Yohana 6

Okoragerigwa kw’abaanto chilifu isano

(Mat 14:13-21; Mar 6:30-44; Luk 9:10-17)

1Magega ase aya Yeso akagenda ng’umbu y’enyancha ya Galili, nero enyancha ya Tiberia. 2Omoganda omonene okamotunyana, ekiagera baroche ebikone abakorerete abarwaire. 3Yeso agatiira gochia egetunwa, agaikaransa aroro amo naborokigwa baye. 4Na Epasaka, rituko rinene ri’Abayahudi, nigo yarenge ang’e. 5Nabo Yeso agachia koimokia amaiso aye, akarora omoganda omonene ogocha asare, akaboria Filipo, “Ng’ai togochia kogora emegati, aba banyare koria?” 6Igo amoboretie aya, erinde amoteeme, ekiagera namanyete ere omonyene eki arakore.

7Filipo akamoiraneria, “Emegati ye chidinari amagana abere tekobaisana, kera oyomo anyore moke igo.” 8Oyomo bw’aborokigwa baye, Anderea, momura omwabo Simioni Petero, akamoteebia, 9“Nare aa omosae, obwate emegati etano y’esairi ne chinswe ibere, korende ebi inki biraisane ase abanto abange buna aba?”

10Yeso akabora, “Ikaransia abanto.” Mbwarenge aroro obonyansi obonge aase aria. Igo abasacha bagaikaransa, barabwo nigo barenge chilifu isaano. 11Yeso akabogoria emegati; kayesesenirie, akagabera abaikaransete; naboigo ne chinswe chiria, koreng’ana buna barigetie. 12Kobachia koigota, agateebia aborokigwa baye, “Sangereria ebisamunye biatigaire, gento tigesira.” 13Nabo bakabisangereria, bagaichoria ebitonga ikomi na bibere ase ebisamunye bi’emegati etano y’esairi, ebiatigaretigwe na baria bariete. 14Ekero abanto baria bachia korora egekone keria Yeso akorete, bakaboora, “Oyo ekeene nomobani oria orenge gocha ase ense!”

Yeso ogweatanana na gotaara ase enyancha igoro

(Mat 14:22-27; Mar 6:45-52)

15Nabo Yeso namanyete ng’a mbarigetie gocha komoira, erinde bamobeeke abe omorwoti. Ase ayio akerusanania, akagenda naende egetunwa ere bweka.

16Rigachia koba mogoroba, aborokigwa baye bagatirimboka gochia nyancha, 17bakariina obwato ime, bagachaaka kwamboka enyancha kogenda Kapernaumu. Naende omosunte konya obeire, na Yeso konya taracha ase bare. 18Enyancha egachaaka koimoka ase engencho y’omwaga omonge orenge kogusa. 19Nabo kabang’usire obwato chimaeli isato gose inye bakarora Yeso ogotaara ase enyancha igoro, ogoika ang’e ase obwato. Erio bakairoka, 20korende Yeso akabateebia, “Ninche. Timoiroka!”

21Bagancha komosoyia obwato ime, erio kegima obwato bogaika ase barenge kogenda.

Abanto bakorigia Yeso

22Ankio yaye omoganda oteneine ng’umbu y’enyancha bakarora ng’a obwato bonde tibwarenge aroro, otatiga boria obomo bwoka, naende ng’a Yeso tasoete ase obwato boria amo naborokigwa baye, korende naborokigwa baye bagendete boka. 23Korende amaato ande agacha korwa Tiberia ang’e nase aria bariete emegati ekero Omonene ayesesenetie. 24Ekero omoganda ochia korora ng’a Yeso tari aroro, nonya naborokigwa baye, barabwo abanyene bagasoa amaato ime, bakagenda Kapernaumu, bakorigia Yeso.

Yeso nomogati bw’obogima

25Goika bagachia komoorora ng’umbu y’enyancha bakamobooria, “Omworokia, indi gwachete aa?”

26Yeso akabairaneria, “Ekeene, ekeene, nabateebirie: Iga mokondigia, tari ekiagera mwaroche ebikone, korende nekiagera mwariete emegati eria, mokaigota. 27Timokorera endagera egosareka korende, endagera ekobao goika obogima bwa kare na kare, eye Omwana‐o‐Mwanyabaanto aranyare kobaa, ekiagera Nyasae Tata obekire ekemanyererio kiaye asare.”

28Nabo bakamobooria, “Ninki togokora tonyare gokora emeremo ya Nyasae?”

29Yeso akabairaneria, “Eye nero emeremo ya Nyasae, ng’a momwegene ere oyotomirwe nere.”

30Bakamoteebia, “Mbikone ki ogokora, erinde torore tokwegene? Meremo ki ogokora? 31#Okong’ 16:4,15; Zab 78:24Chisokoro chiaito nchiariete mana ase erooro, buna yarigetwe: Nabaete omogati korwa igoro bakaria.”

32Yeso akabateebia, “Ekeene, ekeene, nabateebirie: Tari Musa obaete omogati oria orwete igoro, korende n’Tata one ore kobaa omogati bw’ekeene okorwa igoro. 33Naki omogati o Nyasae noria ogoika korwa igoro na koa ense obogima.”

34Nabo bakamoteebia, “Omonene, amatuko onsi otoe omogati oyio.”

35Yeso akabateebia, “Inche nomogati bw’obogima; ere oyogocha ase ’nde takoigwa enchara nonya ng’ake, na ere oyoranyegene takorang’a nonya ng’ake. 36Korende nabateebirie ng’a mwandorire, ko timonyegeneti. 37Bonsi aba Tata akong’a nabache ase ’nde, na ere oyogocha ase ’nde tinkomotuguta isiko nonya ng’ake. 38Naki naikire korwa igoro, tari ase ogokora ogwancha kwane omonyene, korende ogwancha kwaye oyontomete. 39Naende ogwancha kwaye Tata oyontomete nakwo oko, ng’a ase bonsi ang’eire tinsiria nonya noyomo, korende mbabokie ase rituko ri’omoerio. 40Nogwancha kwaye oyontomete nakwo oko, ng’a kera oyokorigereria Omwana na komwegena, nabe nobogima bwa kare na kare, na inche nimobokie ase rituko ri’omoerio.” 41Abayahudi bakamwemurunganeria, ekiagera ateebete, “Inche nomogati oigete korwa igoro.” 42Bakaboora, “Oyo tari Yeso, omwana o Yusufu? Ntomanyete ise na ng’ina. Naki rende akobora: Naikire korwa igoro?”

43Yeso akabairaneria, “Timwemurunganerania inwe ase inwe. 44Omonto onde tari oranyare gocha ase ’nde, atang’usiri na Tata oyontomete, na inche nimobokie ase rituko ri’omoerio. 45#Isaya 54:13Nerikire nababani: Bonsi naborokererigwe na Nyasae. Kera oyoigure na kworokererigwa na Tata, nigo agocha ase ’nde. 46Tari ng’a monto ororire Tata, otatiga ere oyorure ase Nyasae, oyio nere ororire Tata. 47Ekeene, ekeene, nabateebirie: Ere oyonyegenete inche nare nobogima bwa kare na kare. 48Inche nomogati bw’obogima. 49Chisokoro chiaino nchiariete mana ase erooro, na barabwo bagakwa. 50Oyo noro omogati oikire korwa igoro ng’a monto onde bwensi orayorie, tagokwa. 51Inche nomogati bw’obogima oyoigete korwa igoro; omonto kararie omogati oyio, nabe moyo goika kare na kare; na omogati ndarue inche, ase engencho y’obogima bw’ense, nomobere one.”

52Erio Abayahudi bakaamererania barabwo ase barabwo, bakaboora, “Naki omonto oyo aranyare gotoa omobere oye toyorie?”

53Yeso akabateebia, “Ekeene, ekeene nabateebirie: Motarieti omobere oye Omwana‐o‐Mwanyabaanto na konywa amanyinga aye, timori nobogima ime yaino. 54Oyokoria omobere one na konywa amanyinga aane nare nobogima bwa kare na kare, na inche nimobokie ase rituko ri’omoerio, 55ekiagera omobere one nendagera y’ekeene, na amanyinga aane nekenyugwa gi’ekeene. 56Oyokoria omobere one na konywa amanyinga aane nigo akomenya ime yane, na inche ime yaye. 57Buna Tata are moyo antomete, na inche inde moyo ase engencho ya Tata, naboigo oyokondia, nabe moyo ase engencho yane. 58Oyio nomogati oigete korwa igoro, tari buna chisokoro chiaino chiariete mana, bagakwa; oyorarie omogati oyio nabe moyo goika kare na kare.”

59Amang’ana aya nigo ayakwanete ase esinagogi, kaare kworokereria aria Kapernaumu.

Abande ase aborokigwa bakaba ne chitang’u‐tang’u

60Abange ase aborokigwa baye ekero bariigwa, bakaboora, “Ring’ana eri nerikong’u, ning’o oranyare koritegerera?” 61Ko Yeso akamanya ase omoyo oye ng’a aborokigwa baye bemurunganeirie ring’ana eri, akababoria, “Ring’ana eri ndiabagochire? 62Naki erabe rende, komorarore Omwana‐o‐Mwanyabaanto okogenda aaria aase arenge ritang’ani? 63Omoika noro okobeeka obogima, omobere togwenereti gento; amang’ana nabateebirie n’Omoika, naende nobogima. 64Korende mbare abande ase egati yaino bategeneti.” Naki Yeso amanyete korwa omochakano mbarabi abategeneti, naende ning’o orache komorua. 65Akabora, “Eke nakio gekogera nabateebia, ng’a omonto onde tari oranyare gocha ase ’nde, otatiga oeirwe na Tata one.”

66Magega y’ayio abange ase aborokigwa baye bakairana magega, tibamotunyana naende.

Okoorokia gwa Petero igoro ya Yeso

67Erio Yeso akaboria baria ikomi na babere, “Nainwe boigo morigetie kogenda?”

68 # Mat 16:16; Mar 8:29; Luk 9:20 Simioni Petero akamoiraneria, “Omonene! Togende ase ng’o? Aye nore namang’ana y’obogima bwa kare na kare. 69Na intwe twegenire na komanya ng’a aye naye Omochenu o Nyasae.”

70Yeso akabairaneria, “Inee! Tinabachorete inwe ikomi na babere, na oyomo oino Saitani?” 71Nigo akwanete igoro ya Yudasi, omwana o Simioni Iskariota, ekiagera oyo nere orache komorua; na ere noyomo bwa baria ikomi na babere.

موجودہ انتخاب:

Yohana 6: EKGE

سرخی

شئیر

کاپی