TAUNET 44
44
Kotiemei Josep tupchosiekyik
1King’at anyun chito ne kitononjin gonnyi, kolenji, Inyiit amitwogik lolotinwekab bichu, ko u che imuch koib, ak inde fedaisiekab chi tugul kutitab lolennyi. 2Ak inde kikombennyu, noto bo feda, eng’ kutitab loletab towet, koboto fedaisiekyik che bo bek. Ak kiyai ko u ng’olyot ne kiga mwa Josep. 3Ye kingoeech kota ko karon, kounda bichoto koba, icheget ak sigirokwak. 4Ak ye kingo kagomanda eng’ nganaset, ye kitom kolooegitu, kolenji Josep chito ne kitononjin gonnyi, Ng’eet, isub bichoto; ak ye inyoru ilenji, Amu nee si ogeere yaitiet ne mie? 5Tos ma kikombani ne eeise kiptaiyandennyu, ak kong’orse? Koyai ne ya ngoyai ko u ni.
6Kinyor anyun, ak kimwachi ng’alechato. 7Ak kilenji ichek, Amu nee si komwa kiptaiyandennyu ng’alek che u choto? Ingolooit eng’ otwogiguk si mayai kiy ne u noto. 8Ogeero, fedaisiek, che kiginyorji kutuswekab lolotinwekyok, kogiweekwok kogeny eng’ emetab Kanan: kimuktoi ano anyun kechore gotab kiptaindeng’ung’ feda anan ko tahabu? 9Ingome age tugul eng’ achek otwogiguk ne kenorjin kioto, ak keegu achek otwogikab kiptaiyandennyo.
10Ak kile, Ingotebi ko u ng’aleguk: egu inendet ne kenyorjin kioto otwogindennyu; ak magiityinok okwek yaitio. 11Ak kiitu chi tugul lolennyi kochokyi, ak kotiach chi tugul nenyi. 12Ak kicheng’, kotaune ne o, agoi kogesune ne ming’in; ak kiginorji kikombanato loletab Benjamin. 13Kigerer anyun ngoroikwak, ak kiratyi chi tugul tugukyik sigiriennyi, koweektagei koba nganaset.
14Kiit anyun Juda ak tupchosiekyik gotab Josep; amu kitom kwo ui Josep: ak kiibutyi ng’ony ichek eng’ tainnyi. 15Ak kilenji Josep ichek, Nee ni koyai? Tos mongen ole imuchi kong’orso chito ne u ane? 16Ak kile Juda, Tos kimwaun nee anyun, kiptaiyandennyu? King’alali kelen nee? Anan tos kiityindoitech ano imanda? Kagonai Kamuktaindet tengektab otwogiguk: Ogeero, ki otwogikab kiptaiyandennyo anyun acheget, ak inendet ne kaginyorji kikombet agine. 17Ak kile, Ingolooit eng’ ane amayai ko u noto: ago egu otwogindennyu inendet ne kaginyorji kikombet; ago okwek, ko mie obe eng’ kalyet oldab kwandang’wong’.
18Kirikyi anyun Juda Josep, ak kolenji, Bwa kiptaiyandennyu, asain ale, chamwa kiptaiyandennyu ane otwogindeng’ung’ amwaun ng’olyo, amenerekya ane, otwogindeng’ung’, eng’ koromnatet: amu i u aginye Parao. 19Kiiteebenech achek otwogiguk, kiptaiyandennyu, ile, Otinye kwandang’wong’, ak ko mi werit age ne otupche? 20Ak kigimwaun inye, kiptaiyandennyo, kelenjin, Kitinye baba, boiyot ne os, ak kotinye lakwet ne bo osindanyi, ne ta koming’in; ak kigome ng’etab kamet, ak mi noto inegei ne bo kamenywa, ak kochamei kwandanyi inendet. 21Ak kiilenjech, achek otwogiguk, Omutwa, kochorgei ole ami, si kobiit ageer inendet eng’ konyekyuk. 22Ak kigimwaun inye, kiptaiyandennyo, kele, Maimuchi kobesio weroto ak kwandanyi: amu ngot kometo inendet kwandanyi, ko tos me kwandanyi. 23Ak kiilenjech achek otwogiguk, Ngot ko mobwa ochoruge koboto werit ne otupche ne ming’in ko momuchi ogeera togoch kogeny. 24Ak kingeit anyun oldab otwogindeng’ung’ kwandanyu, kemwachi inendet ng’aleguk, inye kiptaiyandennyu. 25Ak kilenjech baba, Oba kogeny oalwech amitwogik tutigin. 26Ak kigilenji, Magimuchi kechortege: ngo mi tupchennyo ne ming’in kobotech kechortege anyun kebe: amu magimuchi kegeer chichoto togoch kobate kemi ak tupchennyo ne ming’in. 27Ak kilenjech otwogindeng’ung’, kwandanyo, Ongen ole kisikwa osotiondennyu werik aeng’: 28ak kibetena age, ak kiale, Angen komie ale kigetonaton; ak koboch yoto, ko mata tun ageer: 29ak ngot omutena nito agine, ak konyor kiy ne ya, ko kogona arirat agoi tun amei. 30Noto anyun, ye ait oldab otwogindeng’ung’ baba, ama mi weri kobotech; amu kinamgei sobondanyi ak sobondab werito: 31komei anyun baba ye keer kole mami lakwet, ak kigochini achek otwogiguk baba, otwogindeng’ung’, korirat agoi tun kome. 32Amu kibunja ane otwogindeng’ung’ lakwanito, atononjinechi baba, alenji, Ngot ko mamutun inendet, ko kabunja chalwogoto betusiek tugul, eng’ taitab baba. 33Eng’ noto anyun, asain ale, Chamwa atebi aek otwogindeng’ung’, inye kiptaiyandennyu, ageeregei weri; ak ingowo weri kotogosta koboto tupchosiekyik. 34Amu amuktoi ano anyun awo atogosta oldab baba, ama kimi ak lakwet? Si mageer yaitiet ne tun nyoru baba.
موجودہ انتخاب:
TAUNET 44: BUKUIT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
God's word open for all
©Bible Society of Kenya, 2020