Luk 7
7
Etsera tsɛ Ɔnang ttamma kwa Asɔza
1Ibe rɛ Jisɔs ukkɨm ɔtɔnga kwɛ no otega anang, ɔtɔnwa ga Kapanum. 2Mumma wɔ kwɛ otserɔtɔm kwɔ ɔnang ttamma kwa asɔza, kwu unɨng-ɛ ke ettem kidam, ɔmmɛ, urɨg kɛm oppe. 3Ɔnang ttamma kwa asɔza ɔkwɔ ɔwanga idɨg rɛ Jisɔs nussi, ɔkwɔ ɔtɔm atsonang pa Aju ka Jisɔs aba ajer-ɛ ukwu, okwo ogweng otserɔtɔm kwɛ. 4Ibe rɛ aba kwa awem ka Jisɔs, aba tsɨn-ɛ, “Ɔdwunɨng nwa ɔbanma kwɔ ɔma akkan-ɛ. 5Ukwurabɛ ofon kwa amana ɔdag-ɛ kidam, ɛma wɔ umun ɔdappa ɔnang mana”. 6Mawɔ Jisɔs ubuw bɛ innam.
Urɨg kɛm owem kɔ ɔtsɔm, ɔnang ttamma kwa asɔza ɔtɔm ayogudɨkko aba akew-ɛ abɛ, “Ɔvaar, oma oyen udɨg ka ayag, amma wɛrɛ nɨ nbana kwɔ ɔma ma kwu ka kam kɔ ɔtsɔm. 7Akwɛma gwɔ ɔnanɔ ɔbanna kwa amma oyen nkwu, tɔng ɔtɔnga, otserɔtɔm nwa kwam no ogwengogweng. 8Amma nde ɔnang kwu ubuw ɔnang kwu utɨm ɛffa, ɔttara ayog pa abuw-m innam. Nkema nteg ɔnang wan abɛ, ‘Sɔng’ ɛma opfona, nteg oyog ɔdwag ‘Kwu’ ɛma ukwu, nteg otserɔtɔm kwam ‘Si nva’ ɛma ussi.”
9Ibe rɛ Jisɔs ɔwang ɔtɔnga ngwo, akwu okkonɛ, ɔwag okker anang pa asawɔsaw pa na abuw-ɛ innam, oteg bɛ abɛ, “Etsera nza ntɨg nssa ki iseg ri Izɨrɛl.” 10Masɛ anang pɔ ɔtɔm ammang innam kɔ ɔtsɔm, aba ase otserɔtɔm ko ogwenga.
Jisɔs ɔshɔw unwa kwo oppokwa
11Masɛ ibe ndo iseng, Jisɔs uyɨn ko ofon kwo okpen Nen, abuwinnam pa Jisɔs ɔttara anang pa asawɔsaw abuw-ɛ innam. 12So ofor ki ikasema ro ofon, ose upfuranang kwa aba atɔg, unwa dwunɨng nwo kwo oppe. Ɛma mɨntsen wɔ kwo opokwa ɔmaan. Anang pa asawɔsaw po ofon ngwo aba abuw ɔkka innam. 13Ibe rɛ Ɔvaar Jisɔs usse-ɛ, ussɛ okwo, oben-ɛ abɛ, “Dag kagama.”
14Muma wɔ kwo onem ɔtɔ ɔdan ikpang ru upfura, anang pa atɔg ikpang ndo aba abe. Jisɔs oben abɛ, “Unwa dwunɨng, nɨn nben abɛ, bɨna be.” 15Upfuranang nwo ubɨna unɨnga ɛyar, utitso otɔnga ɔtɔnga, Jisɔs ɔtag-ɛ ɔnang ɔkka.
16Anang akwɛ ozor bɛ, aba kponga ma atsona Ubɨnɔkpaabyi, aba aben abɛ, “Otegɛkkawa kwu Ubɨnɔkpaabyi kwi ididen kukwa otor mana, Ubɨnɔkpaabyi kukwa abɛ ɔkwɔ ɔkkan anang pɛ.” 17Idɨg zuwa nda rɛ Jisɔs ussi aba awanga ka Judiya ɔttara ki ifon ri ibang muma.
Atɔmɔtɔm pɛ Jɔn Opyenga assi
18Abuwinnam pɛ Jɔn aba ateg-ɛ idɨg rɛ Jisɔs nussi ibɨng, Jɔn ojer abuwinnam pɛ affa. 19Ɔtɔm bɛ ga kɔ Ɔvaar Jisɔs aba ta abɔw-ɛ abɛ, “Ɔma wɔ kwa amana natɨg kwɛ mu ukwu, sa amana na atɨg ɔnang ɔdwag?”
20Sa aba akwa awem kɔ ɔwang kwɛ Jisɔs unɨng, aba ateg-ɛ abɛ, “Jɔn opyenga-assi ɔtɔm mana kakɔ abɛ amana abɔw-ɔ abɛ. ‘Ɔma wɔ makwu sa amana antɨg ɔnang ɔdwag?’ ”
21Ki ibe ndoma, Jisɔs ogweng anang pɛ ɛkpakpa ɛnabɛ nizuwa ɔttara kɨ mmada, ɔmanga ussi akpakpa pyuwa apyɛ iyɨn irɨg bɛ, ussi anang pa kpatsen aba ase iyan. 22Muma wɔ kwɔ ɔmang ɛkkawa ɔnang atɔmɔtɔm pɛ Jɔn. “Sɔng abanga ateg Jɔn idɨg ra abanga ase attara awanga; ayog pa kpatsen ase iyan, akwukwu aba abɨn asenga, ayog pa atto akpokora aba agweng, ayog pa akpa atɔng aba awanga, ayog pa appope aba shɔwa, akpukpora awanga ɔtɔnga zuwa. 23Ɛllɛ ede sɔ ɔnang nwo kwɔ ɔnɛ kɛnɔ ɔdwaga amma bɛ.”
24Masɛ atɔmɔtɔm pa Jɔn abɨn, Jisɔs otitso ɔtɔnga anang pa asawɔsaw abubɛ ɔbanga Jɔn, “Abanga ayɨn ki imɨn tsa anang ana arɨg ata ase mbang? Abanga ata ase otse kwɛ ibum niguma ager? 25Ɔna otse ngwo nuda, abanga ayɨn kiyan ata ase mbang? Ata ase ɔnang kwɔ ɔdaw ɛnya sa? Mma, ayog pa ake anɔma pɛ ɛkpɔgɛ ɛsha, abɛ na atsi akpen abɛ anɨnga ka avaar ter. 26Ɔma ammanga ayɨn ki iyan ata ase mbang? Ata ase otegɛkkawa kwu Ubɨnɔkpaabyi sa? Nteg-ɔ Jɔn ɔyɔnga otegɛkkawa kwu Ubɨnɔkpaabyi. 27Jɔn wɔ kwɛ wɛrɛ aba akker abɛ:
“ ‘Amma ntɔm ɔtɔmɔtɔm kwam ukwu pɛrɛ ɔma,
kwɛ mo oddo eden tsa abanga otsog banga.’
28Nteg banga, ɔnang ko ode kwu ukwanɨng ɔman-ɛ kwɔ ɔyɔnga Jɔn; ɔnang kwɔ ɔkar ki idam kɛ Ɛvaar tsu Ubɨnɔkpaabyi ɔbar ɔyɔnga Jɔn.”
29Anang nbo ibɨng kidam kidam abɔwatasi, ibe ra aba wang ɔtɔnga kwɛ Jisɔs aba atsera abɛ eden tsu Ubɨnɔkpaabyi zɔ ede ɔkkatsɛ, ukwurabɛ Jɔn wɔ opyeng bɛ assi. 30Afarisi ɔttara akpewinyɨna inyɨna tsɛ Mosis aba afum nttɔna ru Ubɨnɔkpaabyi ɔbanga abubɛ, ukwurabɛ aba afum abɛ Jɔn ɔnang bɛ assi opyeng.
31Jisɔs okwo oben abɛ, “Ntag banga nyoma banga anang ma ki ibe nda? Abanga ade masɛ abanga nang? 32Abanga ade masɛ uvava pa anɨng ɛyar kɛ ɛsha, abɛ na ajer ayog:
“‘Abba na kɨrr nbɨn anang banga,
abanga afum ituwa;
ankɔna ebo-mang anang abanga,
abanga afum ɛgama.’
33Jɔn opyenga-assi ibe ru ukwu utsapfɛ nutsa, atwug nugwa, abanga aben abɛ, ‘Ɔkam ɔkpakpa pyuwa.’ 34Unwa kwu Udwunɨng ukwu, utsi utsapfɛ, ugwa atwug, abanga aben-ɛ abɛ, ‘Ode ɔgwɔra ɔttara ubuma atwug, oyogudɨkko kwa abɔwatasi attara kwa aluloma.’ 35Esonga nɛkɔga ɔkkatsɛ otse kwa anang aba rɨg.”
Ululoma Kwanɨng ɔfɔn Jisɔs Ana pa Alew Irɨg
36Ibe ra Farisi wan ojer Jisɔs abɛ ukwu ka kɛ kɔ ɔtsɔm ukwu utsi utsapfɛ ɛmabɛ, Jisɔs otsera uyɨn ga Farisi kɔ otsɔm, ɔraga eyɛr unɨnga abɛ utsi utsapfɛ. 37Ibe rɛ ululoma kwanɨng kwu rɨg ma ofon ngwo ɔwang abɛ Jisɔs nutsi utsapfɛ ga Farisi kɔ ɔtsɔm, ukwanɨng nwo utɨm ana pa alew irɨg ke ekpomma tsi zuwuzuw uyɨn muma. 38Obe Jisɔs ki innam kɨnfokpatwak pɛrɛ nɔgama, asen pɛ aba na afon-ɛ ma kɨnfokpatwak. Ɛma utɨm asisar rɛ re etso ɔfɔn--ɛ, utɨma ɛdag ɔdan-ɛ ma kɨ nfokpatwak, opyeng-ɛ ana nbo pa alew irɨg kɨ nfokpatwak.
39Ibe rɛ Farisi kwo ojer-ɛ ose idɨg ndo, oben ɛma oyen abɛ, “Odesɛ udwunɨng nwa ode otegɛkkawa kwu Ubɨnɔkpaabyi wɛrɛ no songosong ɔnang tse kwɛ nɔdɛn-ɛ masɛ ukwanɨng nwo ode ululoma.”
40Jisɔs ɔpɔn-ɛ abɛ, “Saimɔn, nkam udɨg kwɛ mɨnteg-ɔ.”
Saimɔn otsera abɛ, “Okpew nnwer nnang kɨ nkɔm itɔng.”
41Anang affa aba atsi ofor ko oforakpog, ɔnang wan utsɨ-ɛ ofor #7:41 Dinari ode akpog pa aba na anang ɔnang kɔ ɔtɔm pfi igwu zan ko okpe ngwo.adinari ɛnɔna ukkuma araw asen, ɔnang ɔdwag utsi-ɛ ofor adinari araw affa ukkuma zow. 42Abɛma anang affa ɔnang kwɔ akam akpog pɛ mɔ ɔmanga ɔnang kode, ɛma uffura ifor ndo iffa, anɛwɔ mɔ ɔdag-ɛ kidam?
43Saimɔn ɔpɔn-ɛ abɛ, “Ntan bɛ nwo wan kwa aba affɨr ofor kwi ititam, ɛma wɔ kwɛ mɔ ɔdag-ɛ kidam.”
Jisɔs oteg-ɛ abɛ, “Ɔma ku udɨg ɔkka atɔnga.”
44Jisɔs ɔwag okker ukwanɨng nwo, ɔtɔnga Saimɔn abɛ, “Ku ukwanɨng nwa asa, nkwu ka kɔ ɔtsɔm, ɔma assi kana ananga abɛ nkpow nfokpatwak, ukwanɨng nwa utɨm isen okpow-m nfokpatwak, utɨm asisar re etso ɔfɔn nfokpatwak ram. 45Ɔma kana lowa ɔttara kɛ ɛdag taga, ukwanɨng nwa so otitso ɔnwa ma kɔ ɔtsɔm kwɔ, utumɔ ɔttag nfokpatwak ram ɔttag. 46Ɔma ana kana pyenga ke etso, ukwanɨng nwa opyeng-m ana pa alew irɨg kɨ nfokpatwak ram, 47Nɨnbenbɛ nteg-ɔ abɛ, npyuwa rɛ kusa kɨnbɨna nnang-ɛ, ukwurabɛ ɔkam ididaga ri ititam. Ɛma kwa aba bɨn anang-ɛ ki ilom ri ikikar ɔkɔga ididaga nwa.”
48Jisɔs oben ukwanɨng nwo abɛ, “Npyuwa rɔ kɨ nbɨna nnang-ɔ.”
49Ayog pa aba na atsi utsapfɛ abubɛ aba awag akker ayog, aba atɔnga abɛ, “Bɔg ɔnang wɔ ma kwɔ nubɨna ɔnang anang kɨ npyuwa?”
50Jisɔs oben ukwanɨng nwo abɛ, “Etsera tsɔ kɔma issa annanga, sɔng otemdɨr awuwɛ.”
موجودہ انتخاب:
Luk 7: mfn
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©️2022 Luke Initiative for Scripture Translation
