TAUNET 47
47
Komuti Josep kwandanyi ak tupchosiekyik koba taitab Parao
1Kiwa anyun Josep komwachi Parao, kolenji, Kagoit baba ak werik che kitupche, ak kechirekwak, ak tukwak, ak tugukwak tugul che tinyei kobunu emetab Kanan; ak keero, mitei nguno emetab Gosen. 2Ak kiimut werik mut eng’ werik che tupcho, ak kobarta eng’ taitab Parao. 3Ak kiteebe Parao werik che tupcho ak Josep, kolenji, Nee boisieng’wong’? Ak kiwolji Parao, kolenji, Achek otwogiguk, ko ki kiptichin, koboto kwanisiekyok. 4Ak kilenji Parao, Kageuchi emoni ko ki toek; amu mami ole kiyage akwotisiekab otwogiguk; amu ng’wan rubet eng’ emetab Kanan: ara anyun, kagisain kele, chamwech achek otwogiguk kemeny emetab Gosen. 5Ak king’alalji Parao Josep, kolenji, Kait oldang’ung’ kwandang’ung’ ak werik che otupche: 6mi taing’ung’ emonito bo Misri; igochi kwandang’ung’ ak werik che otupche komeny emet ole kararan mising’ kosiir tugul; ingomeny anyun emetab Gosen: ak ngot ingen bik alak eng’ ichek che ng’omen, igochi korib tukyuk.
7Kiimut anyun Josep kwandanyi kwo taitab Parao: ak kiiberur Jakobo Parao. 8Ak kiteebe Parao Jakobo, kolenji, Ata betusiekab kenyisieguk? 9Ak kiwolji Jakobo Parao, kolenji, Kenyisiekyuk che kiatar eng’ rutoitanyu ko bogol ak sosom: ng’ering’ ak ko yaachen kenyisiekyuk che kiatar, ak ma it kenyisiekyuk che kiit kenyisiekab kwanisiekyuk eng’ rutoitonywa. 10Ak kiiberur Jakobo Parao, yeityo kwo eng’ ole kimi Parao. 11Ak kimeng’isiechi Josep kwandanyi ak werik che tupcho, ak kogochi ole bunjin eng’ emetab Misri, eng’ ole kararan kosiir tugul eng’ emonoto, eng’ emetab Rameses, ko u ye kiga ng’at Parao. 12Ak kibai anyun Josep kwandanyi, ak tupchosiekyik, ak bik tugul che bo gotab kwandanyi, eng’ amitwogik, ko u ye ki te lagokwak.
Kochobei oret ne kitorete Misri ak kondochine
13Ak kima kota komi amitwogik eng’ emet komugul; amu king’wanit mising’ rubet, ak kinyalul emetab Misri ak emetab Kanan amu rubet. 14Ak kiiyum Josep fedaisiek tugul che kibiit eng’ emetab Misri ak emetab Kanan che kigoib koale bek: ak kiib Josep fedaisiechato kobwa gotab Parao. 15Ak ye kingogesgei fedaisiek che bo emetab Misri, ak che bo emetab Kanan, kobwanji Misrik tugul Josep, ak kolenji, Konech amitwogik: amu nee si kebegu eng’ taing’ung’? Amu kogogesgei fedaisiek. 16Ak kilenji Josep, Ogonu tukwok: ak ngogesgei fedaisiek agonok amitwogik che ogeere tukwok. 17Kigetyi anyun Josep tukwak: ak kiigochi Josep amitwogik che kiale mbartanyisiek, ak akwotisiek, ak tuga, ak sigirok: ak kibae kenyinoto amitwogik che kiale tukwak tugul. 18Ak ye kingogesgei kenyinoto, kobwanji inendet eng’ kenyit ne bo aeng’, kobwa kolenji, Magimuchi keung’e kiptaiyandennyo, kele kogogesgei fedaisiekyok tugul; ak kigobunji tukyok kiptaiyandennyo; ma komi kiy ne ng’etunot ne ta keipchini kiptaiyandennyo, kobate borwekyok kityo, ak emotinwekyok; 19amu nee anyun si kebegu eng’ taing’ung’, achek ak emennyo? Alech achek koboto emennyo, si kenyoru amitwogik, ak kebunji achek Parao koboto emennyo keegu otwogikyik: konech keswek, si kesopche, si ma kibegu, si maguber emet.
20Kialji anyun Josep Parao emet komugul ne bo Misri; amu kialda chi tugul eng’ Misrik mbarennyi, ak kieetyi rubet ichek: kibunji anyun Parao emet. 21Ak kiyai Josep bik koek otwogikyik kong’eete tabanda age agoi tabanda age ne bo Misri. 22Kobate emetab tisiik ne ma al inendet; amu kicham konyoru tisiik amitwogik chechuak eng’ Parao, si koamei kebebertanywa ne kiigochin Parao: kima alda anyun emenywa amu noto. 23Kilenji Josep bik anyun, Ogeero, kaalak rani, okwek ak emeng’wong’, obunji Parao: ogeero, irochu keswek, si ogole mbarenik. 24Si ye ogesisie ogochi Parao kebeberta ne bo mut, ak kobunjok kebeberwek ang’wanu, si koek keswekab mbarenik, ak koek amitwogikwok, ak che bo bikab gorikwok, ak amitwogik che bo lagokwok. 25Ak kile, Kaisoru sobonwekyok: mie kenyoru chamet eng’ taitab kiptaiyandennyo, ak keegu otwogikab Parao. 26Ak kiyai Josep ng’olyondonoto koek ng’atutiet eng’ emetab Misri agoi rani, kele kobunji Parao kebeberta ne bo mut; kobate emetab tisiik inegei ne mabunji Parao.
27Kimeny anyun Israel emetab Misri, eng’ emetab Gosen; ak kiek magore eng’ oloto, ak kiiyo ak kotesogis mising’. 28Ak kimeny Jakobo emetab Misri kenyisiek taman ak tisab: ak kenyisiek tugul che kitar Jakobo kosobei ko ki bogol ak artam ak tisab.
29Ak kirik anyun betusiek che bo kalilotetab Israel: kiguur anyun werinnyi Josep, ak kolenji, Ngo kaanyoru chamet eng’ taing’ung’, inde anyun eung’ung’ kubestanyu, iyaiywa ne mie, ak ne bo iman; kaigai ametupcha Misri: 30ago ye alil koboto kwanisiekyuk, isuta amanda eng’ Misri, ak itupcha kererisiekwak. Ak kile, Ayae ko u ye kaimwa. 31Ak kile, Iyosiewa: ak kiiyosiechi. Ak kiing’uruk Israel eng’ olebo itogunnyi meto.
موجودہ انتخاب:
TAUNET 47: BUKUIT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
God's word open for all
©Bible Society of Kenya, 2020