PITUNBEE 18
18
Pɔli Korɛnte kàʔà ni
1Ki kruʔu ma ge, Pɔli wɔ̀ɔ jɛ wa Atɛnni kàʔà ni mà kɛri Korɛnte kàʔà ni ge, 2mà yâ Juwifiyee naŋa wà nya wa pe dáa wi yeri Akilasi. Wi dá bo Ponte klo woo wi. Àʔa po wiì nì wi cɔ Prisiye nì we pe dá bo pé ma pan fonŋo mâ jɛ wa Itali klo ni le ge, mɛjɛn klo fɔlɔ Klode wi dá yo Juwifiyee pè bɛfu pe nyini wa Hrɔmu kàʔà ni ge. Pɔli wɔ̀ɔ yâ drigi pe na. 3Wiì nì pee ní be pa pe da gâ bo tundege kɔfɛɛ ge, wɔ̀ɔ ko wa pe ní. À pe na tunŋu ko teme na. Mɛjɛn pe dá bo kpasyoro goro hanrifɛɛ. 4Pɔli wi dáa nyu wa Juwifiyee pe sɛrigo ni ge fyonriwlɛʔɛ kì bɛfu na mà naʔa ca bì Juwifiyee ní Grɛkiyee pe lama krɛʔɛ me pe na.
5Di Silasi nì Timote nì we pe gâ jɛ wa Maseduwani klo ni mâ pan kɔ ge, Pɔli wɔ̀ɔ wì kân poŋo pli Nyɛʔɛlɛ li kayoro ti yomo ma me. Wɔ̀ɔ naʔa nyu naʔa trigi Juwifiyee ma be mà yo Jesu wí nyɛ Nyɛʔɛlɛ li wofràa. 6Di pa Juwifiyee pe dáa jan wí ni mâ noo teri ge, wɔ̀ɔ wi kpasyoro yaʔara de mà wa pé na mà yo: «Nà ye ìn syɔ yè kapere ma de, paʔa bo ki jɛ́ yèé na. Na woʔo wò waʔa nî adi. Mà kpe alaʔa na ge, mí bi da sye klòʔo ke tɔɔ ke hɛɛn krugu be.» 7Wɔ̀ɔ jɛ mà je be hɛn wà go nî pe dáa ki woo yeri we Titiyusi Jusitusi. Ki woo wi dá bo na Nyɛʔɛlɛ kpɔʔɔ le. Wi go ki da draʔá wa Juwifiyee pe sɛrigo na ge. 8Juwifiyee pe sɛrigo lagwɔ Krisipusi we, wɔ̀ɔ pa wò fɔlɔ na we, wiì nì wi go woo pè bɛfu ní. À Korɛnte kàʔà woo fafaʔa na Pɔli wi kayoro nuru de mà na paʔa na na pè kanʔa, à pe na pe batise.
9Yebliʔi kà ni, wò fɔlɔ wɔ̀ɔ báʔà yo Pɔli ma we pomo mà na nɛbo ŋloʔo gi mà yo: «Mò gáa fyaʔa, di ma da nyu. Mò gá byeri. 10Mɛjɛn mì mí nyɛ naʔa má ni. Hɛn wɛ ìn bì do má na bì ma cɔlɔ. Ma da nyu, mɛjɛn na hɛɛn pé nyɛ naʔa nyɛʔɛmɛɛ ki kàʔà ga ni ge.»
11Pɔli wɔ̀ɔ ko wa mà ta yɛpolo ní yere noli mà na pe ploʔo Nyɛʔɛlɛ kayoro ní de.
12Galyon wi dá bo Akayi klo fɔlɔ nyiŋi ga na ge, Juwifiyee à pe jɛ Pɔli krugu we lademe ní mà yɔ́ɔ̀ co mà kɛri wí ni kiti konhaʔa na ge, 13mà yâ yo: «Ki naŋa ŋa we wí na hɛɛn pe yuru cɔʔɔ de pe na mà yo pe da Nyɛʔɛlɛ kpɔʔɔ le pomo mà na mì yɛ. Ki srɛʔɛ kí na Hrɔmu klo li kayoro cɔʔɔ de.»
14Pɔli wi gáa ki ca wí bi yo nyiŋi ga na ge, Galyon wɔ̀ɔ Juwifiyee po be: «Nàʔa po kií bo kaklolo là li, ná kiì ban, kapekpɔlɔ là li ge, kanyɛmɛ na me, yèé Juwifiyee be, mi dí bìʔi loʔo ye ma. 15Di nàʔa po yé na kakara wa yè ní yè kayoʔo kà kɔ̀rɔ́ na ge, ná kiì ban, yè yegee kèè na ge, ná kiì ban, yè kalɛtaʔa kèè na ge, ki woʔo ga ge kí nyɛ yèé ma. Do mì we mi ìn jori bì bo ki kaʔa ke conrifɔlɔ.» 16Wɔ̀ɔ pé prɔ wa kiti konhaʔa na ge. 17Ki nyiŋi na ge, hɛɛn pè bɛfu à pe Juwifiyee pe sɛrigo lagwɔ Sɔsitɛnni co we mà noo kmo be kiti konhaʔa na ge. Galyon wi ìn ja hoʔo ki kaʔa gee là na.
Pɔli wi hrú mà kɛri Ancɔsi kàʔà ni
18Pɔli wɔ̀ɔ ko wa nɛ Korɛnte kàʔà ni ge mà wlɛfafaʔa ta wa. Ki kruʔu ma ge, wɔ̀ɔ bâ sari sɛrifɛɛ na be mà yâ je nyumu kɔrɔ kà ni mà na sye Siri klo ni le. Prisiye nì, ní Akilasi nì we à pe plɛn wí ni. Di, sanni wí bi je nyumu kɔrɔ ni ge, wɔ̀ɔ klu mà wi yujoro konlo de kpɛn wa Sankre kàʔà ni ge, mɛjɛn wi dá nofele kon Nyɛʔɛlɛ ma le.#18:18 ma wèle wa Ton 6:18 ni wè.
19Pe yâ no wa Efɛse kàʔà ni ge, Pɔli wɔ̀ɔ wi plɛnfɛɛ yaʔa be wa. Wiì tapolo wɔ̀ɔ yâ je wa Juwifiyee pe sɛrigo ni ge mà yo pé ni. 20Ki woo à poo nyɛri mà yo wi nyiŋi kà kɔ wa pe nî, di wi ìn ki ta. 21Wɔ̀ɔ sari pè na mà pe po: «Nyɛʔɛlɛ nà liʔi ta ge, pa mi ba hru bì ban naʔa nɛ yè krugu.» Wɔ̀ɔ jɛ wa Efɛse kàʔà ni ge mà yâ je wa nyumu kɔrɔ kà ni.
22Wi gâ no wa Sesare kàʔà ni ge, wɔ̀ɔ kɛri Jerusalɛmu kàʔà ni mà yâ sɛrigo syeri ge wa, mà kɛri Ancɔsi kàʔà ni ge. 23Wi gâ nyiŋi kà kɔ wa ge, wɔ̀ɔ jɛ mà na sye dee dee wa Galase klo nì, ní Friji klo nì ke klɛnmɛ ni me. Wɔ̀ɔ na fanŋa kanʔa sɛrifɛɛ pè bɛfu ma.
Apolɔsi Efɛse kàʔà ni
24Juwifiyee woo wà dà bo Alɛkisandre kàʔà woo. À pe noo yeri Apolɔsi. Ki naŋa wi dáa gbanni na nyu kmaʔa ceŋge mà po wí ma Nyɛʔɛlɛ li kayoro sɛbɛ ploʔo we kmaʔa ceŋge. Wɔ̀ɔ bâ je wa Efɛse kàʔà ni ge. 25Wi dá bo pé moo ploʔo wò fɔlɔ wi kloʔò nì ge. Wɔ̀ɔ na Jesu wi kaʔa nyu ge hɛɛn ma be wi dihon wì bɛfu ní mà na pe ploʔo ké ni mà yala kmaʔa ceŋge. Àʔa hín bo wí ma cɛn mà kàn Jan wi batɛmu kayoro tiì nigbe na dron. 26Wɔ̀ɔ ki hli na nyu wa Juwifiyee pe sɛrigo ni ge fyara fun. Prisiye nì Akilasi nì we pe gâ loʔo wí ma ge, à poo plɛn pè ní mà yâ Nyɛʔɛlɛ kloʔó hanri màʔa tyɛʔɛ wí na kmaʔa. 27Pɔɔ dá jori wí bi gɛri wa Akayi klo ni le ge, sɛrifɛɛ à pe sɛbɛ troʔo wa ki sɛrifɛɛ ma be mà yo pe yɔɔ cò kmaʔa. Wi yâ no wa ge, wɔ̀ɔ na pe hari kmaʔa bee pe da bá wò fɔlɔ na we Nyɛʔɛlɛ li haʔama ni me. 28Mɛjɛn wi dáa nyu sye ní mà na Juwifiyee jin be hɛɛn pè bɛfu pe yɛʔɛ̀ na ge mà naʔa fligi pé kan kpeʔele Nyɛʔɛlɛ li nyoŋomo kayoro ní de mà yo Jesu wí nyɛ Nyɛʔɛlɛ li wofràa.
موجودہ انتخاب:
PITUNBEE 18: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire