يوحنا 4

أَطَّاس ن يِوْذَان زِي سَمَارْيَا تَامْنن زِي سِيذِيثْنغ عِيْسَى

1ئِسّن عِيْسَى بلِّي يفَرِّيسِيْين اَرِّين-د ڒخْبَار وَامِي د مَارْنِين غَارس يمحْضَارن يتْطهَّار-يثن س وَامَان كْتَار زِي يَحْيَى. 2وَلَكِن عِيْسَى س يِيخف نّس وَار يتْطهَّار شَا إِ يِوْذَان، ذ يمحْضَارن نّس إِݣ يݣِّين مَانَاينِّي. 3سّنِّي يفّغ زِي ثْمُوْرْث ن يَهُوْذِيَا، ئِرُوْح غَار ثْمُوْرْث ن لْجَالِيل. 4ئِتْخصَّا-يَاس إِ نتَّا اَذ يكّ خ ثْمُوْرْث ن سَمَارْيَا. 5ئِكَّا خ يِجّن ن ثنْدِينْت زِي سَمَارْيَا قَّارن-اَس سُوْخَار، زَّاث إِ ومَرْجع نِّي إِݣ يُوْشَا يَعْقُوْب إِ مِّيس يُوْسف. 6ذِنِّي اَنُو ن يَعْقُوْب. وَامِي عِيْسَى يُوْحڒ س وبْرِيذ اَݣ ؤُزْين ن نْهَار، ئِقِّيم غَار وَانُو نِّي ن يَعْقُوْب.

7‏-8ثُوْسَا-د يشْت ن ثمْغَارث زِي سَمَارْيَا اَذ تَايم اَمَان. ئِمحْضَارن ن عِيْسَى نِثْنِي تُوْغَا رُوْحن غَار ثنْدِينْت اَذ سْغن مِين غَا شّن. ينَّا-ٱس عِيْسَى إِ ثمْغَارْث نِّي: "ؤُش-اَيِي اَذ سْوغ."

9ثنَّا-ٱس ثمْغَارْث نِّي: "شك ذ اَئِسْرَائِيلِي، نش ذ ثَسَمَارِيث. مَامّش ذَاش ثخْڒق شك ثتَّارذ-اَيِي اَذ تسْوذ؟" (إِيوَا يسْرَائِيلِيْين قَا وَار تمْصُرُوْفن شَا اَك يِوْذَان ن سَمَارْيَا.)

10ينَّا-ٱس عِيْسَى: "مَعْلِيك شم ثسّْنذ لْهَدِيَا ن أَربِّـي ثسّْنذ مِين عْنِيغ نش إِي ذَام يقَّارن ؤُش-اَيِي اَذ سْوغ، أَتَاف ثتَّارذ-اَيِي شم اَمَان اَذَام ؤُشغ اَمَان ن ثُوْذَارْث."

11ثنَّا-ٱس: "آ سِيذِي، وَار غَارك شَا مِينْزِي غَا ثَايْمذ. أَنُو-يَا يُوْدْجغ، مَانِيس د غَا ثَاوِيذ اَمَان نِّي ن ثُوْذَارْث؟ 12جدِّيثْنغ يَعْقُوْب يُوْشَا-ٱنغ اَنُو-يَا، ئِسْوَا زَّايس نتَّا س يِيخف نّس ذ ثَارْوَا نّس ذ ڒبْهَايم نّس. مَا ثْحسّْبذ يخف نّش كْتَار زَّايس؟"

13ئِنْدق-د عِيْسَى ينَّا-ٱس: "مَارَّا ونِّي غَا يسْون زݣ وَامَان-أَ اَتَاف اَذ يفَّاذ عَاوذ. 14وَلَكِن ونِّي غَا يسْون اَمَان إِي ذَاس غَا ؤُشغ نش اَتَاف وَار يتْفِيذِي شَا عمَّارْص. أَمَان إِي ذَاس غَا ؤُشغ نش اَذ ذوْڒن ذَايس اَمشْنَاو يجّن ن ڒْعُنْصَر اَزَّايس ثسْفِي ثُوْذَارْث ن ڒبْدَا."

15ثنَّا-ٱس ثمْغَارْث نِّي: "آ سِيذِي، ؤُش-اَيِي اَمَان نِّي حمَا وَار تْفِيذِيغ شَا، وَار د تِيسغ شَا وَار تَايْمغ شَا اَمَان سَّانِيتَا."

16ينَّا-ٱس عِيْسَى: "رُوْح ڒَاغَا-د إِ ورْيَاز نّم، ذْوڒ-د ذَانِيتَا."

17ثنَّا-ٱس ثمْغَارْث نِّي: "وَار غَاري بُو اَرْيَاز."

ينَّا-ٱس عِيْسَى: "وَاه، شم ثسِّيوْڒذ نِيشَان وَامِي ثنِّيذ وَار غَارِي بُو اَرْيَاز، 18مِينْزِي ثُوْوِيذ خمْسَا ن يرْيَازن. أَرْيَاز نِّي مِيكذ تْعِيشذ ڒخُّو وَار يدْجِي بُو ذ اَرْيَاز نّم. إِيوَا غَارم صَّح ذِي مِين ثنِّيذ."

19ثنَّا-ٱس ثمْغَارْث نِّي: "آ سِيذِي، تْوَاڒِيغ شك ذ نَّبي. 20ڒجْذُوْذ نّغ عبّْذن أَربِّـي ذݣ وذْرَار-أَ، كنِّيو يسْرَائِيلِيْين ثقَّارم قَا يتْخصَّا أَ نعْبذ ذݣ ؤُمْشَان ن لْقُدْس."

21ينَّا-ٱس عِيْسَى: "تِيقَّا-ٱيِي آ ثَمْغَارْث، أَذ د تَاس يجّن ن ڒْوقْث اَتَاف كنِّيو وَار ثْعبّْذم شَا بَابَا ؤُڒَا ذݣ وذْرَار-أَ ؤُڒَا ذِي لْقُدْس. 22كنِّيو ثْعبّْذم ونِّي وَار ثسِّينم شَا، نشِّين نْعبّذ ونِّي إِي نسّن مِينْزِي اَسنْجم يكَّا-د زݣ يسْرَائِيلِيْين. 23وَلَكِن اَذ د تَاس ڒْوقْث اَقَا ڒخُّو ثُوْسَا-د، مَعْلِيك يِنِّي يعبّْذن نِيشَان اَتَاف اَذ عبّْذن بَابَا س لْحَقِيقَا ذ اَرُّوْح. ذ يِيْنَا إِي خف يرزُّو بَابَا. 24أَربِّـي نتَّا ذ اَرُّوْح، يِنِّي إِي ث يعبّْذن، يتْخصَّا-يَاسن اَث عبْذن س لْحَقِيقَا ذ اَرُّوْح."

25ثنَّا-ٱس ثمْغَارْث نِّي: "نش قَا سّْنغ اَذ د يَاس لْمَسِيَا، قَّارن-اَس لْمَسِيح. خْمِي د غَا يَاس اَذَانغ يِينِي كُڒْشي."

26ينَّا-ٱس عِيْسَى: "قَا ذ نش إِي كِذم يسَّاوَاڒن."

27وَامِي د عقْبن يمحْضَارن نّس، تْعجّْبن وَامِي ث ؤُفِين يسَّاوَاڒ اَك يِجّن ن ثمْغَارْث. وَلَكِن وَار ذَاس ينِّي ؤُڒَا ذ يجّن مِين غَارس ثْرزُّوذ غَار ثَا؟ نِغ، مَايمِّي إِي كِذس ثسَّاوَاڒذ؟

28ثجَّا ثمْغَارْث نِّي اَقْذِيح#4‏.28 أَقْذِيح نتَّا ذ ثَݣمْبُوْرْث نِغ ذ ثَقدْجَاڒْث. نّس ثْرُوْح غَار ثنْدِينْت، ثنَّا-ٱسن إِ يوْذَان: 29"أَرَاحم-د اَذ تࢲرم يجّن ن ورْيَاز ينَّا-ٱيِي مَارَّا مِين ݣِّيغ. يمْكن ذ لمَسِيح نِغ؟" 30فّْغن يِوْذَان نِّي زِي ثنْدِينْت رُوْحن غَارس.

31ذِي ڒْوقْث نّي قَّارن-اَس يمحْضَارن آ لْمُعَلِّم، ٱشّ!

32وَلَكِن نتَّا ينَّا-ٱسن: "غَارِي مِين تتّغ، كنِّيو وَار ث ثسِّينم شَا."

33ئِمحْضَارن نّس سّقْسَان اَيَاوْيَا مَا يُوْوِي-اَس-د حَدّ مِين غَا يشّ؟

34ينَّا-ٱسن عِيْسَى: "ڒْمَكْلَا ينُو اَذ خذْمغ مِين يخس ونِّي ذَايِي د يسّكّن اَذ كمّْڒغ ڒْخذْمث نّس. 35غَارْوم يجّن ن لْمِثَال يقَّار: منْبَعْد إِ اَرْبعَا ن شْهُوْرَاث اَذ د تَاس ڒْوقْث ن ومْجَار. نش اَذَاوم ينِيغ: رزْمث ثِيطَّاوِين نْوم خْزَارث يمَرْجعِيون، ثُوْوض-د ڒْوقْث ن ومْجَار. 36ونِّي يمجَّارن اَذ ييْسِي تخْڒِيسث نّس يجمّع ثَفدْجَاحْث إِ ثُوذَارْث ن ڒبْدَا، حمَا اَذ مُوْنن ذِي ڒفْرَاحث نْسن يِنِّي يزَرّْعن ذ يِنِّي يمجَّارن. 37يعْنِي ذ صَّح مِين يقَّار لْمِثَال: ئِجّن يزرّع، ئِجّن يمجَّار. 38نش سّكّغ-د كنِّيو اَذ تمْجَارم مَانِي وَار ثْزرْعم شَا. ئِنّغْنِي زرْعن، كنِّيو ثسْتنْفَعم زِي ڒْخذْمث نْسن."

39أَطَّاس ن يِوْذَان زِي جِّهث ن سَمَارْيَا ؤُمْنن زِي عِيْسَى وَامِي ثشْهذ ثمْغَارْث نِّي ثنَّا-ٱسن قَا ينَّا-ٱيِي مَارَّا مِين ݣِّيغ. 40وَامِي إِي غَارس د ؤُسِين يِوْذَان زِي سَمَارْيَا عَرْضن-ث اَكِذْسن يقِّيم. سّنِّي يقِّيم اَكِذْسن يُوْمَاين ذِنِّي. 41وَامِي سْڒِين اَوَاڒ ن عِيْسَى مَارْنِين يِوْذَان إِي زَّايس يُوْمْنن. 42نَّان-اَس إِ ثمْغَارْث نِّي نشِّين وَار نْتِيمن شَا ڒخُّو غِير عْلَاحْسَاب مِين ذَانغ ثنِّيذ شم، مِينْزِي يسِّيوڒ اَكِذْنغ س يِيخف نّغ أُو نشِّين نسّن بلِّي ذ صَّح ذ وَا إِݣ يسنْجَامن دُّنشْت.

سِيذِيثْنغ عِيْسَى يسْݣنْفَا مِّيس ن يِج ومْخَازْنِي

43منْبَعْد إِ يُوْمَاين يفّغ سّنِّي عِيْسَى، ئِرُوْح غَار ثْمُوْرْث ن لْجَالِيل. 44أُو نتَّا س يِيخف نّس يقَّار ؤُڒَا ذ يجّن ن نَّبِي مَا محْتَارم ذِي ثْمُوْرْث نّس. 45وَامِي يُوْوض غَار لْجَالِيل رحّْبن زَّايس يِوْذَان مِينْزِي نِثْنِي ࢲْرِين مَارَّا ثِمسْڒَايِين إِݣ يݣَّا ذِي ڒْعِيذ ذِي لْقُدْس. ؤُڒَا ذ نِثْنِي تُوْغَا حْضَارن ذِنِّي ذِي ڒْعِيذ.

46يُوْسَا-د عَاوذ غَار وبِيلَاج ن قَانَا ذِي ثْمُوْرْث ن لْجَالِيل مَانِي تُوْغَا يَارَّا اَمَان عَادِي ذ اَمَان ن وضِيڒ. أُو ذݣ وبِيلَاج ن كَفرْنَاحُوْم ذِنِّي يِجّن زݣ يمْخَازْنِيْين ن وزدْجِيذ يهْڒش مِّيس. 47أَمْخَازْنِي نِّي وَامِي د يَارَّا ڒخْبَار عِيْسَى يُوْسَا-د زِي ثْمُوْرْث ن يَهُوْذِيَا غَار ثْمُوْرْث ن لْجَالِيل، ئِرُوْح غَارس ينَّا-ٱس مَا كِذِي ثهْوِيذ حمَا اَذ تسْݣنْفِيذ ممِّي؟ قَا عْڒَاين اَذ يمّث.

48ينَّا-ٱس عِيْسَى: "كنِّيو، مَا وَار تِيمْنم شَا حتَّا ٱذ ثࢲرم لْمُعْجِيزَاث ذ لْبُرْهَانَاث؟"

49ينَّا-ٱس ومْخَازْنِي: "آ سِيذِي، يَالَّاه اَكِذِي ثهْوِيذ قْبڒ مَا ٱذ يمّث وحنْجِير ينُو."

50ينَّا-ٱس عِيْسَى: "رُوْح، أَقَا مِّيش يدَّر."

أَرْيَاز نِّي يُوْمن زݣ وَاوَاڒ نِّي إِي ذَاس ينَّا عِيْسَى أُوْشَا يرُوْح. 51ئِهوَّا-د نتَّا، مْسڒْقَان اَكِذس يخدَّامن نّس نَّان-اَس قَا اَحَرْمُوْش نّش يدَّر.

52ئِسّقْسَا-ثن ينَّا-ٱسن: "مَان ثْسَعَّات نِّي إِݣ يݣنْفَا؟"

نَّان-اَس: "غَار لْوَاحْذَا ن يِضنَّاظ اَݣ وعشِّي ثْرُوْح خَاس ثْمسِّي إِي ذَايس."

53ڒخْدّنِّي يُوْفَا بَابَاس قَا ذِي ڒْوقْث نِّي إِي ذَاس ينَّا عِيْسَى مِّيش اَذ يدَّر. يُوْمن نتَّا ذ مَارَّا اَيثْبَاب ن ثدَّارْث نّس. 54ذ ثَانِيتَا ذ لْمُعْجِيزَا وِيس ثْنَاين إِݣ يݣّا عِيْسَى زݣ وَامِي إِي د يفّغ زِي ثْمُوْرْث ن يَهُوْذِيَا غَار ثْمُوْرْث ن لْجَالِيل.

موجودہ انتخاب:

يوحنا 4: ريف

سرخی

شئیر

کاپی