JAN 11
11
Lasare wi kùʔù kayoʔo
1Betani kàʔà naŋa wà dà bo yaŋa, à pè noo yeri Lasare, wi cɛpii Mari ní, ní Marite nì pe kàʔà kiì gi.#11:1 ma wèle wa Luk 10:39-39 ni wè. 2Mari wiì wi wi dá nudanʔa hùnmù wo wò fɔlɔ Jesu wi cyeʔe na ge mâ ke tuʔu wi na wi yujoro ní de. Lasare ŋa wi dá bo Mari wi conlo wɔ̀ɔ po yaŋa.#11:1-2 ma wèle wa Jan 12:3 ni wè. 3Wi cɛpii syɛn be à pe tun wa Jesu ma we mà yo: «Wò fɔlɔ, ma nagoro wí nyɛ yaŋa.» 4Jesu wi gâ ki woʔo loʔo ge, wɔ̀ɔ yo: «Ki yara da ti ìn buu kpo. Di tí ma pan jango hɛɛn pe ba Nyɛʔɛlɛ li kpangbanma nya me, pe nì pe Nyɛʔɛlɛ li Pyɔ wi kpangbanma nya me kpo ti fanŋa ni ge.»
5Marite nì, Mari ní, ní pe conlo Lasare nì pe dáa Jesu glanʔa we. 6Di nyiŋi ga na wi da gâ Lasare wi yara kayoʔo loʔo ge, wɔ̀ɔ wlɛrɛ syɛn kɔ wa deʔe ga na wi dá bo ge. 7Ki kruʔu ma, wɔ̀ɔ naʔa yo wi ploʔofɛɛ ma be mà yo: «Ye pan, wo hrù wo kɛri wa nɛ Jude klo ni le.» 8Wi ploʔofɛɛ à poo po: «Krɛʔɛfɔlɔ, kowlɛʔɛ ni, Juwifiyee pe dáa ki ca bì ma wa ŋglɛnrɛ ní. Nyaʔa ma po má yo má bi da sye wa nɛ ge?» 9Jesu wɔ̀ɔ pé po: «Lɛri pii kɛ̂ mà kɛ syɛn ban ŋa wí nyɛ wlɛbogo ge yo? Hɛn nòo da danri wa kpɛnmɛ na, wi ín je da grugu bì da dun, mɛjɛn wí na nyaʔa ki drunya ŋa wí kpɛnmɛ na me. 10Di hɛn ŋa wí bi da danri yeblimi ni ge, wi naa grugu, mɛjɛn kpɛnmɛ wò wa wi nî.» 11Pɔɔ gâ ki kayoro da yo de kɔ ge, ki kruʔu ma, wɔ̀ɔ pé po: «Wò nagoro Lasare wí nyɛ wa na ŋolo. Mí bi gɛri bì yɔ̀ɔ nyɛ́.» 12Wi ploʔofɛɛ à poo po: «Wo fɔlɔ, nàʔa po wí ma gban na ŋolo kɔ ge, wí bi bwɔʔɔ.» 13Jesu wi dá Lasare wi kùʔù kayoʔo yo wi ploʔofɛɛ ma be. Di pe ìn ki cɛn. À pe kɛ na honri màʔa nya nɛɛ ŋlonjɛnmɛ kayoʔo gi wí yo pé kan ge. 14Ki nyiŋi na, Jesu wɔ̀ɔ kí yo màʔa fligi pé kan mà yo: «Lasare wí ma ku. 15Kí nyɛ pronʔo yèé kan be mà domi glan we ceŋge ga na mi ìn dà bo wa ge, jango ye gbàn ye pà kmaʔa. Kiì nì kì bɛfu ní, ye pan wo kɛri wi deʔe na ge.» 16Ki nyiŋi na, Toma, ŋa pé na yeri Pigaan we, wɔ̀ɔ kí yo wi ploʔofɛnyɛɛ ma be mà yo: «Ye pan wo kɛri kpo, jango wo ya gù wa wò krɛʔɛfɔlɔ ní we.»
Jesu wí na kuu nyɛni be
17Nyiŋi ga na Jesu wi yâ no wa ge, wɔ̀ɔ kí nya pé ma Lasare le we kɔ wa fanʔa ni ge. Wɔ̀ɔ wlɛrɛ ticɛrɛ kɔ waʔa nî. 18Betani kàʔà nì, Jerusalɛmu nì pi ìn dà bo leʔe leʔe pì ní, di ki dá gban mà cilo pii tanri nyoʔo kɔ ge. 19Ki kala na, Jude klo woo fafaʔabaa da gɛri wa jango bì yà Marite nì, Mariyee fɛn be pe conlo wi kùʔù kala na le.
20Nyiŋi ga na Marite wi gáʔà loʔo mâ yo Jesu wí na pan ge, wɔ̀ɔ fɛ́ mà yɔ́ɔ̀ flin mà Mari yaʔa we wa go ni klɛnhaʔa. 21Marite wi gaâ flin Jesu ní we, wɔ̀ɔ wí po: «Na fɔlɔ, nàʔa po ma dí bo naʔa ge, na conlo wi ìn dì bî gu. 22Ali ŋaŋa ni ge, mí maʔa cɛn mà yo, nà ma yraʔa o yraʔa nyɛri Nyɛʔɛlɛ ma le, pa liʔi kân má ma.» 23Jesu wɔ̀ɔ wí po: «Ma conlo wí bi nyɛ̀ bì nyíni.» 24Marite wɔ̀ɔ wí po: «Mí maʔa cɛn mà yo nyiŋi ga na Nyɛʔɛlɛ lí bi ba kuu nyɛ bi pé yrigi naʔa drunya wi kɔwlɛʔɛ na ge, pɔɔ nà nyɛ́.»
25Jesu wɔ̀ɔ wí po: «Mi wi mí nyɛ kuu pe nyɛmanyinimi me mà po nyuwyeʔe. Hɛn ŋa wí bi ba ná na, pɔɔ bo nyuwyeʔe na, ali nòo ja gu ge. 26Hɛn ŋa wí nyɛ nyuwyeʔe na mâ po wí ma pa ná na ge, wi ìn bi gu adi. Má ma pa ki woʔo na ge yo?» 27Marite wɔ̀ɔ wí po: «Ee, na fɔlɔ, mí ma paʔa na mà yo mo má nyɛ Nyɛʔɛlɛ li wofràa we, Nyɛʔɛlɛ Pyɔ, ŋa pe dá yo wí bi ba ban naʔa drunya ni we.»
Jesu wi ma kpèlè
28Marite pɔɔ gâ ki kayoro yo de kɔ ge, wɔ̀ɔ kɛri kaʔa ni wi conlo Mari krugu we mà yáʔà yo wí kan kaplɛmɛ ni mà yo: «Wò krɛʔɛfɔlɔ wí ma pan. Wí na ma yeri.» 29Nyiŋi ga na Mari wi gâ ki woʔo ga loʔo ge, wɔ̀ɔ fyala mà jɛ na sye wa wì krugu. 30Jesu wi ìn da bo wi jé wa kpɛn kàʔà ni ge. Wi dá bo be adi deʔe ga na Marite wi da yɔ́ɔ̀ flin ge. 31Juwifiyee bee pe dá bo wa Mari ní we go ni mâ noo fɛn ge, pa pe da gɔ́ɔ̀ nya wí ma fyala mâ jɛ ná sye ge, à pe pa wí na na sye wì krugu mà naʔa nyaʔa nɛɛ wí na sye fanʔa deʔe kiì na bì yàá gbele wa.
32Mari wi gaâ no wa deʔe ga na Jesu wi dá bo ge móò nya ge, wɔ̀ɔ to be Jesu tanla we mòo po: «Na fɔlɔ, nàʔa po ma dí bo naʔa, na conlo wi ìn dì bî gu.» 33Jesu wi gâ Mari nya ní Juwifiyee bee ní pe dá bo wí ni pè bɛfu pé na kpele ge, àʔa yɛpɛnʔɛ kân wí ma ceŋge. Wi lama à mi wlele wí na. 34Wɔ̀ɔ pé po: «Yé moo le hanbe?» À poo po: «Kundiʔi, wò kɛ́, woo sye. Ma ya ki deʔe nya ge mà yɛ.» 35Ki nyiŋi na, Jesu wɔ̀ɔ kpele. 36Juwifiyee à pe naʔa nyu pe ma mà yo: «Yè wèlé, wíi bo wi dá bo noo glanʔa dɛ.» 37À pèè maʔa yo nɛ mà yo: «Ki naŋa ŋa wi da glú mà fyon nyɛʔɛ nyɛʔɛ, wi ìn dì bî gban bì yraʔa kà hanri bì Lasare syɔ we kùʔù ma ge yo?»
Jesu wí ma Lasare nyɛ̀ we mòo yrígi kuu ni be
38Nyiŋi ga na Jesu wi da yâ no wa fanʔa na ge, wɔ̀ɔ ní mà yɛpɛnʔɛ ta nɛ. Ki fanʔa ki dá bo ŋglɛnʔɛ wyeʔe gi. À pe ki nò ton ŋglɛngbɔʔɔ kà nì. 39Jesu wɔ̀ɔ pé po: «Ye ŋglɛnʔɛ laʔa ge wa.» Ŋa wi dá gu wi cɛpii Marite wɔ̀ɔ wí po: «Welé, na fɔlɔ, wí bi da nuʔu tipeʔe kɔ, mɛjɛn wi wlɛrɛ ticɛrɛwoʔo gi ga alaʔa nî wa fanʔa ni ge.»
40Jesu wɔ̀ɔ wí po: «Mi ìn dà glu màʔa yo má kan fan mâ yo, nà ma pa ná na, pa ma Nyɛʔɛlɛ li kpangbanma nya me yo?» 41Ki nyiŋi na, à pe ŋglɛnʔɛ laʔa ge wa fanʔa nó na ge. Jesu wɔ̀ɔ wi yugu jrɛʔɛ ge namuru mà yo: «Na to, mí na ma syeri ma gba kmaʔa na, ga na má na nuru ná ma ge. 42Di mí maʔa cɛn mà yo má na nuru ná ma su. Kiì nì kì bɛfu ní, mí naʔa nyu janma hɛɛn bee kala na pé ma yere mâ na kɛli ge, jango pe pàʔá na, peʔe cɛn pe yo mo wi má ma na tun ge.» 43Wi gâ ki woʔo ga yo kɔ ge, wɔ̀ɔ taʔara mà yo: «Lasare, ma jɛ̀, ma nyini naʔa.» 44Wɔ̀ɔ taʔa mà nyini kpo wa fanʔa ni kpasyoro nì pwɔrɔ, da pe dɔ́ɔ pwɔ á ti po kpasyokogoo kpasyokogoo ge. Wi ceʔe ní, wi kyɛrɛ̀ nì à pi po pwɔbɔ. Wi yɛʔɛ̀ àʔa po foʔo wí na. Jesu wɔ̀ɔ pé po: «Yoo hàʔàlá, yoo yaʔa wi da sye.»
Pé ma dɛnbɛrɛ kon Jesu na we
(Mat 26:1-5; Mar 14:1-2; Luk 22:1-2)
45Juwifiyee bee pe da gɛri wa Mariyee krugu be, pe fafaʔa dà gâ kaʔa gee nya Jesu wi dá hanri ge, à pe pa wí na. 46Di, kiì nì kì bɛfu ní kaʔa gee wi dá hanri ge à Juwifiyee pèè ma kɛri mà yâ ke yo Farisiyee kan be. 47Farisiyee ní, sraʔá farafɛɛ kpandoo ní à pe kpoʔolo Juwifiyee hɛnkpandoo pe tɔɔ ní be mà yo: «Ki naŋa ŋa wí na kafonŋoo fafaʔagaa hanri. Wó bi nyaʔa hanri? 48Nà woo yaʔa wi da ki kafonŋoo hanri ge su, hɛɛn pè bɛfu pé bi ba wí na. Ki kruʔu ma, Hrɔmu fanŋa fɛɛ pa pe ban bì ba Nyɛʔɛlɛ li sràʔá go cɔʔɔ ge bì blɛn wò klo lì bɛfu ní.» 49Ki nyiŋi na wà dà bo wa pe ní, à pe noo yeri Kayifu. Wiì wi wi dá bo sraʔá fara fɔlɔ kpangbanŋa we ki yɛlɛ na le. Wɔ̀ɔ pé po: «Ye ìn yraʔa kà cɛn. 50Ye ìn ki cɛn bì yo: Kí nyɛ ye kan pronʔo hɛn nigbe bí gu hɛɛn pe kala na, sanni pé bi ba hɛɛn pè bɛfu kpo ge yo? 51Wi ìn dà ki kayoro da yo de wi fandaʔa ni, ɛɛn di, pɔɔ da gâ bo sraʔá farafɔlɔ kpangbanŋa ki yɛlɛ ni le, wi dá ga yo kí bi ba hanri ge mâ yo Jesu wí bi ba gu ki klo li kala na le.
52Liì nigbe kala ban. Wí bi ba gu jango bì Nyɛʔɛlɛ pii pè bɛfu kpoʔolo pè na bee pé nyɛ craʔabaa ge.» 53Mà kpe ki wlɛʔɛ na, à peʔe hli na ticlimi ma ca, jango bùu kpo. 54Ki kala na, Jesu wi ìn dàá nyari adi bì da wì teri Juwifiyee na be. Di wɔ̀ɔ jɛ be ki deʔe na ge mà kɛri klɛnmɛ mà ni wa sinbriʔi tanla ge. Kàʔà kà dà bo wa, pé naʔa yeri Efrayimu. Wɔ̀ɔ yâ go wa wi ploʔofɛɛ ní be.
55Juwifiyee pe Toromo srɛʔɛ fɛti wlɛʔɛ ki dáa jɛn bì no. À hɛɛn fafaʔabaa ma jɛn ki klɛnmɛ ni me mà kɛri wa Jerusalɛmu kàʔà ni bì yà glu bì pe yɛlɛ Nyɛʔɛlɛ li yɛʔɛ̀ na ge. 56À pe na Jesu ca we su mà nì naʔa nyu pe ma nɛ wa Nyɛʔɛlɛ li sràʔá go deʔe na ge mà yo: «Yé na nyaʔa honri? Yé yo wí bi ban naʔa srɛʔɛ fɛti ma we yo?» 57Àʔa hín bo sraʔá farafɛɛ kpandoo ní, Farisiyee ní pe daʔá yo hɛɛn ma be mà yo, nà hɛn ŋa bí wi deʔe cɛn ge, wi yaʔa yo pé ma, jango pe yɔɔ cò.
موجودہ انتخاب:
JAN 11: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire
