LUKA 24
24
Yesu Yisimushitswa Khurula mu Likhutsa
(Mat 28:1-10; Mk 16:1-8; Yoh 20:1-10)
1Nukushili mu mavwevwe khulitukhu lia Jumapili, vakhali venavo vasimukha nivatsia khu shilindwa, nivachinji vindu vihuunyanga mwayu mulahi via vali nivalombi. 2Vanyola lichina nilikolongominywi khurula mu vwinjililu vwi shilindwa. 3Navutswa lwa vinjilamu shivanyola mmbili ku Mwami Yesu tawe. 4Lwa vali nivashichenyanga shichila kali nikakholeshe, nonoho lwa vandu vavili nivifwali tsinguvu tsindavu tsiang'ang'anga vatukhaho vwangu. 5Vakhali venavo varia, nivakwa hasi khu malova; navutswa vandu yavo vavareeva, “Shichila shina mukhavanga mu vandu vakhutsa woyo ushili mwoyo? 6Avula havundu hanu; umali khwisimushitswa khurula mu likhutsa. Mwitsushitse ka yamuvoolela nashili mu lusomo lwa Galilaya: 7Khutukha Mwana wu Mundu aliitsa khuhaanwa khu vandu vooni, avambwi khandi khulitukhu lia khavaka yisimushi khurula mu likhutsa.”
8Khulwa yako, vakhali venavo vitsushitsa makhuva ka Yesu yali niyavoola. 9Lwa vakalukha nivarula khu shilindwa, vavoolelakhu veechi likhomi na mulala na vandu vandi voosi makhuva kenako. 10Vakhali venavo vali Mariya Magadalena, Yohana nende Mariya mama wa Yakobo; vo halala na vakhali vandi vavoolela varumwa makhuva kenako; 11navutswa varumwa shivasuuvila vakhali venavo tawe, shichila makhuva kavo kalolekha khuli kavula vukhonyi. [ 12Navutswa Petro yasinjila niyilukhaka natsia khu shilindwa. Yinama nalola luvaala lwali nu lwa naavwa khurula khu machoro malahi lwonyene vuchila shindu shiosi. Yakalukha ingo nali nilichenya khulondokhana khu kali nikakholeshe.]#24:12 Mahandiko Matakatifu kandi kavula luvaso 12.
Luchendo lu Khutsia Emau
(Mk 16:12-13)
13Khulitukhu lilala lienelo, valondi vavili khu valondi va Yesu vali nivatsitsanga mu muchitsi kulaangwangwa Emau; kwali himbi tsikilomita likhomi nindala khurula Yerusalemi, 14khandi vali nivashelenyinyanga vene khuvene khulondokhana khu vindu viali nivikholeshe. 15Lwa vali nivashelenyinyanga khandi nivareevana vene khuvene, Yesu yisuunda himbi khuvo, nachenda navo. 16Valola Yesu, navutswa vamukorwa 17Yesu yavavoolela, “Ni shina shia muchendanga numushelenyinya?” 18Mulala khu valondi vavili venavo, walaangwangwa Kiliopa, yareeva Yesu, “Yivi nu mundu mucheni wonyene mu Yerusalemi ukorelwi vindu vikholesheyo mumatukhu kanu?”
19Yavareeva, “Ni vindu shina?” Vamuchipa, “Vindu viakholekha khu Yesu wa Nazareti.” Vachipa, “Yali muprofeti wi tsingulu mu vikholwa khandi mu makhuva ka yalomolomanga imbeli wa Nyasaye nende vandu voosi; 20khandi khuli vasalisi vakali nende vamihi veru vamuhaana akhalachilwi likhutsa, khandi navambwa. 21Khwali khwasuuvila ndi neye uliitsa khuvoholola Vaisraeli. Khumeeta khu kenako, yili nalio litukhu lia khavaka khurula vindu vienevo nivikholekha. 22Vakhali valala khurula mu shituma shieru vakhuchenyinyi. Vasimukha nivatsia khu shilindwa kushili mu mavwevwe, 23navutswa shivanyola mmbili kwa Yesu tawe. Khulwa yako, vakalukha nivavoola valoli tsinjelosi mu malolo tsivavoolele ndi ashili mwoyo. 24Vandu valala mu shituma shieru vasimukha nivatsia khu shilindwa nivanyola vutswa khuli vakhali venavo vali nivavooli; navutswa shivamulola tawe.”
25Nalwo lwa Yesu yavavoolela, “Muli vandu vayiingwa vene muno, muli va kalaha mu mwoyo khusuuvila makhuva koosi ka vaprofeti vavoola! 26Shiuvwali vulahi ndi Masiha anyakhane shichila vindu vienevo, yinjili mu vukhumi vwevwe tawe.” 27Yesu yavivaalila makhuva kali nikavoolwa khulondokhana khuye mwene mu Mahandiko Matakatifu koosi, khuraanjila khu vitabu via Musa nende mahandiko ka vaprofeti voosi.
28Lwa valondi vavili venavo vali nivali himbi khutukha mu muchitsi kwa vali nivatsitsamu, Yesu yikhola aviranga; 29navutswa vamwikalila khuvira khutsia, nivavoola, “Menyakhu na khutsi; vutukhu vutukhanga.” Khulwa yako, Yesu yinjilamu namenya navo. 30Lwa Yesu yali niyikhale naliitsanga shiukhulia navo, yavukula mukati, nasanditsa. Yatong'olanyinya mukati kwenoko navaha. 31Tsimoni tsiavo tsikukha, nivamanya Yesu; navutswa Yesu yakora imbeli wavo vwangu. 32Vareevana vene khuvene, “Mioyo chieru shichiashi khuli mulilu lwa alomolomenje na khutsi nu khuli khu muhaanda khandi nakhwivaalila makhuva khurula mu Mahandiko Matakatifu?”
33Varula vwangu nivatsia Yerusalemi; nivanyola veechi likhomi na mulala nivivunjelitsi halala na vandu va vali navo, 34nivavoola, “Ni kilikali, Mwami wisimushi khurula mu likhutsa, khandi umali khulolekha khu Simoni!”
35Nalwo lwa valondi vavili venavo vivaalila veechi likhomi na mulala kali nikakholeshe khu muhaanda, khandi khuli vamanya Mwami lwa yatong'olanyinya mukati.
Yesu Yalolekha khu Veechi Veve
(Mat 28:16-20; Mk 16:14-18; Yoh 20:19-23; Vikh 1:6-8)
36Lwa veechi vavili venavo vali nivashilomolomanga makhuva kenako, Mwami yasinjila mwene hakari muvo vwangu, khandi navavoolela, “Nyoli milembe.”#24:36 Nyoli milembe: Mahandiko Matakatifu kandi kavula yavavoolela “Nyoli milembe.”
37Navutswa vatechela muno, nivakanakana valolanga shinanyenzo. 38Navutswa Yesu yavareeva, “Shichila shina muheendi mwoyo? Shichila shina muhaya hayanga mu tsinganakani tsienyu? 39Heenzikhu mu makhono kaanje nende mu vilenje vianje, mulole ninzi mwene. Ndilikhu khandi mulole; shichila shinanyenzo shivula mmbili nende vikuumba, khuli lwandi navio.”
[ 40Lwa Yesu yali niyakhavoola ndio, yavamanyinya vilenje vievie nende makhono keke.]#24:40 Mahandiko Matakatifu kandi kakhale kavula luvaso 40. 41Lwa veechi veve vali nivashili khusuuvila, shichila vuyaanzi muno nende lichenya; Yesu yavareeva, “Mulikhu ni shiukhulia shiosi hanu shiamulia?” 42Vamuha shitonye shi isutsi shiali nishiatekhwa; 43navukula nalia, veechi veve nivamuheenzanga.
44Khulwa yako, Yesu yavavoolela, “Yivi navio vindu via namuvoolela khulondokhakhu nishili na munyi. Shia shindu shiosi shiahandikwa khulondokhana khwinzi mu Malako ka Musa, mu mahandiko ka vaprofeti nende Tsitsaburi viarweshitswa.”
45Yesu yikula vwoongo vwavo khu vamanye Mahandiko Matakatifu, 46navavoolela, “Yaka nako kahandikwa: Masiha aliitsa khunyakhana khandi matukhu kavaka nikakhavira, aliitsa khwisimukha khurula mu likhutsa; 47khandi khuvirila mu lira lielie likhuva khulondokhana khulikanila nende khusemehwa khurula mu vwoni liliitsa khwilwatswa khu vandu voosi mu shivala, khuraanjila Yerusalemi. 48Muli vashiahidi vi vindu vienevo. 49Nzitsanga khumurumila shia Tata wanje yamulaaka. Navutswa mulindilile mu litaala likali khutukha lwa munyola tsingulu khurula mwikulu.”
Yesu Yahilwa Mwikulu
(Mk 16:19-20; Vikh 1:9-11)
50Khulwa yako, Yesu yimilila veechi veve khurula mu litaala likali khutukha himbi mu litaala lia Betsania, wa yachinga mwikulu makhono keke, navakasitsa. 51Lwa yali navakasitsanga, yavalekha nahilwa mwikulu. 52Veechi veve vasaala khuye, nivakalukha Yerusalemi, nivali nu vuyaanzi vunyishi muno. 53Vatsililila khuva mu Litempeli, nivitsominyanga Nyasaye.
موجودہ انتخاب:
LUKA 24: LLLCATHOLIC
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© The Bible Society of Kenya, 2013
