PITUNBEE 21
21
Pɔli wi krɛlɛ Jerusalɛmu kàʔà ni
1Wo gâ laʔa pé na kɔ ge, à wo je nyumu kɔrɔ ni mà sin pri na sye fɔ mà yâ no wa Kɔsi klo na le. Ki kpɛntoʔo na ge, à wo yâ no wa Hrɔde kàʔà na ge. Wo gâ jɛ be ki deʔe na ge, à wo kɛri Patara kàʔà ni. 2À wo yâ nyumu kɔrɔ kà ta wa ga kí bi nyugbɔmo pari me bi mi kón bi gɛrí Fenisi klo ni le. À wo je ki woʔo ni ge mà kɛri. 3Wo gáa Sipre klo nyaʔa le nyiŋi ga na, à wo lí yaʔa wa wò kamolo namyɛʔɛ na mà toro na sye Siri klo namyɛʔɛ na ge mà yâ yere wa Tire kàʔà ni ge, mɛjɛn ki dá bo nyumu kɔrɔ tuʔuru tí bi drigi be ban. 4Wo gâ sɛrifɛɛ ca be wa mâ pe nya ge, à wo wlɛrɛ nasyɛn kɔ wa pe ní. Pa Nyɛʔɛlɛ li Nyìli li daʔa cɛʔɛ́ pé na ge, à pe na Pɔli pin we wò ga gɛri wa Jerusalɛmu kàʔà ni ge. 5Di ki wlɛrɛ nasyɛn wi gâ funŋu kɔ, à wo kloʔò kpe ge mà na sye. Ki woo pè bɛfu ní, pe cɛɛ ní, ní pe pii ní be à pe yâ wo troʔo fɔ mà no wa kàʔà kruʔu ma ge. À wo kunbiʔi kán ge be nyugbɔmo tanla me mà Nyɛʔɛlɛ nyɛri le. 6Ki kruʔu ma, à wo sari wò na. Wòó à wo je nyumu kɔrɔ ni ge. Pee à pe hru mà kɛri kàʔa ge.
7Nyiŋi ga na wo gâ nyini wa Tire kàʔà ni ge má yâ no wa Pitolimayisi kàʔà na ge, wò nyumu tanʔala à li kɔ. À wo sɛrifɛɛ syeri be mà wlɛʔɛ nigbe kɔ wa pe ní. 8Ki kpɛntoʔo na ge, à wo jɛ wa mà kɛri Sesare kàʔà ni mà yâ je wa Nyɛʔɛlɛ li kayotanʔa yofɔlɔ Filipe wi go nî ge. Hɛɛn nasyɛn bee pe dá fara wa Jerusalɛmu kàʔà ni ge, ki woo wà wi. À wo trìgì wì na.#21:8 ma wèle wa Pit 6:5; 8:5 ni wè. 9Pii pèè dá bo wí ma picɛɛ ticɛrɛ. À pe po Nyɛʔɛlɛ leyoo. 10Wo gâ go be mâ wlɛrɛ tà kɔ ge, à Nyɛʔɛlɛ leyoo wà ma gâ jɛ wa Jude klo ni le mà pan be wò krugu, pe dáa wi yeri Agabusi.#21:10 ma wèle wa Pit 11:28 ni wè. 11Wɔ̀ɔ yâ wo tòn be mà Pɔli wi anuʔulu kpe le mà wì pwɔ lí ni cyeʔe ní kyɛrɛ̀ na de mà yo: «Ga Nyɛʔɛlɛ li Nyìli lí yo ge, kí ga: Ki anuʔulu la li fɔlɔ we Juwifiyee pé yɔ̀ɔ pwɔ banmɛ ge wa Jerusalɛmu kàʔà ni ge bùu le klòʔo ke tɔɔ hɛɛn pe kyɛrɛ̀ ni de.» 12Pa wo da gâ ki kayoro da loʔo de ge, wòó ní ki deʔe woo ní be à wo na Pɔli fɛn we mà yo wò ga gɛri wa Jerusalɛmu kàʔà ni ge. 13Di ki nyiŋi na ge, Pɔli wɔ̀ɔ wo po: «Nyaʔa ma po yé na kpele mâ na lama wlele me na na? Ali domì mí ma klɛn mà kondo mà yaʔa na na kuwlɛʔɛ hanni ge wa Jerusalɛmu kàʔà ni wò fɔlɔ Jesu wi yele li kala na le, pe nà ga loʔó na pwɔmo kala.» 14Pa wi ìn dà gáʔà ta bí wò kayoʔo loʔo ge, wòó fanna à wo ki kayoʔo yaʔa ge ban mà yo: «Wò fɔlɔ wi nadanma miì bí hanri.»
15Ki wlɛrɛ ti gâ doro kɔ ge, à wo wò yrɛbɛ kondo be mà kɛri Jerusalɛmu kàʔà ni ge. 16À Sesare kàʔà sɛrifɛɛ pèè ma plɛn wo nì mà kɛri kpo. Ki woo à pe yâ wo troʔo naŋa wà kasyɛn ma, pe dá bo na ki naŋa yeri we Minason. Wiì wi ŋa ki dá bo wí yà wo kan trigihaʔa ní ge. Wi dá bo Sipre klo woo mà po sɛrifɛkplɛɛ be wà wi wí ni.
Pɔli wí ma kɛri Jake deʔe na
17Wo yâ je wa Jerusalɛmu kàʔà ni ge, sɛrifɛɛ à pe wo co wa kmaʔa lafiʔimi nì. 18Ki kpɛntoʔo na ge, wòó ní Pɔli nì à wo plɛn mà kɛri wa Jake wi deʔe na ge. Sɛrigo lagwɔɔ pè bɛfu à pe kɛri wa kpo. 19Pɔli wɔ̀ɔ yâ pe syeri mà na kaʔa nyu ge pé kan nigbe nigbe gee Nyɛʔɛlɛ li dá hanri wa klòʔo ke tɔɔ hɛɛn pe nulala ni le, wi tunŋu ki namyɛʔɛ na ge.
20Pe gâ ki woʔo ga loʔo ge, à pe na Nyɛʔɛlɛ sonni le mà Pɔli po we: «Wò woo, wele, Juwifiyee bee pé ma pa wò fɔlɔ na we ge, pé ma hɛɛn saamo pii fafaʔa kɔ. Pè bɛfu pé na kayoro da kpɔʔɔ pe dihon wì bɛfu ní Nyɛʔɛlɛ li dá yo Mowisi wi nò na ge. 21Di pé maʔa loʔo ma namyɛʔɛ na ge mà yo má na Juwifiyee pè bɛfu ploʔo bee pé nyɛ wa klòʔo ke tɔɔ hɛɛn ni be ge mà yo pe làʔá Mowisi wi kayoro na de mà nì mà naʔa pin pò gáa pe pii lege be, pò gáa Juwifiyee pe kalɛʔɛ ke kloʔò tanri ge. 22Kí bi bo mɛlɛ san, mɛjɛn, kanyɛmɛ na me, hɛɛn pè bɛfu pé biʔi loʔo bì yo má ma pan?
23Ki kala na le, wó bi ga yo má kan ge maʔa hanri ban. Hɛɛn ticɛrɛ nyɛ naʔa wo ni bee pe dá nofele kon Nyɛʔɛlɛ ma le ge.#21:23-24 ma wèle wa Ton 6:13-21 ni wè. 24Ma plɛ̀n ki hɛɛn ní be. Ma pe sraʔá fwɔʔɔ ton ge, jango pe gbàn pe pe yuru kpoʔori de. Ye ya yè yɛli teme na Nyɛʔɛlɛ li yɛʔɛ̀ na ge. Ki pomo na me, hɛɛn pè bɛfu pa peʔe cɛn bì yo kayoʔo ga pé ma loʔo ma namyɛʔɛ na ge kayocɛnŋɛ ban, di pa pe yo mo tapolo we má na Mowisi wi kloʔò tanri ge kmaʔa kpo. 25Di kloʔò ke tɔɔ hɛɛn pe namyɛʔɛ na ge, bee pé ma krɛʔɛ sɛrifɛɛ ge, wò kaʔa gee wo da gón ge, wòó wó ma ke nyoŋo mà ke troʔo wa pe ma. À wo yo pe da hɛnʔɛ ki sràʔá kara fligi de, ní disyan kama ní me, ní yraʔa ga nì pé ma kpo, pe ìn ki konli ge, mà plɛn kyɛnrɛ ní de.»#21:25 ma wèle wa Pit 15:29 ni wè.
26Ki nyiŋi na, wɔ̀ɔ plɛn ki woo ní be mà kɛri. Ki kpɛntoʔo na ge, Pɔli wi gâ wì yɛli pé ni teme na ge, wɔ̀ɔ je wa sraʔá go ni ge mà ylɛmɛ wlɛrɛ ti funŋunyiŋi tyɛʔɛ ge sraʔá farafɛɛ na be. Àʔa po wí yo ki nyiŋi kiì gi ga pé bi ba sraʔá fara pè bɛfu nigbe nigbe kan ge.
Pɔli colo sraʔá go ni
27Wlɛrɛ nasyɛn ti gáa jɛn tí bi funŋu nyiŋi ga na ge, Asi klo Juwifiyee à pèè ma Pɔli nya we wa sraʔá go ni ge. À pe janma hɛɛn pè bɛfu pri mà pe wa wí na mà yɔ́ɔ̀ co 28mà na taʔara naʔa pin: «Israyɛli klo woolo, ye pan ye ba wo haʔa. Naŋa ŋa wí na hɛɛn pè bɛfu krɛʔɛ deʔe kì bɛfu na ná can wò klo hɛɛn ní be ní Nyɛʔɛlɛ li kayoro ní de ní sraʔá go ní ge, wí ŋa. Ali wí ma je naʔa sraʔá go ni ge klòʔo ke tɔɔ ke hɛɛn pèè ní mà ki degmaʔa kran Nyɛʔɛlɛ li yɛʔɛ̀ na ge.»
29Pe dáa ki woʔo ga nyu ge, mɛjɛn pe da glú mà Efɛse kàʔà Trofime nya we wa wi ní kalama ni me teme na. À pe naʔa nyaʔa nɛɛ Pɔli wí ma je wa wi ní sraʔá go ni ge.#21:29 ma wèle wa Pit 20:4 ni wè.
30Kàʔà kì bɛfu àʔa wlele. Hɛɛn à pe na jrɛʔɛ deʔe kì bɛfu na na fe na pan mà bâ Pɔli co we noo kle na nyini wí ni wa sraʔá go ni ge. Ki nyidege na ge, à pe sraʔá go goyɛrɛ ton de. 31Pe gáa ki ca bùu kpo ge, ki kayoʔo àʔa no wa Hrɔmu kàʔà ki sorasiyee pe lagwɔ kpangbanŋa na we mà yo Jerusalɛmu kàʔà kì bɛfu kí na kpoʔoro. 32Ki nyidege na ge, wɔ̀ɔ sorasiyee pèè kpe mà plɛn sorasiyee lagwɔɔ pèè ní mà fɛ mà kɛri pé ni wa janma mi deʔe na ge. Janma hɛɛn pe gâ wiì nì wi sorasiyee nya be ge, à pe Pɔli wi kmomo yaʔa me ban. 33Ki nyiŋi na ge, sorasiyee pe lagwɔ wɔ̀ɔ flo wa Pɔli tanla we mòo co mà yo sorasiyee poo pwɔ timoro nyoʔomo syɛn ní, mà na hɛɛn yugu be mà yo: «Han wi ŋa ki woo ŋa nì we? Wí ma nyaʔa po?» 34Di janma hɛɛn à pèè na taʔara na kà nyu. À pèè na taʔara nɛ na kà nyu kì yɛ. Sorasiyee pe lagwɔ pa wi ìn gà gban bí kanyɛmɛ cɛn me kmaʔa hɛɛn pe yopibi pi tunnumu mi kala na le, wɔ̀ɔ sorasiyee po be pe kɛri Pɔli nì we wa sorasiyee pe korohaʔa deʔe na ge.
35Pɔli wi yâ no wa pe goyɛʔɛ ki luʔuhaʔa deʔe na ge, àʔa po kí ma yala sorasiyee poo kpe pe luʔu wí ni janma mi canʔalama mi kala na le. 36Mɛjɛn hɛnfafaʔa da bá wí na mà na taʔara naʔa pin: «Woo kpo.»
Pɔli wí ma wi woʔo yo
37Sorasiyee pe gáa jɛn pé bi Pɔli le wa pe korohaʔa deʔe na ge, wɔ̀ɔ sorasiyee pe lagwɔ kpangbanŋa po we: «Pa mi gban bì kayoʔo kà yo má kan yo?» Ki naŋa wɔ̀ɔ wí po: «Má na gbanni Grɛki hɛnrɛ ní de yo?
38Ejipite klo woo ŋa wi dá hɛɛn kpofɛɛ saamo (4 000) pri we mà pe wa Hrɔmu kàʔà woo na be mà kɛri pé ni wa sinbriʔi ni ge nyiŋi kà na, ki woo wiì ban ŋa mo ní we yo?» 39Pɔli wɔ̀ɔ yo: «Do mì we mí nyɛ Juwifiyee woo mà po Tarisi kàʔà woo Silisi klo ni le. Yegbɔlɔ kàʔà pyɔ wi ná ni. Mí na ma fɛn. Ma na yaʔa bì yo hɛɛn ní be.» 40Sorasiyee pe lagwɔ kpangbanŋa wɔ̀ɔ kí ta. Pɔli wɔ̀ɔ jɛ mà yere wa luʔuhaʔa na ge mà kyɛrɛ̀ wa de hɛɛn ma be. Pè bɛfu pe gâ byeri ge, wɔ̀ɔ na nyu pé ni Juwifiyee hɛnrɛ ni de mà yo:
موجودہ انتخاب:
PITUNBEE 21: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire