Jɛ́nɛ́sì 18
18
Gèɖèpɔ́ɔ̀ ɖáìn Ééɓòɖòhɛ̃́ɛ̀ gàa-dyù ɖò nyɛ́nɛ́ín
1Wé ɖòɛ̀ ɓaɖaa, ti ɓɛ́ Ééɓòɖòhɛ̃́ɛ̀ kò ma ɓó ɔ jàɖàìn-gbòɔ̀ dyúa dyi, dɛ̀ ɓɛ́ Máwèɖèɛ̀ cu vɛ̀nɛ̀ ɓěɔ̀ nì ma kà kɛɛ, ɓó dyóɖóaún sá-sá kɛɛ, Bounɓoɔ̀ wóɖóìn ma ɔ dyí. 2Ké Ééɓòɖòhɛ̃́ɛ̀ ɖú ma dú dyií, ké ɔ dyé ma gàa tã ɓě ɓɛ́ wa nyànà ma ɖé dyúa dyiɛ. Ɖò mɔ̀ ma Bounɓoɔ̀, ké nyɔ sɔ̃́ tɔ̀ɔ̀ ɓěɔ̀ mɔ̀ ma ínjà. Ti ɓɛ́ ɔ dyé ma wa kɛɛ, ɔ mu ma wa hwìǐ. Ɔ kpa ma peɖeɛ, ké ɔ taɓa ma dú hwuɖu ɓó wa dyúa. 3Ké ɔ ɖá, “Ɓɔ̌ɔ̀ ɓě, ɔ jǔ ké ɓěɛ̀ hwòɖǒ dyi ḿ múin dèìn ní, nìí, ní ɓaà ɓě ní, ɓě ɓɔ́ mɔ̄ mɔ̀à ɓěɛ̀ gbo-nì-dyùɔ̀ kɛɛ dyíin ziɛ. 4Wa mɛ dyà ní wè, ɓɛ́ ɓě ké ɓo wĩin dèɖè, ɓɛ́ ɓě ké cua xwíɖíi fɔ̀ìn. 5Ní ɓaà ɓě ní, ḿ mɛ dyà ɖɛ ɖò, ɓɛ́ ɓě kéɛ ɖi, ɓɛ́ kpé ké ɓě dyí kpá, hwɛ̀ ɓɛ́ ɓě ké zi, kà ɓɛ́ ɓě ɖǎà dà mɔ̄ mɔ̀à ɓěɛ̀ gbo-nì-dyùɔ̀ kɛɛ gbo pàìn nyɛ.”
Ké wa ɖá, “Ɔ nɔ̀mɔ̀ dyíin. Nyuɛ kà m̀ nyuà cɛ̃ɛ kɛ.”
6Hwɛ̀ ké Ééɓòɖòhɛ̃́ɛ̀ fṹà, ké ɔ mu ma ɖé ɔ jàɖàìn-gbòɔ̀ mú, ɖé Seɖɔ́ gbo, ké ɔ ɖá, “Fṹà, ɓɛ́ m̀ ké fáɖáɓà#18:6 Fáɖáɓà nì kà mɔɔ́-ɓóɖó nìà kɛ. nìɛ̀-nìɛ̀ ɓɔ̌ɔ̀ vɛ̀nɛ̀ dyúáɖò ɖàɓàìn, ɓɛ́ m̀ ké bɛɖɛɛ̀-kpò ɓě nyu.” 7Ké ɔ mìɔùn fṹà, ké ɔ mu ma ɖé ɔ ɓìɖǐ ɓěɔ̀ gbo. Ké ɔ kpɔ̃ ma ɓìɖǐ-dyù gmɔ̀ nɔ̀mɔ̀ dyíin ɖò, ké ɔ nyíɛ ma ɔ gbo-nì-nyɔ̀ ɓěɔ̀ ɖò xwa. Ké ɔ fṹà, ké ɔ nyuɛ ma ɖoɓo. 8Ké Ééɓòɖòhɛ̃́ɛ̀ ɖú ma bɔ́ɖɔ̀ kè ɓìɖǐ-nɛɛ̀-nì kè ɓìɖǐ-sùàɖɛ̀ ɓɛ́ ɔ gbo-nì-nyɔ̀ɔ̀ ɖǎ ma kà ɖoɓo nyuɛɛ dyí, ké ɔ dèɛ̀ ma ɓóɛ wa dyúa dyi. Ké wa ɖiɛ ma, ti Ééɓòɖòhɛ̃́ɛ̀ nyànà ma ɓó wa wáún dyi ɓó cuɔ̀ xwíɖíi, ɓɛ́ ɔ ké wa ɖii-ɖɛ̀ɔ̀ nyɔ wa mu mɔ́ùn ɖeɛɛ nyí kɛ.
9Hwɛ̀ ké wa diè ma ɔ dyi, ké wa ɖá, “Dɛ̌ nì gmàà Seɖɔ́ nì kɛ́?”
Ké ɔ ɖá, “Ɔ nì ɖé gbǒɔ̀ mú.”
10Ké Bounɓoɔ̀ ɖá, “Ní mu ɓě gbo dyi téìn ɖe jǎà ɓó zɔ̃ muà dyiìn nyɛɛ, ti dyúáɖòɛ̀ xwíníín, ké nì gmàà Seɖɔ́ mu gàa-dyù ɖò ɓéɖéìn jǎà.”
Ɓó tia ɓaɖaa, Seɖɔ́ nì ma ɓó gbǒ-wɔ̃̀ nì ma ɓó Bounɓoɔ̀ ɖeín nyɛɛ gbo, ké ɔ nìɛ̀ wɔ̃́uń. 11Ɓó tia ɓaɖaa, Ééɓòɖòhɛ̃́ɛ̀ kè Seɖɔ́ ɖǎ ma nyɛ, ké waà zɔ̃ ɓěɔ̀ ɖǎ ma dyí vò mìɔ. Ké Seɖɔ́ se ma dyú-wóɖóìn-tì kɔ̃ nì ɖe. 12Púɛɛ, Seɖɔ́ kéɛ̀ ma ɖé ɔ hwòɖǒ bũ̌, ké ɔ poìn ma hwìɖǐi, ké ɔ ɖá, “Mɔ̄ ɖǎà nyɛ, ké ní dyú-ɓǎɔ̀ mɔ̀ùn ɖǎà nyɛ ɖekèɛɛ, à ɓɛ́ìn dyú wóɖóɛ̀n ɖeè?”
13Hwɛ̀ ké Bounɓoɔ̀ cɛ̃ɛ ma Ééɓòɖòhɛ̃́ɛ̀ gbo, ké ɔ ɖá, “Ɖɛ́ kɔ̃̀ jè Seɖɔ́ kéɛ̀à, ɓɛ́ ɔ dyià níiń, ‘Mɔ̄ ɖǎà nyɛɛ, ḿ ɓɛ́ìn dyú wóɖóɛ̀n ɖe jǎà kɛ́?’ 14Ɖɛ ɖò kàmà mú mìɔ, ké ḿ seɛ nyuɛ ɓɛ́ìne? Ní mu ɓě gbo dyi téìn ɖe ɓó zɔ̃ muà dyiìn nyɛɛ, ti dyúáɖòɛ̀ xwíníín, ké Seɖɔ́ mu gàa-dyù ɖò ɓéɖéìn.”
15Kɛɛ Seɖɔ́ fɛ̃̀ìn ma ní jèɛɛ, ɔ doɛ̀n ma mú, ké ɔ ɖá, “Ḿ se kéɛ̀o.”
Kɛɛ Bounɓoɔ̀ ɖá, “Gbào, m̀ kéɛ̀ ní.”
Ééɓòɖòhɛ̃́ɛ̀ ɓaà ma ɓó Sáɖɔ̀ùn-hwɔ̀ɖɔ̀ɔ̀ jè
16Hwɛ̀ ké gàa ɓěɔ̀ sɔ̀ ma dyí, ké wa pòìn ma ɖé Sáɖɔ̀ùn-hwɔ̀ɖɔ̀ɔ̀ gbo dú. Ké Ééɓòɖòhɛ̃́ɛ̀ kpa ma wa hwìǐ. 17-18Ti ɓɛ́ ɔ nì ma wa hwìǐ kpáuń wɛ̃ɛ, Bounɓoɔ̀ cɛ̃ɛ ma ɖé ɔ hwòɖǒ bũ̌, ké ɔ ɖá, “Kà ɓɛ́ Ééɓòɖòhɛ̃́ɛ̀ muà ɓóɖó-dù vɛ̀nɛ̀ ɓéɖé kpé mìɔ kɛɛ jǔùn cá, ké ɓóɖó-dù séín nì ɓóɖó-kpàɔ̀ kɔ̃ɛɛ muà jĩ́á-jè dyéìn dyììn ɖé ɔ múɛɛ, ḿ se ɖɛ ní muà nyuùn wɛ̃ɛ ɔ dyí vǐèɛ̌ mu. 19Sepóɛɖé ḿ ɖǎ ɔ gã, ɓɛ́ ɔ ké ɔ dyú ɓěɔ̀ kè ɔ gbǒ-xwíníín ɓěɔ̀ náún po, ɓɛ́ wa ké ní mɔ́ɔ́-ɖɛ̀ ɓěɔ̀ nyu dyììn ɖé dyí-sɛ́ɖɛ́ìn-ɖɛ̀ nyu-nyu mú, ɓɛ́ ḿ ké ɖɛ ḿ ɖǎà ɔ nyɛ́nɛ́ín ɖáìn nyɛɛ nyu.”
20Ɔ jèɛɛ, Bounɓoɔ̀ cɛ̃ɛ ma Ééɓòɖòhɛ̃́ɛ̀ gbo, ké ɔ ɖá, “Ḿ ɖǎ zaa-dè-wùɖù ɓáún-ɓáún wɔ̃́ ɓá Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ nyuu-nàmàǔn kúɖúú ɓěɔ̀ jè dyí. 21Ɔ jèɛɛ, ní mu ɖé muùn, ɓɛ́ ḿ ké ɖɛ wa ɖǎà nyuɛɛ dyé kɛbì ɔ mɔ̀ jǎà kà ḿ nyuàà wɔ̃́ɔ kɛɛ ní. Ɔ jǔ ké ɔ se ná nìǐn, nìí, ɓɛ́ ḿ kéɛ dyuò.”
22Hwɛ̀ ké ínjà sɔ̃́ ɓěɔ̀ cɛ́ɛ̀ ma xwa, ké wa mùìn ma ɖé Sáɖɔ̀ùn-hwɔ̀ɖɔ̀ɔ̀ mú. Kɛɛ Bounɓoɔ̀ kè Ééɓòɖòhɛ̃́ɛ̀ nyànà ma ɓó hwìèɔ̀ wáún dyi. 23Ké Ééɓòɖòhɛ̃́ɛ̀ xwɛ̃́ìn ma Bounɓoɔ̀ bũ̌in, ké ɔ diè ma ɔ dyi, ké ɔ ɖá, “Nì mu dyí-sɛ́ɖɛ́ìn-nyɔ̀ ɓěɔ̀ kè hwòɖǒ-kɔ̃in-nyìnììn-nyɔ̀ ɓěɔ̀ dyí poìn, ɓɛ́ m̀ ké wa mú gbɔɔ̀? 24Ɔ jǔ ké dyí-sɛ́ɖɛ́ìn-nyɔ̀ kpáɖá-nyɔ sɔ̃́ ɓaɖa-bùè dyi ɖé Sáɖɔ̀ùn-hwɔ̀ɖɔ̀ɔ̀ mú nì ní, nìí, nì mu páɔ̀ mú gbɔɔ̀ùn pū, ɓɛ́ m̀ ké seɛ dyi táà ɓó dyí-sɛ́ɖɛ́ìn-nyɔ̀ kpáɖá-nyɔ sɔ̃́ ɓaɖa-bùè ɓě nì ɖéɛ múɛɛ jèè? 25Ɓɔ́ dyí-sɛ́ɖɛ́ìn-nyɔ̀ ɓěɔ̀ kè hwòɖǒ-kɔ̃in-nyìnììn-nyɔ̀ ɓěɔ̀ dyí poɛ̀n, ɓɛ́ m̀ ké wa mú gbɔɔ̀. Ɓɔ́ ɖɛ m̀ muà hwòɖǒ-kɔ̃in-nyìnììn-nyɔ̀ ɓěɔ̀ bũ̌ nyuùn wɛ̃ɛ dyí-sɛ́ɖɛ́ìn-nyɔ̀ ɓěɔ̀ mɔ̀ùn bũ̌ nyuɛ fɔɔ cá. M̀ mɛ ɓɔ́ɔ náa nyuɛ. Má, ɓóɖó-kpà gànáɔ̀ zaa-wɔ̃-po-nyɔ̀ɔ̀ mu dyí-sɛ́ɖɛ́ìn-ɖɛ̀ nyuùn kánáá pūe?”
26Ké Bounɓoɔ̀ ɖá, “Ɔ jǔ ké ḿ dyi dyí-sɛ́ɖɛ́ìn-nyɔ̀ kpáɖá-nyɔ sɔ̃́ ɓaɖa-bùè ɖé Sáɖɔ̀ùn-hwɔ̀ɖɔ̀ɔ̀ mú dyéɛ ɓɛ́ìn ní, nìí, ní mu pá gànáɔ̀ dyi táàùn ɓó wa jè.”
27Ké Ééɓòɖòhɛ̃́ɛ̀ cɛ̃ɛ ma ɖe, ké ɔ ɖá, “Ɓɔ̌ɔ̀, kɛbì ḿ mɛ mɔ̀ dyú-gbɔ́ɔ́ kɛɛ, ní ɓaà m̀ ní, m̀ mɛ dyé ḿ wìǐn, ɓɛ́ ḿ ké m̀ dyi diè ɖe. 28Ɔ jǔ ké dyí-sɛ́ɖɛ́ìn-nyɔ̀ hm̀m̌ dyi ɓó sè, ɓɛ́ nyɔ kpáɖá-nyɔ sɔ̃́ ɓaɖa-bùèɔ̀ ké ɖé hwɛ̀ ní, nìí, nì mu hwɔɖɔ gànáɔ̀ mú gbɔɔ̀ùn ɓó nyɔ hm̀m̌ sèà ɓóɛɛ jèè?”
Ké Bounɓoɔ̀ ɖá, “Ɔ jǔ ké ḿ dyi ɖé dyí-sɛ́ɖɛ́ìn-nyɔ̀ kpáɖá-nyɔ sɔ̃́ sè hm̀m̌ dyé ní, ḿ seɛ mú gbɔɔ̌ mu.”
29Ké Ééɓòɖòhɛ̃́ɛ̀ diè ma Bounɓoɔ̀ dyi ɖe, ké ɔ ɖá, “Ɔ jǔ ké nyɔ kpáɖá-nyɔ sɔ̃́ nyɛ̀nɛ̀ɛ̀ dyi ɖé nì ní ɖé?”
Ké Bounɓoɔ̀ ɖá, “Ḿ seɛ nyuɛ́ mu ɓó nyɔ kpáɖá-nyɔ sɔ̃́ ɓěɔ̀ jè.”
30Ké ɔ cɛ̃ɛ ma, ké ɔ ɖá, “Ɓɔ̌ɔ̀, m̀ mɛ ɓɔ́ dyoɖoún kpáa. Ní ɓaà m̀ ní, ḿ mɛ wùɖù ɖe. Ɔ jǔ ké nyɔ kpáɖá-nyɔ ɓaɖa-bùè nyɛ̀nɛ̀ɛ̀ dyi ɖé nì ní ɖé?”
Ké Bounɓoɔ̀ ɖá, “Ḿ seɛ nyuɛ́ mu, ɔ jǔ ké ḿ dyi ɖé nyɔ kpáɖá-nyɔ ɓaɖa-bùè dyé ní.”
31Ké ɔ cɛ̃ɛ ma ɖe, ké ɔ ɖá, “Ɓɔ̌ɔ̀, ní ɓaà m̀ ní, m̀ mɛ dyé ḿ wìǐn, ɓɛ́ ḿ ké m̀ dyi diè ɖe. Ɔ jǔ ké nyɔ kpáɖá-nyɔ nyɛ̀nɛ̀ɛ̀ dyi ɖé nì ní ɖé?”
Ké Bounɓoɔ̀ ɖá, “Ḿ seɛ mú gbɔɔ̌ mu ɓó nyɔ kpáɖá-nyɔ ɓěɔ̀ jè.”
32Hwɛ̀ ké ɔ cɛ̃ɛ ma, ké ɔ ɖá, “Ɓɔ̌ɔ̀, m̀ mɛ ɓɔ́ dyoɖoún kpáa. Ní ɓaà m̀ ní, ḿ mɛ wùɖù ɖe kpa dyúáɖò nyɛ̀nɛ̀ɛ̀. Ɔ jǔ ké nyɔ ɓaɖa-bùè nyɛ̀nɛ̀ɛ̀ dyi ɖé nì ní ɖé?”
Ké Bounɓoɔ̀ ɖá, “Ḿ seɛ mú gbɔɔ̌ mu ɓó nyɔ ɓaɖa-bùè ɓěɔ̀ jè.” 33Ti ɓɛ́ Bounɓoɔ̀ kè Ééɓòɖòhɛ̃́ɛ̀ ɖǎ ma wùɖùɛ̀ hwɔɛɛ, ɔ mu ma ní, ké Ééɓòɖòhɛ̃́ɛ̀ mɔ̀ùn mu ma ɔ ɓíɖí-taún ɖe.
موجودہ انتخاب:
Jɛ́nɛ́sì 18: ƁB02
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bassa Bible © Bible Society Liberia, 2002.