Luuka 11
11
Nihusiho na Yeesu mwaha wa ovekela
1Nihuku nimoha Yeesu eera avekelaka vanipuroni nimoha. Amalihaka, mmoha a oohuseraawe aamweerela: “Apwiya, munixuttihe ovekela ntoko Yohaane aaxuttinghaawe oohuseraawe.” 2Owo aaweerela: “Nyuwo mwaavekelaka, mweereke: ‘Atiithi, Nsinananyu ntteelihiwe. Omwenaanyu orwe. 3Munivahe yoocaahu ya khula nihuku. 4Munilevelele sootthekasahu, niwoko hiyo nnaalevelela yaawo annitthekela. Muhinihiye neereriwaka.’” 5Vano aaweerela: “Noone ha weera mmoha a nyuwo akhalanneene nthamwene, ni onoorowa empaawe ohiyu eriyari amweerelaka: ‘Nthamwenaaka, mukoolihe ipaawu tthaaru, 6niwoko nthamwenaaka mmoha oohoowa ni mukwahaawe, ni miyo nkinono etthu yoomvaha.’ 7Vano owo ori mpaani ommwaakhula: ‘Muhikixupe. Nsele noowaliwa ni anamwanaaka anookona ni miyo. Nkingwera ovenya weera koovaheeni yeeyo mukivekenlaanyu.’ 8Miyo kinooleelani: Naari ahivenyaka weera amvahe ipaawu niwoko ori nthamwenaawe, owo anaavenye ni anaamvahe sootheene ontthunaawe niwoko na ovilelawawe woohuuliwa muru. 9Tivawo kinooleelani: Muvekele, ni munoovahiwa. Mwaasaase, ni munoophwanya; Mmane nsele, ni munoohuleliwa. 10Ootheene amvekela, animwaakhela; yoole onaasaasa, onoophwanya; ni wa yoole ommana nsele, onoohuleliwa. 11Tiithi heeni a nyuwo, mwaninyu oovekelani ehopa, onoomvaha enowa? 12Hoye hoye avekela nooce, onoomvaha walisi? 13Waari weera nyuwo murookhalaru atthu onanara murima munsuwela waavaha itthu sooreera anamwaniinyu, Atithinyu ari wiirimu anootepaxa waavaha Munepa Wootteela yaawo anaavekela!”
Yeesu ni Beelzebuli
14Yeesu eera oomolaka munepa woonanara wa mutthu aari oohuuluma. Okhumakaru munepa woonanara, mutthu oohuuluma aahuuluma, ni muloko wa atthu ancipale waatikhina. 15Akinatho a yaawo yaaheera: “Owo ongwera woomola minepa soonanara ni ekhavihero ya Beelzebuli, mwaneene a minepa soonanara.” 16Akinatho yaamweerera, emvekelaka eneneero ya wiirimu. 17Asuwelaka soowuupuwelasaya, Yeesu aaweerela: “Omwene wootheene wookawanyeya muneenaayaru onoomalela mmilepeni, ni empa emoha yookawanyeya eneenaayaru, enoopittuwa. 18Satana iikawanyiha muneenaawe, moota heeni omwenaawe oneeraaya okhale? Miyo kinghima yeeyo niwoko mweenraanyu weera Miyo kinoomola minepa soonanara ni ekhavihero ya Beelzebuli. 19Miyo koomola minepa soonanara ni ekhavihero ya Beelzebuli, anamwaniinyu anoomola minepa soonanara ni nsina nawani? Tivawo, awo asineenaaya eniikhale aphukaanyu. 20Waaritho weera Miyo kinoomola minepa soonanara ni ekatha ya Muluku, vano, omwene wa Muluku wohoorweelani. 21Mulopwana mmoha a ikuru, ni awanreene ni iyuuma sa ekhotto, alipelelaka empaawe, itthusawe nsikhale soolipa. 22Mukinatho oolipaxa angwanano ni angwina, onoomwaakha iyuuma iye owo aaroromelaawe, ni anaakawe mihakhusawe. 23Yoole ohikhanle ni Miyo, onookiinanano, ni yoole ohintakansa vamoha ni Miyo, onoomwaramwaxa. 24Munepa woonanara wakhuma wa mutthu, omvira mmapuroni a nikare, waasaasaka wiitthuuwa. Waahiphwanya, oneera: ‘Kinoohokoleela empa miyo kaakhumelenlaaka.’ 25Waaphiyaka, onoophwanya empa yookwesiwa ni yoorehereriwa. 26Vano munepa ole onrowa ni onruuha minepa mithannamiili siri sootepaxa onanara. Sivolowaka mmo, sinkhala mwemmo. Hiiho ehuhu yoomalihera ya mutthu ole eniikhale yoonanaraxa opwaha yoopacera.” 27Yeesu aahimaawe masu ale, muthiyana mmoha a atthu ancipale aakhuwela: “Ooreelihiwa ti muthiyana ooyanreni ni owaamwihaleni.” 28Owo aamwaakhula: “Ooreelihiwa oophwaha ti yaale aniiwa masu a Muluku ni aniiwelela.”
Eneneero ya Yoonasi
29Yaandyeerereyaka atthu, Yeesu aapacera ohima: “Ekhapira ela ti ekhapira yoonanara. Ela ennavekela eneneero yootikhiniheiya, mene kheewowo eneneero eneeraaya evahiwe, ehikhanle eneneero ya Yoonasi. 30Vano, ntoko Yoonasi aaraawe eneneero wa atthu a oNinive, hiihotho Mwaana a mutthu anaakhale eneneero wa ekhapira ela. 31Apwiyamwene a ohitto eniivenye nihuku na othorihiwa vamoha ni atthu a ekhapira ela ni awo eniithorihele ela, niwoko awo yaaweenle ottaiwenexa weera yiiwe miruku sa Salomoni. Vano Yoowo ori va ti mutokweene ompwaha Salomoni. 32Atthu a oNinive eniivenye nihuku na othorihiwa vamoha ni ekhapira ela ni eniithorihele ela, niwoko yiiwaka olaleiya wa Yoonasi, yaarukunxa murima. Vano Yoowo ori va ti mutokweene ompwaha Yoonasi.
Onyaari wa erutthu
33Khaawo ompattiha onyaari ni oniikaathi nipuro noowiipitheya, naari vathi va laata. Ohiyanawaya, oniikaathi nipuro nootthuneya weera yaawo amvolowa, yooneke waara. 34Maitho ari waara wa erutthu. Maithwaanyu yaakhalaka ooreera, erutthwaanyutho eniisareiye waara. Maithwaanyutho yaakhalaka oonanara, erutthwaanyutho eniisareiye epiphi. 35Tivawo, mwiipasoope weera waara ori mpuwamwanyu ohikhale epiphi. 36Erutthwaanyu yootheene yasareya waara, ehikhalanaka mpatta mukina mpiphini, munoomwaleeliwa nnenesene ntoko waara wa onyaari onoomwaleelani.”
Yeesu onimwaahiiha aFarisi* ni anamawera a nlamulo*
37Yeesu amalihaka wuuluma, muFarisi* mmoha aamwiitthanela yooca. Vano Yeesu aarowa ni aakilaathi vameesa. 38muFarisi*, oonaka weera Yeesu khaanyangwe ahinaaye oca, aatikhina. 39Vano Apwiya yaamweerela: “Nyuwo aFarisi* munrapiha omokoni wa ekoomixi ni wa esasaani, mpuwatho moosareya ohaawela mihakhu ni onanara. 40Alolo! Yoowo opanke omokoni, khapanketho mpuwa? 41Mwaavahetho yeeyo eri mpuwa wa esasaani oohaawa,ni mmoone weera sootheene moorapiheliwa. 42Ii! Munoohaawa, nyuwo aFarisi*! Niwoko munimvaha Muluku anaamuloko a sooreerela sooreeraxa, aruda* ni a makukhu oohiyanahiyana a maphuwa ootheene a mutuphini, mene khamumpwatthela ekhaikhai ni osivela wa Muluku. Ontthuneya weera nyuwo mukwanihereke yeeyo, muhaahiyaka anaamuloko. 43Ii! Munoohaawa, nyuwo aFarisi*, niwoko nyuwo munnasivela mapuro oopacera muSinagogani* ni wuulumihiwa mwaatthuni. 44Ii! Munoohaawa nyuwo, niwoko muri ntoko mahiye ahinooneya, mwa yaawo atthu amviramo ehisuwelaka.” 45Namawera a nlamulo* mmoha aamwaakhula: “Muhusiha, mwaahimaka itthusene seiyo, munniruwanatho hiyo.” 46Yeesu aamwaakhula: “Ii! Munoohaawa nyuwotho, anamawera a nlamulo*, niwoko munnaathateliha atthu ni soolemela awo ahingweraaya okuxa, ni nyuwo asineenaanyu khamunaakhavihera oteexa naari ni ekatha emoha. 47Ii! Munoohaawa nyuwo, niwoko munootekela mahiye a maprofeeti, ereenetho makholowaanyu asineenaanyu yaawiivale. 48Hiiho nyuwo munkhalela onamoona weera munaakhulela yeeyo makholowaanyu yaapankaaya. Awo yaawiiva maprofeeti ni nyuwo munaatekela mahiyaaya. 49Tivawo Muluku eenraawe ni mirukusawe: ‘Miyo kinimoorumihelani maprofeeti ni arummwa. Vano awo eniiwiive akina ni eniyaasoonde akinatho.’ 50Tivawo ekhapira ela eniikhalihiwe ni mulattu wa ephome ya maprofeeti ootheene eyeehiwe okhuma ompacereroni wa elapo ya vathi: 51okhuma ephome ya Abeli mpaka ya Zakariya, iiviwe variyari wa altaari* ni Empa ya Muluku. Aani, Miyo kinooleelani weera ekhapira ela eniikhalihiwe ni mulattu wa sootheene seiye. 52Ii! Munoohaawa, nyuwo anamawera a nlamulo*, niwoko moovenxa exaavi ya esuwelo. Nyuwo asineenaanyu khamvolongwe, ni mowooceeliha yaale yeera evolowe.” 53Avenyaka vaavaale Yeesu, aFarisi* ni anamawera a nlamulo* yaapacera wiinanano vancipale ni omukohakoha sincipale, 54yeereraka weera emvare ni masu eeraawe uulume.
موجودہ انتخاب:
Luuka 11: VMK2021
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Makhua Shirima Bible © Christelike Lektuurmaatskappy NPC, 2021.
