ወንጌል ዘሉቃስ 22

ምዕራፍ 22

በእንተ በዓለ ፋሲካ

1 # መዝ. 2፥2፤ ማቴ. 26፥1-5፤ ዮሐ. 11፥46-54። ወቀርበ በዓለ መጸለት ዘስሙ ፋሲካ። 2ወየኀሠሡ ሊቃነ ካህናት ወጸሐፍት በዘይቀትልዎ ወኮኑ ይፈርህዎሙ ለሕዝብ።

በእንተ ተሰናዕዎቱ ለይሁዳ ምስለ አይሁድ

3 # ማቴ. 26፥14-16፤ ማር. 14፥10-11። ወቦአ ሰይጣን ውስተ ልበ ይሁዳ አስቆሮታዊ ዘእምዐሠርቱ ወክልኤቱ ኍልቁ። 4ወሖረ ወተናገሮሙ ለሊቃነ ካህናት ወለጸሐፍት ዘከመ ያገብኦ ሎሙ። 5ወተፈሥሑ ወተሰናዐዉ ምስሌሁ ወተናገርዎ የሀብዎ ሠላሳ ብሩረ ወአስተኃለቁ ነገረ። 6ወየኀሥሥ ሣኅተ ያግብኦ ሎሙ እንዘ አልቦ ሰብእ።

በእንተ አስተዳልዎ ድራር ደኃሪት

7 # ዘፀ. 12፥1-27፤ ማቴ. 26፥17-25፤ ዮሐ. 13፥21-30። ወበጽሐት ዕለተ መጸለት አመ ይጠብሑ ፍሥሐ። 8ወይቤሎሙ እግዚእ ኢየሱስ ለጴጥሮስ ወለዮሐንስ ሑሩ ወአስተዳልዉ ለነ ፍሥሐ ዘንበልዕ። 9ወይቤልዎ በአይቴ ትፈቅድ ናስተዳሉ ለከ። 10ወይቤሎሙ በዊአክሙ ሀገረ ትረክቡ ብእሴ ዘይጸውር ጻሕበ ማይ ወትልውዎ ኪያሁ ኀበ ቦአ ቤተ። 11ወበልዎ ለበዓለ ውእቱ ቤት ይቤለከ ሊቅ አይቴኑ ቤት ኀበ እበልዕ ፍሥሐ ምስለ አርዳእየ። 12#ማር. 14፥15። ወውእቱ ያርእየክሙ ጽርሐ ዐቢየ ወንጹፈ ወሥርግወ ወበህየ አስተዳልዉ ለነ። 13ወሐዊሮሙ ረከቡ በከመ ይቤሎሙ ወአስተዳለዉ ፍሥሐ።

በእንተ ሠሪዐ ቅዱስ ቍርባን

14 # ማቴ. 26፥26-30፤ ማር. 14፥22-26። ወሶበ ኮነ ጊዜሁ ረፈቀ እግዚእ ኢየሱስ ወዐሠርቱ ወክልኤቱ ሐዋርያቲሁ ምስሌሁ። 15ወይቤሎሙ ፈቲወ ፈተውክዎ ለዝንቱ ፋሲካ እብላዕ ምስሌክሙ ዘእንበለ ይብጽሐኒ ሕማምየ። 16#13፥29። እብለክሙ ባሕቱ ከመ ኢይበልዕ እንከ እምኔሁ እስከ ይትፌጸም በመንግሥተ እግዚአብሔር። 17ወተመጠወ ጽዋዐ ወአእኰተ ወይቤ ንሥኡ ዘንተ ወተካፈልዎ ኵልክሙ። 18#ማቴ. 26፥29። እብለክሙ ኢይሰቲ እንከ እምዝንቱ ፍሬ ወይን እስከ ትመጽእ መንግሥተ እግዚአብሔር ።#ቦ ዘይቤ «እስከ አመ እሰትዮ ሐዲሰ በመንግሥተ እግዚአብሔር» 19#1ቆሮ. 11፥23። ወነሥአ ኅበስተ ወአእኲቶ ፈተተ ወወሀቦሙ ወይቤሎሙ ዝንቱ ውእቱ ሥጋየ ዘይትወሀብ በእንቲኣክሙ ለቤዛ ብዙኃን ወከመዝ ግበሩ ተዝካርየ በእንቲኣየ። 20#ዘፀ. 24፥8፤ ኤር. 31፥31-34፤ ዕብ. 12፥24። ወከማሁ ጽዋዐኒ እምድኅረ ተደሩ ይቤሎሙ ዝንቱ ጽዋዕ ዘሐዲስ ሥርዐት ደምየ#ቦ ዘይቤ «ዘበደምየ» ውእቱ ዘይትከዐው በእንቲኣክሙ ወበእንተ ብዙኃን።

በእንተ ትእምርት በዘያገብኦ

21ወባሕቱ ናሁ እዴሁ ለዘያገብአኒ ምስሌየ ውስተ ማእድ። 22#መዝ. 40፥9። ወወልደ ዕጓለ እመሕያውሰ የሐውር በከመ ተሠርዐ በእንቲኣሁ ወባሕቱ አሌ ሎቱ ለውእቱ ብእሲ ዘበውስተ እዴሁ ይትሜጠውዎ ለወልደ ዕጓለ እመሕያው። 23ወተባሀሉ በበይናቲሆሙ አርዳኢሁ መኑ እንጋ ውእቱ እምኔሆሙ ዘዘንተ ይገብር።

በእንተ ትሕትና

24 # 9፥46፤ ማቴ. 18፥1፤ ማር. 9፥34። ወእምዝ ተዋክሑ በበይናቲሆሙ እንዘ ይብሉ መኑ እንጋ የዐቢ እምኔሆሙ። 25#ማቴ. 20፥26፤ ማር. 10፥42። ወይቤሎሙ ነገሥቶሙ ለአሕዛብ ይኴንንዎሙ ወይቀንይዎሙ ወመኳንንቲሆሙ ረዳእያነ ይብልዎሙ። 26#ፊልጵ. 2፥3፤ 1ጴጥ. 5፥3-6። ወለክሙሰ አኮ ከመዝ አላ ዘየዐቢ እምኔክሙ ይኩንክሙ ከመ ዘይንእስ ወሊቅኒ ይኩን ከመ ላእክ። 27#ዮሐ. 13፥4-14። መኑ ውእቱ ዘየዐቢ ዘይረፍቅኑ ወሚመ ዘይትለአክ አኮኑ ዘይረፍቅ ወአንሰ ናሁ ከመ ላእክ በማእከሌክሙ። 28#18፥28። ወአንትሙሰ ባሕቱ እለ በእንቲኣየ ተዐገሥክሙ ምስሌየ በሕማምየ። 29#ራእ. 3፥21። አነኒ አስተዳሉ ለክሙ መንግሥተ በከመ ሊተ ወሀበኒ አቡየ። 30ከመ ትብልዑ ወትስተዩ በማእድየ በመንግሥትየ ወትነብሩ ዲበ መናብርት ወትኴንኑ ዐሠርተ ወክልኤተ ሕዝበ እስራኤል።

በእንተ ጽንዐ ሃይማኖት

31 # ማቴ. 26፥31-35፤ ዮሐ. 13፥26-38፤ 1ጴጥ. 5፥8። ወይቤሎ እግዚእ ኢየሱስ ለስምዖን ስምዖን ስምዖን ናሁ ስኢለ ሰአለ ሰይጣን የኀንፅፅክሙ ወየኀንፍጽክሙ ከመ ዐለስ። 32#ዮሐ. 17፥9-21። ወአንሰ ሰአልኩ በእንቲኣክሙ ከመ ኢይድክም ሃይማኖትክሙ#ቦ ዘይቤ «... በእንቲኣከ ከመ ኢይድክም ሃይማኖትከ» ወአንተኒ ተመዪጠከ ጸንዖሙ ለአኀዊከ። 33#ዮሐ. 13፥37። ወይቤሎ እግዚኦ አንሰኬ ጥቡዕ ለሐዊር ምስሌከ ውስተ ኢየሩሳሌም እመኒ ለተሞቅሖ ወእመኒ ለመዊት። 34ወይቤሎ እብለከ ጴጥሮስ ዮም ዘእንበለ ይንቁ ዶርሆ ሥልሰ ትክሕደኒ ከመ ዘኢተአምረኒ። 35#9፥3፤ 10፥4፤ ማቴ. 10፥9-10፤ ማር. 6፥8-9። ወይቤሎሙ አመ ፈነውኩክሙ ዘእንበለ ቍናማት ወጽፍነት ወአሣእን ቦኑ ዘተጸነስክሙ። 36ወይቤልዎ አልቦ ወይቤሎሙ ይእዜሰኬ ዘቦ ቍናማት ይንሣእ ሎቱ ወከማሁ ዘሂ ጽፍነት ወዘሰ አልቦ መጥባሕት ይሢጥ ልብሶ ወይሣየጥ ሎቱ መጥባሕተ። 37#ኢሳ. 53፥12። እብለክሙ ከመ ይበጽሐኒ ዘጽሑፍ ወይትፌጸም በላዕሌየ ዘይብል ምስለ ኃጥኣን ተኈለቈ ወኵሉ ዘበእንቲኣየ ይትፌጸም። 38ወይቤልዎ እግዚኦ ነዋ ሀለዉ ኀቤነ ክልኤቱ መጣብሕ ዝየ ወይቤሎሙ የአክለክሙ እንከሰ።

ዘከመ ጸለየ እግዚእ ኢየሱስ በደብረ ዘይት

39 # ማቴ. 26፥36-46፤ ማር. 14፥32-42። ወወፂኦ ሖረ በከመ ያለምድ ይጸሊ ደብረ ዘይት ወተለውዎ አርዳኢሁ። 40ወበጺሖ ህየ ይቤሎሙ ጸልዩ ከመ ኢትባኡ ውስተ መንሱት። 41ወተአተተ እምኔሆሙ መጠነ ሙጋረ እብን ወሰገደ ወጸለየ። 42እንዘ ይብል አባ ለእመ ትፈቅድ አግኅሦ ለዝንቱ ጽዋዕ እምኔየ ወባሕቱ ፈቃደ ዚኣከ ይኩን ወአኮ ፈቃደ ዚኣየ። 43#1ነገ. 19፥5። ወአስተርአዮ መልአከ እግዚአብሔር እምሰማይ ዘይጼንዖ። 44#ዮሐ. 18፥1-4፤ ዕብ. 2፥14-15። ወፈርሀ ወአውተረ ጸልዮ ወኮነ ሐፉ ከመ ነጸፍጻፈ ደም ዘይወርድ ውስተ ምድር። 45ወተንሢኦ እምኀበ ይጼሊ ሖረ ኀበ አርዳኢሁ ወረከቦሙ እንዘ ይነውሙ እምኀዘን። 46ወይቤሎሙ ምንትኑ ያነውመክሙ ተንሥኡ ወጸልዩ ከመ ኢትባኡ ውስተ መንሱት።

በእንተ ግብአቱ ውስተ እደ አይሁድ

47 # ዮሐ. 18፥3-11። ወእንዘ ዘንተ ይብሎሙ በጽሑ ሕዝብ ወይሁዳ አሐዱ እምዐሠርቱ ወክልኤቱ አርዳኢሁ ይመርሖሙ ወቀርበ ኀቤሁ ለእግዚእ ኢየሱስ ወሰዐሞ ወዝ ውእቱ ትእምርት ዘወሀቦሙ ወይቤሎሙ ዘሰዐምክዎ ውእቱ ኪያሁ አኀዙ አጽኒዐክሙ።#ቦ ዘኢይጽሕፍ «ወዝ ውእቱ ትእምርት ዘወሀቦሙ ወይቤሎሙ ዘሰአምክዎ ውእቱ ኪያሁ አኀዙ አጽኒዐክሙ» 48#ማር. 14፥43-50፤ ዮሐ. 18፥3-12። ወይቤሎ እግዚእ ኢየሱስ ለይሁዳ በስዒምኑ ታገብኦ ለወልደ ዕጓለ እመሕያው አኮኑ ከመ ታቅትሎ።#ቦ ዘኢይፍጽሕፍ «አኮኑ ከመ ታቅትሎ» 49ወርእዮሙ እለ ምስሌሁ ይቤልዎ ለእግዚእ ኢየሱስ እግዚኦ ትፈቅድኑ ንዝብጦሙ በመጥባሕት። 50ወዘበጦ አሐዱ እምኔሆሙ ለገብረ ሊቀ ካህናት ወመተሮ እዝኖ ዘየማን። 51ወአውሥአ እግዚእ ኢየሱስ ወይቤሎ ኅድግ ዘንተሰ ወገሠሦ እዝኖ ሶቤሃ ወአሕየዎ። 52ወይቤሎሙ እግዚእ ኢየሱስ ለእለ መጽኡ ኀቤሁ የአኀዝዎ ሊቃነ ካህናት ወመገብተ ምኵራብ ወረበናት ከመ ሰራቂኑ ተአኀዙኒ መጻእክሙ ምስለ መጣብሕ ወዕፀው። 53#19፥47፤ 21፥37፤ ዮሐ. 7፥30፤ 8፥20። ወእንዘ ኵሎ አሚረ ሀለውኩ ምስሌክሙ በምኵራብ እዴክሙ ጥቀ ኢሰፋሕክሙ ላዕሌየ ወባሕቱ ዝንቱ ውእቱ ሰዓትክሙ ወሥልጣኑ ለመኰንነ ጽልመት።

ዘከመ ክሕዶ ጴጥሮስ ወነስሐ

54 # ማቴ. 26፥69-75። ወአኀዝዎ ወወሰድዎ ቤተ ሊቀ ካህናት ወተለዎ ጴጥሮስ እምርኁቅ። 55#ዮሐ. 18፥15-28። ወአንደዱ እሳተ ማእከለ ዐጸድ ወነበሩ ወጴጥሮስኒ ነበረ ምስሌሆሙ ማእከሎሙ። 56ወርእየቶ ወለት እንዘ ይነብር መንገለ በርህ ወተጠየቀቶ ወትቤ ዝኒ ምስሌሁ ሀሎ። 57ወክሕደ ወይቤላ ብእሲቶ ኢየአምሮ ለዘትብሊ። 58ወእምድኅረ ሕቅ ርእዮ ካልእ ወይቤሎ አንተሂ እምኔሆሙ አንተ ወይቤሎ ጴጥሮስ አንተ ብእሲ ኢኮንኩ። 59ወኀሊፎ መጠነ አሐቲ ሰዓት አጥወቆ አሐዱ ካልእ እንዘ ይብል አማን ዝንቱሂ ምስሌሁ ሀሎ ወገሊላዊ ውእቱ ብእሲሁ። 60ወይቤሎ ጴጥሮስ አንተ ብእሲ ኢየአምሮ ለዘትብል ወእንዘ ውእቱ ይትናገር ዘንተ ነቀወ ዶርሆ ሶቤሃ። 61ወተመይጠ እግዚእ ኢየሱስ ወነጸሮ ለጴጥሮስ ወተዘከረ ጴጥሮስ ቃሎ ለእግዚእነ ዘይቤሎ ሥልሰ ትክሕደኒ ዮም ዘእንለ ይንቁ ዶርሆ። 62ወወፂኦ አፍኣ ጴጥሮስ በከየ ብካየ መሪረ።

ዘከመ ተሣለቁ አይሁድ ላዕለ እግዚእ ኢየሱስ

63 # ማር. 14፥65። ወዕደውኒ እለ አኀዝዎ ለእግዚእ ኢየሱስ ኮኑ ይሣለቁ ላዕሌሁ ወይዘብጥዎ። 64ወይገለብብዎ ወይጸፍዕዎ ገጾ ወይሴአልዎ ወይብልዎ ተነበይ ለነ መኑ ውእቱ ዘጸፍዐከ። 65ወባዕደኒ ብዙኀ ይቤልዎ እንዘ ይፀርፉ ላዕሌሁ።

በእንተ ቀዊሞቱ ለእግዚእ ኢየሱስ ውስተ ዓውድ

66 # ማቴ. 26፥59-66፤ ዮሐ. 18፥19-24። ወጸቢሖ ተጋብኡ ሊቃነ ካህናት ወጸሐፍት ወሊቃናተ ሕዝብ ወወሰድዎ ውስተ ዐውዶሙ። 67ወይቤልዎ እመ አንተሁ ክርስቶስ ንግረነ ገሃደ ወይቤሎሙ እመኒ አይዳእኩክሙ ኢተአምኑኒ። 68ወእመኒ ተስእልኩክሙ ኢትነግሩኒ ወኢሂ ተኀድጉኒ። 69#ማር. 14፥62። ወባሕቱ እምይእዜሰ ይነብር ወልደ ዕጓለ እመሕያው በየማነ ኀይለ እግዚአብሔር ። 70ወይቤልዎ ኵሎሙ አንተኑ እንከ ውእቱ ወልደ እግዚአብሔር ወይቤሎሙ አንትሙ ትብሉ ከመ አነ ውእቱ ወልደ እግዚአብሔር ። 71ወይቤሉ ምንተ እንከ ንፈቅድ ሰማዕተ በእንቲኣሁ ናሁ ለሊነ ሰማዕነ እምአፉሁ።

موجودہ انتخاب:

ወንጌል ዘሉቃስ 22: ሐኪግ

سرخی

شئیر

کاپی