Génesis 31
31
Jacob witing mahka kulwi talwiLabán ūni kaupak kalahwi kirinin
1Jacob witing dakana Labán walanbis ahal kidika aput yuyulwi: “Jacob laih mapapangki dini balna bitik duna, bahang kidika kau witing laih diduyang kalna atwakat.” 2Dawak bik Jacob witing talna Labán kulnin lani balna kidika muhnilau kapat awasdai. 3Kaput Dawan yaklauwi Jacob yakat kalyulna: “Man papangma sauni dai yakat nawatta yawah, man wanaihma balna bangyakat, bahang yang lawik mamakdaki.”
4Jacob yaklauwi Raquel dawak Lea bik diyulwak uina, witing asangpas kau tinglau maintalwasak yakat, 5dawak witing yaklauwi diyulna:
—Yang uman amanglanayang, papangmana kidika tanitkau dai kaput awas ki niking yakat; kaunah papangki balna Papangnina kidika yaruhmwi dawaski ban mikdawi. 6Manna yamni amanglatamana yang manna papangmana warkni yamnayang ampus tanit yamni sipyang yakat, 7dawak witing yaklauwi alas yayulna, dawak bik mikit kidika sat sat wirlawi duaina. Kaput kaunah Papang yaklauwi kaldawas dai dutni yayamnin kidika; 8nawatni kauh laih witing yulna dai: ‘Yang lautikmaki tinglau sani kapat balna kidika kau’, sīp yayal walaninabis yayakwa kidika unitak sani kapapat manah yayakwadai; dawak watwi aput kalyulwak: ‘Piritni balna kidika kau lautikmaki kaltakat’, sīp yayal walaninabis kidika piritni manah yayakna dai. 9Dawak kaput kuduh Papang yaklauwi tinglau balna kidika dakyakwi yana yang akat.
10“Ma as kat, tinglau balna kidika alnimuk karak kal-laihnin mani kaina dai, bahang yang amana kau talnayang kuts almuk yaklauwi kuts yal yakat laihwa kidika piriritni dai, dawak ririsni bik. 11Kidika amana talnayang yakat Papang innisal yaklauwi ayangki kau yulna dai, dawak yang biritik nangnitlanayang: ‘Yang akat sakyang.’ 12Dawak innisal kidika yayulna: ‘Yamni talah, dawak talma tinglau ahalmuk yayal yakat lalaihwa kidika laih sasani, ririsni manah ki, kat amanglanayang Labán yaklauwi man yakat ais mayamwa kidika. 13Yang kuduh Papang Betel yakat lāih alahwanayang dai kidika,#31.13 Betel yakat Papang lāih kalahna dai kidika man yakat: sara kau ulna balna yakat kaput yulwi. Hibru kau laih yulwi Betel Papangni. kidika yakat man kipala kau blisin kalatadai kidika, dawak bik pramis as yayamtadai kidika.#Gn 28:18-22. ¡Mawang! Lawa mahka adika pāni kaupak mahka yawah; nawatta yawah man batahndanaman sauni yakat.’
14Kaput laih Raquel dawak Lea karak biriwi nangnitlalana:
—Yangna dikina pahni as bik disyangna papangkina ūni yakat. 15Nawatkauh laih, muih ūk yangna kapat yanayamwi. ¡Yanawauhwi bakanna, dawak yangna yanadunaman yulni minit lauta kalanaman kidika bitik duna! 16Rahm kidika laih ritsni balna kidika bitik Papang yaklauwi dakyakna mapapangki yakat, bahang kidika laih mayang madiki, dawak bik mawalakibis balna dinina. Kaput bahang man yamtah Papang yaklauwi mayulna balna kidika bitik.
Jacob witing Padam-aram kaupak mahka kiwi
17-18Jacob witing ridi kalahna mahka kiuna atnin Canaán yakat, witing papangni Isaac yalahwadai pāni yakat. Witing yalni balna dawak walanibis balna kidika bitik kiamil minit yakat ilna dai, dawak di duwa balna dai kidika bitik duna, dawak tinglau balna witing Padam-aram yakat wark kalahwi duna balna dai kidika duwi mahka ta yakat kalahwi lapakna. 19Labán witing pa ūk yakat kiwi sīp butuni balna kidika dakwalikkat Raquel yaklauwi kiwi Labán sulani balna daninawan dauh kidika malna. 20Kaput, yaklauwi Labán arameo yakat alas kalyamna, witing mahka kiwa kidika kalyulwasdai. 21Witing di duwa balna dai kidika bitik duwi kirana. Sirihni Éufrates wasni kidika dakyaklana, dawak tanit yakat ban kiuna Galaad asangnipas nining yakat.
Labán yaklauwi Jacob yakat uiwi kiuna
22Ma bās bayakwak usnit kat, Labán dakana Jacob kirana kidika. 23Kaput laih witing wanaihni balna karak kalpakwi kalahwi uiwi kiuna, dawak ma tiaskaubu bayakwak uiwi laihna Galaad asangnipas yakat. 24Kaunah kidika puknita Papang yaklauwi Labán arameo muihni yakat lāih kalahna dawi kalyulna: “Dakah, man Jacob yakat yulma parasni kalyulwinih.”
25Labán witing Jacob yakat uiwi kiuna dai Galaad asangnipas yakat, bahang yakat Jacob kidika kiwi watnadai. Dawak sihm kidika yakat Labán bik kiwi watna witing wanaihni balna karak, 26dawak Jacob yakat kal-laihwi dakana:
—¿Man ais yamnamanh? ¿Ais yamta alas yayulnamanh? ¡Man walakibis balna adika duaina man sihm silak muihni balna kapat! 27¿Ais yamta alas yayultah madah alahwa iranamahn, di as bik yayultas? Amanglanayang kat laih alasna karuk alahwa aiwitimdai, drom karuk dawak pasnin dini balna bik pasnin dai. 28Walakbis balna dawak māki balna bik yadatang umtasyang. ¡Tapdadas as kapat yamnaman! 29Yang sipyang dai manna bitik dutni manayamnik, kaunah warpukta papangma Papangni yaklauwi yayulna aput: ‘Dakah, man Jacob yakat yulma parasni kalyulwinih.’ 30Kaunah man papangma ūni yakat yawakih mawa kidika bahang yawanaman, dawak kaput kat ¿ais yamta dakiwan wayani balna kidika malnamanh?
31Kaput dawak Jacob yaklauwi biriwi nangnitlana Labán yakat:
—Kat yang yamadunayang dai bahang. Dawak yang kulnayang man walamabis yayal balna kidika man parasma kau yadakyakma kulnayang. 32Kaunah akat bang-adika paskaupak man damawan wayani kidika duna kat, ¡kidika laih muihni laih dauwang! Yangna wanaihkina balna adika witnis karang: yayultah man dima as dutayang kat duta yawah.
Kaunah Jacob witing amanglawas dai Raquel yaklauwi dawan dauh wayani balna malna dai kidika.
33Dawak Labán yaklauwi Jacob ūni labanni pasyakat kana, kidika kaupak Lea pāni yakat bik, dawak dini yamyang balna panina yakat bik kana, kaunah daniwan dauh wayani balna kidika yakwas dai. Lea pāni kaupak kalahwi Raquel pāni yakat kana, 34dawak Raquel yaklauwi dawan dauh wayani balna kidika duwi kiamil dangni yakat lakwi kilwa dini pasyakat āna, dawak minit yakat yalahna. Dawak Labán laih pa bitik walna kaunah yakwas dana. 35Kaput dawak Raquel yaklauwi kalyulna:
—Papang, man anwinih yang man muhma yakat kalki kau lawas yang kidika, kat yang warmani yal sikkinis kidika yalaihna bahang.
Kaunah Labán witing daniwan dauh wayani balna kidika walwi yakwas dana, 36dawak Jacob kulnin daukalwi Labán yakat kalyulna, adika yulni karak:
—¿Ais as dutni yamna yang? ¿Angdika dutni yamnayang kat yalaihkih mawak yauita aiwanamahn? 37Yang diki balna bitik isihta talnaman, bahang ¿man ais dini as yaknamahn man dima? ¡Akat duaita laktah, man wanaihma balna muhnina yakat dawak yang wanaihki balna muhnina yakat bik, dawak witingna yaklauwi yuyulwarang bu kidika kaupak wais rahmni duwa kidika! 38Adika, man karak kurih 20 wark alahwanayang kidika man karak man sīpma balna dawak kutsma balna walaninabis as bik banina paskaupak dauwi kalahwas dai, kaput bik sīp almuk as bik kastasyang dai; 39nawah balna tingmalau ihiwak as bik man yakat duaitasyang dai, nawatkauh laih, kidika minit yang lautik matayang dai; madah karang dawak pukta karang bik tinglau mamalwak kidika minit yang akat yakultaman dai. 40Yang madah yakat daihni dautayang dai, dawak pukta yang sanni dautingkat, ¡dawak makauh bitik laih diswadai! 41Kurih 20 man ūma yakat yang dai, dawak adika kuduh yang akat bukwa kidika: man walambis yayal bu adika yulnina kurih 14 man warkma alahwanayang; dawak tingmalau balna yulnina kurih tiaskauas dima yamna yang; dawak yang mikit kidika sat sat wirlataman dai. 42Abraham Papangni dawak, yang papangki Papangni kidika yang karak awaskat dai katlaih, man lawa tingki pāni manah yasihtitimdai. Kaunah Papang yaklauwi yang kulnik bukna kidika talna, dawak yang warkki balna yamtayang kidika bik, kaput bahang warpukta man yakat mabilna.
Jacob dawak Labán karakpramis as yayamwi
43Kaput dawak Labán yaklauwi Jacob yakat nangnitlana:
—Walakbis yayal kidika yang walakbis yayal; dawak māki balna kidika bik yang māki balna; dawak sīp balna kidika bik yang sīpki balna; ¡man akat talaman balna kidika bitik laih yang diki balna! Kaput kaunah ¿waralaih ais as diyamnik sipyah walakibis yayal balna yakat, kidika awaskat witingna walaninabis balna duduna kidika yakat bik? 44Kidika bahang aiwah; yang man karak pramis as yamdarang, bahang kidika laih mayang albu mapasking yakat adika yulni yamda kidika sakkarang.
45Dawak kaput laih Jacob yaklauwi kipala as dulausakna, ū rahni as kapat 46dawak diyulna witing wanaihni balna yakat:
—¡Kipala balna kidika uduhtanauh!
Dawak witingna bitik kipala ududuhna mahni, dawak kidika yaihnit yakat di kakasna. 47Dawak Labán yaklauwi kidika pāni ayangni pakna witing tūni kat “Jegar Sahaduta”, dawak Jacob bik witing tuni kat ayangni pakna “Galaad”.#31.47 Kidika yulni bupak tanka laih witingna yulnina mahni arameo dawak hibru kau bik sihm kaput ki.
48Kaput dawak Labán yulna:
—Warmani adika kinipala balna uduhna adika mayang albu mapasking yakat witnis karang.
Kaput laih kidika pāni ayangni pakna Galaad, 49dawak ayangni ūk bik pakna Mizpa,#31.49 Hibru kau, Mizpa kidika yulni tanka laih, maintalnin pāni, yulni binka kapat paruh yulwi. kat Labán yaklauwi yulna bahang:
—Mayang albupak Dawan yaklauwi maitalwa karang, mayang biri biri kaltaldas dadarang yakat. 50Yang walakbis yayal balna yakat dutni diyamma kat, kidika awas kat yayal ūk duma kat baisa minit yakat, dawak mayang mapasking yakat witnis diskarang bik, Papang kidika witnis karang.
51Dawak Labán baisa adika yulna Jacob yakat:
—Talah akat kipala mahni uduhna bangki, dawak rahni as mayang mapasking akat dungnayang adika bik. 52Bupak witnis karang man bik dawak yang bik sip adika lainni kaupak malawi biri biri dutni kalyamdaskarang. 53Man kukungma Abraham dawak yang kukungki Nacor Papangni kidika yaklauwi yamna karang, mayang albu mayang mayulki adika.
Kaput laih Jacob witing papangni Isaac Papangni ayangni kau yakwi yulna. 54Kidika usnit kat Jacob sakripais busna kidika asangni yakat, dawak wanaihni balna yakat yulwak uina dikasna atnin. Witingna bitik kalpakwi kakasna dawak kidika asangni yakat payayahna.
55 # S.b. 31:55—32:32 kidika laih S.b. 32:1-33 kat kidika simh ki hibru kau ulna kidika.Ma payahlawak mapiris Labán yaklauwi mani balna yakat umna dawak walanbis yayal balna yakat bik; usnit kat blisin diawi dawi mahka nawatwi sauni yakat kiuna.
موجودہ انتخاب:
Génesis 31: SUMU
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Biblia Sumo
Texto © Sociedad Bíblica de Nicaragua 1998