Mathiyu 4
4
Gberiŋino hu ka Yisɔs haŋ
(Maki 1:12-13; Luku 4:1-13)
1Kɛna see Yisɔs kata iŋ Yina wo ka Masaala woŋ ka wula baŋ ba ka gberiŋino iŋ Sithani, Wayi Womandiŋ woŋ.#Hib 2:18; 4:15 2Yisɔs bohe suŋ ba gbɛɛni kɔnthɔ kanaŋ iŋ hura kɔnthɔ kanaŋ. Naa daŋande wuŋ kɛndɛ kɔnthɔ bohe niŋ. 3Kɛna see Bathiiki woŋ ka Yisɔs e ndɛ dɔma, na “Mɛnɛ yina Hati ka Masaala woŋ, niya hɛ tharaka thaŋ thaŋ yamari tha be sikiyɔkɔ muthɔma.”
4Kɛrɛ Yisɔs tepe niŋ ba dɔma, na “Magbali ma ka Masaala maŋ tepe, na ‘Muthɔma nagbɛti kutɛ ni ba wɔmɛti niyɔ iŋ sii, kɛrɛ sɔkɔ o sɔkɔ hu Masaala tɛpi huna ni ba wɔmɛti niyɔ iŋ sii.’”#Dit 8:3
5Kɛna sekithe niŋ Wayi Womandiŋ woŋ e niŋ kata ka mɛti bakuwɛ ba ka biYusu beŋ baŋ, ba dɔma baŋ na ka Yɛrusalɛmi, e niŋ ka tuta ka banka bamandiŋ ba ka Masaala baŋ ka thinthi, 6awa e tɛpa ka Yisɔs, na “Mɛnɛ yina Hati ka Masaala woŋ, yɛlɔkɔ hɛ ka pothi, baa magbali ma ka Masaala maŋ tepe ba dɔma, na
‘Masaala kɔŋ ni yamari malekɛŋ nama beŋ ba yina dethiteke,#Ŋaiŋa 91:11
awa bi kɔŋ yina thaye,
haliko kuthaki nda koŋ ku be tha hintiŋ thuŋɔ raka hunthe.’”#Ŋaiŋa 91:12
7Kɛrɛ Yisɔs mɛyiyɛ niŋ ba dɔma, na “Magbali ma ka Masaala maŋ tepe hɛlɛŋ, na ‘Yi ka ba gbɛriŋina Mariki woŋ Masaala wokɛnda woŋ.’”#Dit 6:16
8Wayi Womandiŋ woŋ sekithe hɛlɛŋ niŋ e niŋ ka dunkuta ka kusɛri ku kuthɔɔkuwɛ-thɔɔkuwɛ koŋ ka thinthi, e niŋ toŋine fooma thagbakinɛ tha ka faydo thaŋ iŋ nanhuluiŋ babɛina fooma. 9Kɛna tepe niŋ Wayi Womandiŋ woŋ ba dɔma, na “Yaŋ kɔŋ yina dunkune muŋ muŋ baŋ fooma mɛnɛ yi kɔŋ yama kunthuŋuyɛ e yi yama niya kubatho.”
10Kɛna tepe Yisɔs Sithani na ba dɔma, na “Gbɔniyɔkɔ yama dondo baŋ, baa magbali ma ka Masaala maŋ tepe, na ‘Yɔkɔŋ yi be ni kubatho Mariki woŋ Masaala wokɛnda woŋ; ndɛ wuntheŋ nape, ndɛ na yi ba niyiyɛ wali.’”#Dit 6:13
11Kɛna peneke ntiŋ niŋ Wayi Womandiŋ woŋ. Awa malekɛŋ see mase Yisɔs na.
Yisɔs sɛsi wali bakɛnama baŋ
(Maki 1:14-15; Luku 4:14-15)
12Naa yuye Yisɔs ba dɔma na Yɔni boho e ndɛ thiyo ka yeeli woŋ,#Math 14:3; Maki 6:17; Luku 3:19-20 Yisɔs key ka Kalili. 13Kɛrɛ ndɛ tha kahati ka mɛti ba ka Nasarɛthi baŋ. Ndɛ key doŋe ka mɛti ba ka Kapaniyɔmi ka gbaraŋ ba mankɔ maŋ,#Yɔni 2:12 ka bompi wo ka Sɛbulɔŋ mɛnɛ ka Nafatalai, 14haliko hu tepe nde banabi woŋ Aisaya ka kuthagba nama koŋ haŋ hu be thiŋ. Ndɛ tepe nde ba dɔma, na
15“Kuyɛkɛŋ ku ka Sɛbulɔŋ mɛnɛ kuyɛkɛŋ ku ka Nafatalai,
wu tɔpɛ mankɔ maŋ, haaŋ thuhandeŋ ka mankɔ ma ka Yɔdaŋ maŋ,
kuyɛkɛŋ ku ka Kalili ka siyani bahɛna baŋ ka,
16Biya bi dɔŋɔy kɛndɛ ka huntuma humandiŋ haŋ beŋ,
bi kɔŋ kutu waŋ bamandiŋ.
Awa iŋ ba biya bi dɔŋɔy ka kuyɛkɛŋ ku ka huntuma hu ka tuka haŋ koŋ, waŋ ba kɔŋ bindɛ bende.”#Ais 9:1-2
17There ka lɔkɔ babɛina Yisɔs sɛsi ba niya kɛwandi ba dɔma, na “Sikiyɔkɔŋ maŋaye ka hakɛŋ ndeŋ baŋ, baa huybakine hu ka ariana haŋ thuriye.”#Math 3:2
Yisɔs thiyi bakarandeni bimayoŋ beŋ
(Maki 1:16-20; Luku 5:1-11)
18Naa nde Yisɔs kaande ka gbaraŋ ba ka mankɔ ma ka Kalili maŋ, ndɛ kute biya biye bi huwɛndiya, Saimɔŋ wo domo Pita woŋ mɛnɛ wɛndama Anduru, bi si yɛli ŋapɛli ka mankɔ ka, baa bayɔsiŋ bina bindɛ. 19Huna dome Yisɔs kɛnamɛŋ, na “Yemaŋ yama, awa yaŋ kɔŋ bena sikiŋ bayɔsiŋ biyamɛti.” 20Ka thagbɛmgbɛŋ thabɛina bindɛ pɛyi ŋapɛli namɛŋ ŋaŋ e bindɛ yema Yisɔs na.
21Naa Yisɔs key biyasi nama haŋ ka kɔtɔkɔy, ndɛ kute hɛlɛŋ biya biye bi huwɛndiya, Yemisi mɛnɛ wɛndama Yɔni bi doŋe ka gbe baŋ mɛnɛ fandamɛŋ Sɛbɛdi bi si yeheni ŋapɛli namɛŋ ŋaŋ. Kɛna thiyi bindɛ Yisɔs. 22Ka thagbɛmgbɛŋ thabɛina bindɛ pɛyi gbe baŋ mɛnɛ fandamɛŋ e bindɛ yema Yisɔs na.
Yisɔs ni kɛwandi e ndɛ puya
(Luku 6:17-19)
23Awa Yisɔs key kaŋ kaande fooma ka kuyɛkɛŋ ku ka Kalili kaŋ thaninuwa iŋ kaŋ niya kɛwandi biya beŋ Huseri Huyɔhɔy haŋ ba huybakine hu ka Masaala haŋ ka bankɛŋ namɛŋ bathuŋuyande baŋ. Ndɛ puyi fooma nthoonani kihakuwande mɛnɛ kɔnthɔhiliŋ bi ka ŋakɔtɔ fooma ka biya bi kɛndɛ beŋ.#Math 9:35; Maki 1:39 24Kɛna see keŋ ku ka Yisɔs gbanthande fooma ka kuyɛkɛŋ ku ka Siriya. Biya beŋ bohe sisa bithoonuwɔy beŋ fooma ka Yisɔs, bi iŋ nthoonani kihakuwande, bi iŋ bumbuŋɛŋ, bi kutande iŋ mbayiŋ, bi bɔhɔy makɛndɔiŋ, mɛnɛ bigbɛsinkɔy. Yisɔs puyi bindɛ fooma. 25Awa sɛthɛ bamandiŋ yeme Yisɔs na maŋaye ka kuyɛkɛŋ ku ka Kalili, ka Mɛtiŋ Kɔhi baŋ, ka mɛti ba ka Yɛrusalɛmi, ka kuyɛkɛŋ ku ka Yudiya, mɛnɛ ŋaye thuhaŋ mankɔ ma ka Yɔdaŋ maŋ.
موجودہ انتخاب:
Mathiyu 4: LMBNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© The Bible Society of Sierra Leone, 2011
