TAUNET 37
37
Kealdoi Josep kwo Misri amu kiwech tupchosiekyik inendet
1Kimeny anyun Jakobo emetab Kanan ole kiegunote kwandanyi toondet. 2Chu ortinwekab Jakobo. Kiga koit Josep kenyisiek taman ak tisab, ye kiiyagoti akwetab kerichek koboto tupchosiekyik; ak kimi weroto koboto werikab Bila, ak werikab Silba, osotikab kwandanyi: ak kiibu Josep ng’alekwak che yaachen komwachin kwandanywa. 3Ak kichamei Israel Josep kosiir werikyik tugul, amu kisichei koga koosit: ak kinapchi ngoriet ne koi ne bochin agot eunek. 4Ak kigeer werik che tupcho kole, chamei kwandanywa inendet kosiir tupchosiekyik tugul; ak kiwech inendet, kot komata kocham kong’alalji inendet eng’ kalyet.
5Ak kiiruotyi Josep karuotitoet, ak kimwachi werik che tupcho: ak kites kowech inendet kosiir. 6Ak kilenji ichek, Kaigai ogas karuotitaoni koaruotyi: 7ogeero, kogirate bek che mi ak mobek eng’ mbar, ak kong’eetyo bekyuk che koarat, kotononso: ogeero, koyiem bekwok che koorat, bek chechuk ak kong’urukyi. 8Ak kilenji werik che tupcho, Ilen tos tun ilaitoranenech? Anan tos tun iboiywech? Ak kites kowech inendet kosiir amu karuotitaosiekyik, ak ng’alekyik. 9Ak kiiruotyi karuotitoet age kogeny, ak kimwachi tupchosiekyik kolenji, Ogeero, koaruotyi kogeny karuotitoet; ogeero, koing’urukya asista ak arawet ak kecheik taman ak agenge. 10Ak kimwachi kwandanyi ak werik che tupcho: ak kiger kong’ kwandanyi inendet, ak koteebe kolenji, Nee karuotitaoni koiruotyi? Tos king’urukyin agoi ng’ony iman agot ane ak komet ak tupchosieguk? 11Ak kiam ng’et kong’ tupchosiekyik agobo inendet; ago kigonor kwandanyi ng’olyondonoto eng’ muguleldanyi.
12Ak kiba tupchosiekyik koyaga akwetab kechirek che bo kwandanywa eng’ Sekem. 13Ak kilenji Israel Josep, Tos maiyagi werik che otupche akwet eng’ Sekem? Nyo anyun ayokten iwe ole mi icheget. Ak kilenji inendet, Ami yu. 14Ak kilenji, Ui anyun nguno, igeer ngo chamegei tupchosieguk koboto akwet; si inyo imwawa. Kiiyokto anyun kwo eng’ atebwetab Hebron, kiit anyun Sekem. 15Ak kinyor inendet chito age, ogeero, kicheng’soti eng’ kewet; ak kiteebe inendet kolenji, Icheng’e nee? 16Ak kile, Acheng’oti werik che kitupche: kaigai imwawa ole iyagisie. 17Ak kilenji chichoto, Kogoba eng’ oli: amu kiagas komwaei kolen, Ongebe Dotan. Ak kisub Josep tupchosiekyik, ak kinyorji Dotan. 18Ak kigeer icheget inendet kota komi ole loo, ak kingotom korik ole mi, kotil ng’alek ole bartoi inendet. 19Ak king’alaljigei kole, Ogeero, nyonei chitab karuotitoet. 20Ongebe anyun kebar, si kewirji keringet, ak kemwa kele, Kaam tiondo ne ya: si kegeer kit ne egu karuotitaosiekyik. 21Ak kigas Reuben, ak kisor inendet eng’ eunekwak, kolenji, Amongebar. 22Kilenji Reuben, Amotumde korotik: owirji keringoni mi ong’atet, amoyachi kiy ne ya: si kosor inendet eng’ eunekwak, si koweekyi inendet kwandanyi. 23Ak kingoit Josep ole mi tupchosiekyik, koreegune Josep ngoriennyi, ngorionoto koi ne kiilaachi; 24kiimut anyun inendet, ak kowirji keringet: kimi buch keringonoto, kima komi beek.
25Ak kiteb ng’ony koamis: kitobendo anyun, kogeer bikab Ismaelik kobwanei, kobunu Gilead, koboto tambesikwak che kilaei tuguk che ng’uu ne anyiny, ak mwanik che kinyaise, ak tuguk che u igomoik, kochortagei Misri. 26Ak kilenji Juda werichoto tupcho, Tos mi kelunet nee ngebar tupchennyo ak keuny korotikyik? 27Ongebe anyun kealdochi Ismaelik, ago amongeyachi kiy ne ya; amu inendet ko tupchennyo, ak ko bo korotikyok. Ak kigas tupchosiekyik ng’alekyik. 28Yeityo kosiir yoto chemung’arainik che bo Midian; ak kiimoong’ Josep kolong’ eng’ keringet, ak koaldochi Joseph Ismaelik eng’ fedaisiek tiptem. Kiimut anyun Josep kwo Misri.
29Ak kiweeigei Reuben kwo ole mi keringet; ak ogeero, kima komi Josep keringet; ak kigerer ngoroikyik. 30Kiweektagei anyun kwo ole mi tupchosiekyik, ak kile, Mamitei lakwet; ara, si awo ano anyun? 31Ak kinam ngorietab Josep ak koeny kwesta, ak koiile ngoriet korotik; 32ak kiiyokto ngorionoto koi, keipchi kwandanywa; ak kile, Kaginyoru ngorioni; inyit anyun ngo ngorietab wering’ung’ anan ma nenyi. 33Ak kiinyit, ak kole, Ngorietab werinnyu iman; kagoam inendet tiondo ne ya; kagetonaton Josep iman. 34Ak kigerer Jakobo ngoroikyik, ak kogermenegei kuniet, ak kirirji werinnyi betusiek che chang’. 35Ak king’eetyo werikyik tugul ak tibikyik tugul kole kogaigai inendet; ago kiesio inendet kigaigai; ak kile, Eng’ noto anyun, arirjini werinnyu agoi ait oldab che kigobek. Kirirji anyun kwandanyi inendet.
36Ak kialda Midianik Josep kwo Misri, koal Potipar, kiboitiotab Parao, kiptaiyatab ribik.
موجودہ انتخاب:
TAUNET 37: BUKUIT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
God's word open for all
©Bible Society of Kenya, 2020