matta 5
5
almmud l‑lmasiḥ ġ‑iggi n‑uwrir
1lliġ iẓra yasuɛ mddn ggutnin uškan‑d s‑dars, iġli s‑yan‑uwrir iskiws, munn‑d fllas imḥḍarn‑ns. 2ibdu ar‑tn‑isslmad yini: 3«imbarkin ad‑gan ġwilli ssḥssanin is‑ur‑gin yat, ašku ntni a‑mi‑tlla‑tgldit n‑ignna. 4imbarkin ad‑gan ġwilli allanin, ašku ntni a‑mi‑ra‑isfiḍ rbbi imṭṭawn‑nsn. 5imbarkin ad‑gan ġwilli tṣbarnin, ašku ntni a‑ra‑išškšm rbbi s‑kullu timih̬ar‑ns. 6imbarkin ad‑gan ġwilli yaġ laẓ ula irifi i‑ma‑irḍan rbbi, ašku ntni a‑ra‑išbɛ. 7imbarkin ad‑gan ġwilli tḥnnunin ġ‑wiyyaḍ, ašku ntni a‑f‑ra‑d‑iḥnnu rbbi. 8imbarkin ad‑gan ġwilli dar ul iġusn, ašku ntni a‑ra‑iẓr rbbi. 9imbarkin ad‑gan ġwilli skarnin sslamt, ašku ntni a‑ra‑ig rbbi d‑tarwa‑ns. 10imbarkin ad‑gan ġwilli trfufunnin f‑ssibt n‑ma‑irḍan rbbi, ašku ntni a‑mi‑tlla‑tgldit n‑ignna. 11imbarkin a‑tgam iġ‑kʷn‑rgmn mddn ssrfufnn‑kʷn inin fllawn kullu ma‑yʷh̬šnn s‑tkrkas f‑ssibt n‑ma‑tgam winu. 12thnnayat tfrḥm bahra, ašku tggut lbaraka lli‑rad‑awn‑yili ġ‑ignna. han ġmkan ad‑ssrfufnn ula lanbiya lli‑kʷn‑d‑zwarnin.
lmɛna n‑tisnt d‑tifawt
13«kunni tgam tisnt n‑ddunit. walaynni iġ‑tlmus tisnt ma‑s‑ra‑stti‑tssmarġm? ur‑sul‑tgi i‑yat. ra‑stt‑in‑luḥn mddn ġ‑brra akʷln fllas. 14kunni tgam tifawt n‑ddunit. tamdint nna‑illan f‑iggi n‑uwrir ur‑tẓḍar a‑tntl. 15ur‑a‑ssrġan mddn lqndil a‑t‑in‑srsn ġ‑ddu lɛbrt, walaynni f‑iggi n‑mani yattuyn a‑f‑a‑t‑in‑srasn baš ad‑isfiwn kullu ayt‑tgmmi. 16ġmkad a‑s‑d‑iqqan tifawt‑nnun a‑tisfiw ġ‑lgddam n‑mddn, baš ad‑ẓrn afulki lli‑tskarm alġn babatun lli‑illan ġ‑ignna.
almmud f‑ššrɛ n‑musa
17«ad‑ur‑tġalm is‑d‑uškiġ ad‑ssittiġ ššrɛ n‑musa ula arratn l‑lanbiya. ur‑d‑uškiġ a‑tn‑ssittiġ. uškiġ‑d a‑tn‑kmmlġ. 18lḥqq a‑rad‑awn‑iniġ, kullu mad‑qaman ignwan d‑wakal ur‑ra‑yitti kra l‑lḥrf nġd kra n‑tnqiṭṭ zġ‑ššrɛ ard yafu kullu ma‑gis‑illan. 19wanna issunfn kra l‑luṣit imẓẓin zġ‑luṣiyat‑ad n‑ššrɛ isslmd i‑mddn ad‑as‑anfn, ra‑ig nttan wad kullu imẓẓin ġ‑tgldit n‑ignna. imma wanna iskarn s‑luṣiyat‑ad isslmd mddn ad‑srsnt‑skarn, ra‑ig nttan wad imqqurn ġ‑tgldit n‑ignna. 20rad‑awn‑iniġ, iġ‑ur‑trḍim rbbi uggʷar n‑imslmdn n‑ššrɛ d‑ifarisin ur‑akkʷ‑ra‑tiẓḍarm a‑tkšmm s‑tgldit n‑ignna.
almmud f‑taẓit d‑uṣraḍ
21«tsfldm is‑inna musa i‑willi zrinin ‹a‑ur‑tnġt. wanna inġan, ra‑fllas‑ittut lḥukm.› 22imma nkki rad‑awn‑iniġ, kullu wanna ikurhan gʷmas, illa fllas lḥukm. d‑wanna irgmn gʷmas iqqan‑t‑id a‑izri zġ‑lmḥkama, d‑wanna‑yas‑innan ‹kiyi wašš a‑tgit› isthlla lɛafit n‑jhnnama. 23iġ‑tiwit kra n‑twafka s‑tgmmi n‑rbbi tswangmd‑d is‑tskrt kra yʷh̬šnn ġ‑gʷmak, 24fl‑n tawafka‑nnk ġ‑tama n‑uẓru n‑tġrsi, tddut tṣalḥt d‑gʷmak, twrrid‑d ilmma tfkt tawafka‑nnk i‑rbbi. 25iġ‑ak‑iṣrḍ kra n‑yan, mšaškad‑d dids ġ‑uġaras ur‑ta‑tlkimm lmḥkama, a‑ur‑k‑in‑idḥi‑umṣraḍ‑nnk i‑lqaḍi, idḥi‑k lqaḍi i‑umh̬zni, iluḥ‑k‑in ġ‑lḥbs. 26lḥqq a‑rad‑ak‑iniġ, ur‑ra‑di‑tffuġt zġ‑ġin ard tfrut taqaritt iggʷran.
almmud f‑zzna
27«tsfldm is‑inna musa ‹a‑ur‑tznut.› 28imma nkki rad‑awn‑iniġ, wanna issmaqqln ġ‑kra n‑tmġart išthu‑tt, han izna srs ġ‑uwl‑ns. 29iġ‑a‑k‑tssṭar tiṭ‑nnk tafasit, ssukf‑tt‑id tluḥt‑stt. yuf a‑k‑ih̬ṣṣa yan‑ugzzum ġ‑ddat‑nnk ula a‑n‑kullu‑ttyawgar ddat‑nnk ġ‑jhnnama. 30iġ‑a‑k‑issṭar‑ufus‑nnk afasi, bbi‑t tluḥt‑t. yuf a‑k‑ih̬ṣṣa yan‑ugzzum ġ‑ddat‑nnk ula a‑kullu‑tddu ddat‑nnk s‑jhnnama.
almmud f‑ṭṭlaq
31«inna‑daġ musa ‹wanna ifran i‑tmġart‑ns iqqan‑t‑id ad‑as‑ifk tabrat l‑lfra.› 32imma nkki rad‑awn‑iniġ, wanna ifran i‑tmġart‑ns f‑kra yaḍni bla zzna, hati irur‑tt a‑tznu. d‑wanna itahln tanna‑d‑ifran, han zzna ayn iskr.
almmud f‑tgallit
33«tsfldm is‑inna musa i‑willi zrinin ‹a‑ur‑tffuġt f‑maylli‑s‑tggullit s‑rbbi. illa fllak a‑tssafut tagallit‑nnk.› 34imma nkki rad‑awn‑iniġ, a‑ur‑ttgallam, la s‑ignna ašku iga lɛrš n‑rbbi, 35ula s‑ddunit ašku tga aẓru lli‑f‑isrs iḍarn‑ns, ula s‑urušalim ašku tga tamdint n‑ugllid imqqurn. 36ula tggullit s‑ih̬f‑nnk ašku ur‑tẓḍart a‑trart yan‑unẓaḍ a‑ig umlil nġd iḍili. 37illa fllawn a‑ig‑wawal‑nnun ‹iyah› nġd ‹uhu›. aynna tzuydm i‑mayan, han iblis a‑d‑ikka.
almmud f‑ṣṣbr
38«tsfldm is‑inna musa ‹tiṭ s‑tiṭ, ula ah̬s s‑wah̬s.› 39imma nkki rad‑awn‑iniġ, a‑ur‑tmmaġm d‑yan gigun iskrn ma‑yʷh̬šnn. iġ‑k‑yut yan f‑umadl afasi, gllb‑as‑n aẓlmaḍ. 40iġ‑ak‑iṣrḍ yan yiri ad‑ak‑yawi aqššab, fk‑as ula aslham. 41iġ‑k‑yumr kra n‑yan ad‑as‑tasit taġawsa‑ns yan kilimitr, ddu dids sin. 42wanna‑zgik‑iḍalbn, fk‑as. d‑wanna‑d‑yuškan ad‑as‑trḍlt, a‑ur‑ti‑trart bla yat.
ḥnnwat ġ‑inuwwašn‑nnun
43«tsfldm is‑inna musa ‹a‑tḥnnut ġ‑umddakkʷl‑nnk, tkrhut anuwwaš‑nnk.› 44imma nkki rad‑awn‑iniġ, ḥnnwat ġ‑inuwwašn‑nnun, tḍalbm rbbi a‑irḥm ġwilli‑kʷn‑ssrfufnnin. 45ġmkad a‑s‑ra‑tgm zund babatun lli‑illan ġ‑ignna, ašku ntta ar‑d‑issaqlay tafukt‑ns f‑willi ʷh̬šnnin ula f‑willi fulkinin, ar‑d‑yakka anẓar i‑willi skarnin s‑wawal‑ns ula ġwilli ur‑srs‑skarnin. 46iġ‑a‑ttḥnnum ġir ġ‑willi gigun tḥnnunin, mal‑lbaraka a‑rad‑awn‑yili? is‑urd ġmkan ad‑skarn ayt‑nkkas ula ntni? 47iġd ġir imddukkʷal‑nnun a‑da‑ttnsallamm, man afulki tskrm uggʷar n‑mddn yaḍni? is‑urd ġmkan ad‑skarn ula ġwilli ur‑ssinnin rbbi? 48imma kunni, illa fllawn a‑tfulkim s‑ufulki ikmmln, ġmklli kullu ifulki babatun n‑ignna.
موجودہ انتخاب:
matta 5: SHILNT10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament in Tashelhayt (Latin script) © United Bible Societies, 1998, 2010.
Robert Bernard Dann.
