Genesi 10
10
Mahundzu nya sanana sa Nowa
(1 Dzikoronika 1:4-24)
1Esi khu situgulwana sa sanana sa Nowa: Semi, Kami ni Jafeti ni sanana va velegidego hwane nya ndrambi.
2Sanana sa Jafeti khesi: Ghomeri, Magogi, Madhayi, Javani, Tubhali, Meseki ni Tira.
3Sanana sa Ghomeri khesi: Asikenazi, Rifati ni Togarima.
4Sanana sa Javani khesi: Eliya, Tarisisi, Kitimi ni Dhodhanimi.
5Khavo va velegidego vathu vatshavbo va vbanyago sidwani. Va khade khu mahundzu gukhedza khu guhambanelana nya vababe vawe nya guphele. Lihundzu ni lihundzu li na ni litigo laye ni lidimi laye.
6 # Wona gambe: Umo nya gindrimana 13. Sanana sa Kami khesi: Khusi, Mizirayimi, Puti ni Khanani.
7Sanana sa Khusi khesi: Sebha, Havhila, Sabhita, Rama ni Sabhiteka. Sanana sa Rama khu Sebha ni Dhedhani.
8 # Wona gambe: Umo nya sindrimana 13,15,24 ni 26. Khusi a di velega gambe Nimerodi, muthu nya tshivba nya guphele nya khongolo a nga manegago tigoni. 9Gambe a diri musoti nya tshivba mahoni gwa Pfhumu Nungungulu. Khidzo kala na muhuno gu nga gu ganedwago gupwani: “Pfhumu Nungungulu a na gu gire musoti nya tshivba kha nga Nimerodi.” 10Phede khu gu fumela madhoropa yaya: Bhabheli, Ereki, Akade ni Kaline yatshavbo ya gipandrengulu gya Sinari. 11Gukhugela umomo a di ladza mufumo waye wu vboha kala Asiriya, a gu vbaha lidhoropa la Ninivha ni Reyobhoti-Iri, Kalahi, 12ni Resemi vbakari ni vbakari ga Ninivha ni Kalahi, li nga bani liri lidhoropa nya likhongolo.
13Mizirayimi khuye nyapandre wa vathu va Ludhi, va Anami, va Leyabi ni avo va Nafitu, 14ni ava gambe va Patrusi ni va Kasilu, va dugelago umo Vafilisitiya ni Vakafitori.#10:14 Vakafitori guthudwa vathu va gidwani gya Kreta.
15Khanani khuye babe wa Sidhoni, gyanana gyaye nya matiwula, ni Heti, 16ni wa Vajebhuzi, Vaamori, Vagirigazi, 17ni Vahevhi, Vaharaki, ni Vasini, 18ni Vaharivadhi, Vazemari ni Vahamati. Khavbo avbo, situgulwana nya livelego la Khanani si di swayega khu mitsawa tigoni. 19Litigo lawe li di ladza gukhugela Sidhoni kha guhongola Gerari, vbafuvbi ni Gaza, kala Sodhoma ni Ghomora, Adhama, Seboyimi kala Lasa.
20Khiso esi situgulwana nya livelego la Kami khu dzinyumba, ni malimi ni mahundzu ni mafumbu yawe.
21Semi, koma wa Jafeti, velegide nuye sanana. Khuye babe wa sanana satshavbo sa Hebheri.
22Sanana sa Semi khu esi: Elamo, Asuri, Arifasadi, Ludhi ni Arami.
23Sanana sa Arami khu esi: Uzi, Huli, Geteri ni Masi.
24Arifasadi khuye babe wa Sela; Sela a velega Hebheri.
25Hebheri a di velega sanana sivili: Gimwegyo gi di ranwa pwani Pelegi#10:25 Pelegi, gutshamusedwa gupwani gukabanega., kholu matshiguni gwaye vathu va di swayega tigoni gwatshavbo. Gimbe gi ranwa pwani Jokitani.
26Jokitani khu muvelegi wa Alimodhani, wa Selefi, wa Hazari-Mave, wa Jara, 27wa Adhoramo, wa Uzali, wa Dhikila, 28wa Obhali, wa Abhimayeli, wa Sabha, 29wa Ofiri, wa Havila, wa Jobhabhi. Ava vatshavbo sanana sa Jokitani.
30Va di gu vbanya mayigoni ma ladzidego gukhugela Mesa kala Sefari, sigomoni khu phuvbo ga Khugadambo.
31Esi khiso situgulwana sa Semi khu dzinyumba, ni mahundzu ni mayigo yawe.
32Khuwo owu sasamedzo nya dzinyumba nya situgulwana sa Nowa, gukhedza khu linyangwa nya lihundzu ni lihundzu, mahundzu yatshavbo nya vathu va mafuni, hwane nya talo nya ndrambi, ma velegidwe ga dzinyumba dzedzi.
موجودہ انتخاب:
Genesi 10: BGG2014
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Gitonga DC Bible © Bible Society in Mozambique, 2014.