PITUNBEE 10
10
Nyɛʔɛlɛ lí ma Pyɛri tun Kɔrinɛyi ma
1Naŋa wà dà bo wa Sesare kàʔà ni ge, pe dáa wi yeri Kɔrinɛyi. Wɔ̀ɔ po sorasiyee lagwɔ wà wa sorasiyee klɛnmɛ ni me ma pe dáa yeri Itali womo me. 2Ki naŋa wi dáa Nyɛʔɛlɛ kpɔʔɔ le. Wiì nì wi go woo pè bɛfu ní à pe na li fyaʔa. Wɔ̀ɔ na nadanma yrɛbɛ fafaʔa kanʔa Juwifiyee pe fyomo fɛɛ ma be na nyɛri Nyɛʔɛlɛ ma le nyiŋi kì bɛfu na. 3Yaapraʔa kà na, wɔ̀ɔ gâ Nyɛʔɛlɛ mlɛŋɛ wà nya finmi na kpeʔele nɛɛ ŋloʔo gi, wí ma je wa wì krugu mòo po: 4«Kɔrinɛyi.» Kɔrinɛyi wɔ̀ɔ nyɛʔɛ kán ge wí na. Fyara à tuu co gbanʔa. Wɔ̀ɔ mlɛŋɛ po we: «Nyaʔa ma po wa, na fɔlɔ?» Mlɛŋɛ wɔ̀ɔ wí po: «Nyɛʔɛlɛ lí ma ma nyɛrimi syɔ me ní nadanma yrɛbɛ ba nì má ma kan fyomo fɛɛ ma be. À li na lama tun má ni. 5Ŋaŋa ni ge, ma hɛɛn pèè troʔo wa Jɔpe kàʔà ni ge pe ya naŋa wà yeri wa ŋa pé na yeri Simo Pyɛri we. 6Wí na kori Simo wà go nî, ŋa wí nyɛ hlɛrɛ kporifɔlɔ we. Wi go kí nyɛ wa nyugbɔmo tanla me.» 7Mlɛŋɛ ŋa wi dáa nyu wí ni ge wi gâ gɛri kɔ, Kɔrinɛyi wɔ̀ɔ wi go tungɔɔ pèè yeri hɛɛn syɛn mà plɛn sorasinaŋa wà nì ŋa wi dá bo na Nyɛʔɛlɛ kpɔʔɔ le mâ po wa bee ni pe dá bo wa wì tanla mâ na hanri wí kan ge. 8Wi gâ kì bɛfu tanli pé kan kɔ ge, wɔ̀ɔ pé tun Jɔpe kàʔà ni ge.
9Ki kpɛntoʔo na, pe gáa nori wa kàʔà na ge, Pyɛri wɔ̀ɔ po wí ma luʔu wa go ki binŋi na ge, jango bì yà Nyɛʔɛlɛ nyɛri le wa, ki dá bo yaagbanʔa na. 10Funŋu àʔa wí co, wɔ̀ɔ cori wí bi li. Pe gáa hro hori de wi kân ge, àʔa po nɛɛ wí na ŋolo, 11mà namuru nya de tí ma nyɛʔɛ. Wɔ̀ɔ yraʔa kà nya kí na tiʔi na pan. Ki dá bo nɛ pa kpasyokpɔʔɔ nyɛ ge mà po pwɔʔɔ ki kanŋaa ticɛrɛ na we. Àʔa na trigi ké na tra na de. 12Cyeʔe ticɛɛjɛɛ ajobo ní, ní tra yrɛbɛ ba nì pí na flolo ge, ní namuru kajɛnʔɛ ní ge pi tyɛnʔɛ kè bɛfu à ke po waʔa nî. 13À ákpolo là moo po: «Pyɛri, jɛ̀ ma pà kpo ma pi ka.» 14Di Pyɛri wɔ̀ɔ yo: «Ayoʔolo, na fɔlɔ, mɛjɛn mi ìn jé yraʔa kà ka ga kí nyɛ tipeʔe mâ po kranʔa ma yɛʔɛ̀ na ge.» 15Ákpolo à li ní màʔa yo wí kan syɛnwoʔo na ge mà yo: «Ga Nyɛʔɛlɛ lí yo kí nyɛ ylɛʔɛ ge, mò gá yo kí nyɛ kranʔa.» 16Ki woʔo ga ki dá hanri mà ta hanrihaʔa tanri. Ki kruʔu ma ge, ki yraʔa àʔa jɛ be kpo mà kɛri namuru ni de.
17Pyɛri pɔɔ da gáa wì yugu wi anyaʔa ki kɔ̀rɔ́ ní we ge, Kɔrinɛyi wi pitunbee be à pe po pé ma Simo wi go ca ge màʔa nya mà pan fɔ mà bâ yere be goyɛʔɛ nó na ge kɔ. 18À pe yugu wa gbanʔa mà yo: «Simo Pyɛri wí na kori naʔamɛ yo?» 19Pa Pyɛri wi da gâ bo wí na ki yraʔa ga wí nya ki kayoʔo honri ge adi, Nyɛʔɛlɛ li Nyìli à luu po: «Wele, hɛɛn tanri na ma ca. 20Ma jɛ̀ ma trìgì ma plɛ̀n pé ni maa sye. Mò gá kakara wa pé ni, mɛjɛn mì wi mí ma pe tun ge.» 21Pyɛri wɔ̀ɔ trigi mà pan pè krugu mà bâ pe po: «Mì wi ŋa yé na ca ge. Yé pan nyaʔa kala na?» 22À pe yo: «Kɔrinɛyi, ŋa sorasiyee lagwɔ we, wí ma wo tun naʔa. Wí nyɛ hɛnsinŋi na fyaʔa Nyɛʔɛlɛ na le. Juwifiyee à pe na wi yegmala yeri. Mlɛŋɛkmaa wà maʔa tyɛʔɛ wí na mà yo wi ba ma yeri ma kɛri wa wi go nî ge wi ya kayoro tà loʔo má ma.» 23Pyɛri wɔ̀ɔ pé co mà trigihaʔa kân pé ma. Ki kpɛntoʔo na ge, wɔ̀ɔ jɛ mà plɛn pé ni. Sɛrifɛɛ bee wa Jɔpe kàʔà ni ge, à pèè ma plɛn pé ni mà yâ pe troʔo. 24Ki kpɛnmɛ mi gâ do ge, à pe yâ je wa Sesare kàʔà ni ge. Kɔrinɛyi wɔ̀ɔ na pe hanni wa mà po wí ma wi heme woo ní wi tanma fɛɛ yeri be mà pe kpoʔolo. 25Nyiŋi ga na Pyɛri wi ga bâ je ge, Kɔrinɛyi wɔ̀ɔ jɛ mòo flin mà kunbiʔi kán wì tanla mòo kpɔʔɔ. 26Di Pyɛri wɔ̀ɔ wí jrɛʔɛ mòo po: «Jɛ̀, mì tapolo mí nyɛ hɛnwyee kpo.» 27Wɔ̀ɔ na ca na nyu wí ni na sye mà yâ je wa mà hɛnfafaʔa nya pé ma kpoʔolo. 28Wɔ̀ɔ pé po: «Yé maʔa cɛn mà yo hɛn ŋa Juwifiyee woo we wi furu di bí da fonʔolo klòʔo ke tɔɔ hɛɛn wà nì, ná kiì ban, bí da sye wa wì krugu ge. Di Nyɛʔɛlɛ lí maʔa tyɛʔɛ ná na mà yo ho gá yo hɛn wà nyɛ kraan mà po tipee. 29Ki kala na le, pa ye gâ na yeri, à mi ín ban. Mi ìn kakara le waʔa nî. Ɛɛn mí na ye yugu. Nyaʔa ma po wa á ye ná yeri ge sin?»
30Kɔrinɛyi wɔ̀ɔ yo: «Yaapraʔa kà na mɛsimɛ nyiŋi na ge, mi dá bo na Nyɛʔɛlɛ nyɛri le wa na go nî ge. Ki wlɛrɛ ticɛrɛwoʔo gi ga alaʔa nî ge. À mi gâ naŋa wà nya nà tanla na yɛʔɛ̀ ma ge yerehaʔa. Wi dreʔe ki dá bo na fligi fɔ mà na funŋu. 31Wɔ̀ɔ ná po: ‹Kɔrinɛyi, Nyɛʔɛlɛ lí ma ma nyɛrimi syɔ me mà na lama tun nadanma yrɛbɛ ba nì má na kanʔa fyomo fɛɛ ma be.› 32Ma hɛɛn pèè troʔo wa Jɔpe kàʔà ni ge pe ya Simo Pyɛri yeri we. Wí na kori wa Simo go nî ge, ŋa hlɛrɛ kporifɔlɔ we. Ki go kí nyɛ wa nyugbɔmo tanla me. 33Ɛɛn ki nyidege na ge, à mi hɛɛn pèè tun wa ma ma. Mo fanna, má maʔa po kmaʔa má pan ge. Ki tɔ na ge, wò bɛfu wó nyɛ naʔa Nyɛʔɛlɛ li yɛʔɛ̀ ma ge bì kì bɛfu loʔo ga wò fɔlɔ wi dá yo má kan ge.»
Pyɛri kayoro Kɔrinɛyi kasyɛn ma
34Ki nyiŋi na ge, Pyɛri wɔ̀ɔ ki hli na nyu pé ni mà yo: «Kanyɛmɛ na me, mí maʔa nya Nyɛʔɛlɛ loò na hɛn wà ponro wà na.#10:34 ma wèle wa Lado 10:17 ni wè.
35Di klo o klo ni hɛn ŋa wí na Nyɛʔɛlɛ fyaʔa le wa mâ na ga hanri kí nyɛ sinŋi ge, wi naa li glanʔa. 36Yèé yé ma kayoʔo cɛn ge ga Nyɛʔɛlɛ li da droʔó Israyɛli pii kan be mâ na ki kayotanʔa nyu ge pe kân nyimi woʔo ge, ma mí na taʔa Jesu Krisi ma we, ŋa hɛɛn pè bɛfu pe fɔlɔ we. 37Yé maʔa cɛn kpo ga ki da bâ hanri Jan wi batɛmu kayoro jarimi mi kruʔu ma ge mà kpe wa Galile klo ni fɔ mà bâ no Jude klo lì bɛfu ni, 38mà nì màʔa cɛn Jesu Nasarɛti kàʔà woo we. Nyɛʔɛlɛ li dɔɔ́ kan Nyɛʔɛlɛ li Nyìli li sye ní we pomo ma na ge, wɔ́ɔ na sye dee dee mâ na kmaʔa hanri ná hɛɛn pè bɛfu pori bee Sotanri, ŋa yele cɔʔɔfɔlɔ we, wi dá bo na cɔlɔ ge. Jesu wi dáa ki woʔo hanri ge, mɛjɛn Nyɛʔɛlɛ li dá bo wí ni. 39Kaʔa kè bɛfu gee wi dá hanri wa Juwifiyee pe klo ni le ní Jerusalɛmu kàʔà nì ge, wó nyɛ ke jarifɛɛ. À poo kán tipraʔa na mòo kpo. 40Nyɛʔɛlɛ à luu nyɛ mòo yrígi wlɛʔɛ tanriwoʔo na ge mòo yaʔa, wɔ̀ɔ wì tyɛʔɛ hɛɛn pèè na. 41Di hɛɛn pè bɛfu ban fɔ mà gâ laʔa wòó bee na Nyɛʔɛlɛ li da glú mâ fara mâ yo wo po wi kaʔa ke jarifɛɛ ge. Wi nyɛmanyinimi mi kruʔu ma wòó bɛ wo dáa li mâ na jo wí ni ge. 42Jesu wɔ̀ɔ kí yo wo ma mà yo woʔo jàrí hɛɛn ma be woʔo flìgí pé kan wo yo wiì wi ŋa Nyɛʔɛlɛ lí ma tɛnŋɛ wí po hɛnwyee ní kuu ní pe kiti konfɔlɔ we. 43Nyɛʔɛlɛ leyoo pè bɛfu pe dá ki woo wi kayoʔo yo mà yo hɛn o hɛn ŋa wí bi yere wí na ge, ki woo wi kapere pa ti yaʔa wí kan Jesu wi yele na le.»
Klòʔo ke tɔɔ ke woo pèè ma Nyɛʔɛlɛ li Nyìli ta le
44Nyiŋi ga na Pyɛri wi dáa ki kaʔa gee nyu ge adi ge, Nyɛʔɛlɛ li Nyìli à li trigi ki kayoʔo ki loʔofɛɛ pè bɛfu na. 45Sɛrifɛɛ bee pe da blɛ́n Pyɛri nì we mâ po Juwifiyee ge, àʔa pé fo, ga na Nyɛʔɛlɛ lí ma li akanʔa trigi ge kpo klòʔo ke tɔɔ ke hɛɛn na be, ga kí nyɛ Nyɛʔɛlɛ li Nyìli le. 46Mɛjɛn pe da pé nya pé na nyu hɛnrɛ tà ni tì yɛ mà na Nyɛʔɛlɛ kpoʔo le. Ki nyiŋi na, Pyɛri wɔ̀ɔ yo: 47«Bee pé ma Nyɛʔɛlɛ li Nyìli ta le nɛ pa wòó nyɛ be, pa hɛn wà bí gban bìʔi ce bì yo pò ga pé batise wa nyumu ni me yo?» 48Wɔ̀ɔ na pé po pe pe batise Jesu Krisi wi yele na le. Ki kruʔu ma, à poo nyɛri mà yo wi kò wa pe ní wi wlɛrɛ tà kɔ wa.
موجودہ انتخاب:
PITUNBEE 10: NLK10
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Côte d'Ivoire