YOHANA 6
6
Yesu Yaliishitsa Vasatsa Tsihelefu Tsiranu
(Mat 14:13-21; Mk 6:30-44; Luka 9:10-17)
1Matukhu mati nikakhavira, Yesu yambukha natsia khuluveka lundi lwi Inyanza ya Galilaya, ili ni lira lindi Inyanza ya Tiberia. 2Shituma shikali shia vandu vamulonda, shichila vali nivaloli viloleshitsu vievie khuli yali nahonyinyi vandu valwala. 3Yesu yatikulukha khu shikulu, niyikhala hasi na veechi veve. 4Litukhu liu Mulukha kwa Pasaka liali nilili himbi khutukha. 5Lwa Yesu yaheenza nalola shituma shia vandu vanyishi nivitsanga havundu ha yali nali, yareeva Filipu, “Khukuula khurina mikati chia vandu yava voosi vanyala khulia?” 6Yesu yavoola likhuva lienelo khulu khuchelitsa Filipu; shichila ye mwene yali namanyi shindu shiatsitsanga khukhola.
7Filipu yachipa, “Tsidinari tsimia tsivili shitsinyala khukuula mikati chia vandu yava vasuchila voosi tawe!”
8Mulala khu veechi veve walaangwangwa Andereya, nali amwavo Simoni Petro, yavoola, 9“Mwana vi shiyayi ali hanu ni mikati chiranu chialombwa khu ishayiri nende tsisutsi tsivili; navutswa vandu vanyishi shivanyala khusuchila tawe.”
10Yesu yavoolela veechi veve, “Vooleli vandu vikhale hasi.” Havundu henaho hali hamela vunyasi vunyishi. Khulwa yako, vandu vasatsa venavo vikhalaho, voosi tsiheelefu tsiranu. 11Yesu yavukula mukati, nasanditsa Nyasaye khandi nakavulila vandu vali nivikhaleho; khandi yakhola malala mele khu tsisutsi; ma vandu nivakavulilwa mu vunyishi khuli venyanga. 12Lwa vikura nivakhalia, Yesu yavoolela veechi veve, “Vunjelitsi matonye ki shiukhulia shirikale, khu khuvuli khwononyinyakhu shindu shiosi.” 13Veechi vavunjelitsa matonye ki mikati chiali nichirikale chialombwa khu ishayiri nikitsula mu mihinda likhomi na chivili, vandu nivakhamala khulia. 14Lwa vandu valola shiloleshitsu shia Yesu yali nakholi, vavoola, “Ni kilikali, uyu neye muprofeti wenyekhanga ave niyitsa mu shivala.” 15Lwa Yesu yamanya vulahi ndi vandu venavo venyanga khwitsa khumuvukula ni tsingulu khumwamihitsa, yilukha natsia mu vikulu wanyala khuva wonyene.
Yesu Yachenda khu Matsi
(Mat 14:22-35; Mk 6:45-52)
16Lwa khulukolovo khwatukha, veechi va Yesu vakholomokha nivatukha khu inyanza. 17Vinjila mu liaro, nivambukha inyanza khukalukha mu litaala lia Kaperenamu. Vutukhu vwatukha, navutswa Yesu yali nashili khukalukha khuvo. 18Imbuutsa inditoho yahuutsanga, matsi nikaraanga khuhilikana. 19Lwa veechi va Yesu vali nivakhisuundakhu tsikilomita tsiranu inoho sita, valola Yesu. Yesu yali nachendanga khu matsi; khandi nali himbi khutukha khu liaro. Veechi vatechela. 20Navutswa Yesu yavavoolela, “Ninzi; muvuli khuria.” 21Venya khwinjilitsa Yesu mu liaro, navutswa liaro liatukha vwangu khuluchinga havundu ha vali nivatsitsanga.
Vandu Vakhava Yesu mu litaala lia Kaperenamu
22Litukhu lialondakhu, vandu vali nivarikale khuluveka lundi lwi inyanza vamanya ndi ni liaro lilala lionyene, nalio liali nilirikaleho. Vamanya ndi Yesu shiyali nanini mu liaro, halala na veechi veve tawe; navutswa veechi veve vali nivaruliho vonyene. 23Malala khu maaro kali nikaruli Tiberia kitsa, nikasinjila himbi havundu ha shituma shia vandu vali nivaliililenje mukati kwa Mwami Yesu yali nasanditsi. 24Lwa shituma shia vandu valola ndi Yesu inoho veechi veve vavulaho, vinjila mu maaro kenako; nivatsia khukhava Yesu mu litaala lia Kaperenamu.
Yesu ali Khuli Mukati ku Vulamu
25Lwa vandu vanyola Yesu nali khuluveka lundi lwi inyanza, vamureeva, “Mwechitsi, isaa shina yutushi hanu?”
26Yesu yavachipa, “Muvoolelanga toto ndi mukhavanga inzi, shikali shichila mwalola viloleshitsu tawe, navutswa shichila mwalia mikati numwikura. 27Mukhakholi mihinzilu khulu khunyola shiukhulia shionekhanga tawe; navutswa mukhole mihinzilu khulu khunyola shiukhulia shihaananga vulamu vwi mihika ni mihika. Yishi nashio shiukhulia shiu Mwana wu Mundu amuha munyi; shichila Nyasaye, uli Tata, watuuya khuye muhuuli kwekwe khumanyinya ndi wamuyaanza.”
28Nalwo lwa vandu venavo vareeva Yesu, “Shina shia khunyala khukhola khu khutsililile khukhola mihinzilu chia Nyasaye?”
29Yesu yachipa, “Muhinzilu kwa Nyasaye yenyanga mukhole, nu khusuuvila mu woyo wa yaruma.”
30Vamureeva, “Ni shiloleshitsu shina shiunyala khukhola khu khushilole khandi khusuuvile mu yivi? Nu muhinzilu shina kukhola? 31Vakuuka veru valia shiukhulia shilaangwangwa maana, lwa vamenyanga mu shiangalangwi, khulondokhana khuli Mahandiko Matakatifu kavoolanga, ‘Yavaha mukati kwa valia khurula mwikulu.’ ”
32Yesu yavavoolela, “Muvoolelanga toto ndi shiali Musa wamuha mukati khurula mwikulu tawe; navutswa Tata wanje neye umuheetsanga mukati kwatoto khurula mwikulu. 33Mukati kwa Nyasaye ahaananga ni woyo warula mwikulu, khandi ahaananga vulamu khu vandu mu shivala.”
34Vavoolela Yesu, “Mwami, umenye nu khuheetsanga shia khase khosi mukati kwenoko.”
35Yesu yavavoolela, “Ninzi mukati kuhaananga vulamu. Mundu witsa khwinzi shianyala khuhulila inzala tawe. Mundu wanasuuvili mwinzi, shianyala khuhulila vuluhu tawe. 36Navutswa namuvoolela ndi mumali khulola inzi; nikhali shiumunyala khusuuvila tawe. 37Shia mundu wosi wa Tata wanje amba, aliitsa khwitsa khwinzi; khandi mundu witsa khwinzi, shinyala khumukhunga tawe; 38shichila shinarula mwikulu khwitsa mu shivala khukhola lienya lianje mwene tawe; navutswa khukhola lienya lia Nyasaye yanduma khole. 39Lienya lia Nyasaye wanduma lili ndi mbuli khukoritsakhu khali mulala khu yavo voosi vayamba; navutswa visimushitsi voosi khurula mu likhutsa khulitukhu liukhumalilikha. 40Lienya lia Tata wanje yenyanga likholeshe nu khulola ndi shia mundu wosi ulolanga Mwana khandi asuuvila muye anyole vulamu vwi mihika ni mihika; khu ni limwisimushitsa khurula mu likhutsa khulitukhu liukhumalilikha.” 41Nalwo lwa Vayahudi varaanga khung'ung'una, shichila Yesu yali navooli, “Ninzi mukati kwarula mwikulu.” 42Khulwa yako, vireevana vene, “Shikali katoto uyu ni Yesu, mwana wa Yosefu, mundu wa khwamanya tata wewe nende mama wewe? Akhuvoolelanga munjila shina, ‘Niitsa hasi khurula mwikulu?’ ”
43Yesu yavachipa, “Leshi khung'ung'una munyi vene. 44Mundu avulakhuho unyala khwitsa khwinzi, Tata wanduma nakhamuleri khwinzi; khandi ninzi uliitsa khumwisimushitsa khurula mu likhutsa khulitukhu liukhumalilikha. 45Vaprofeti vahandika, ‘Vandu voosi valiitsa khwechitswa na Nyasaye.’ Shia mundu wosi uhulilanga likhuva lia Tata khandi yeka khurula khuye neye witsanga khwinzi. 46Mundu avulakhuho walola Tata, nikakhali woyo warula khu Nyasaye; neye wonyene walola Tata. 47Muvoolelanga kilikali ndi mundu usuuvilanga, neye uli nu vulamu vwi mihika ni mihika. 48Ninzi mukati kuhaananga vulamu. 49Vakuuka venyu valia shiukhulia shia maana, lwa vamenyanga mu shiangalangwi, navutswa khali ndio vakhutsa. 50Navutswa yuku nakwo mukati kwarula mwikulu, kwa mundu anyala khulia avuli khukhutsa. 51Ninzi mukati kuli mwoyo kwarula mwikulu. Niiva mundu aliitsa khulia mukati yuku, alatsililila khuva mwoyo mihika ni mihika. Mukati kwambananga shichila vulamu vwa vandu mu shivala nu mmbili kwanje.”
52Khulwa yako, Vayahudi varaanga khuhangalitsana vene khuvene, nivavoola, “Mundu uyu yakhakhuha munjila shina mmbili kwekwe khulii?”
53Yesu yavavoolela, “Muvoolelanga toto ndi nu mukhalia mmbili ku Mwana wu Mundu, khandi mung'wi masahi keke, shiumuli nu vulamu mu munyi vene tawe. 54Mundu uliakhu mmbili kwanje khandi ang'wi masahi kaanje ali nu vulamu vwi mihika ni mihika; khandi niitsa khumwisimushitsa khurula mu likhutsa khulitukhu liukhumalilikha. 55Mmbili kwanje ni shiukhulia shiatoto khandi masahi kaanje ni shiu khung'wa shiatoto. 56Mundu uliakhu mmbili kwanje khandi ang'wikhu masahi kaanje atsilililanga khuva mwinzi; ninzi mwene muye. 57Khuli Tata uli mwoyo wanduma, khandi ndi mwoyo shichila Tata, khu mundu uliakhu inzi, alatsililila khuva mwoyo shichila inzi. 58Khulwa yako, yuku nakwo mukati kwarula mwikulu. Shiukuli khuli mukati kwa vakuuka venyu valia nivakhutsa tawe; navutswa mundu uliitsa khuliakhu mukati yuku, alatsililila khuva mwoyo mihika ni mihika.”
59Yesu yavoola likhuva lienelo, niyechitsanga mu lisinagogi mu litaala lia Kaperenamu.
Makhuva Kahaananga Vulamu vwi Mihika ni Mihika
60Lwa valala khu veechi va Yesu vahulila navoolanga ndio, vavoola, “Liechitso yili ni litinyu muno. Ni viina unyala khulihuchilila?”
61Navutswa lwa Yesu yamanya mu mwoyo kwekwe ndi veechi vilililanga khulondokhana khu likhuva lienelo, yavareeva, “Kamboli kamunyashitsanga mu mioyo? 62Khulwa yako, nikave karina lwa mulilola Mwana wu Mundu nakalukhanga mwikulu mwa yamenyanga? 63Roho neye uhaananga vulamu; tsingulu tsiu mmbili tsivula vukhonyi vwosi. Makhuva kamuvoolele nako kachilanga numunyola Roho nende vulamu. 64Navutswa khali ndio, vandu valala vali mu munyi vakhasuuvilanga tawe.” Yesu yali wamanya khurula muliraanga mundu uliitsa khuvula khusuuvila; khandi mundu uliitsa khumutsama. 65Yesu yatsililila khuvavoolela, “Yishi nashio shivune shichili nimuvoolela ndi mundu avulakhuho unyala khwitsa khwinzi niyakharumwa na Tata.”
66Khuraanjila lwenolo, valala khu veechi va Yesu, vakalukha inyuma nivambakhana khuchendanga naye.
67Yesu yareeva veechi veve, “Khali munyi mwenyanga khunzivala?”
68Simoni Petro yamuchipa, “Mwami Yesu, ni viina wa khutsiakhu? Nivi uli na makhuva kahaananga vulamu vwi mihika ni mihika. 69Khusuuvili khandi khwakhamanya nunundi ndi nivi Mutakatifu warula khu Nyasaye.”
70Nalwo lwa Yesu yavareeva, “Shinamurovola likhomi na vavili? Navutswa khali ndio, mulala khu munyi wakwa Ibilisi.”
71Yesu yalomoloma makhuva khulondokhana khu Yuda, mwana wa Simoni Isikarioti. Khali niiva Yuda, yali mulala khu veechi likhomi na vavili, neye wali natsitsanga khutsama Yesu.
موجودہ انتخاب:
YOHANA 6: LLLCATHOLIC
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© The Bible Society of Kenya, 2013
