OKHUCHIAKA 3
3
Okhukwa khwomundu
1Ne inzokha yali niyalwenyukha okhuyomba tsinyama tsindi etsiom'bulimo etsia OMWAMI Nyasaye yalomba. Inzokha nereeba omukhasi mbu, “Nitooto mbu Nyasaye yam'bool'la mulekhe okhuliakhwo amatunde komusaala nalebe m'mukunda?”#Okhub. 12:9; 20:2
2Omukhasi nakalusia mbu, “Khunyala okhulia amatunde kemisaala chiosi m'mukunda, 3nikurali omusaala okuli hakari womukunda. Nyasaye yakhubool'la khurakhaliakhwo amatunde komusaala yikwo kata okhutiila khukwo tawe, nikhuliakhwo khwakhafwa.”
4Inzokha nebool'la omukhasi mbu, “Simunyala okhufwa tawe. 5Nyasaye yaboola mbwo sichila wamanya mbu nimuliakhwo, ne nimuba nokhumanyilisia okhwinji nende obuchesi singa Nyasaye ma mumanye amalahi nende amabi.”
6Omukhasi uyo yalola omusaala yikwo nikuli omulahi khandi amatunde nikali amalahi akokhulia, ma nikunyonya tsimoni tsitsie, khandi nalola bwakhaba obulahi okhuchetsiha. Yamala nanoka khwitunde liakwo nalia, khandi nahelesiakhwo omusaatsawe naye naliakhwo. 7Olwa baliakhwo, bali nende okhumanyilisia nende obuchesi ma nibamanya mbu bali esihechenye, ma nibanaba amasafu khumikhuyu nibeboha mubisienje.
8Khumukolooba kwelitukhu yilio bahul'la OMWAMI Nyasaye nachendanga m'mukunda, ne nibebisa m'musaala. 9OMWAMI Nyasaye nalanga Adamu, namureeba “Oli hena?” 10Naye nakalusia mbu, “Mbuliiye nochendanga m'mukunda ma niria, nindebisa sichila ndi esihechenye.” 11Nyasaye namureeba mbu, “Niwina okhubooleye oli esihechenye? Oliye litunde liandakhukaya okhuliakhwo nohomba?” 12Adamu nakalusia mbu, “Omukhasi wawaimbeye khumenye n'naye niye oumbelesisie litunde ma nase nindia.”
13OMWAMI Nyasaye nareeba omukhasi mbu, “Esichil'le nokhola mbwo nisina?” Naye nakalusia, “Inzokha niyo eyaingaat'te ma nindiakhwo.”#2 Kor. 11:3; 1 Tim. 2:14
Nyasaye yakhalachila omundu esiina
14OMWAMI Nyasaye nabool'la inzokha mbu, “Sichila okhol'le akene yaka oli musilaamo siobubi esianasikhwabukhanie khutsisolo tsindi tsiosi. Nomoolenje nende indayo khandi nolitsenje olukuukhi amatukhu kobulamu bubwo bwosi. 15Khandi nare obusuku hakariwo nende omukhasi, khandi hakari wolwibulo lulwo nende olulwe. Olwibulo lulwe lwakhatuye omurwekwo nawe wakhalumache es'sisilo sisie.”#Okhub. 12:17
16Ne nabool'la omukhasi mbu, “Ndakhameete obunyakhanibwo bwokhubelekha nende okhutsunwakhwo khweinumwa. Obwekombibwo bwakhabetsenje khumusaatsawo, ne yakhakhwamihenje.” 17Ne nabool'la Adamu mbu, “Sichila ohuliye amang'ana komukhasiwo ma nolia litunde liomusaala kwandakhukaya okhuliakhwo, liloba lilaamilwe khulweibe. Notiyenje khulio netsingufu mubulamu bubwo bwosi khulwo okhunyoola esiolia.#Heb. 6:8 18Liakhakhuleer're amarakalu nende eminyenya, nawe nolitsenje tsifwa tsiom'mukunda. 19Khulwoluchesi lulwo nonyoolenje esiolia okhurula khwiloba okhwola olwa wakhakalukhe khwiloba eliawalombwakhwo. Walombwa okhurula khwiloba khandi wakhakalukhe khwiloba.”
20Adamu nakulikha omukhasiwe Hawa, sichila niye nyina abandu bosi. 21Ma OMWAMI Nyasaye nalomba tsingubo okhurula khumaseelo ketsisolo nababiikha.
Adamu nende Hawa bakhungwa m'mukunda
22OMWAMI Nyasaye naboola mbu, “Luno omundu uno wekhol'le singa mulala khu ifwe, okhumanya obulahi nende obubi. Arakhahuchil'lwa okhubukulakhwo amatunde komusaala kwobulamu aliekhwo tawe, khase yakhahindila inziayo.”#Okhub. 22:14 23Kho OMWAMI Nyasaye yamala namuhiinia m'mukunda kwa Edeni mbu atsie alime liloba eliayahinibwakhwo. 24Khulubeka lwebukwe lwomukunda kwa Edeni Nyasaye yarayo “Abakerubi”#3:24 Abakerubi Ebilimwoyo nohomba ebilonje bietsimbaha. nende olukanga lwolumemo olwasukhananga tsimbeka tsiosi, khulwa okhulinda injila yokhutsia khumusaala kwobulamu.
موجودہ انتخاب:
OKHUCHIAKA 3: EBAIBO
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Bible Society of Kenya, 2019