JAN 7
7
Jesu wi cyɛɛn pe ìn ba wì na
1Ki kruʔu ma, Jesu wi dáa nyari wa Galile klo ni le. Wi ìn dàʔa ta bì da nyari wa Jude klo ni le, mɛjɛn Juwifiyee pe lagwɔɔ pe dáa ki ca bùu kpo. 2Pa srɛʔɛ fɛti ŋa pé na yeri kajoʔo fɛti wi wlɛʔɛ ki gáa nori ge.#7:2 ma wèle wa Sraʔa 23:34; Lado 16:13 ni wè. 3Jesu wi cyɛɛn à poo po: «Ma jɛ̀, ma kɛri wa Jude klo ni le, jango ma ploʔofɛɛ pe ya ma kahranʔa nya ge kpo. 4Mɛjɛn ŋa wí ma cori hɛɛn poo cɛn ge, wi ín jé da wi kaʔa hanri ge hrama ni. Pa má na ki kaʔa hanri ge, kí ma yala ma de mà teri drunya hɛɛn pè bɛfu na.»
5Ali wi cyɛɛn pee pè tala pe ìn dà bo pe pá wí na kpɛn ki nyiŋi na ge. 6Jesu wɔ̀ɔ pé po: «Ki nyiŋi ki ìn je dyɛʔɛ ná ma kpɛn bí ki woʔo ga hanri ge. Di nyiri tì bɛfu tí ma yala yèé ma be. 7Drunya hɛɛn pe ìn gban bì yèé cɛ be. Di pé ma mi cɛ we, mɛjɛn mí na pe noʔo konmo kayoro nyu mà yo pe kahranʔa ké nyɛ tipeʔe. 8Yèé yee sye ki srɛʔɛ fɛti ma we. Ho na sye wa, mɛjɛn nyiŋi ga kí ma yala ná ma ge, ki ìn dyɛʔɛ kpɛn.»
9Nyiŋi ga na wi da gâ ki woʔo ga yo ge pe ma, wɔ̀ɔ ko wa Galile klo ni le.
Jesu wi krɛlɛ kpasyoro goro srɛʔɛ fɛti ma
10Di wi cyɛɛn pe gâ gɛri kɔ ge, ki kruʔu ma, Jesu wiì fanna wɔ̀ɔ jɛ mà kɛri wa. Àʔa hín bo wi ìn dàʔa hanri finmi na, di ki dá bo hrama ni. 11Juwifiyee pe lagwɔɔ pe dáa wi ca na hɔlɔ wa fɛti na we mà naʔa nyu mà yo: «Ki naŋa ŋa wí nyɛ hanbe?» 12Hɛɛn pe dáa nyu pè ní kaplɛmɛ ni wa janma ni me wi namyɛlɛ na le. À pèè ma naʔa nyu mà yo: «Hɛncɛnŋɛ wi.» À pèè ma naʔa nyu mà yo: «Ayo, wí na hɛɛn fanla.» 13Di, kiì nì kì bɛfu ní, pee wà nigbe ìn yraʔa kà yo finmi na wi namyɛlɛ na le, mɛjɛn pe dáa fyaʔa Juwifiyee pe lagwɔɔ na be.
14Fɛti wi nulala ni le, Jesu wɔ̀ɔ yâ je wa Nyɛʔɛlɛ li sràʔá go ni ge mà na hɛɛn krɛʔɛ be. 15Àʔa Juwifiyee pe lagwɔɔ fo be. À pe yo: «Ki naŋa wiʔí po mɛlɛ mâ ki kaʔa kè bɛfu cɛn, áʔa hín bo pe ìn joo krɛʔɛ ke ní ge.» 16Jesu wɔ̀ɔ pé po: «Mí na hɛɛn krɛʔɛ be kayoro da nì ge, na woro ban. Nyɛʔɛlɛ la lí ma na tun liì woro di. 17Nàʔa po na krɛʔɛmɛ mí ma jɛ wa Nyɛʔɛlɛ ma le, ná kiì ban, na lama womo mi yoo, hɛn ŋa wí ma cori bí da Nyɛʔɛlɛ li nadanma hanri me, pɔɔ ki cɛn. 18Ŋa wí na wi lama woro nyu de, ki woo wí na wì kpɔʔɔmo ca. Di ŋa wí bi da wi tunfɔlɔ kpɔʔɔmo ca ge ki woo wí nyɛ kanyɛmɛ fɔlɔ. Klomo wò nyɛ wí na. 19Mowisi wi ìn dà Nyɛʔɛlɛ li furu kayoro kan de ye ma yo? Àʔa hín bo yèé wà nigbe wò na ti kpɔʔɔ. Nyaʔa ma po á ye naʔa ca bì na kpo ge?» 20Hɛɛn à poo po: «Gbosyo nyɛ má ni. Han naʔa ca bì ma kpo?» 21Jesu wɔ̀ɔ pé po: «Mi dá kafonlo là hanri nigbe àʔa yè bɛfu fo.
22Di Mowisi pɔɔ da gáʔà yo ye kan mâ yo ye da yè pii lege bee pé nyɛ nabii be, yé naʔa hanri ali nàʔa ja bo fyonriwlɛʔɛ na ge. Ki woʔo ga ki ìn dà jɛ Mowisi wiì ma, di kí ma jɛ wò tokpɔɔ pee ma.#7:22 ma wèle wa Hli 17:10; Sraʔa 12:13 ni wè. 23Nàʔa po yé na nabii lege be fyonriwlɛʔɛ na, jango Mowisi wi furu kayoʔo kò ga jɔʔɔ, nyaʔa ma po á ye na nàʔà taʔa ná ni mâ yo mí ma hɛn wà pwɔʔɔ kmaʔa ceŋge fyonriwlɛʔɛ na ge?#7:23 ma wèle wa Jan 5:9 ni wè. 24Yò gáa kiti kon bì da yala ga nì yé na nyaʔa finmi na ge. Di ye da kiti sinŋi kon.»
Jesu wí nyɛ Nyɛʔɛlɛ li wofràa
25Ki nyiŋi na, à Jerusalɛmu kàʔà woo pèè naʔa nyu mà yo: «Ki woo ŋa wiì ban pé na ca bùu kpo ge yo? 26Welé, wí na nyu foroba nî, di pe ìn yo wí ni. Kana wò lagwɔɔ pé maʔa nya wí nyɛ Nyɛʔɛlɛ li wofràa kanyɛmɛ na yo. 27Di Nyɛʔɛlɛ li wofràa nòo gá ban nyiŋi ga na ge, hɛɛn wà wóo wi jɛhaʔa cɛn ge. Ɛɛn di, wòó wó mɛɛ ki woo ŋa wi jɛhaʔa cɛn ge.»
28Nyiŋi ga na Jesu wi dáa hɛɛn krɛʔɛ be wa Nyɛʔɛlɛ li sràʔá go ni ge, wɔ̀ɔ taʔara mà yo: «Yé ma na cɛn mà plɛn na jɛhaʔa ní ge kanyɛmɛ na yo? Àʔa hín bo mi ìn ban na fandaʔa ni. Di ŋa wí ma na tun ge wí nyɛ kanyɛmɛ fɔlɔ wi. Yèé ye ìn wi cɛn. 29Di domi mí moo cɛn mɛjɛn mí ma jɛ wa wiì ma. Wiì wi wí ma na tun naʔa ge.» 30Ki nyiŋi na, à pe naʔa ca bùu co. Di hɛn wɛ̀ ìn kyɛʔɛ pa wí na, mɛjɛn wi nyiŋi ki ìn dà bo kí ma no. 31Di wa janma ni me hɛɛn fafaʔabaa da bá wí na mà naʔa nyu mà yo: «Nyɛʔɛlɛ li wofràa nòo gá ban nyiŋi ga na ge, pɔɔ baa kafonŋoo hanri bì doro ki woo ŋa na we yo?»
Pé ma sorasiyee tun be mà yo pe ya Jesu co we
32 Farisiyee pèè gáʔà loʔo mâ yo janma hɛɛn pé na nyu pè ní kaplɛmɛ ni wi namyɛlɛ na, pee ní, sraʔá farafɛɛ kpandoo ní à pe pe sorasiyee tun jango pe yɔɔ cò. 33Ki nyiŋi na, Jesu wɔ̀ɔ yo: «Mí nyɛ naʔa ye nì bì nyiŋi cɛnri kɔ. Ki kruʔu ma, bì na hru bì gɛri ŋa krugu wi da ná tun ge. 34Nà mi gá ba gɛri, pa ye gà baa na ca, di yòo na nya. Mɛjɛn mí bi yà bo wa deʔe ga na ge, yòo gban bì no wa.» 35Ki nyiŋi na Juwifiyee à pe naʔa nyu pè ma mà yo: «Wí bi gɛri hanbe, wɔ́ɔ yo wo ìn bi gɔ̀ɔ nya adi ge? Kana wí bi gɛri wò kluʔu woo bee krugu pé ma craʔa wa Grɛkiyee ni be bì yà Grɛkiyee krɛʔɛ be yo? 36Wí maʔa yo mà yo: Wòó wó bi baa wi ca, di wòo bɔɔ nya, mà yo nɛ: Deʔe ga na wí bi yà bo ge, wòo gban bì no wa ge. Ki kayoro ti kɔ̀rɔ́ wí nyɛ nyaʔa ní?»
Nyuwyeʔe nyumu ma mí na fo ge
37Fɛti wlɛdanʔaŋa na ge, ga ki dá bo wlɛgbɔʔɔ gí mâ toro ti tɔ na de, Jesu wɔ̀ɔ jɛ mà yere mà taʔara mà yo: «Nàʔa po nyujɔʔɔ kí ma ŋa co, wi da ban nà krugu, wi ba jɔ.#7:37 ma wèle wa Sraʔa 23:36 ni wè. 38‹Hɛn ŋa wí bi ba ná na ge, nyumu ma mí na nyuwyeʔe kanʔa ge, pa mi da fo bì da nyini wa wi lama ni me nɛbo caple li,› nɛ pa Nyɛʔɛlɛ li sɛbɛ wí maʔa yo ge.»#7:38 ma wèle wa Esek 47:1; Sak 14:8 ni wè.
39Nyumu kayoro da Jesu wí yo ge, wi dáa nyu Nyɛʔɛlɛ li Nyìli li namyɛlɛ na, la pé bi ba da bee pé ma pa wí na ge. Di pe ìn dà bo pé ma li ta kpɛn ki nyiŋi na ge, mɛjɛn Jesu wi ìn dà bo wí ma wi kmara ta de kpɛn.
Hɛɛn pé ma konʔolo pè na Jesu wi kala na le
40Hɛɛn pe gâ ki kayoro loʔo de, ki nyiŋi na, à pèè mà yo: «Kayocɛnŋɛ gi. Ki woo ŋa wí nyɛ Nyɛʔɛlɛ leyoo, ŋa wó na hanni ge.»
41À pèè mà yo: «Nyɛʔɛlɛ li wofràa wi.» À pèè ma yo nɛ: «Nyɛʔɛlɛ li wofràa wòo gban bì jɛ wa Galile klo ni. 42Nyɛʔɛlɛ li sɛbɛ wí naʔa nyu mà yo Nyɛʔɛlɛ li wofràa wí bi ba jɛ Dafide kluʔu ni bì nyíni wa Bɛtelɛmu kàʔà ni, deʔe ga na pe dá Dafide he we.»#7:42 ma wèle wa 2Sam 7:12; Mis 5:1 ni wè.
43Hɛɛn pe honriri à ti taʔa mà konʔolo tì na wi kala na le. 44Pèè dá bo wa janma ni me mà cori pé buu co. Di pee ni be, wɛ̀ ìn kyɛʔɛ pa wí na.
Juwifiyee lagwɔɔ pe babama
45Ki nyiŋi na, sorasiyee à pe hru mà kɛri sraʔá farafɛɛ kpandoo krugu ní Farisiyee ní be. Ki woo bee à pe yâ pe sorasiyee yugu be mà yo: «Kí mɛlɛ á ye pan móò yaʔa wa ge?» 46Sorasiyee à pe pé po: «Kanyɛmɛ na, wo ìn jé hɛn wà nya wi da nyu nɛ pa ki naŋa ŋa wí na nyu pomo ma na ge.» 47Farisiyee à pe pé po: «Wí ma ye fanla kpo yo? 48Yè lagwɔɔ wà wi, ná kiì ban, Farisiyee wà ma pa wí na yo? 49Di ki janma ma mi ìn Nyɛʔɛlɛ li furu kayoro cɛn de, mí ma danŋa.» 50Ki nyiŋi na, Nikodɛmu, ŋa wi da glú mâ kɛri wa Jesu krugu we mâ po Farisiyee wà wi wí ni ge, wɔ̀ɔ pé po: 51«Wò furu kayoro tòo gban bì hɛn wà cɔlɔ kí po wo ìn ki hɛn wi kayoro loʔo, kí po wo ìn wi kahranʔa cɛn ge.» 52À poo po: «Galile klo woo wà wi má ni kpo yo? Ma ya hanri, ma wèlé wa Nyɛʔɛlɛ sɛbɛ ni we. Má bi yàʔa nya wa Nyɛʔɛlɛ leyoo wòo gban bì jɛ wa Galile klo ni le.» 53[Pè bɛfu à pe canmu mà kɛri pe kasyɛnrɛ ma de.
موجودہ انتخاب:
JAN 7: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire
