Ebik 13
13
Baranaba na saulo nibatumwa
1Omu kitebe ky'abaikiriza ekikaba kiri Antyokiya, hakaba harumu abarangi n'abeegesa, nubo banu: Baranaba, Simyoni anyakwetwa Kiiragura, Lusiyo owa Kireene, Manayeni ayayoroirwe hamu n'owiisaza Herode, na Saulo. 2Kiro kimu obu bakaba nibasaba MUKAMA kandi nibasiiba, Mwoyo Ahikiriire yabagambira ati: “Munsororremu Baranaba na Saulo, bakole omulimo ogu mbeetiire.” 3Boona obu baamazire kusiiba n'okusaba, baabataho emikono baabatuma.
Ebya Elima omunyamasano wa Kipuro
4Ababiri abo obu baamazire kutumwa Mwoyo Ahikiriire, baimukya orugendo orwa Seleyukiya; kandi okurugayo, baagwerra omu meeri, baagenda Kipuro. 5Obu baahikire orubuga Salamisi, baarangirra ekigambo kya Ruhanga omu masorrokaniro g'Abayudaaya, kandi bakaba baina Yohaana arukubakoonyera.
6Obu baamazire kuraba omu kizinga kyona kya Kipuro, baahika orubuga Paafo. Oku baasangayo Omuyudaaya omu, omunyamasano kandi omurangi w'ebisuba arukwetwa Bar-yesu (amakuru ngu, mwana wa Yesu). 7Akaba ali hamu n'omulemi mukuru w'ekicweka eki, omuntu anyakwetwa Serugiyo Paulo, omusaija omwetegereza. Nuwe yayesire Baranaba na Saulo yabasaba kumusoborra ekigambo kya Ruhanga. 8Baitu Elima, arukwetwa omunyamasano (habwokuba nugo makuru g'ibara lye) yatandika kubahakaniza naagenderra kuhabisa omulemi mukuru, aleke kwikiriza. 9Baitu Saulo, anyakwetwa Paulo, aijwire Mwoyo Ahikiriire, yamugumyaho amaiso 10nnagamba ati: “Iwe mwana wa Sitaani, iwe omunyanzigwa w'obuhikiriire bwona, iwe anyakwijwire obugobya n'obubi bwona, olireka di kuramaza emihanda ya MUKAMA enyakuterekeriire? 11Lero hati, omukono gwa MUKAMA nigwija kukuteera nukwo ofe amaiso, omale akasumi otarukurora izooba.” Ahonaaho ekiho n'omwirima byamusweka, yahaamanga naaserra ow'okumunanata. 12Omulemi mukuru obu yarozire ekibaireho, yaikiriza kandi yahunirizibwa ebi baayegeseze hali MUKAMA.
Ebyabaire Antyokiya orwa Pisidiya
13Paulo n'abagenzi be baagwerra nibaruga Paafo, baayambuka, baahika Peruga, orubuga orwa Panfiliya. Oku nuho Yohaana yabarugiireho, yagaruka Yerusaalemu; 14baitu bbo bairrayo baaruga Peruga, baahika Antyokiya, narwo rubuga rwa Pisidiya. Kandi ha kiro kya Sabbato bakataaha omu isorrokaniro ly'Abayudaaya, baikarra. 15Eby'Ebiragiro bya Musa n'eby'abarangi obu byamazire kusomwa, abakuru b'isorrokaniro baabatumaho nibabasaba bati: “Bagenzi baitu, obu muraaba mwina ekigambo ky'okugumya abantu banu, mukigambe.” 16Paulo nukwo kwemerra, boona yabaculeeza n'omukono gwe, yatandika kwegesa ati:
“Inywe bantu ba Isirairi, na inywena abarukutiina Ruhanga, muhurre. 17#Kurug 1:7; Kurug 12:51.Ruhanga w'ihanga lyaitu Isirairi akakoma baisenkuru itwe, yabakuza yabafoora ihanga ruranganwa obu bakaba bali omu nsi ya Misiri, nukwo hanyuma yabaihayo habw'amaani g'obusobozi bwe. 18#Kubar 14:34; Bir 1:31.Akabagumiisiriza obu bakaba bali omu irungu kumara emyaka makumi ana. 19#Bir 7:1; Yos 14:1.Obu yamazire kuhwerekereza amahanga musanju ag'omu nsi ya Kanaani, ensi egi yagiha Abaisirairi ebe bugwetwa bwabu, baamarayo emyaka nka bikumi bbina mw'ataano. 20#Bac 2:16; 1 Sam 3:20.Ebi obu byahoire, akabaha abacwi b'emisango babaleme okuhika ha businge bw'omurangi Samwiri. 21#1 Sam 8:5; 1 Sam 10:21.Nubwo bamusabire abahe omukama, kandi Ruhanga yabaha Saulo mutabani wa Kisi ow'omu ruganda rwa Benyamiini, yabalemera emyaka makumi ana. 22#1 Sam 13:14; 1 Sam 16:12; Zab 89:20.Kandi Ruhanga obu yamwihire ha ngoma, yataho Daudi kuba omukama waabu, ou yagambireho ati: ‘Mmazire kukoma Daudi, mutabani wa Yese, nuwe muntu ndukusiima ow'alikora byona ebi ndukwenda.’ 23Omu baijukuru ba Daudi ogu, Ruhanga numwo yaihiire Isirairi Omujuni, nuwe Yesu, nkooku kyaraganiziibwe. 24#Mar 1:4; Luk 3:3.Kandi Yesu obu akaba atakaizire, Yohaana akarangirra Abaisirairi boona okubatiza okw'okwegarukamu. 25#Yoh 1:20; Mat 3:11; Mar 1:7; Luk 3:16; Yoh 1:27.Yohaana obu akaba naamaliriza omulimo gwe, akagamba ati: ‘Nyowe nimunteekerezaho ki? Tindi ogu ow'okwija, nangwa. Baitu haroho arukunyija enyuma kandi tinsemeriire kusumurra orukoba orw'enkaito ze.’
26“Bagenzi bange, baijukuru ba Abburahamu, na inywena abarukutiina Ruhanga, obukwenda obu obw'okujunwa, niinyowe bwaiziire. 27Baitu abantu ba Yerusaalemu n'abalemi baabo Yesu batamumanyirre noobu kwakuba okukenga ebyagambirwe abarangi, ebisomwa hanu buli Sabbato. Baitu Ebihandiiko bakabihikiriza obu baamusingisize omusango. 28#Mat 27:22,23; Mar 15:13,14; Luk 23:21-23; Yoh 19:15.Noobu baraaba baabuzirwe eky'okumujunaana ekisemeriire kumwisa, nabwo bakasaba Pilaato amwite. 29#Mat 27:57-61; Mar 15:42-47; Luk 23:50-56; Yoh 19:38-42.Kandi obu baamazire kuhikiriza byona ebyamuhandiikirweho, baamuhanuura ha muti, baamuziika omu kituuro. 30Baitu Ruhanga akamuhumbuura omu bafu; 31#Ebik 1:3.yamara ebiro bingi naabonekera abo abaarugire nawe Galiraaya baija Yerusaalemu. Hati nubo barukumuheera obwakaiso omu bantu. 32#Zab 2:7.Na itwe twizire nitubaleetera Amakuru Amarungi ag'ebi Ruhanga yaraganiize baisenkuruitwe, 33nkooku yabihikiriize omuli itwe abaana baabo obu yahumbwire Yesu. Kandi nukwo kyahandiikirwe kiti omu zabbuli eya kabiri:
‘Iwe oli Mwana wange,
nkuzaire kiro kya hati.’
34 #
Is 55:3. Habw'okugumya nkooku yamuhumbwire omu bafu okutagaruka kujunda, Ruhanga akongera ati:
‘Ndikuha emigisa egumire kandi erukwera
nk'ei nahaire Daudi.’
35 #
Zab 16:10. Nikyo yagambiire omu zabbuli endi ati:
‘Toliikiriza Ahikiriire wawe kujunda.’
36Daudi obu yamazire kuhikiriza entegeka ya Ruhanga omu bantu b'obusinge bwe yafa, yaziikwa n'abaisenkuru, kandi yajunda; 37baitu ogu Ruhanga ou yahumbwire, atajunde.
38“Nahabweki bagenzi bange, mumanye okuganyirwa ebibi nkooku kubarangirirwa habw'omuntu ogu Yesu, 39kandi habw'ogu, weena arukumwikiriza naganyirwa byona ebi Ebiragiro bya Musa bitarasoboire kumuganyira. 40Nahabweki mwerinde, timwikara kuhikwaho abarangi ebi baarangire bati:
41 #
Hab 1:5. ‘Inywe abasekeerezi mwetegereze,
muhunirre kandi muhweho;
habwokuba omu biro byanyu
ninkora ekikorwa eki mutalisobora kwikiriza,
noobu haakubaho arukukibasoborra.’”
42Obu bakaba nibaruga omu isorrokaniro, abantu baasaba Paulo na Baranaba kugaruka kubasoborra ebigambo ebi ha Sabbato erukwija. 43Orusorrokano obu rwarugirwemu, Abayudaaya baingi hamu n'abantu baayo abaahindukire kutaaha omu diini y'Ekiyudaaya, baakuratira Paulo na Baranaba, kandi bbo baabateererra kwikara nibeesiga embabazi za Ruhanga.
Paulo na Baranaba nibacwamu kugenda omu Banyamahanga
44Ha Sabbato eyakurasireho, kutagirwa ab'omu rubuga boona bakeesorooza hamu kuhurra ekigambo kya Ruhanga. 45Baitu Abayudaaya obu baarozire obwingi bw'abantu, bakwatwa ihali, baatandika kuhakaniza Paulo ebi yagambire, baamujuma. 46Paulo na Baranaba baabagarukamu n'obumanzi bati: “Kikaba nikyetaagwa inywe mubanze murangirirwe ekigambo kya Ruhanga. Baitu obu mwakyangire, mukecwera inywenka omusango nkooku mutasemeriire kutunga obwomeezi obutahwaho; hati itwe nitwija kugenda omu Banyamahanga. 47#Is 42:6; 49:6.Nikyo MUKAMA yaturagiire naagamba ati:
‘Nkutaireho obe kyererezi hali Abanyamahanga,
okujuna kwange okuhikye ha mpero y'ensi.’ ”
48Abanyamahanga obu baahuliire eki, baasemererwa, baatandika kuhaisaniza ekigambo kya Ruhanga; kandi boona abaakomiirwe obwomeezi obutahwaho baikiriza. 49Ekigambo kya MUKAMA kyararanga omunsi egi yoona. 50Baitu Abayudaaya baimukiriza abakazi ab'ekitiinisa abaayekambiraga ediini, hamu n'abasaija bakuru ab'omu rubuga, baatandika kuhiiganiza Paulo na Baranaba, baababinga omu nsi y'owaabu. 51#Mat 10:14; Mar 6:11; Luk 9:5; 10:11.Nukwo bbo kubateerateera ecuucu y'omu bigere byabo, baagenda Ikoniyo. 52Baitu abeegesebwa baijura omuhimbo na Mwoyo Ahikiriire.
موجودہ انتخاب:
Ebik 13: BRR2008
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible in Runyoro/Rutooro Interconfessional Translation © Bible Society of Uganda, 2008.