मत्ती 3
3
कु-रु़दु़म ग्वाक्पा यूहन्नाका लाम्दी बनेबु़डु़म
(मर्कूस १:१-८; लूका ३:१-१८; यूहन्ना १:१९-२८)
1चक्थो़वा यहूदियाडाम र्याङगो-र्याङगोडा कु-रु़दु़म ग्वाक्पा यूहन्नाका आरे र्वाक्तो जो़पा-सेला थो़बेन्मु चो़म्डु़, 2“छु़ललाम ख्लोन्सिट्नी, हेङालोने पाह्री-किब्दी#३:२ पाह्री-किब्दी ने माम्चु़नीका साखाम थो़मिमिम माम्चु़नीकु किब्दी वो र्वामी। रोम्फामुङा खाप्डु़म बु।”#मत्ती ४:१७; मर्क १:१५ 3ओराम यूहन्नाकु दुथाम माम्चु़नीलाम-जेपा यशैयाका आरे र्वाक्ताम बाइडा:
“र्याङगो-र्याङगोडा कोङनिम येत्तोङा लेडु़,
‘मिप्रङमाकु लाम्दी बनेबे,
उनीमा लाम्दी जो़पा बेजो़ला’।”#यशै ४०:३
4यूहन्नाका ऊँटकु सो़मकाम ये-सेम फस्थाल्ला, मा कम्मरडा कोक्तेकु खिम्खिरी खिम्स्थाल्ला। गुका रु़ नुङ ब्रेउ-खुदो पु़थाल्लु़।#२ राज १:८ 5यरूशलेम, खोत्ले यहूदिया नुङ यर्दन ब्लोकुकु होनो-आथो़म इलाकाडाम खोत्ले मु़चु़मिम यूहन्नाकाडा रोम्डी, 6मा मेर्मिमका बेम्डिम छु़लमिम सो़साका यर्दन ब्लोकुडा यूहन्नालामका कु-रु़दु़म रम्डी।
7फरिसीमिम नुङ सदुकीमिमगोडाम हापा मु़चु़मिम वो यूहन्नाकाडा कु-रु़दु़म रप्डा रोम्डिम ल्वास्तु़। मेम्मा यूहन्नाका मेर्मिमलाई बु़डु़मी, “लु-फेले बेपा ब्लो होप्माम मु़चु़नी, माम्चु़नीका बोमु खाप्मिमिम नियालामका वाङ दु़म्मु कोङनिमका गानीलाई ङिमसान्मु मेचाम्नी।#मत्ती १२:३४; २३:३३ 8मेम्मिमका इनी छु़लमिमलामका माम्चु़नीडा ख्लोन्सिट्निम रेम्बेपा खारी बेनी। 9‘गुकु ने अब्राहामकु चो़-चु़सु़ सो़, मेम्मिमका देन्दे मेल्वाकु’ र्वाक्पा इनी त्वाप-त्वापगोडा मेमिम्सिट्नी, हेङालोने गो गानीलाई र्वाङु, माम्चु़नीका ओर्मिम लुङकाम वो अब्राहामकु चो़-चु़सु़ प्रङमु चाम्मी।#यूह ८:३३ 10धक्सामिमकु फारगोयु़ खोका फल्मुङा खाप्डु़मिम बु। मेम्मिमका जो़पा मा मेसिट्पा खोत्ले धक्सा रु़प्मी, मा मुड्डा घ्रोमी।#मत्ती ७:१९; लूक ३:९
11“गो ने गानीलाई इनी छु़लमिमलाम माम्चु़नीडा ख्लोसिबेट्पा कु-रु़दु़म ग्वानिनी, लावो गोडाम चङडा रोक्पा मु़चु़ ने गोडाम वो डोक्पु यु़मनुङमा बुमी। गो ने उनीमा डु़ल्चो़ दु़म्साका उनीमा सो़लो़प कुर्मु वो मेघ्रेटपा बुङु। गुमीका गानीलाई माम्चु़नी-पेल नुङ मुकाम रु़दु़म#३:११ सेपा दु़म्बेट्पा रु़दु़म। ग्वानिमी। 12स्याक्पा उनी स्वाफेमका जेप्सेर स्यामुङा खाप्मिमिम बु। मेम्मा गुमीका उनी देल्फु जो़होमका छिमी मा उनी जेप्सेर छेदेनेमडा खोप्साका जु़ल्मी, लावो होक्ते ने हेल्लो वो मेसिपा मुगोडा चामी।”
येशूका कु-रु़दु़म रम्डिम
(मर्कूस १:९-११; लूका ३:२१-२२; यूहन्ना १:३२-३४)
13मेकोतिमा यूहन्नालामका कु-रु़दु़म रप्डा येशू गालीललामका यर्दन ब्लोकुडा रोम्डी। 14लावो यूहन्नाका आरे र्वाक्साका गुमीलाई कु-रु़दु़म मेग्वामु माल्लु़, “गानी डे गोलाई कु-रु़दु़म ग्वामु बासिक्पा ने, गानी हेङा कु-रु़दु़म रप्डा आमाडा रोनिम?”
15येशूका गुनुङ र्वाम्डी, “ओम्लो आरेङा बे, हेङालोने माम्चु़नीका बेनी र्वामिमिम खोत्ले बोमु बासी।” मेम्मा यूहन्नाका कु-रु़दु़म ग्वामु बिसिड्डा।
16येशूका कु-रु़दु़म रम्डिमा पाखाला लुङगेम्डी, मेकोतिलोङा पाह्री ह्वासिड्डा मा गुमीका माम्चु़नी-पेल तुक्तुकुर होङङा बेपा योक्तोङा लेट्पा मा गुमीडला गन्तोङा बेपा ल्वाम्डी। 17मेम्मा पाह्रीलामका कोङ लो़लामका आरे र्वाक्ता, “गो छो़म द्वाक्पुमिम ओराम आमा तारापाचो़, गुडाम गो छो़म गेर्सिक्पा बुङु।”#उत २२:२; भज २:७; यशै ४२:१; मत्ती १२:१८; १७:५
موجودہ انتخاب:
मत्ती 3: THUL
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc. All rights reserved.
