Mathiyu 24
24
Yisɔs tepe ba banka bamandiŋ ba ka Masaala baŋ kɔ saa ka teetuwo
(Maki 13:1-2; Luku 21:5-6)
1Naa Yisɔs pɛyɛŋ banka bamandiŋ ba Masaala niyo kubatho baŋ ba kaa, bakarandeni nama beŋ see kɛnama ba niŋ toŋine yɔhɔ hu ka bankɛŋ bahɛna ba ka Masaala baŋ kɛndɛ. 2Kɛna mɛyiyɛ Yisɔs bindɛ ba dɔma, na “E beŋ kute bankɛŋ baŋ baŋ fooma? Yaŋ kɔŋ bena tepe nɔndi baŋ, ba kɔŋ teetuwa fooma. Raka hunthe huŋ sa niyɔ hu tutɔ ntɔ nama na ka thinthi, tha kɔŋ ŋɔti kɛkɛŋ fooma.”
Yisɔs tepe ba bakarandeni beŋ kɔŋ niyo thɔrɔ
(Maki 13:3-13; Luku 21:7-19)
3Naa dunkɔy ndɛ ka kusɛri ku dɔma na Ɔlifisi koŋ e ndɛ kɛndɛ ka dɔŋɔ, kɛna see bakarandeni nama beŋ kɛnama ka bindɛ bintheŋ e bindɛ dɔma kɛnama, na “Tepe hɛ mina malɔkɔ ma bɛyiniŋ baŋ baŋ fooma niiye, awa iŋ bɛyi ba yenke niyɔ ba tɔŋɔŋ ba dɔma na yi bohe ba saa iŋ ba tɔŋɔŋ mapeye ma ka lɔkɔ ba ka fay woŋ baŋ.”
4Huna tepe Yisɔs bindɛ ba dɔma, na “Niyaŋ kuthɛgbɛ wɔ be tha bena thɔkɔŋ. 5Biya bibɔyɛ bi kɔŋ see ka keŋ kukiyaŋ, awa wɔ o wɔ ka bindɛ kɔŋ dɔmɔkɔŋ, na ‘Yama Banikisi wo niyo nde lahiri woŋ,’ awa bi kɔŋ thɔkɔŋ biya bibɔyɛ. 6Awa beŋ kɔŋ yuyɛ masɔnkɔ ma ka ŋayombo wuthuriye bena mɛnɛ maseriŋ ma ka ŋayombo wuthokiye bena. Kɛrɛ baŋ ni thɔrɔ ka thathukuma ndeŋ, baa muŋ muŋ fooma mu kiŋ ba yenke niyɔ hintiŋ. Kɛrɛ mapeye ma ka lɔkɔ ba ka fay woŋ baŋ kutɛ hɛ. 7Kuyɛkɛŋ ku kɔŋ dekeyi kuyɛkɛŋ, awa huybakine hu kɔŋ dekeyi huybakine, awa ŋakɔnthɔ ŋamandiŋ ŋa kɔŋ niyɔ, kuyɛkɛŋ koŋ ku kɔŋ thɛnɛŋ ka thani ka bɔyɛ. 8Kɛrɛ muŋ muŋ fooma athɔyande iŋ wuthoonɛ wumayoŋ wu naa yɛrɛmɛ bohe ba saa ka mpaa.
9“Awa beŋ kɔŋ bɔha e beŋ dunkuno ka biya bi bena gbasaŋati haaŋ e bindɛ bena kɔra, awa biyamɛti bi kɔŋ bena thambo saathɛ ba kiyaŋ.#Math 10:22 10Ka lɔkɔ babɛina bibɔyɛ bi kɔŋ fuŋ ka lanɛya baŋ, awa biya bi kɔŋ niyande gbɔŋ ka bi iŋ sɛmbɛŋ baŋ beŋ, awa biya bi kɔŋ thambiyande. 11Banabiŋ bibahothiŋ bi kɔŋ fuŋ awa bi kɔŋ thɔkɔŋ biya bibɔyɛ. 12Biya bibɔyɛ bi kɔŋ pɛyi ba thimiyande baa banɛnɔy baŋ ba kɔŋ key ka kɔtɔkɔy wudankande. 13Kɛrɛ wɔ wo ni muyuŋ woŋ haaŋ ka mapeye maŋ, ndɛ na niyɔ kisi.#Math 10:22 14Awa Huseri Huyɔhɔy haŋ haŋ baŋ ba Hugbakinɛ hu ka Masaala haŋ hu kɔŋ niya kɛwandi ka fay woŋ fooma, haliko ba niya maseri ka siyani baŋ fooma, awa kɛna ntiŋ mapeye ma ka lɔkɔ ba ka fay woŋ baŋ tɛŋ.
Ntha Kithambiyo kiŋ
(Maki 13:14-23; Luku 21:20-24)
15“Naa beŋ kute nthɔŋ Ntha Kithambiyo ki sɔkinɔkɔ Masaala na, ki dome nde banabi woŋ Daniyɛli kiŋ,#Dan 9:27; 11:31; 12:11 ki kooye ka kuwɛ kɛ ka banka bamandiŋ ba ka Masaala baŋ ka be kiŋ sisande ba kɔɔ.” (Yindo ni karaŋ woŋ, niya kuthɛgbɛ yi be wuŋ metho.) 16“Ka lɔkɔ babɛina, bi ka Yudiya, yɔkɔŋ bi be kite ka ŋasɛri ŋaŋ ka. 17Wɔ wo penko ndɛ tute ka banka bakɛnama baŋ ka thinthi, ndɛ be tha nda thuhu ba si sɛkitha mu ka banka nama baŋ kaake, 18awa wo nda ka dumgbu nama ka, ndɛ be tha nda duu ba si sɛkitha kuhɔli nama koŋ.#Luku 17:31 19Nambara ba kɔŋ nɔŋ niyɔ ka yɛrɛmɛŋ bi niyɔ iŋ thahɔɔyɛ beŋ mɛnɛ bi bɔpɔŋ malɛɛthɛŋ ka lɔkɔ babɛina. 20Niyaŋ kuraminɛ ka Masaala haliko kita ndeŋ haŋ hu be tha nɔŋ niyɔ thamɔ maa ka Malɔkɔ Mahemuwe maŋ, 21baa nambarɛŋ babɔyɛ ba kɔŋ niyɔ ba be hɛ nɔŋ niyɔ hanthe kabi na thɛri nde ka fay woŋ haaŋ saaŋ bohi ka lɔkɔ baŋ baŋ.#Dan 12:1; Matɔ 7:14 Awa bɛyi bahɛna sa nɔŋ nda niyɔ ba thɔyande iŋ baŋ baŋ. 22Kɛrɛ Masaala thanki thuruna malɔkɔiŋ ma ka nambarɛŋ baŋ baŋ. Mɛnɛ huŋ kutɛ nde, wɔ yo wɔ sa buthurɔ tuka. Kɛrɛ saathɛ ba bi thanki Masaala yɛtha beŋ, ma kɔŋ thuruna.
23“Huna, mɛnɛ wɔ kɔŋ bena tepe, na ‘Banikisi wo niyo nde lahiri woŋ na woŋ,’ maa ‘Ndɛ na kanka woŋ,’ baŋ niŋ ni lanɛya, 24baa bi dɔmɔkɔ beŋ na Baninikisiŋ bina bindɛ mahɛŋ ma bindɛ ka nɛŋ, mɛnɛ banabiŋ bibahothiŋ bi fuŋ beŋ, bi kɔŋ ni bɛyiniŋ bathakaba, haliko ba thɔkina biya bibɔyɛ. Bi kɔŋ yɔli ti punke bindɛ ba thɔkina bi thanki Masaala yɛtha beŋ, mɛnɛ wu kɔŋ ŋɛnɔ. 25Wuna biyɛ yaŋ kɔŋ bena yenke tepe bɛyiniŋ baŋ baŋ saanuŋ bɛŋ ba niyɔ.
26“Huna mɛnɛ bi kɔŋ bena dɔŋ, na ‘Banikisi wo niyo nde lahiri woŋ tɛŋ ka wula ka,’ baŋ kɛndɛ key. Mɛnɛ bi kɔŋ bena dɔŋ, na ‘Ndɛ nunekeŋ ka banka ka kaake,’ baŋ bindɛ ni lanɛya, 27baa Hati ka Wɔ woŋ kɔŋ see na nthɔŋ kuwaliwaliŋ koŋ kɛriŋande ŋaye kuwaŋ kubekede koŋ e kɔŋ kaa kuwaŋ kupothi koŋ.#Luku 17:23-24
28“Beŋ bareŋ kɔ yuyɛ na wuŋ tɛpa na ka maama woŋ tuke ka, kɛna yibani beŋ kɔmande ka tha banthe.#Luku 17:37
Saa hu ka Hati ka Wɔ woŋ haŋ
(Maki 13:24-27; Luku 21:25-28)
29“Ka wuthurɔy wu nambarɛŋ baŋ baŋ see wuŋ, kaŋ woŋ kɔŋ niyɔ huntuma,#Ais 13:10; Yow 2:10, 31; 3:15; Matɔ 6:12 awa sɛnkɛ woŋ sa nda bɛndi,#Ais 13:10; Isi 32:7; Yow 2:10; 3:15 sosɛŋ beŋ bi kɔŋ yayi maŋaye ka kuthahinɛ koŋ,#Ais 34:4; Matɔ 6:13 sɛmbɛŋ ba ka kuthahinɛ koŋ baŋ ba kɔŋ thɛnɛŋ.#Yow 2:10 30Ka lɔkɔ babɛina na ntiŋ bɛyi bathakaba baŋ tɔŋinɔkɔ ka kuthahinɛ koŋ ba tɔŋina ba wuŋ niyɔ na Hati ka Wɔ woŋ kɔŋ see. Awa siyani ba ka faido baŋ fooma ba kɔŋ boki naa bindɛ kute Hati ka Wɔ woŋ si see ka thawuruma tha ka kuthahinɛ koŋ thaŋ iŋ sɛmbɛ mɛnɛ yiki bamandiŋ.#Dan 7:13; Matɔ 1:7 31Kuthuthu kumandiŋ koŋ ku kɔŋ hɔŋa. Ndɛ kɔŋ ŋindi malekɛŋ nama beŋ ba kɔminande ka tha banthe bi thanki ndɛ yethiyo beŋ maŋaye ka fai wobunthu woŋ fooma.
Mathanani ma ka mutiŋ muthɔma mu dɔma muŋ na fiki
(Maki 13:28-31; Luku 21:29-33)
32“Niyaŋ ba kuyeŋ ku tiŋ mutiŋ muthɔma mu dɔma muŋ na fiki ku thɔyande nɔŋ kugbemgbeŋ koŋ bena thaninuwa mathanani. Naa beŋ kute nthɔŋ bathalɛŋ biŋama beŋ thaha e bindɛ fuŋuna bompa, kɔthɔŋ ba dɔma na thamɔ bohe thɔɔ. 33Thanuwaŋ mathanani maŋaye ka wuŋ baŋ. Naa beŋ kute nthɔŋ bɛyiniŋ baŋ baŋ fooma ba si niyɔ, kɔthɔŋ ba dɔma na ntha kiŋ ki kiŋ nda wuthuriye, awa ki kooyeŋ nda ka biyo haŋ ba biyande. 34Yaŋ kɔŋ bena tepe nɔndi baŋ, biya bi ka yamana bahɛ baŋ baŋ sa niye daŋiyande fooma e bɛyiniŋ baŋ baŋ niyɔ. 35Kuthahinɛ kɔŋ iŋ ka fay woŋ mu kɔŋ daŋande fooma, kɛrɛ thampa niŋ thaŋ sa daŋande.
Wɔ o ka wo kɔthɔ lɔkɔ ba Hati ka Wɔ woŋ see
(Maki 13:32-37; Luku 17:26-30, 34-36)
36“Wɔ o ka wo kɔthɔ malɔkɔ mɛnɛ wakathi wo Hati ka Wɔ woŋ see, hali hintiŋ malekɛŋ bi ka ariana beŋ, maa Hati woŋ. Yɔkɔŋ Fandaŋ woŋ nagbɛti ndɛ na kɔthɛ. 37Hati ka Wɔ woŋ kɔŋ see e biya kɔ niya bɛyiniŋ nɔŋ na niyɔy nde nthɔŋ wuŋ na ka yamana ba ka Nowa baŋ.#Mthr 6:5-8 38Ka lɔkɔ ba thenkiyiye mandi maŋ ka faido, biya bi kɔŋ nde thɔɔmi e bindɛ kɔ thiiyuwe mampani, bi kɔŋ nde yɛɛnti e bindɛ kɔ dunkuna ŋayɛntande, haaŋ Nowa thɔɔ ka gbe bamandiŋ baŋ. 39Awa bindɛ tha nde kɔthɔ ba niyɔ haaŋ yɔkɔŋ na thɛnkiyiyɔy mandi maŋ e bindɛ momino fooma.#Mthr 7:6-24 Nɛna nɔŋ wuŋ niyɔ na Hati ka Wɔ woŋ see. 40Ka lɔkɔ babɛina, lamgbeŋ biye bi kɔŋ niyɔ ka wali ka dumgbu ka, wunthe kɔŋ si sɛkitha, e woŋ kɛndɛ peyo. 41Yɛrɛmɛŋ biye bi kɔŋ kɔɔ ka yɔŋa ka kuthodo kunthe. Wunthe kɔŋ si sɛkitha, e woŋ kɛndɛ peyo. 42Niyaŋ kuthɛgbɛ baa beŋ kɔita malɔkɔ ma Mariki ndeŋ woŋ see maŋ. 43Awa yaŋ thimoŋ ba beŋ hakiyando hu tepe hɛ yaŋ bena haŋ. Mɛnɛ wɔ wo biyɛ banka baŋ woŋ nde hɔkɔŋ nthɔŋ kɔthɔ wakathi wo ka huyɛ baŋ wo batuwaŋ woŋ see ba si thinka banka nama baŋ, ndɛ kɔŋ nde hure yila banka nama baŋ napiripiri haliko ba be tha si thinka ba tuuto. 44Huna niyɔŋ bendo dɛɛnkitɔkɔy timo tima, baa Hati ka Wɔ woŋ kɔŋ see ka wakathi wo be beŋ niŋ siyuwe.#Luku 12:39-40
Bawali wothumbɛ woŋ mɛnɛ wosikɔy woŋ
(Luku 12:41-48)
45“Mbɛ bawali wo yɔhɔy niyo lanɛya e ndɛ hɛlɛŋ niyɔ wo kele? Ndɛ na wɔ wo mariki nama ni bayaha ka bawaliŋ bihɛna beŋ ba bindɛ kɔ dunkune muthɔma naa lɔkɔ ba ka thɔma haŋ baŋ tɛŋ. 46Bawali wobɛina kɔŋ yehitɔkɔ naa mariki nama woŋ penke niŋ si ni wali babɛina. 47Yaŋ kɔŋ bena tepe nɔndi baŋ, ndɛ kɔŋ niŋ ni bayaha ba kɛriŋiyɛ mu biyɛ ndɛ muŋ fooma. 48Kɛrɛ mɛnɛ bawali wonɛnɔy na ndɛ, ndɛ kɔŋ dɔŋ ka yɛthɛ nama, na ‘Mariki niŋ woŋ seeta hɛ yako.’ 49Ndɛ kɔŋ sɛsi ba tawa ntɔni nama bi bawaliŋ beŋ, e ndɛ kɔ thɔma, e ndɛ kɔ thiiye mampa maŋ iŋ bayilɔiŋ beŋ. 50Mariki wo ka bawali wonɛnɔy woŋ kɔŋ see ka lɔkɔ ba be ndɛ niŋ siyuwe, iŋ wakathi wo be ndɛ kɔthɔ. 51Ndɛ kɔŋ niŋ gbasaŋati ka nanthe iŋ banitɔkɔiŋ beŋ, ka tha ka bɛina kɛndɛ kɛna biya thinkuwɔ thathukuma kɛ e bindɛ kɔ berina wuthoonɛ-thoonɛ.”
موجودہ انتخاب:
Mathiyu 24: LMBNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© The Bible Society of Sierra Leone, 2011
