔɔ ɓuɓalise falanga ɓi꞉nye tiga ɓuwei kʉ anɨ. 15Ambuɓongo umiki kʉtambanaka 'ufimbo, ambuɓukpinyo kʉ ɓuɓomu kʉɓʉa aɓei ʉ ɨkáa yɨ Asʉɓɨɨ, nʉ ɓakɔndɔlɔ, nʉ ɓangɔmbɛ, ngiɓʉndaɓʉ inyeni kugbukumoko ɓamɛza, nʉ kungbingo mikpekpe yɨ falanga akɛsɨ. 16Kija a꞉sigio ɓombi ngiɓa ɓi꞉nye kʉgaba ɓapizo ɓɔ: « Ungwiseni kumbo ngiakɛ aka. Nɔɔnɨtanakisokɔmʉ ɨkáa yɨ Tidoo ngiasɛmɛ kʉka ɨkáa yɨ magabʉ. » 17Ɓakpataka ngiɓangɔ ɓambutunguo moni ngika ɓa꞉tɨndakɨa amati ʉ Mubio kʉ Asʉɓɨɨ ɓɔ: « Imi ngia manayɔ akʉ ɨkáa ngiisɔɔ yanɛmɛ kuzizo ndʉ dyaa. » 18Ɨkyɛmɨngana, ɓangama ɓʉ Ɓayuda ɓambumuɓukuo ɓɔ: « Moni kɔɔ mʉmbangɛ tɨmanɨ wa꞊tɨpana ika ka꞊baya nayɔ ɓɔ wanʉ ʉpanʉ kʉkyɨa moni ikanzi ngikakɛ? » 19Gʉ Yeso naɓɔ ɓɔ: « Teni‑zʉ ɨkáa yɨ Asʉɓɨɨ ngia akɛsɨ ɓʉ gbatata, kija tʉkʉ amati ʉ makwaa kaatʉ mambuimaiso kʉtɔ. » 20Kija Ɓayuda ɓa꞉musigio ɓɔ: « Ɨkáa yɨ Asʉɓɨɨ ngia, ɓa꞉ɨtɨa amati ʉ mugo makumi ɓʉgɨna nʉ ʉmalɨa. Ajʉ ɔwɛ wa ikanzi ngia wa꞊ɨtɨa kʉ mbise tʉkʉ amati ʉ makwaa kaatʉ ɓiɛ? » 21Ʉna tɔ, ɨkáa yɨ Asʉɓɨɨ ngia Yeso i꞉nye kʉyaka moni ekoo ɔngɔ, yi꞉nye tʉkʉ isisinio yɨ ndʉtʉ ngiangɔ. 22Ati ngia Yeso a꞉jʉkana‑ɔɔ akʉ ingyo, ɓakpataka ngiɓangɔ ɓambutunguo ɓɔ Yeso a꞉ɓʉɓɨa jɛnɛ moni ngikʉnanɨ tʉkʉ ɓɨaa. Kija ɓa꞉baya moni ngika ɓa꞉tɨndakɨa jɛnɛ amati ʉ Mubio kɔɔ Tu nʉ moni ngika Yeso a꞉sigo jɛnɛ.
Yeso aambɨa mɨtʉma yɨ ɓombi kʉ ɓuɓomu
23Ati ngia Yeso i꞉nye‑ɔɔ anʉ Yelusalɛma akʉ wati wʉ ʉmbɔ wʉ Pasɨka, ɓombi ɓaja ɓambʉmʉbaya kʉna moni kɔɔ mʉmbangɛ ngika i꞉nye kʉkyɨa engo. 24Ɨkyɛmɨngana, Yeso a꞉napɨakɔmʉ 'ʉtʉma ekoo ʉ moni ngikʉndaɓʉ, jʉ i꞉nye naɓɔ kʉmbɨa kʉ ɓuɓomu tʉkʉ iɗo. 25Yambikinye kʉta kʉ ɓwanɨ ɓɔ ɓʉmʉchwɨa uduɓa wʉ mombi gʉkʉ mʉngana, jʉ ɛyɔ makʉɔngɔ i꞉nye mbɨa moni kʉ 'ʉtʉma wʉ mombi iɗo.
موجودہ انتخاب:
Yʉanɨ 2: BudKoya
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2021, Wycliffe Bible Translators, Inc.
