PITUNBEE 16
16
Timote wí ma plɛn Pɔli nì ní Silasi nì we
1Ki kruʔu ma ge, Pɔli wɔ̀ɔ kɛri Dɛribe kàʔà ni, ní Lisitre kàʔà ni ge. Sɛrifɔlɔ wà dà bo wa pe dáa wi yeri Timote. Wi no wi dá bo Juwifiyee cɔ mà po sɛrifɔlɔ. Di wi to wɔ̀ɔ po Grɛkiyee woo. 2Sɛrifɛɛ bee pe dá bo wa Lisitre kàʔà ni, ní Ikonyomu kàʔà nì ge, à pe na wi yedanla yeri. 3Pɔli wi dá jori wi plɛ̀n wí ni pe kɛri, di wɔ̀ɔ wi lege Juwifiyee bee pe dá bo wa ki dere na de pe kala na le. Mɛjɛn pè bɛfu pe daʔa cɛ́n mâ yo wi to wi dá bo Grɛkiyee woo ge. 4Kyɛ̀rɛ̀ da pe dáa doro ge, ga pitunbee ní, lagwɔɔ ní bee pe dá bo wa Jerusalɛmu kàʔà ni pe dá yo mâ flinʔi na ge, à pe naʔa nyu sɛrifɛɛ kan be mà yo pe daʔa hanri. 5Sɛrigoro à ti na fanŋa taʔa wa pama ni me. Sɛrifɛɛ pe nò àʔa na nyɛʔɛ wlɛʔɛ kì bɛfu na.
Pɔli wi anyaʔa wa Trowasi kàʔà ni
6Nyɛʔɛlɛ li Nyìli pa li gáʔà tyɛʔɛ pé na mâ yo pò gá Nyɛʔɛlɛ li kayoro yo de wa Asi klo ni le ge, à pe Friji klo nì Galase klo pari le mà li kon. 7Pe yâ no wa Misi klo tanla le ge, à pe naʔa ca bì gɛri wa Bitini klo ni le, di Jesu wi Nyìli li ìn ki ta pe kɛri wa. 8À pe Misi klo pari le mà li kon mà kɛri Trowasi kàʔà ni. 9Ki yebliʔi ni ge, Pɔli wɔ̀ɔ yraʔa kà nya nɛbo ŋloʔo gi màʔa nya Maseduwani klo woo naŋa wà nyɛ be yerehaʔa noo fɛn mà yo: «Toro naʔa wo ma Maseduwani klo ni le ma ba wo haʔa.» 10Pɔɔ gâ ki yraʔa nya ge, ki nyidege na, à wo naʔa ca wó bi gɛri Maseduwani klo ni le, mɛjɛn wo dáa ki nyaʔa nɛɛ Nyɛʔɛlɛ lí ma wo yeri wo ya kayotanʔa yo ge wa pe kân.
Lidi wi pama Filipe kàʔà ni
11À wo je nyumu kɔrɔ kà ni wa Trowasi kàʔà ni ge mà kɛri sinmi na pri mà yâ no Samotrasi klo na le. Ki kpɛntoʔo na ge, à wo yâ je Nɛyapolisi kàʔà ni ge. 12Wo gâ jɛ be, à wo kɛri Filipe kàʔà ni. Ki kàʔà ki dá bo Maseduwani klo li klɛngblɛnmɛ kàʔà kà gi mà po Hrɔmu kàʔà woo pe korohaʔa kà gi. À wo wlɛrɛ tà kɔ wa ki kàʔà ni ge. 13Fyonriwlɛʔɛ na ge, à wo nyini wa kàʔà ni mà kɛri caʔa nó na, deʔe ga na wo dáa ki nyaʔa nɛɛ Nyɛʔɛlɛ nyɛrihaʔa kà nyɛ wa Juwifiyee pe woʔo ge. À wo yâ glɛn wa na nyu cɛɛ bee ní pe dá gboʔolo wa ge. 14Tyatire kàʔà woo cɔ wà dà bo wa, pe dáa wi yeri Lidi. Wɔ̀ɔ po kpasyonyɛrɛ pɛrɛfɔlɔ. Wi dáa Nyɛʔɛlɛ kpɔʔɔ le. Wɔ̀ɔ na wò kayoro nuru de. Wò fɔlɔ wɔ̀ɔ wi dihon nyɛʔɛ we wì na, jango wi pà ga na Pɔli wi dáa nyu ge. 15Wiì nì, wi go woo ní be pe gâ pè kân á pe pé batise kɔ ge, wɔ̀ɔ wo fɛn mà yo: «Nàʔa po yé naʔa honri mâ yo mí ma pa wò fɔlɔ na we ge, ye ya drìgì wa na go nî ge.» Wɔ̀ɔ wo ciʔili ban.
Pɔli nì Silasi nì pe leme kaso nî Filipe kàʔà ni
16Wlɛʔɛ kà na, wo gáa sye Nyɛʔɛlɛ nyɛrihaʔa na ge, à ŋkojɔ wà yâ wo flin. Gbosyo dà bo wí ni, wɔ̀ɔ po cɛlɛfɔlɔ. Wɔ̀ɔ na gbejanfafaʔa taʔa wa wi cɛpɛrɛ ni de wi kafɛɛ kan be. 17Ki woo wɔ̀ɔ pa wòó ní Pɔli na we na taʔara mà yo: «Ki hɛɛn bee be pé nyɛ Nyɛgbɔfiʔi ki tungɔɔ bɛ. Pé na syɔmo mi kloʔò ki kayoro nyu de ye kan.» 18Wɔ̀ɔ na ki woʔo hanri ge ban mà wlɛfafaʔa kɔ. Ki gâ Pɔli te we wɛʔɛ ge, wɔ̀ɔ wa mà krɛʔɛ mà gbosyo po we: «Mí naʔa nyu má ma Jesu Krisi wi yele na le, ma nyini wí ni.» Ki nyidege na ge, gbosyo wɔ̀ɔ nyini be wi nî. 19Ki ŋkojɔ wi kafɛɛ pe gáʔà nya pe gbejanra tahaʔa ki cɔʔɔ́ ge, à pe Pɔli nì Silasi co we mà pe kle mà kɛri pé ni foroba deʔe na ge, kàʔà lagwɔɔ krugu be. 20Pe gâ no wa pe ní kiti konfɛɛ na be ge, à pe yo: «Ki hɛɛn bee be Juwifiyee bɛ. Pé na wò kàʔà wlele ge wo ma wɛʔɛ, 21mà na kalɛʔɛ kèè nyu wo ma gee ki ìn yala wo yèré ké na, wó da ke hanri ge, mɛjɛn wòó wó nyɛ Hrɔmu woo bɛ wo nì.» 22Janma à mi jɛ Pɔli nì Silasi krugu we kpo. Kiti konfɛɛ à pe yo sorasiyee pe drere hlugu de pe ti fàrà pe na pe pe kmo apiʔi ní. 23À pe pe kmo apinyɛʔɛ fafaʔa nì mà pe le kaso nî mà kasogo welefɔlɔ po wi da pe wèlé kmaʔa. 24Pɔɔ gâ ki kayoʔo loʔo ge, wɔ̀ɔ yâ pe le wa kasogo ki lama go pyɔ wà ni mà pe cyeʔe le ge wa tiʔi kà na fruʔu gi.
25Nyilɛlɛ na le, Pɔli nì Silasi nì we à pe na Nyɛʔɛlɛ nyɛri le mà na ŋu na li sonni. Kaso fɛɛ pe tɔɔ à pe na nuru pé ma. 26Pe kacɛnlɛ tra à ti kpoʔoro gbanʔa ceŋge, fɔ kasogo ki noʔoma wɔ̀ɔ kpoʔoro. Ki nyidege na ge, kasogo goyɛrɛ tì bɛfu à ti nyɛʔɛ. Pe dá kaso fɛɛ pwɔ be nyoʔomo ba nì ge, à pi haʔala. 27Kasogo ki fɔlɔ wɔ̀ɔ nyɛ. Wi gâ kaso goyɛrɛ nya de nyɛʔɛrɛ ge, wɔ̀ɔ wi mlaʔa kpele fara le mà yo wí bi wì kpo. Mɛjɛn wi dá bo naʔa nyaʔa nɛɛ kaso fɛɛ pé ma fɛ. 28Di Pɔli wɔ̀ɔ taʔara gbanʔa mà yo: «Mò gá tipeʔe hanri mà na, mɛjɛn wò bɛfu wó nyɛ naʔa.» 29Kasogo welefɔlɔ wɔ̀ɔ yo pe pan kwɔrɔ ní wi ba nya. Wɔ̀ɔ ye mà je na hiʔiri mà yâ kunbiʔi kán Pɔli nì Silasi tanla we, 30mà nyini pé ni dala na mà bâ pe po: «Na fɛɛlɛ, kí ma yala bì nyaʔa po sin, jango bí syɔ ge?» 31À poo po: «Ma yèré wò fɔlɔ Jesu na, pa ma syɔ, mo ní, ma go woo ní be.» 32À pe wò fɔlɔ wi kayoro yo de wiì nì, wi go woo pè bɛfu kan. 33Ki yebliʔi nyidege na ge, wɔ̀ɔ Pɔli nì Silasi co we mà kɛri pé ni mà yâ pe kmoro namoro jeʔe de pe na. Ki nyidege na ge, wɔ̀ɔ wì kân, à poo batise, wiì nì, wi woo pè bɛfu ní. 34Ki kruʔu ma, wɔ̀ɔ pé co mà luʔu mà kɛri pé ni wi go nî ge mà yâ hro kan pé ma. Wiì nì, wi go woo pè bɛfu ní à pe na leʔele ga na pé ma yere Nyɛʔɛlɛ na le ge.
35Ki kpɛntoʔo na ge, kiti konfɛɛ à pe pe sorasiyee pèè tun mà yo pe ya kasogo fɔlɔ po we: «Ma ki hɛɛn bee wa be.» 36Kasogo fɔlɔ wɔ̀ɔ ki kayoʔo ga yo ge Pɔli ma we mà yo: «Kiti konfɛɛ pé ma hɛɛn tun naʔa mà yo bì ye wa. Ɛɛn ki tɔ na ge, ye nyini yee sye nyimi na.» 37Di Pɔli wɔ̀ɔ pé po: «Wòó Hrɔmu woo be pé ma wo kmo foroba nî ge mâ po pe ìn jé kiti kon wo na, á pe wo le kaso nî ge. Ki tɔ na ge, pa pe gà wo yrigi wa wi nî hrama ni yo? Ayo dɛ. Kí ma yala pee tapoboo pe pan pe ba wo yrigi naʔa.» 38Sorasiyee à pe yâ ki woʔo ga yo ge kiti konfɛɛ kan be. Pe gáʔà loʔo mâ yo Pɔli nì Silasi nì we Hrɔmu woo bɛ ge, fyara à ti pé co. 39À pe pan mà bâ pe fɛn mà pe yrígi wa kaso nî we mà pe nyɛri mà yo pe nyini wa pe kàʔà ni ge. 40Pe gâ nyini wa kaso nî we kɔ ge, à pe kɛri Lidi wi kasyɛn ma ge. Pe gâ sɛrifɛɛ nya be mâ dihon kan pé ma ge, à pe kɛri.
موجودہ انتخاب:
PITUNBEE 16: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire