TAUNET 48
48
Koberuri Jakobo Manase ak Epraim werikab Josep
1Ak kingobata tuguchuto, kolenji chito age Josep, Keero, miani kwandang’ung’: ak kiwa komut werikyik tuwai, Manase ak Epraim. 2Ak kilenji chito age Jakobo, Ineni wering’ung’ Josep, nyonei ole imi: ak kiigiilgei Israel kong’eet kotebe itogut. 3Ak kilenji Jakobo Josep, Kimong’ja Kamuktaindet ne bo Kamuktaet eng’ Lus eng’ emetab Kanan, ak kiiberura, 4ak kilenja, Keero, agonin iyotet, ak abarain, ak ayain iegu bororiosiek che chang’; ak tun agochini emoni iyotet ne biitu let eng’ inye, koek nenywa koigeny. 5Chechuk anyun nguno werichuguk aeng’u, chu kigisigun eng’ emetab Misri, ye kitom aitu ole imi eng’ Misri; Epraim ak Manase, ko u Reuben ak Simeon. 6Ak egu cheguk che tun isiche let eng’ chu; kiguurtoe kainaikab werik che tupcho eng’ bortenywa. 7Ak kirebena meet Rael eng’ oret, eng’ oret eng’ Kanan abunu Padan, ye kita ko loo kitigin eng’ Eprat: ak kiatupchi oloto, oretab Eprat (noto ko Bet-lehem).
8Ak kigeer Israel werikab Josep, ak koteebe kolenji, Ng’o chu? 9Ak kilenji Josep kwandanyi, Werikyuk chu che kigona Kamuktaindet eng’ olito. Ak kile, Kaigai imutwa kobwa yu, si aberur. 10Ak ki negit kogorio konyekab Israel amu osindo; kima kota komuchi kogeer kiy komie. Ak kiimut lagochoto korikyi inendet, ak king’utut, ak koue eunekyik. 11Ak kilenji Israel Josep, Kama kota abwati ale ta ageere togeng’ung’: ago, kagoborua Kamuktaindet lagoguk agichek. 12Ak kiisto Josep lagochoto eng’ kutung’oikab Jakobo; ak kiing’uruk inendet agoi ng’ony. 13Ak kinam Josep ichek tuwai, kiname Epraim eunnyi ne bo tai kotokyi eutab katam ne bo Israel, ak koname Manase eunnyi ne bo katam kotokyi eutab Israel ne bo tai, ak komut korikyi kwandanyi. 14Ak kiito Israel eunnyi ne bo tai kogonoor metitab Epraim, werit ne ming’in, ak kogonoor eunnyi ne bo katam metitab Manase, kiigonoor eunekyik ko u noto, kongen; amu ki werit ne bo tai Manase. 15Ak kiiberur Josep, ak kole, Kamuktaindet ne kibendate tainnyi kwanisiekyuk Abraham ak Isak, Kamuktaindet ne kibaata atkinye tugul agoi kora, 16malaikaiyat ne kiitiacha eng’ yaitwogik tugul, ingoberur lagochu; ak keguurtoe ichek kainennyu, ak kainaikab kwanisiekyuk agichek, Abraham ak Isak; ak ingotesogis kochang’a eng’ kwenutab ng’ony. 17Ak kingogeer Josep kole kagogonoor kwandanyi eunnyi ne bo tai metitab Epraim, koyait eng’ tainnyi: konam anyun eutab kwandanyi kole koisto eng’ metitab Epraim si konde metitab Manase. 18Ak kilenji Josep kwandanyi, Ma u noto, baba: amu ni ko werit ne bo tai; igonoor eung’ung’ ne bo tai metinnyi. 19Ak kiesio kwandanyi, ak kole, Angen ale u noto, werinnyu, angen: egu agine inendet bororiet, ak tun eetu: ago eetu ng’etab kamet ne ming’in kosiir inendet, ak chang’aitu lagokyik koegu bororiosiek che chang’. 20Ak kiiberur ichek betunoto, kolen, Iberuri Israel bik amu inye, kole, Ingoyain Kamuktaindet ogergeitu ak Epraim ak Manase, ak kinam Epraim kondoe Manase. 21Ak kilenji Israel Josep, Keero, negit ame: ago mi Kamuktaindet koboten, ak koweekten kogeny iwe emetab kwanisieguk. 22Ak kaagonin kebeberta agenge ne siirei che bo tupchosieguk ne kialuule Amorik eng’ rotwennyu bo chok ak kwangennyu.
موجودہ انتخاب:
TAUNET 48: BUKUIT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
God's word open for all
©Bible Society of Kenya, 2020