Joh 5
5
Jesû nîwavonirie mûndû warî kîthua
1Vuva wa ûguo, Jesû nîwathiîre Jerusalemu kîrugorî Kîam Ayahudi. 2Nakuo kûu îtûûrarî rîa Jerusalemu vakuvî na Kîvingo Kîam Ng'ondu, kwarî na îria rînene rîa manjî rîatumîrîtwe ithaku ithano na rîetagwa Bethizatha na rûthiomi rwa Kîhibirania. 3Nao arwaru eengî: atumumu, ithua, na andû arîa maakuîte ciîga, nîmeekarîte ithakurî icio. [Arwaru acio nîmeetagîrîra manjî maunjugwe, 4nîûndû mavinda kwa mavinda mûraika wa Mwathani nîwanyûrûrûkaga îriarî rîu na akaunjuga manjî. Nake mûrwaru wa wonthe ûrîa watuvûkaga îriarî rîu arî wa mbere manjî marîkia kunjugwa, nîwavonagua mûrimû wa wonthe ûrîa ethagîrwa arwarîte.]#5.4 Mandîko mamwe matirî 5:3b-4. 5Vau Kîthakurî vaarî na mûndû watûûrîte mîaka mîrongo îthatû na înana arwarîte. 6Rîrîa Jesû oonire mûndû ûcio amamîte vo, nîwamenyire atî mûndû ûcio aarî mûtûûru mîaka mîîngî arî mûrwaru. Kwoguo Jesû nîwaûririe mûndû ûcio atîrî, “We nîûrenda kûvona?”
7Mûndû ûcio nîwacokerie Jesû atîrî, “Mûthuuri ûyû, ava vatirî na mûndû ûngînduvukia îriarî manjî marîkia kunjugwa. Na vîndî wa yonthe îrîa nageria gwîtuvukia kuo, mûndû wîngî nîatuvûkaga kuo mbere yakwa.”
8Nake Jesû nîwamwîrire atîrî, “Ûkîra woce kîvarî gîaku na ûthiî.” 9Na vîndî wa îo mûndû ûcio nîwavonire, agîoca kîvarî gîake na akîîthiîra.
Mûthenya ûcio gwekîkire ûguo warî wa thavatû. 10#Neh 13.19; Jer 17.21 Kwoguo Ayahudi nîmaamwîrire atîrî, “Ûmûnthî nî mûthenya wa thavatû na watho wetû ndûgwîtîkîrîtie gûkuua kîvarî gîaku.”
11Nake mûndû ûcio nîwacokerie Ayahudi acio atîrî, “Mûndû ûrîa ûmvonirie aambîrire mboce kîvarî gîakwa na nthiî.”
12Nao Ayahudi nîmaaûririe mûndû ûcio atîrî, “Nî mûndû ûrîkû ûcio ûkwîrire wîke ûguo?”
13Nwatî mûndû ûcio wavonetue ndaamenya ûrîa wamûvonirie nîûndû Jesû nîwaûrîre kîrîndîrî kîrîa Kîamrî vau.
14Vuva wa ûguo, Jesû nîwethîrîrie mûndû ûcio hekarûrî na akîmwîra atîrî, “Nîwona, rîu we nîwavona. Tiga kwîvagia nîguo ndûkone ûndû wîngî mûcûku makîria ya ûyû.”
15Nake mûndû ûcio nîwacokire akîthiî kwîra Ayahudi atî Jesû nîke wamûvonetie. 16Kwoguo Ayahudi nîmaambîrîrie kûnyarira Jesû nîûndû nîwekaga maûndû ta mama mûthenya wa thavatû. 17Nwatî Jesû nîwerire Ayahudi atîrî, “Vava nîarutaga wîra vîndî cionthe na wa nanie nwa nginya ndute wîra.”
18Rîrîa Jesû aaugire ûguo, Ayahudi nîmaagîre na kîîo kîîngî mûno gîa kwenda kûmûûraga. Meendaga gwîka ûguo tî nîûndû atî nîwaunîte watho wîgiî mûthenya wa thavatû, nwatî nîûndû nîwaugîte atî Ngai nî îthe kwoguo akeîganania na Ngai.
Wathani wa Mûriû
19Kwoguo Jesû nîwamerire atîrî, “Nîramwîra na ma atî: gûtirî ûndû Mûriû ekaga eîrîte; ekaga wa ûrîa tu onaga Îthe agîka. Na wa ûrîa wonthe Îthe eekaga, wana Mûriû nîwîkaga. 20Nîûndû Îthe nîwendete Mûriû na nîamwonagia maûndû monthe marîa ke mwene ekaga. Ke nîakaamwonia wana maûndû manene ma gwîka gûkîra mama, na mue nîmûkaamaka. 21Na wata ûrîa Îthe ariûkagia akuû na akamava mwoyo, ûguo nwa ta guo Mûriû avecanaga mwoyo kûrî arîa onthe endaga kûva. 22Gûtirî mûndû ûtucagîrwa ciira nî Îthe. Ke nîwîtîkîrîtie Mûriû atucanagîre ciira, 23nîguo andû onthe matîîage Mûriû wata ûrîa matîîaga Îthe. Mûndû wa wonthe ûtatîîaga Mûriû, ndatîîaga Îthe ûrîa wamûtûmire.
24“Nie nîramwîra na ma atî: mûndû wa wonthe wîgucaga ndûmîrîri yakwa na agetîkia Ngai ûrîa wandûmire, arî na mwoyo wa tene na tene. Mûndû ûcio ndagaacirithua nî Ngai, nîûndû ke nîmumu kûrî arîa akuû na agatonya kûrî arîa marî mwoyo. 25Nie nîramwîra na ma atî îvinda nîrîkuvîvîriu na nîrîrîkîtie gûkinya. Îvinda rîîrî nîrîo akuû makeegua mûgambo wa Mûriû wa Ngai, na arîa makaawîgua nîmakaagîa na mwoyo. 26Na wata ûrîa Vava ke mwene arîke kiumo Kîam mwoyo, ûguo nwa ta guo atûmîte Mûriû atuîke kiumo Kîam mwoyo. 27Nake Vava nîavete Mûriû rûtha rwa gûtuîra andû ciira, nîûndû ke nî Mûrû wa Mûndû. 28Tigani kûmakua nî maûndû mama, nîûndû îvinda nîrîgaakinya rîrîa akuû onthe makeegua mûgambo wake, 29#Dan 12.2 na maume mbîrîrarî ciao. Andû arîa mekîte waro nîmakaariûkua na magîe na mwoyo wa tene na tene, nwatî arîa mekîte naaî nîmakaariûkua na matuîrwe.
Aira a Jesû
30“Gûtirî ûndû nîngîka na vinya wakwa. Nducanagîra ciira kûringana na ûrîa Ngai ambîraga mbîke. Kwoguo îtua rîakwa nî rîa kîvooto nîûndû nie ndirageria kûvingia wendi wakwa, nwatî nîrageria kûvingia wendi wa ûrîa wandûmire.
31“Angîthîrwa nîravecana ûira wakwa nie mwene, ûira ûcio nîravecana tî wa ma. 32Nwatî nîmbîcî atî kûrî mûndû ûvecanaga ûira ûmbîgiî, na nie nîmbîcî atî maûndû marîa augaga mambîgiî nî ma ma. 33#Joh 1.19-27; 3.27-30 Mue nîmwatûmire anjaama enyu kûrî Johana, na Johana akîaria ûma ûrîa ûmbîgiî. 34Nie ndivatarîte ûira kuuma kûrî mûndû wana ûrîkû, nwatî nauga ûguo nîguo mûvonokue. 35Johana aakengaga ta taa yakanîte, namue nîmwendire gûkenerera ûtheri ûcio wake kavinda kanini. 36Nwatî nîrî na ûira ûmbîgiî ûkîrîte wa Johana. Maûndû marîa Vava aambîrire mbîkage nîmo maumbûraga atî Vava nîke wandûmire. 37#Mat 3.17; Mar 1.11; Luka 3.22 Wana nginya Vava ûrîa wandûmire nîavecanaga ûira ûmbîgiî. Mue mûtianegua mûgambo wake na mûtianona ûrîa ekariî. 38Mue mûtiîtîkagîra ndûmîrîri yake nîûndû mûtiîtîkagia ûrîa wandûmire. 39Mue mûthomaga Mandîko Matheru nîûndû mwîciragia atî mwamathoma nîmûkûgîa na mwoyo wa tene na tene. Mandîko Matheru maragia ûvoro ûmbîgiî. 40Kûnarî ûguo mue mûtiendaga gûka kûrî nie nîguo mûgîe na mwoyo.
41“Nie ndiracaria ngumo kuuma kûrî andû. 42Nwatî nîmbîcî mûrî andû a mûthemba ûrîkû na nîmbîcî atî mue mûtiendete Ngai na ngoro cienyu. 43Nie mbûkîte na rîîtwa rîa Vava na mûtinyamûkagîra. Nwatî mûndû wîngî angîûka akîaragia ûrîa eîrîte, nwa mûmwamûkîre. 44Mue mûcaragia ngumo kuuma kûrî andû arîa engî, nwatî mûtigeragia kûgîa na ngumo kuuma kûrî ûrîa arîke Ngai. 45Mûtigecirie atî nie nînie ngaamûthitanga kûrî Vava. Musa ûrîa mwigîte kîîrîgîrîro kûrî ke, nîke ûkaamûthitanga. 46Kethîrwa na ma mue nîmwetîkîtie Musa, wa nanie nîmûngîmbîtîkîtie, nîûndû ke aandîkire ûvoro ûrîa ûmbîgiî. 47Nwatî angîthîrwa mûtiîtîkîtie ûvoro ûrîa aandîkire, mûngîvota atîa vi gwîtîkia ûrîa nie mbugîte?”
موجودہ انتخاب:
Joh 5: KKB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Bible Society of Kenya, 2019
