KĨAMBĨRĨRIA 2
2
1Igũrũ na thĩ gũgĩkĩrĩka o kũrĩka, o na mwaranĩrie wa ũingĩ wothe wakuo; 2#Thama 20.11.#Ahib 4.4,10.naguo mũthenya wa mũgwanja Ngai agĩkorũo arĩkĩtie wĩra ũcio wake aarutaga wa ũũmbi; ningĩ mũthenya o ũcio wa mũgwanja akĩhurũka atiganĩte na wĩra wake wothe ũcio aarutĩte wa ũũmbi. 3Na rĩrĩ, mũthenya ũcio wa mũgwanja-rĩ, Ngai akĩũrathima, akĩwamũra, nĩ ũndũ mũthenya ũcio nĩguo aahurũkire agĩtiga wĩra wake wothe ũrĩa we Ngai aarutĩte wa gũtũma indo igĩe, o na wa gũciũmba.
4Kĩu nĩkĩo kĩhumo kĩa igũrũ na gĩa thĩ, rĩrĩa ciatũmirũo igĩe kuo, o mũthenya ũrĩa Jehova Ngai ombire thĩ na igũrũ. 5Na hĩndĩ ĩo thĩ ndĩakoretwo ĩgĩĩte kamũtĩ o na kamwe ga gĩthaka, kana gũkamera kahuti ga gĩthaka o na karĩkũ, amu hĩndĩ ĩo Jehova Ngai ndoirĩirie thĩ mbura, o na gũtiarĩ mũndũ wa kũrĩma mũgũnda; 6no rĩrĩ, nĩ kĩbii kĩaambataga kiumĩte na thĩ, gĩkaihũgia thĩ igũrũ, o harĩa yakinya. 7#1 Kor 15.45.Nake Jehova Ngai akĩũmba mũndũ na rũkũngũ rũa thĩ, agĩcoka akĩmũheeherera mĩhũmũ ya muoyo na marima ma iniũrũ; nake mũndũ ũcio agĩtuĩka mũndũ wĩ muoyo. 8Naguo mwena ũrĩa riũa rĩrathagĩra, Jehova Ngai agĩthondeka mũgũnda mũirigĩre, o kũrĩa gwetagwo Edeni, na akĩũhanda; na nĩho aaigire mũndũ ũcio ombĩte. 9#Kũg 2.7; 22.2,14.Naguo tĩri Jehova Ngai agĩtũma ũmere mũtĩ o wothe wa kwendeka ũkĩonwo, na ũrĩa mwega wa kuuma irio, naguo mũtĩ wa muoyo ũkagĩa o mũgũnda ũcio gatagatĩ, o na mũtĩ wa kũmenyithania wega o na ũũru. 10Na kwarĩ rũũĩ rũoimĩte kũu Edeni rũa kuunithagĩria mũgũnda ũcio maĩ; naruo rũoima hau, rũkagayũkangana, rũgatuĩka rũa mĩmero ĩna. 11Rĩĩtwa rĩa ũrĩa wa mbere nĩ Pishoni, na ũcio nĩguo ũrigicĩirie bũrũri wothe wa Havila, kũrĩa gwĩ thahabu; 12nayo thahabu ya bũrũri ũcio nĩ njega, ningĩ kũu no kũrĩ kĩndũ kĩrĩa gĩĩtagwo bendora na mũthemba wa ihiga ũrĩa wĩtagwo onigithi. 13Na rĩĩtwa rĩa rũũĩ rũa kerĩ nĩ Gihoni, na rũu nĩruo rũrigicĩirie bũrũri wothe wa Kushi. 14Na rĩĩtwa rĩa rũũĩ rũa gatatũ nĩ Hidekeli, na rũu nĩruo rũgereire mbarĩ ĩrĩa ĩngĩ ya bũrũri wa Ashuri. Na rũũĩ rũa kana-rĩ, nĩ Farati. 15Nake Jehova Ngai agĩtwara mũndũ ũcio ombĩte akĩmũiga mũgũnda ũcio warĩ kũu Edeni, aũrutage wĩra, na aũikaragie. 16Nake Jehova Ngai agĩatha mũndũ ũcio, akĩmwĩra atĩrĩ, Mũtĩ o wothe ũrĩa wĩ mũgũnda ũyũ-rĩ, nĩũrekereirio ũũrĩage; 17no rĩrĩ, mũtĩ ũrĩa wa kũmenyithania wega o na ũũru, ndũkanaũrĩe, nĩ gũkorũo mũthenya ũrĩa ũkaũrĩa, no mũhaka ũgakua.
18Ningĩ Jehova Ngai akiuga atĩrĩ, Ti wega mũndũ ũyũ aikare wiki; nĩngũmũũmbĩra mũmũteithia o ũrĩa maaganĩrĩirũo nake. 19Na rĩrĩ, Jehova Ngai ombire nyamũ o yothe ya gĩthaka na tĩri, o na nyamũ o yothe ĩrĩa ĩrĩ njoya ya rĩera-inĩ, agĩcoka agĩcitwara ciothe kwĩ mũndũ ũcio, nĩguo emenyere ũrĩa egũciĩta; na rĩrĩ, kĩũmbe o gĩothe gĩa icio irĩ muoyo-rĩ, o rĩĩtwa rĩrĩa mũndũ ũcio aagĩtuire, rĩu rĩgĩtuĩka rĩĩtwa rĩakĩo. 20Nake mũndũ ũcio agĩtua mahiũ mothe marĩĩtwa, o na nyamũ iria ii njoya cia rĩera-inĩ o na nyamũ ciothe cia gĩthaka; no rĩrĩ, ha ũhoro wa mũndũ-rĩ, gũtiakorirũo kwĩ na mũmũteithia maaganĩrĩirũo nake. 21Nake Jehova Ngai agĩtũma mũndũ ũcio agwatwo nĩ toro mũnene mũno, agĩgĩkoma; ningĩ akĩmũruta rũbaru rũmwe, agĩcoka agĩcokania nyama hau ruuma, 22naruo rũbaru rũu Jehova Ngai aarutire mũndũ ũcio, akĩrũkũmbania rũgĩtuĩka mũndũ mũka, agĩcoka akĩmũtwara kwĩ mũndũ ũcio. 23Nake mũndũ ũcio akiuga atĩrĩ, Rĩu kaĩ ũyũ nĩwe ihĩndĩ rĩmwe riumĩte mahĩndĩ-inĩ makwa, o na nyama yumĩte nyama-inĩ ya mwĩrĩ wakwa-ĩ! Nĩ wega etagwo Mũndũ-mũka, tondũ arutirũo thĩinĩ wa Mũndũ-mũrũme.
24 #
Mat 19.5; Mar 10.7,8; 1 Kor 6.16; Ef 5.31. Tondũ wa ũguo-rĩ, mũndũ mũrũme nĩatigane na ithe na nyina, magwatane na mũka, nao erĩ matuĩke mwĩrĩ ũmwe. 25Nao acio erĩ, mũndũ na mũka, maarĩ njaga, na matiaiguaga thoni.
موجودہ انتخاب:
KĨAMBĨRĨRIA 2: OGKBIBLE
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Bible Society of Kenya, 2019