Génesis 26
26
Isaac Gerar yakat kiwi
1Kidika mani balna yakat di kasnin dini balna dis kalna dai kidika sauni yakat, Abraham sangka dai kidika mani balna yakat yuhlakna dai kidika minit yakat. Kidika bahang Isaac kidika Gerar yakat kiuna dai, bahang kidika yakat filisteo balna kingni Abimelec kidika sakdai. 2Kidika yakat Dawan kidika lāih kalahwi kalyulna: “Man Egipto yak kiwinih, bahang watma yang lawik mayulki pāni yakat, 3dawak waradika laih adika sauni akat ban yalahta awah. Yang mankarak awaki dawak bik blisin maki, kat man dawak sulama balna bitik yakat adika sauni diaki. Kaput laih papangma Abraham kau pramis yamnayang yakat yamki. 4Yang lawik yamting kat sulama balna kidika kisang kau yala balna mahni kaput kalwarang, dawak adika sauni bitik diaki. Dawak bik sau akat nisan balna bitik laih blisin diana karang, man sulama balna munah,#Gn 22:16-18. 5kat Abraham kidika yang yulki dakana, dawak yang ais yulnayang yakat yamna, yang laki balna, sumalnayang balna kidika bitik.”
6Kaput laih Isaac kidika Gerar yakat watna, 7kidika pāni yakat yalalahwa balna kidika yaklauwi yulwi dakakawakat Rebeca kidika, Isaac witing yamaduna dai yulna atnin; “Yang yalki”, bahang diyulna dai: “Kidika laih yang wirahki.”#Gn 12:13; 20:2. Rebeca laih uba nuhni yaksihni dai bahang Isaac kulna, Rebeca yulni witing yakat ihiwarang kulna.
8Ma balna bayakna dawak witing kidika pāni yakat watna. Kaunah ma as kat Abimelec kidika windar yakat talwasakdai, bahang witing talna Isaac kidika yalni yakat laihwi umwasakkat. 9Kaput dawak kalyulna kiuna dawak kalyulna:
—Kaput bahang witing kidika man yalma, ¿rahm-awas yah? Kaput dawak ¿man ais yamta yulnamandaih witing kidika man wirahma?
—Yang kulnayang laih witing yulni yaihiwarang —Isaac yaklauwi kaput kalyulna.
10Kaunah Abimelec kalyulna:
—¿Ais yamta adika yanayamtamahn? Baisa apis dai katlaih tawan muihni balna adika as kalahwi man yalma karak kalalangwitdai, bahang man lawa yanayamtang kat dutni yamtanatitikdai.
11Kaput laih Abimelec yaklauwi witing tawanni muihni bitik yakat dipakna dai:
—Muih as yaklauwi adika alni akat uswarang kat, kidika awas bik yalni yakat uswarang kat, kidika muihni laih daunin yakat wirlana karang.
12Kidika kurihni Isaac witing di dahna dai, dawak di minik yamni yakna dai, kat Dawan yaklauwi blisin kalana dai bahang. 13Dawak witing di duyang kalna, dawak di manas bik witing duna dai. 14Dawak sīp balna kidika mahni palni dai, tuniruh yayal balna bik, kaput bik dini yamyang balna bik mahni palni duna dai, bahang filisteo balna tutumna dai. 15Witing papangni Abraham kidika baisa sangka dai yakat, Abraham dini yamyang balna kidika pa as kukuhrna dai was laihnin, kaunah usnit kat filisteo balna yaklauwi watwi sau kuhrwi pupuna dai pāni kuhrna pasyakat. 16Witni kat Abimelec yaklauwi Isaac yakat kalyulna:
—Akaupak alahwa yawah, kat yangna karak dawak man laih tanitna di duyang kalnaman.
17Kaput laih Isaac witing kalahwi kiuna Gerar sauni langni yakat, bahang kidika yakat watwi yalahna. 18Witing papangni sangka mani balna yakat pa kuhrwak filisteo balna kuhrwi nununa balna dai kidika witing dauna usnit kat, bahang watwi kuhrwi apahna, papangni yaklauwi ayangni balna amput paknadai kaput watwi paknadai. 19Ma as kat Isaac dini yamyang balna kidika sau langni yakat was pāni as kuhrwa bangdai, dawak was burhwa as yayakna. 20Kaunah Gerar sauni langni yakat sīp maintalyang balna kidika yaklauwi, Isaac sīpni maintalyang balna karak kalbabauna, kat witingna yaklauwi yuyulna, kidika wasni laih witingna dinina. Kidika bahang Isaac yaklauwi kidika pāni kuhrna ayangni pakna “Kalbauna”, kat kidika yulni kalbabauna dai bahang. 21Kidika usnit kat Isaac dini yamyang balna yaklauwi was pāni ūk kukuhrna. Dawak watwi kidika yulni kalbabauna, dawak Isaac yaklauwi kidika pāni kuhrna ayangni pakna “Kalwaihla”.
22Isaac kidika kaupak naikau kiuna, dawak pa ūk kuhrna. Dawak kidika pa kuhrna yulni watwi kalbabauwas dadana bahang, ayangni pakna dai “Pri lani”, kat yulna dai bahang: “Waralaih Dawan yaklauwi pri maidana adika pāni akat barakna atnin.”
23Kidika kaupak Isaac Beerseba yak kiuna. 24Kidika puknita Dawan lāih kalahwi kalyulna:
“Yang kuduh man papangma AbrahamPapangni yang.
Yamaduwinih, yang man karak yang.
Yang diki yamyang Abraham yulni
blisin maki dawak, sulama balna kidikamahni yamna awaki.”
25Kaput laih kidika pāni yakat Isaac yaklauwi walapni busnin pāni as yamna, dawi Dawan ayangni kidika yulna dai, kidika pāni yak uni labanni pakna dawi pa as kukuhrna.
Isaac dawi Abimelec karakpramis as yayamna
26Ma as kat Abimelec#Gn 21:22. Gerar kaupak kiuna Isaac karak yulbaunin. Witing karak kaltalyang yamni Ahuzat dawak Ficol kidika balna minikdawi uina, bahang kidika balna laih kalbauyang balna taninatuna nunuhni dai. 27Dawak Isaac yaklauwi diyulna:
—Manna yang adika dukih manawaski, bahang sauma kaupak yakangta yaknamana, ¿bahang ais yamta yatalna aiwamanah?
28Witingna biriwi nangnitnalalana:
—Yangna talnayangna Dawan kidika man karak ki, yangna man karak pramis as yamnin kultik aiwayangna. Bahang pramis kidika laih adika karang: 29man dutni as bik yangna akat yanayamtas awama, kat yangna man yakat maustasyangna bahang. Nawatkauh laih, man yakat yamni mayamnayangna, maparistik datiningkat alahwa yawaman, waradika laih Dawan yaklauwi blisin mawi.
30Kaput laih Isaac yaklauwi alasna nuhni as yamna, dawak witingna kakasna dawak didina. 31Ma payahlawak mapiris kat yaklauwi witingna Papang ayangni kau yakwi yuyulna biri. Usnit kat Isaac yaklauwi diyulna Papang karak yawanauh, dawak witingna bik kulninna yamni kapat diparaswa dawi kalahwi uina.
32Sihm kidika mani Isaac dini yamyang balna aiwi yul wisamni as kalalana, witingna pa kuhrwa bangdai kidika, was burhwa as yayakna. 33Dawak Isaac kidika pāni kuhrna ayangni Seba#26.33 Hibru yulni kau Seba kidika yulni tanka laih Papang ayangni kau yakwi pramis yamna dawak bik di manas yulni kapat as duwi. pakna. Kidika bahang warmani kat kidika tawanni nuhni ayangni duwi Beerseba.
34Esaú kidika kurih 40 duwakat Judit karak kalduduna, kidika Beri walanibis dai, hitita kaupakdai kidika. Kaput bik laih Basemat karak bik kalduduna, kidika laih Elón walanibis hitita muihni ūk dai kidika. 35Adika yayalni balna bu adika Isaac dawak Rebeca witingna sangninaka yakat tapalhni diayana dai.
موجودہ انتخاب:
Génesis 26: SUMU
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Biblia Sumo
Texto © Sociedad Bíblica de Nicaragua 1998