मत्ती 12

सब्त रा दिन

1उस बेल्ले यीशु विश्राम दिन खेत्रां रस्ते का होई करी जाया करदे थिये, ते तिन्हेरे चेल्‍लेयां जो भूख्ख लग्गी ते से जगंली बीह् री फलियां जो तोड़ी-तोड़ी करी खाणे लग्गे। 2तां फरीसियां ने ए दिख्खी करी बोल्लेया, कि दिख्ख, तेरे चेल्‍ले से करेया करदे हिन जिसेरा विश्राम दिन करणा मूसा रे नियमां रे हिसाब कने ठीक नी है? 3पर यीशु ने तिन्हा का पूच्छेया, कि कै तुसा ने पवित्रशास्त्र बिच ए नी पढ़ेया कि दाऊद अते तिन्हेरे मित्तरां ने, जां तिन्हा जो भूख्ख लग्गी थी, तां कै कित्ता थिया? 4तिसने परमेश्वर रे तम्बू अन्दर जाई करी परमेश्वर जो चढ़ाये री रोटियां किय्यां खाई थी? जिन्हा जो खाणा ना तां तिसेरे तांइ अते ना तिसेरे साथियां तांइ, पर सिर्फ पुरोत्तां तांइ ठीक थिया। 5या मूसा रे कानून बिच तुसा ए नी पढ़ेया कि विश्राम दिन मन्दिर रे पुरोत्त ही तिसेरी विधि जो तोड़दे हिन अते फिरी भी तिन्हा जो कोई किच्‍छ नी बोलदा। 6पर मैं तुसा जो बोलदा, इत्ते कोई है जे मन्दिर का भी बधी करी है। 7जे अगर तुसा पवित्रशास्त्र बिच लिख्खे री इन्हा गल्लां जो समजदे, “मैं लोक्कां बिच कुर्बानी नी पर दया भावना चांह्दा।” तां तुसा मेरे बेकसूर चेल्‍लेयां जो कुसूरवार नी बणांदे। 8किजोकी मणू रा पुत्तर, जे मैं ही है, विश्राम दिन रा भी मालक है।

सुके हत्थ वाले मणू जो ठीक करणा

9फिरी यीशु तित्ते का सभास्थल जो चली गे। 10तित्ते इक्क मणू थिया, जिसेरा इक्क हत्थ सुक्कड़ीह् गे रा थिया तां मणूआं ने पुछ्‌छेया, मूसा री रीति रे हिसाब कने विश्राम दिन कुसकी जो खरा करणा, सही है? तिन्हा ने उन्हा का ए इधेरे तांइ पुछ्‌छेया ताकि से तिन्हा पर इल्जाम लगाई सकण। 11पर यीशु ने उन्हा जो जवाब दित्तेया, मन्नो, तुसा रे बिच का कुसकी का इक्क भेड़ हो, ते से भेड़ विश्राम दिन कुसकी गत्ता बिच जाई पेयो, तां कै तुसा तिसजो पकड़ी करी बाहर नी कड्डणा? 12तां फिरी इक्क मणू कुसकी भेड़ का तां बड़ा जादा कीमती है, इधेरे तांइ विश्राम दिन पर कुसकी जो ठीक करणा मूसा रे कानून रे हिसाब कने सही है।

13तां यीशु ने तिस सुकड़ित्ते रे हत्थ वाले जो बोल्लेया, अपणा हत्थ अग्गे कर अते तिन्ने अपणा हत्थ अग्गे कित्तेया अते से खरा होई गेया ठीक तिय्यां ही जिय्यां तिसेरा दुज्जा हत्थ थिया। 14फिरी फरीसी तित्ते का बाहर निकली आये अते यीशु जो मारणे तांइ कोई तरकिब सोच्चणा लग्गे।

परमेश्वर रा चुणे रा सेवक

15पर यीशु ए जाणी गे अते तित्ते का चली गे बड़े भरी लोक्की तिन्हेरे पीच्छे चली पेह् अते यीशु ने तिन्हा सबनियां जो खरा कित्तेया, 16अते तिन्हा जो समजाया कि मेरे जो प्रकट मत करदे। 17ए इधेरे तांइ होया कि भविष्यद्वक्ता यशायाह रे जरिए प्रभु ने जे बोल्लेया थिया, से पूरा हो,

18“दिख्खो, ए मेरा सेवक है;

जिस जो मैं चुणे रा है ए मेरा प्यारा है,

मैं इसका खुस है मैं तिसेरे उप्पर अपणी आत्‍मा रखणी अते तिसने गैर यहूदियां रे लोक्कां जो हिसाब-किताब रा सुब बसेख दैणा।

19तिनिये ना तां लड़ाई-झगड़ा करणा अते ना ही लेरां मारणी, अते ना कुन्ने इसेरी अवाज गलियां बिच सूणनी।

20तिनिये झुके रे नलू सांई कमजोर मणू जो नी लताड़णा,

तिसने बुझदे दीये सांई कमजोर मणू जो नी मारणा।

ते तिसने लोक्कां रा इंसाफ करणा।

21अते गैर यहूदी लोक्कां तिसेरी आस रखणी।”

यीशु ते दुष्टात्मां रा सरदार

22फिरी मणू यीशु का इक्क अन्ने जो लियाये जे कि जह्ल्ला भी थिया किजोकी तिस बिच दुष्टात्मा थी यीशु ने तिसजो खरा करी दित्तेया, अते से अह्न्ना जह्ल्ला बोलणे अते दिखणे लग्गेया। 23अते सबणी मणूआं जो बड़ी हैरानी होई अते से बोल्णा लग्गे, कै ए मणू दाऊद रा पुत्तर होई सकदा? 24जां फरीसियां ने ए सूणेया तां से बोलणा लग्गे, ए तां दुष्टात्मा जो, दुष्टात्मां रे सरदार री मदत कने कड़दा। 25यीशु जो तिन्हेरे विचारां रा पता लग्गी गेया अते से तिन्हा जो बोलणा लग्गे, जिस राज बिच फूट पेई जांदी, से खत्म होई जांदा, अते जिस सहर या टब्बर बिच फूट पेई जाओ से नी टिकदा। 26अते जे अगर शैतान ही शैतान जो बाहर कड्डे तां से अपणे ही खिलाफ होई गेया तां फिरी तिसेरा राज किय्यां टिकी सकदा? 27भला जे अगर मैं दुष्टात्मां रे सरदार री मदत कने दुष्टात्मा जो कडदा तां तुसा रे चेल्‍ले कुसेरी मदत कने तिन्हा जो बाहर कडदे हिन? इधेरे तांइ तुसा रे चेल्‍लेयां ही ने तुसा रा फैसला करणा। 28पर जे मैं दुष्टात्मा जो पवित्रात्मा रे जरिए कडदा तां परमेश्वर रा राज तुसा का आई गे रा है। 29या किय्यां कोई ताकतवर मणू रे घरे घुसड़ी करी तिसेरे चोरी करी सकदा, जां तांइ से पैल्ले ताकतवर मणू जो बन्नी ना लै? तां ही से तिसेरा घर जो लूटी सकदा। 30जे मेरे कने नी हिन, से मेरे खिलाफ हिन अते जे बिखरियाँ भेड़ां जो इकट्ठा करणे बिच मेरी मदत नी करदा, से बिखेरेया करदा है। 31इधेरे तांइ मैं तुसा जो बोल्दा, मणू रा हर इक्क पाप अते हर इक्क बेजती माफ कित्ती जाणी पर पवित्रात्मा री बेजती करणे वाले जो माफ नी कित्तेया जाणा। 32अते जे कोई मणू रे पुत्तर, जे मैं ही है रे खिलाफ बिच बोलगा तिसजो माफ कित्तेया जाणा, पर जे कोई पवित्रात्मा रे खिलाफ बिच किच्‍छ बोलगा, तिसेरा ए गुनाह ना तां इस जुग बिच अते ना आणे वाले जुग बिच माफ कित्तेया जाणा।

बूट्टा ते तिसेरा फल्ल

33जे अगर इक्क बूट्टा खरा है तां तिसेरा फल्ल भी खरा ही होणा, पर जे अगर इक्क बूट्टा खराब है तां तिसेरा फल्ल भी खराब ही होणा, किजोकी बूट्टा अपणे फलां कने पछाणेया जांदा। 34तुसा जहरिल्ले कीड़े रे बच्चेयां सांई हिन! जे तुसा बुरे ही हिन तां ठीक गल्लां किय्यां करी सकदे हिन? किजोकी जे तिसेरे मन बिच है सेह्ई मुँह पर आंदा। 35इक्क खरा मणू जे अच्छाई तिसेरे दिल बिच है, तिस बिच का से ठीक ही गल्लां कडदा, अते बुरा मणू जे बुराई तिसेरे दिल बिच है, तिस बिच का बुरा गल्लां कडदा। 36पर मैं तुसा जो बोलदा मणू री हर इक्क फजूल गल्ल रा हिसाब तिसजो हिसाब-किताब वाले रोज्जे दैणा पैणा। 37तुसा री गल्लां रे हिसाब कने ही परमेश्वर ने तुसा जो सही या गलत साबित करणा।

स्वर्गीय निशानी री मांग

38तां किच्‍छ शास्त्रियां अते फरीसियां ने यीशु जो बोल्लेया, गुरु जी, असी तुसा का इक्क निशानी दिख्खणा चाह्‍ंदे। 39पर यीशु ने जवाब दित्तेया, ए बुरी अते व्यभिचारी पीढ़ी निशानी दिखणे री इच्छा रखदी, फिरी भी इन्हा लोक्कां जो योना भविष्यद्वक्ता जो दित्ती गेरी निशानी रे अलावा होर कोई निशानी नी दित्ती जाणी। 40किजोकी जिय्यां योना त्रै रोज्ज अते त्रै रात बड्डी मच्छी रे पेट्टा बिच रेया थिया, तिय्यां ही मणू रे पुत्तर, जे मैं ही है, भी त्रै रोज अते त्रै रात कब्र बिच रैह्णा। 41हिसाब-किताब रे बेल्ले नीनवे रे मणूआं ने अज्ज री इस पीढ़ी रे मणूआं कने उठी करी उन्हा जो कसुरवार दस्सणा किजोकी नीनवे रे लोक्कां ने योना री उपदेस सुणी करी अपणे पाप्पां का तौबा कित्ती थी, अते इत्ते तां कोई योना का भी बड्डा है पर तुसा फिरी भी तौबा नी करदे। 42हिसाब-किताब रे रोज्जे दक्षिण री राणी ने इस पीढ़ी रे लोक्कां कने उठी करी तिन्हा जो कसुरवार ठैहराणा, किजोकी से सुलैमान का ज्ञान री गल्लां सुनणे तांइ दुनिया रे दूए कुणे का आए री थी, अते दिख्खो, इत्ते तां कोई सुलैमान का भी बड्डा है, पर तुसा फिरी भी तौबा नी करदे। 43जां कोई दुष्टात्मा कुसकी मणू बिच का निकलदी, तां से अराम री तोप बिच सुकी जगाह् बिच भटकदी फिरदी रेह्न्दी, पर से तिसजो नी मिलदी। 44तां से अप्पु जो बोलदी, जिस मणू बिच का मैं निकली करी आई थी, तिस बिच ही हटी जांदी, अते जां से हटी करी तिस मणू री जिन्दगी जो अप्पु तांइ इक्क कमरे सांई खाली, साफ-सुथरी अते सजी सजाई पांदी। 45तां से दुष्टात्मा जाई करी अपणे कने होर जादा बुरी, होर सत्त दुष्टामां जो लेई आंदी, अते तिस मणू बिच रैह्णा लग्गी पैंदी, ते तिस मणू री हालत पैल्ले का भी जादा बुरी होई जांदी, अज्ज री इस बुरी पीढ़ी रे मणूआं री हालत भी इय्यां ही होणी।

यीशु रा सच्चा परिवार

46जां से मणूआं री भीड़ कने गल्लां करेया करदे थिये कि यीशु री मां अते भाई तित्ते आई करी बाहर खड़े होई गे अते से यीशु कने गल्ल करणे तांइ भालेया करदे थिये। 47अते कुसकी ने यीशु जो बोल्लेया, सुणो तुसा री मां अते भाई बाहर खड़ितेरे हिन ते तुसा कने गल्ल करणा चाह्‍ंदे हिन। 48ए सुणी करी यीशु ने उस बोलणे वाले जो जवाब दित्तेया, कुण है मेरी मां? कुण है मेरा भाई? 49अते अपणे चेल्‍लेयां पास्से हत्थ बद्धाई करी के बोल्लेया, दिख्खो, मेरी मां अते मेरे भाई हिन! 50किजोकी जे कोई मेरे परम-पिता री जे स्वर्ग बिच हिन मर्जी पूरी करदा, सेह्ई मेरा भाई, भैण अते मेरी मां है।

موجودہ انتخاب:

मत्ती 12: CDHNT

سرخی

شئیر

کاپی