Ciîko 9
9
Saûlo nîwagarûrûkire
(Ciîko 22.6-16; 26.12-18)
1Nwatî kavindarî wa kau Saûlo nîwekaraga akîvavûraga arûmîrîri a Mwathani, akiuga atî nîakûmaûraga. Kwoguo nîwathiîre kûrî Mûthînjîri-Ngai ûrîa mûnene, 2na agîtia maarûa cia kûmûmenyithania mavoerorî marîa maarî îtûûrarî rîa Damesiki, nîguo angîona arûmîrîri a njîra ya Mwathani, arûme kana aka, amanyite na amacokie Jerusalemu.
3Na rîrîa Saûlo aakuvîvîrie Damesiki ûtheri nîwaumire îgûrû na ûkîmûmûrîka wa rîmwe kuuma mîena yonthe. 4Nake nîwarivanire nthî na akîgua mûgambo ûkîmwîra atîrî, “Saûlo, Saûlo! Ûnyariraga nîkî?”
5Nake nîwaûririe atîrî, “We wî û Mwathani?”
Nake nîweguire mûgambo ûcio ûgîcokia atîrî, “Nie nînie Jesû ûrîa ûranyarira.”
6“Nwatî ûkîra wa rîu, ûthiî îtûûrarî, na nîûkwîrwa ûrîa wagîrîrîtwe nî gwîka.”
7Nao andû arîa maathiîcanîtie na Saûlo nîmaarûngamire vau, nwatî matiauga wa naarî ûndû. Nîmegwire mûgambo, nwatî mationa mûndû. 8Nake Saûlo nîwarûngamire na akîvingûra metho, nwatî ndangîavotire kwona kîndû. Kwoguo andû arîa maarî nake nîmaathiîre mamûnyitîte njara nginya magîkinya Damesiki. 9Nake nîwekarire mîthenya îthatû atakûvota kwona na atakûrîa kana kûnyua wa naarî kîndû.
10Nakuo kûu Damesiki kwarî na mwîtîkia ûmwe wetagwa Anania. Nake Mwathani nîwamumîrîre na njîra ya kîoneki na akîmwîra atîrî, “Anania!”
Nake nîwamûcokerie atîrî, “Nie nîrî ava, Mwathani.”
11Nake Mwathani nîwamwîrire atîrî, “Ûkîra ûthiî njîrarî Nûngarû, na wona wakinya mûciî kwa Judasi, ûrîrîrie mûndû ûmwe wa kuuma îtûûrarî rîa Tarishisi wîtagwa Saûlo. Rîu ke arî kûu akîvoya, 12na nîagîte na kîoneki na akona mûndû wîtagwa Anania akîthiî kûrî ke na akîmwigîrîra njara nîguo amûvotithie kwona rîngî.”
13Nwatî Anania nîwacokirie atîrî, “Mwathani, andû eengî nîmambîrîte ûvoro wîgiî mûndû ûcio, na wîgiî maûndû monthe macûku marîa ke ekîte andû aku atheru arîa marî kûu Jerusalemu. 14Rîu ke nîarîkîtie gûka gûkû Damesiki. Nao anene a athînjîri-Ngai nîmamûvete wathani wa kûnyita mûndû wa wonthe ûrîa ûkûgoocaga.”
15Nwatî Mwathani nîwerire Anania atîrî, “We thiî, nîûndû nie nînthuurîte Saûlo nîguo atuîke ndungata yakwa. Ke nîke ûgûtûma rîîtwa rîakwa rîmenywe nî Andû a Ndûrîrî, athamaki na andû a Isiraeli. 16Na nie mwene nîngûmwonia ûrîa ke akathînua nîûndû wakwa.”
17Kwoguo Anania nîwathiîre, agîtonya mûciî kwa Judasi, akigîrîra Saûlo njara na akîmwîra atîrî, “Saûlo mûriû wa îthe wetû, nie nînatûmwa nî Mwathani Jesû ûrîa ûrakumîrîre vîndî îrîa we ûraûkîte gûkû. Ke andûma nîguo we ûvote kwona rîngî na wîcûrwe nî Roho Mûtheru.” 18Na wa rîmwe tûnyamû twekariî ta tûkoro twa rûûo rwa nthamaki nîtwagwîre kuuma methorî ma Saûlo na akîvota kwona rîngî. Nake nîwacokire akîrûngama na akîvatithua; 19na arîkia kûrîa irio agîcokwa nî vinya.
Saûlo nîwavunjirie Damesiki
Kwa îvinda rîa mîthenya mînini Saûlo nîwekaranirie na etîkia arîa maarî Damesiki. 20Na vîndî wa îo ke nîwambîrîrie kûthiî mavoerorî. Nake nîwavunjirie kuo akiugaga atî Jesû nî Mûriû wa Ngai.
21Nao andû onthe arîa maamwîgwire nîmaamakire mûno na makîûrania atîrî, “Na kinthî mûndû ûyû tîke ûrîa ûrarî Jerusalemu, na nîke ûraûragaga andû arîa magoocaga mûndû ûcio wîtagwa Jesû? Wana kinthî ke twake ûraûkire gûkû nîûndû wa gîtûmi wa kîu gîa kûnyita arûmîrîri acio a Jesû akîmacokagia kûrî anene a athînjîri-Ngai?”
22Nwatî Saûlo nîwavunjirie na vinya mûno. Nake nîwonanagia nama atî Jesû nîke Mesaya, ûndû nginya Ayahudi arîa maatûûraga Damesiki matangîavotire gûkararania na Saûlo.
23 #
2Akor 11.32-33
Nayo mîthenya mîîngî yarîkia kûvîtûka, Ayahudi amwe nîmaacemanirie na makîvanga maûrage Saûlo. 24Nao nîmaamwetagîrîra kîvingorî Kîam îtûûra rîu makîenda kûmûûraga, nwatî Saûlo nîwamenyire mûvango ûcio wao. 25Nwatî ûtukû ûmwe arûmîrîri ake nîmaamwagararîrie rûthingorî îgûrû makîmûnyûrûrûkia arî gîkavurî.
Saûlo arî Jerusalemu
26Nake Saûlo nîwathiîre Jerusalemu na akîgeria gûtonya gîkundirî Kîam arutwa, nwatî onthe nîmaamwîtigîre nîûndû matietîkagia atî ke aarî mûrûmîrîri. 27Nwatî Baranaba nîwamwîtîkîre na akîmûvira kûrî atûmwa. Baranaba nîwamataarîrie ûrîa Saûlo arî njîrarî oonire Mwathani na Mwathani akîmwarîria. Nîwacokire akîmeera ûrîa Saûlo aavunjirie na rîîtwa rîa Jesû arî na ûmîrîru mwîngî mûno kûu Damesiki. 28Kwoguo Saûlo nîwekaranirie na atûmwa. Nake nîwathiîcaga kûu Jerusalemu kuonthe akîvunjagia rîîtwarî rîa Mwathani arî na ûmîrîru mwîngî. 29Mavinda meengî ke nîwaragia na agakararania na Ayahudi arîa maaragia Kîngiriki, nwatî nao nîmaageragia kûmûûraga. 30Rîrîa etîkia maamenyire ûvoro ûcio, nîmaamûvirire Kaisarea na makîmwîra athiî îtûûrarî rîa Tarishisi.
31Kwoguo kanitha ya kûu kuonthe Judea, Galili na Samaria nîyekarire îrî na thayû. Nayo îgîtethagîrîrua nî Roho Mûtheru nîyagîre na vinya na îkîthiî na mbere gûkûra îkîongererekaga îrî na wîtigîri wa Mwathani.
Petero nîwathiîre Lîda na Jopa
32Rîrîa Petero aathiîcaga kûndû na kûndû, nîwacerere andû a Ngai arîa maatûûraga gîcagirî Kîam Lîda. 33Akinya kuo nîwethîrîrie mûndû wetagwa Aenea. Aenea nîwarwarîte mûrimû wa gûkua ciîga cia mwîrî na nîwekarîte mîaka înana atakûvota kuuma ûrîrî. 34Nake Petero nîwamwîrire atîrî, “Aenea, Jesû Kristû nîagûkûvonia wa rîu. Ûkîra na ware ûrîrî waku.” Na wa rîmwe Aenea nîwaûkîrire. 35Nao andû onthe arîa maatûûraga kûu gîcagirî Kîam Lîda na Sharoni nîmaamwonire na magîtîkia Mwathani.
36Nakuo îtûûrarî rîa Jopa nîkwarî na mûndûmûka mwîtîkia wetagwa Tabitha. (Rîîtwa rîu rîake na Kîngiriki nî Dorokasi, na nî ta kuga “nthiia.”) Nake nîwamenyerete gwîkaga ciîko mbaro na gûtethagia athîni. 37Vîndî îrîa Petero aarî kûu Lîda, Tabitha nîwarwarire na agîkua. Naguo mwîrî wake nîwathambirue na ûkigwa nyomba ya îgûrû. 38Na nîûndû kûu Lîda kwarî gûkuvî na Jopa, etîkia arîa maarî Jopa megua atî Petero aarî Lîda nîmaatûmire andû aîrî mathiî mamûthaithe makîmwîraga atîrî, “Wenda tu ûka gwetû narua.” 39Kwoguo Petero nîwaûkîrire na akîthiîcania nao. Na vîndî îrîa ke aakinyire kuo, etîkia nîmaamûvirire nyomba ya îgûrû. Nao aka a ndigwa nîmaathiûrûrûkîrie Petero makîrîraga, na makîmwonia cati na magooti marîa Dorokasi aatumîte rîrîa aarî mwoyo. 40Nwatî Petero nîwerire andû onthe arîa maarî kuo maume nja. Nake nîwaturirie maru na akîvoya. Nîwacokire akîvûgûka na kûrîa mwîrî ûcio warî na akiuga atîrî, “Tabitha, ûkîra!” Nake nîwavingûrire metho, na vîndî îrîa oonire Petero, nîwekarire nthî. 41Nake Petero nîwamûnengererie njara na akîmûtethia kûrûngama. Nîwacokire agîîta etîkia na aka a ndigwa na akîmûnenganîra kûrî o arî mwoyo. 42Naguo ûndû ûcio nîwamenyekanire Jopa kuonthe na andû eengî magîtîkia Mwathani. 43Nake Petero nîwekarire kûu Jopa mîthenya mîîngî marî na mûndû wathondekaga njûo wetagwa Simoni.
موجودہ انتخاب:
Ciîko 9: KKB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Bible Society of Kenya, 2019