Mathiyu 26
26
Yisɔs yukuyo yanfa
(Maki 14:1-2; Luku 22:1-2; Yɔni 11:45-53)
1Naa thanki Yisɔs thaninuwa bɛyiniŋ baŋ baŋ fooma, ndɛ dome ka bakarandeni nama beŋ, na 2“Beŋ kɔthɛŋ ba dɔma na wuŋ pɛyɛ hura kaye biya ba dɔŋɔ ba siyuwa malɔkɔ ma puntiyando nde biIsirɛli beŋ maŋ iŋ maleka wo ka tuka haŋ woŋ ka Iyipiti.#Fuŋa 12:1-27 Ka lɔkɔ babɛina na Hati ka Wɔ woŋ dunkuna ka bi niŋ yanti ka kuyeŋ kubariŋande koŋ ba niŋ kɔra.”
3Ka lɔkɔ babɛina hɛlɛŋ tɛɛna kɔmande bafodeni bibukuyuwɛ beŋ mɛnɛ bakalani bibayahɛŋ ka biya beŋ ka tha banthe ka gbada hu ka Bafode Womandiŋ wo dɔma Keyafasi woŋ. 4Bindɛ dɛɛnki ka tha banthe na bindɛ bohe Yisɔs na ka gbundu ba niŋ kɔra. 5Bindɛ gbonkoy ka tha banthe ba dɔma, na “Miŋ kɔŋ niŋ kɔri, kɛrɛ miŋ bɛiŋ wuŋ ni ka wiki wo ka thɔma humandiŋ haŋ woŋ, baa thampo biya muŋ niya sɔnkɔ-sɔnkɔ.”
Yisɔs koŋo mayɔ ma thimɔy huru ka Bɛthani
(Maki 14:3-9; Yɔni 12:1-8)
6Ka lɔkɔ babɛina Yisɔs kiŋ nde ka mɛti ba ka Bɛthani ka banka ba ka Saimɔŋ wo boho nde iŋ nthoonaŋ kinɛnɔy ki bohe ka kɔtɔ ku ka wɔmɛti koŋ ka thinthi. 7Naa dɔŋɔy Yisɔs ka thɔma haŋ, hati yɛrɛmɛ wunthe see ka Yisɔs wo iŋ bithira hu mayɔ ma thimɔy huru, awa e mɛŋ nde hɛlɛŋ niyɔ ma kahɛ mɔlɔŋ. Bithira hubɛina hu yehinuwo maŋaye ka raka hu kahɛ mɔlɔŋ hu dɔma na alabasata. Hati woyɛrɛmɛ woŋ baŋ key mɛŋ koŋe Yisɔs na ka yaha ka doŋe ndɛ ka thɔma haŋ ka.#Luku 7:37-38 8Naa kute wuŋ bakarandeni nama beŋ, wuŋ baŋiye bindɛ wumandiŋ. Huna dome bindɛ, na “Mbɛ hu teetuwe hati woyɛrɛmɛ woŋ baŋ mayɔ maŋ maŋ? 9Mayɔ maŋ maŋ ma kɔŋ nde niya gbɔŋ e mɛŋ fuŋuna kɔbiri womandiŋ, wo nde bamɔnɛŋ beŋ dunkuno.”
10Yisɔs kɔthɛ hu bindɛ tɛpi haŋ, huna dome ndɛ kɛnamɛŋ, na “Mbɛ hu beŋ niye hati woyɛrɛmɛ woŋ baŋ thɔrɔ? Ndɛ thanki niya bɛyi bayɔhɔy kiyaŋ. 11Beŋ kiŋ iŋ bamɔnɛŋ beŋ timo tima,#Dit 15:11 kɛrɛ beŋ sa niyɔ iŋ yaŋ timo tima. 12Mayɔ ma koŋe hati woyɛrɛmɛ woŋ yama ka kɔtɔ maŋ, ndɛ ni wuŋ ba yama kɔsinɔkɔ haliko na yaŋ si maankuwo. 13Yaŋ kɔŋ bena tepe, komo kama ka Huseri Huyɔhɔy haŋ haŋ baŋ niya kɛwandi ka fay woŋ baŋ fooma, ba ni hati woyɛrɛmɛ woŋ baŋ ba kɔŋ doŋe tepo ba niŋ siyuwa.”
Yudasi yɛrɔkɔy ba niya Yisɔs na gbɔŋ ka hadeni nama beŋ
(Maki 14:10-11; Luku 22:3-6)
14Kɛna ŋaye wunthe ka bakarandeni nama bikɔhi iŋ biye beŋ, wo dɔma Yudasi Isakariyɔti woŋ, e ndɛ kaa ka bafodeni bibukuyuwɛ beŋ. 15Ndɛ key bindɛ thɔnthɔŋɔŋ ba dɔma, na “Mbɛ mu beŋ yama dunkune mɛnɛ yaŋ dunkune bena Yisɔs na?” Kɛna konde bindɛ kɔbiri wosiliba kɔnthɔ kataati e bindɛ niŋ dunkune Yudasi na. 16Awa there nda ka lɔkɔ babɛina, Yudasi bohe nda deethuwa na ndɛ dunkune Yisɔs na ka hadeni nama beŋ.
Yisɔs thɔŋ iŋ bakarandeni beŋ thɔma hu ka siyuwa malɔkɔ ma puntiyando nde biIsirɛli beŋ
(Maki 14:12-21; Luku 22:7-14, 21-23; Yɔni 13:21-30)
17Ka lɔkɔ bamayoŋ ka wiki wo thɔŋ bindɛ kutoŋ ku ka iŋ yisithi woŋ koŋ, bakarandeni beŋ see ka Yisɔs, e bindɛ niŋ si thɔnthiŋina ba dɔma, na “Kama thimo yi ba miŋ kosineke ba thɔma hu ka siyuwa malɔkɔ ma puntiyando nde siya ntuŋ baŋ iŋ maleka wo nde katitɔkɔ tuka haŋ woŋ?”
18Huna dome Yisɔs kɛnamɛŋ, na “Kaaŋ ka mɛti bamandiŋ ba ka Yɛrusalɛmi baŋ e beŋ ka tepe wɔ wunthe kɛndɛ ba dɔma, na ‘Karimɔkɔ woŋ dome, na lɔkɔ niŋ baŋ thuriye. Huna yaŋ kɔŋ thɔŋ thɔma haŋ iŋ bakarandeni niŋ beŋ ka banka kɛnda do.’”
19Bakarandeni beŋ ni nɔŋ na toŋinuwe nthɔŋ Yisɔs bindɛ na. Naa toŋino bindɛ makonko maŋ, bindɛ kɔsinɔkɔy kɛndɛ wuyɔhɔy ba thɔma haŋ.
20Naa tɛŋ wuŋ mahɔnkɔlɛŋ, Yisɔs dɔŋɔy ka thɔma haŋ iŋ bakarandeni kɔhi iŋ biye beŋ. 21Awa naa bindɛ thɔŋ, huna dome Yisɔs kɛnamɛŋ, na “Yaŋ kɔŋ bena tepe, wunthe ka beŋ kɔŋ yama ni gbɔŋ ka hadeni niŋ beŋ.”
22Naa yuye bindɛ haŋ haŋ baŋ, wuŋ niyɔy bindɛ nkinikiniŋ wumandiŋ. Kɛna bohe bindɛ niŋ thɔnthiŋinuwa ka wunthe-wunthe, na “Mariki, yaŋ kutɛ ye.”
23Yisɔs mɛyiyɛ bindɛ ba dɔma, na “Wunthe ka beŋ wo yaŋ thiyitande yɔnkɔ ka kaaro banthe woŋ, ndɛ na yama ni gbɔŋ.#Ŋaiŋa 41:9 24Hati ka Wɔ woŋ kɔŋ tuke nɔŋ na gbalo nde wuŋ na ka magbali ma ka Masaala maŋ ba ndɛ. Kɛrɛ nambara ba kɔŋ see ka wɔ wo ni Hati ka Wɔ woŋ gbɔŋ. Wu kɔŋ nde nɔŋ niyɔ hita ba wɔ bɛina nde nɔŋ thana mpoo.”
25Yudasi hɛlɛŋ gbeeŋ ndɛ thɔɔtɔy ka dɔma, na “Karimɔkɔ, yaŋ kutɛ ye.” Huna dome Yisɔs kɛnama, na “Na tepe nda nɛŋ yi.” Yudasi wobɛina gbeeŋ na niye Yisɔs na gbɔŋ woŋ.
Thɔma hu ka Mariki woŋ haŋ
(Maki 14:22-26; Luku 22:14-20; 1 biKɔrinthi beŋ 10:16; 11:23-25)
26Naa nde bindɛ thɔŋ, Yisɔs sekithe kutoŋ koŋ, e ndɛ thiyiyɛ kuŋ maamo. Naa thankaŋ ndɛ, ndɛ thinkinuwande kuŋ e ndɛ dunkune bakarandeni beŋ e ndɛ bindɛ tepe ba dɔma, na “Sɛkithaŋ kutoŋ koŋ koŋ baŋ e beŋ kuŋ thɔma. Kɔtɔ niŋ koŋ kuna.”
27Ndɛ sekithe hɛlɛŋ kɔɔpu haŋ e ndɛ thiya Masaala na maamo. Awa naa thanki ndɛ thiya maamo, ndɛ dome kɛnamɛŋ, na “Thiiyeŋ beŋ fooma. 28Mampa maŋ maŋ mɛna wasi niŋ baŋ,#Fuŋa 24:8 ba thiŋinɛ mayukunande ma ka Masaala maŋ iŋ biyamɛti.#Yɛr 31:31-34 Wasi niŋ baŋ ba kɔŋ tɔŋa wuna biya bibɔyɛ pɛniya hakɛŋ namɛŋ baŋ. 29Yaŋ kɔŋ bena tepe ba dɔma na yaŋ sa nɔŋ nda thiiye mampa ma ka mutiŋ muŋ muŋ baŋ, yɔkɔŋ nɔŋ nda ti yaŋ thiiye maŋama maŋ ka Hugbakinɛ hu ka Fandaŋ woŋ haŋ.”
30Naa thanki bindɛ thɔma, bindɛ soŋe kuiŋa ku ka Masaala koŋ, kɛna pɛyɛŋ bindɛ kɛndɛ ba kaa ka kusɛri ku dɔma na Ɔlifisi koŋ.
Yisɔs tepe ba niŋ Pita kɔ buuhuwa
(Maki 14:27-31; Luku 22:31-34; Yɔni 13:36-38)
31Kɛna dome Yisɔs kɛnamɛŋ, na “Beŋ fooma beŋ kɔŋ yama pɛyɛŋ huyɛ baŋ baŋ. Wu kɔŋ niyɔ nɔŋ na tepe Masaala na ka magbali nama maŋ ba dɔma, na ‘Yaŋ kɔŋ kɔri batɔli woŋ, awa takɛŋ beŋ fooma ka kubinthi koŋ bi kɔŋ paŋande.’#Sɛk 13:7 32Kɛrɛ naa yaŋ ŋayino ka tuka haŋ, yaŋ kɔŋ key ka Kalili; kɛna beŋ yama penke.”#Math 28:16
33Huna dome Pita kɛnama, na “Hali beŋ beŋ fooma bi pɛyɛnaŋ yina, yaŋ sa yina pɛyɛŋ.”
34Huna dome Yisɔs ka Pita, na “Yaŋ kɔŋ yina tepe nɔndi baŋ, saanuŋ koki woŋ ba kokira huyɛ baŋ baŋ, yi kɔŋ yama buuhu dɔŋɔ kataati ba dɔma na yi kɔita yama.”
35Kɛna dome Pita kɛnama, na “Hali wu pɛnkaŋ nthɔŋ ba dɔma na yaŋ kɔŋ tuku iŋ yi ka nanthe, yaŋ sa yina buuhu.”
Bakarandeni bibintheŋ beŋ fooma dome hɛlɛmaŋ nɛŋ.
Yisɔs ni kuraminɛ ka Kɛthɛsɛmɛni
(Maki 14:32-42; Luku 22:39-46)
36Yisɔs mɛnɛ bakarandeni nama beŋ fuŋ ba kaa ka tha ka dɔma na ka Kɛthɛsɛmɛni. Naa tɛŋ bindɛ kɛndɛ, ndɛ tepe bakarandeni nama beŋ, na “Dɔŋɔŋ dondo baŋ. Yaŋ kɔŋ key kanka baŋ ba ka niya kuraminɛ.” 37Ndɛ diŋe Pita na ka kaa mɛnɛ mpati bi ka Sɛbɛdi bibiye beŋ. Ka lɔkɔ baŋ baŋ ndɛ bohe kutɔkɔ nkinikiniŋ, awa e thukuma nama haŋ kɔ niya thɔrɔ. 38Huna dome ndɛ kɛnamɛŋ, na “Yaŋ kiŋ iŋ nkinikiniŋ wumandiŋ ka thukuma niŋ haŋ, wu yama kɔ ba kɔra. Bɛna pɛyɔŋ dondo baŋ, beŋ be huru gbele ka nanthe iŋ yaŋ.”
39Kɛna key ndɛ ka kɔtɔkɔy hɛlɛŋ wuyete, e ndɛ putɔ nasɔli-sɔli ka niya kuraminɛ, na “Fandaŋ woŋ, mɛnɛ wu kɔŋ nde ŋɛnɔ, niya ba kɔɔpu hu ka nambara baŋ baŋ haŋ yama bariŋɔ. Kɛrɛ wu bɛiŋ niyɔ ka mathimo niŋ nde, kɛrɛ wu niyɔyŋ ka mathimo makɛnda maŋ.”
40Naa thanki ndɛ niya kuraminɛ, ndɛ teŋiteke ka bakarandeni bitaati beŋ. Kɛrɛ ndɛ penke bi si nine. Huna dome ndɛ ka Pita, na “Mbɛ hu sa bendo bitaati beŋ punku hure gbele iŋ yaŋ hali ba wakathi wunthe? 41Huraŋ gbele e beŋ niya kuraminɛ wuna sa beŋ thiika ba niya hakɛŋ. Thukuma haŋ hu thimoŋ ba niya bɛyi bathumbɛ, kɛrɛ huwɔmɛtiya haŋ ka iŋ sɛmbɛ ba bɛŋ niya.”
42Naa nambe wuŋ wuyete, Yisɔs key hɛlɛŋ ba ka niya kuraminɛ hukaye. Huna dome ndɛ, na “Fandaŋ woŋ, mɛnɛ kɔɔpu hu ka nambarɛŋ baŋ baŋ haŋ sa yama bariŋɔ na yɔkɔŋ yaŋ thiiye huŋ, awa mathimo makɛnda ma niyɔyŋ.” 43Naa thanki ndɛ niya kuraminɛ, ndɛ see hɛlɛŋ ka bakarandeni beŋ e ndɛ pɛnka bindɛ bi si nine, baa bi thiŋo nde mandɛ ka thaaya namɛŋ thaŋ.
44Ndɛ pɛyi hɛlɛŋ bindɛ kɛndɛ e ndɛ kaa ba ka niya kuraminɛ hu tɛŋinɛ dɔŋɔ kataati. Kuraminɛ kukunthe koŋ thuŋ kuŋ ma key ka niya. 45Naa thanki ndɛ niya kuraminɛ, ndɛ teŋiteke hɛlɛŋ ka bakarandeni beŋ, kɛrɛ ndɛ penke hɛlɛŋ bi si nine. Huna dome ndɛ kɛnamɛŋ, na “E haaŋ hɛ nine na beŋ nine e beŋ kɔ hɛɛmuwa? Poniyaŋ nuŋ kuiha, wakathi woŋ tɛŋ wo Hati ka Wɔ woŋ niyo gbɔŋ woŋ ka thɛnkɔ tha ka bahakɛŋ. 46Ŋayeŋ ka kɔɔ, miŋ beŋ key. Dethaŋ hɛ, wo yama ni gbɔŋ woŋ, ndɛ kiŋ nda mina wuthuriye.”
Yisɔs boho
(Maki 14:43-50; Luku 22:47-53; Yɔni 18:3-12)
47Naa nde Yisɔs gbonkoy, kɛna see Yudasi, wo nde wunthe ka bakarandeni kɔhi iŋ biye beŋ, iŋ sɛthɛ babɔyɛ bi iŋ silanhiŋ mɛnɛ ŋagbemgbe, bi ŋindi bafodeni bibukuyuwɛ beŋ mɛnɛ bakalani bibayahɛŋ beŋ. 48Saanuŋ bindɛ ba kaa ka bɔha Yisɔs na, Yudasi, banigbɔŋ woŋ, toŋine bindɛ na wundɛ ka ni na bindɛ kothiye Yisɔs na. Ndɛ tepe bindɛ ba dɔma, na “Hati wathe wo nthɔŋ yaŋ dɔɔkɔ ka maana woŋ, bɔhaŋ niŋ. Ndɛ na.”
49Naa tɛŋ Yudasi, ndɛ key toloŋ ka Yisɔs ka e dɔma, na “Maande, karimɔkɔ.” Awa ndɛ dɔɔkɔy niŋ ka maana.
50Yisɔs dome kɛnama, na “Nyathiki, niya yako ba see yi ka niya dondo baŋ.”
Kɛna see sɛthɛ baŋ ŋote Yisɔs na e bindɛ niŋ bɔha wukahɛ. 51Naa kute nthɔŋ wuŋ wunthe ka bi iŋ Yisɔs beŋ, ndɛ yose silanhi nama baŋ e ndɛ yuwa waayi wo ka Bafode Womandiŋ woŋ e gbaara kuiha nama koŋ. 52Naa kute wuŋ Yisɔs, ndɛ tepe niŋ ba dɔma, na “Thiya silanhi nda baŋ ka kurɔmɔ nama koŋ, baa bi sɛkithɛ silanhiŋ namɛŋ beŋ fooma ba dekiya, silanhiŋ bɛna bindɛ kɔɔri. 53E beŋ kɔita ba dɔma na yaŋ punkeŋ ba thɔnthiŋina Fandaŋ woŋ ba maso, awa ndɛ kɔŋ yama tɔŋɔti ŋakunkunɛ ŋa yamɛ kɔhi iŋ ŋaye ŋa ka kurugbani bimalekɛŋ beŋ ŋaŋ? 54Kɛrɛ mɛnɛ yaŋ thɔnthɔŋɔŋ ba bindɛ, nama magbali ma ka Masaala maŋ thiŋe, ma tɛpɛ maŋ ba dɔma na bɛyiniŋ baŋ baŋ fooma yɔkɔŋ bɛŋ niiye nɛŋ?”
55Kɛna dome Yisɔs ka sɛthɛ baŋ, na “E beŋ asee iŋ silanhiŋ mɛnɛ ŋagbemgbe ka bɔha yama nɔŋ ka beŋ see ka bɔha wɔ wo sa putiyɔ siraŋ? Tima o tima yaŋ kɔŋ dɔŋɔ iŋ beŋ ka banka bamandiŋ ba ka Masaala baŋ ka thaninuwa,#Luku 19:47; 21:37 kɛrɛ beŋ tha yama bohi. 56Kɛrɛ bɛyiniŋ baŋ baŋ niyɔy fooma haliko magbali ma ka banabiŋ beŋ maŋ ma be thiŋ.”
Ka lɔkɔ baŋ baŋ bakarandeni beŋ fooma pɛyɛŋ niŋ e bindɛ kita.
Yisɔs kiyo ka kɔtɔkɔy ka kaama woŋ
(Maki 14:53-65; Luku 22:54-55, 63-71; Yɔni 18:13-14, 19-24)
57Bi bɔhɛ Yisɔs na beŋ kati niŋ ka banka ba ka Keyafasi ka, Bafode Womandiŋ woŋ, ka kɔmande karimɔkɔiŋ bi ka Siraŋ baŋ beŋ mɛnɛ bakalani bibayahɛŋ beŋ. 58Naa Yisɔs kata, Pita yeme kahɛŋ kɛrɛ wuthɔkiyande iŋ bindɛ. Naa biyande Pita, ndɛ key dɔŋɔ ka gbada hu ka banka ba ka Bafode Womandiŋ woŋ baŋ. Ndɛ key dɔŋɔ iŋ bi ni kantha beŋ ba detha ba niyɔ. 59Bafodeni bibukuyuwɛ beŋ mɛnɛ bakaamani beŋ fooma bohe niya maseri mahothi ma sɔkinɔkɔ Yisɔs na haliko na ndɛ koro. 60Kɛrɛ bindɛ tha kutu hu bindɛ niŋ thonkine. Biya bibɔyɛ see kɔɔ kɔ kɔtɔkɔy ba niŋ keriŋiyɛ hothi. Yɔkɔŋ hu mankɛ nagbɔŋ baseriŋ biye see kɔɔ, 61bi tɛpɛ ba dɔma, na “Ndɛ tepe nde ba dɔma, na ‘Yaŋ punkeŋ teetuwa yikiya ba ka Masaala baŋ, awa e yaŋ bɛŋ hɛlɛŋ thanka thoya ka gbɛɛŋ wo tɛŋinɛ wotaati woŋ.’”#Yɔni 2:19
62Naa yuye huŋ Bafode Womandiŋ woŋ, ndɛ ŋaye ka kɔɔ e ndɛ dɔma ka Yisɔs, na “E yi ka iŋ yaabi ba yi ni ka maseri ma lamgbeŋ beŋ beŋ ni ma sɔkinɔkɔ yina maŋ?” 63Kɛrɛ Yisɔs tha hintiŋ nthɔŋ niŋ tɔtiyɔkɔ. Huna dome Bafode Womandiŋ woŋ kɛnama, na “Yi iŋ Masaala wopethɔy woŋ, gbiŋa hɛ mɛnɛ yina Banikisi wo niyo miŋ lahiri woŋ, Hati ka Masaala woŋ.”
64Huna dome Yisɔs kɛnama, na “Na tepe nda nɛŋ yi. Kɛrɛ yaŋ kɔŋ bena tepe, wuŋ sa nda nambi beŋ kɔŋ kutu Hati ka Wɔ woŋ ka madoŋe mayiki maŋ ka yɔnkɔ huthome hu ka Wo biyɛ sɛmbɛŋ fooma woŋ haŋ, awa e ndɛ kɔ saa ka thawuruma tha ka kuthahinɛ koŋ thaŋ.”#Dan 7:19
65Naa yuye huŋ Bafode Womandiŋ woŋ, ndɛ saayaŋ ŋahɔli ŋa thooye ndɛ ŋaŋ ba tɔŋina ba ndɛ thɔɔ ka mathoŋ, e ndɛ dɔma, na “Ndɛ kɔŋ yetheni keŋ ku ka Masaala koŋ ka gbonkiya. Mbɛ hɛlɛŋ nda maseri ma miŋ kufiyo? Beŋ fooma yuye nda na ndɛ yetheni keŋ ku ka Masaala koŋ. 66Nama tepe beŋ?”
Huna tepe bindɛ ba dɔma, na “Ndɛ asisande ba koro.”#Lɛb 24:16
67Kɛna thuthe bindɛ Yisɔs na ka yethi haŋ, e bindɛ niŋ tawa. Kɛna dome bi thorinɛ niŋ beŋ kɛnama,#Ais 50:6 68na “Niya hɛ hunabi kɛntuŋ, baa yina Banikisi woŋ. Mbɛ wo thorinɛ yina?”
Pita buuhu Yisɔs na
(Maki 14:66-72; Luku 22:56-62; Yɔni 18:15-18, 25-27)
69Ka lɔkɔ babɛina Pita doŋeŋ nde ka gbada ka. Kɛna see hati bɛthɔ wo nde wunthe ka bawaliŋ bi ka Bafode Womandiŋ woŋ kɛnama e ndɛ dɔma, na “Yi hɛlɛŋ nɛŋ gbeeŋ yina nɔŋ iŋ Yisɔs wo ka Kalili woŋ.”
70Kɛrɛ Pita buuhu ka kooye bindɛ kɛ e ndɛ dɔma, na “Yaŋ kɔita hu yi tɛpi haŋ.” 71Pita fuŋ e ndɛ ka kɔɔ ka biya muŋ biiyande kɛ. Hati bɛthɔ wohɛna kute hɛlɛŋ Pita na. Huna dome ndɛ ka bi kɔɔyɛ kɛndɛ kuwaŋ beŋ, na “Hati lamgba woŋ baŋ ndɛ na nɔŋ iŋ Yisɔs wo ka Nasarɛthi woŋ.”
72Kɛna buuhu hɛlɛŋ Pita e ndɛ tɛpa ba dɔma, na “Yaŋ gbiŋe, yaŋ kɔita hati lamgba woŋ baŋ.”
73Naa nambe nthɔŋ wuŋ wuyete, kɛna see bi kɔɔyɛ kɛndɛ kuwaŋ beŋ ka Pita e bindɛ dɔma, na “Hunɔndi yaathi wunthe na yi ka bindɛ, baa magbonkoy makɛnda maŋ tɔŋɔŋ ba yi ŋaye ka tha banthe iŋ bindɛ.”
74Kɛna bohe Pita thiyiyɔkɔ danka e ndɛ kɔ gbiŋa ba dɔma, na “Yaŋ kɔita hati lamgba woŋ baŋ. Mɛnɛ yaŋ kɔthɛŋ niŋ, haliko Masaala gbasiŋita yama.”
Ka thagbɛmgbɛŋ thabɛina, koki woŋ kokori. 75Kɛna siyi Pita hu tepe nde niŋ Yisɔs haŋ ba dɔma, na “Saanuŋ koki woŋ ba kokira, yi kɔŋ yama buuhu kataati ba dɔma na yi kɔita yama.” Pita fuŋ ka gbada ka e ndɛ berina wuthoonɛ-thoonɛ.
موجودہ انتخاب:
Mathiyu 26: LMBNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© The Bible Society of Sierra Leone, 2011
