PITUNBEE 24
24
Juwifiyee pé na baʔa Pɔli na we Sesare kàʔà ni
1Wlɛrɛ kɔgunnu kruʔu ma ge, sraʔá farafɔlɔ kpangbanŋa Ananyasi wɔ̀ɔ pan, wiì nì lagwɔɔ pèè ní, ní kayoro yofɔlɔ wà nì, pe dáa wi yeri Tɛritule, jango bi ba baʔa Pɔli na we klo fɔlɔ wi yɛʔɛ̀ na. 2Pe gâ Pɔli yeri we ge, Tɛritule wɔ̀ɔ ki hli mà na baʔa wí na mà yo:
«Felikisi kmaa, wó na nyigbɔmo taʔa ma fanŋa ni ge. Ki klo la li kaʔa à ke na tyonri kmaʔa ma yɛklumu mi kala na le. 3Wó na ma syeri kpangbanŋa ceŋge kmaʔa ga na wó na taʔa nyiŋi kì bɛfu na deʔe kì bɛfu na ge. 4Di mi ìn jori bì ma te wɛʔɛ kayofafaʔa nì. Mí na ma fɛn kayoʔo ga mí bi yo má ma cɛnri ge, maʔa lòʔó ná ma ma lagmama kala na le. 5Wó ma ki naŋa ŋa nya we wí nyɛ nɛ pa tiflɛʔɛ yara nyɛ de. Wí ma kan drunya Juwifiyee pè bɛfu pé na kakara wa pè ní. Wí nyɛ Nasarɛti kàʔà woo pe jafa kloʔó ki yɛklu. 6Ali wi dáa ki ca bì sraʔá go kran ge Nyɛʔɛlɛ li yɛʔɛ̀ na ge. À wo yɔ́ɔ̀ co wa. [Wo dá jori bì kiti kon wí na nɛ pa wò kalɛʔɛ ké naʔa nyu pomo ma na ge. 7Di sorasiyee lagwɔ kpangbanŋa Lisyasi wɔ̀ɔ pan mà bɔ́ɔ̀ syɔ wo ma fangbɔʔɔ ní, 8mà yo bee pé ma baʔa Pɔli na we pe da ban mà krugu.] Mo tapolo we, nà ma ba Lisyasi yugu we ge, kala la lí kan, á wo na baʔa Pɔli na we, pa ma gban bì lì bɛfu cɛn wí ma.» 9Juwifiyee à pe yereʔe na mà yo ki kaʔa ke dá bo ban cɛ.
Pɔli wí ma wi woʔo yo Felikisi wi yɛʔɛ̀ na
10Klo fɔlɔ wɔ̀ɔ yugu wa Pɔli ma we mà yo wi da nyu. Pɔli wɔ̀ɔ yo: «Mí maʔa cɛn mà yo, mà kpe yɛʔɛ́ fafaʔa na, má nyɛ ki klo hɛɛn pe kiti konfɔlɔ. Ki kala na le, mí bi na woʔo yo ge ma kân lafiʔimi na. 11Pa ma gban bìʔi cɛn kmaʔa bì yo mí ma kɛri wa Jerusalɛmu kàʔà ni ge bì yà Nyɛʔɛlɛ kpɔʔɔ le wa. Ki ìn jé ja doro kpɛn wlɛrɛ kɛ̂ mà kɛ syɛn na we. 12Pe ìn je ná nya mí na kakara wa hɛn wà nì, ná kiì ban, na janma mà kpoʔolo nà tanla wa sraʔá go ni ge, kà na Juwifiyee sɛrigoro tà ni, ná kiì ban, foroba dere tà na. 13Pé na baʔa ná na kaʔa gee na ge, pe ìn bi gban bì ke nyɛli má kan, gee ké bi gân ma yereʔe na ge. 14Di mí ma yere ga na mí bi dyɛʔɛ má na ge, bí yo mí na kloʔò ga tanri pee pé na yeri jafa kloʔó ge mà na wò tokpɔɔ pe Nyɛʔɛlɛ kpɔʔɔ le wa ban. Mí ma pa kì bɛfu na ga kí nyɛ wa nyoŋoʔo Mowisi wi sɛbɛ ni we ní Nyɛʔɛlɛ leyoo pe woo ní be. 15Mí ma pa Nyɛʔɛlɛ na le nɛ pa pee tapoboo pé ma pa lí na pomo ma na ge mâ yo hɛnsinbee ní, hɛnkloboo ní pé gà ba nyɛ bí nyini ge. 16Ki kala na le, mì tapolo mí na nà kpanŋi jango nyiŋi kì bɛfu na na dihon wò daʔa teri ná na bì yo mí ma punŋu kala là na Nyɛʔɛlɛ ní hɛɛn pe yɛʔɛ̀ na ge.
17Yɛʔɛ́ kèè da gâ doro kɔ ge, à mi kɛri bì yà nadanma yrɛbɛ pà kan na klo hɛɛn pèè ma bì sraʔayée pèè fara wa Nyɛʔɛlɛ ma le kpo.#24:17-18 ma wèle wa Pit 21:17-28 ni wè. 18Nyiŋi ga na mi dá bo wa ná ki kaʔa hanri ge, na baʔa hɛɛn à pe yâ na nya wa sraʔá go ni ge. À mi po mí ma nà yɛli Nyɛʔɛlɛ li yɛʔɛ̀ na ge kɔ. Janma ìn dà bo wa. Kakara taʔaraʔa ìn bo wa kpo. 19Di Asi klo Juwifiyee be pèè dá bo wa. Nàʔa po na baʔa kala dá bo wa pe lama ni me ge, ki dá yala pe pan naʔa pe ba ki baʔa kayoʔo yo ge ma yɛʔɛ̀ na ge. 20Ná kiì ban, bee pé nyɛ naʔa ge, nàʔa po ga pe da ná ple, á mi po wa yerehaʔa Juwifiyee pe lagwɔɔ pe kpoʔolomo deʔe na ge, pe daʔá nya mí ma tipeʔe kà po ge, peʔe yo má kan. 21Di mi dá kala nigbe hanri, nyiŋi ga na mi dá bo wa yerehaʔa pe nulala ni le mâ taʔara mâ yo: ‹Kuu pe nyɛmanyinimi miì mi ma mí kan kiti wɔ́ɔ na kon ná na yè yɛ̀ʔɛ̀ ma alaʔa nî ge.› »#24:21 ma wèle wa Pit 23:6 ni wè.
22Felikisi pɔɔ dá Jesu wi kloʔò ga ki kaʔa cɛn ge kmaʔa, wɔ̀ɔ pe nuŋu mà yo: «Sorasiyee pe lagwɔ kpangbanŋa Lisyasi nòo gá ban ge, pa mi ba yè kiti kon we ye kan.» 23Wɔ̀ɔ kí yo sorasiyee lagwɔ ŋa ma wi dá bo be ge mà yo wi da Pɔli kɔrɔsi we di wuu yaʔa wi po wì kân cɛnri. Nà Pɔli wi woo wà bí yo wí bi kmaʔa kà hanri wí na, ki sorasiyee lagwɔ wò gaʔa cé.
Pɔli wí yo Felikisi nì Drusiye yɛ̀ʔɛ̀ na
24Ki gâ wlɛrɛ tà kɔ ge, Felikisi wɔ̀ɔ pan wi cɔ Drusiye nì we. Ki cɔ wi dá bo Juwifiyee woo. Felikisi wɔ̀ɔ Pɔli yeri we mà bâ pama kayoʔo loʔo ge wi ma, ma pé na pa Jesu Krisi na we. 25Nyiŋi ga na Pɔli wi gáa sinmi ní, macomo nì ní Nyɛʔɛlɛ li kiti kayoro nyu de ŋa wí na pan wa ge, fyara à ti Felikisi co we, wɔ̀ɔ yo: «Ki tɔ na ge, ta sye kpɛn. Nà mi gá nyiŋi kà ta kmaʔa ge, pa mi ma yeri wa nɛ.» 26Wi dá bo naʔa nyaʔa nɛɛ Pɔli wí buu kân gbejanra nì, mà kan wɔ̀ɔ na Pɔli yeri we nyiŋi fafaʔa na mà na nyu wí ni.
27Ki gâ yɛʔɛ́ syɛn funŋu ge, Pɔrisiyusi Fɛsitusi wɔ̀ɔ bâ glɛn be Felikisi wi nolo na le. Felikisi pɔɔ dá jori wí bi Juwifiyee pe nadanma miì hanri ge, wɔ̀ɔ Pɔli yaʔa wa kaso nî we.
موجودہ انتخاب:
PITUNBEE 24: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire