Ciîko 4
4
Petero na Johana nîmaavirirwe mbere ya kîama
1Rîrîa Petero na Johana maaragîria andû acio, athînjîri-Ngai, mûnene wa arangîri a hekarû, na Asadukai nîmaakinyire. 2Nao nîmaarakarire mûno nîûndû arutwa acio aîrî nîmaathomithagia andû makameera atî Jesû nîwariûkîte, ûvoro ûrîa wonanagia atî arîa makuîte nîmakaariûka. 3Ayahudi acio nîmaanyitire Petero na Johana na makîmavingîra njera nîguo meterere gûkîe, nîûndû kwarî kîvwaî. 4Nwatî andû eengî gatagatîrî ka arîa meegwire ndûmîrîri îo yavunjagua nî Petero na Johana nîmeetîkirie. Nao arûme arîa meetîkirie nîmongererekire magîkinya kîndû ta ngiri ithano.
5Mûthenya ûcio wîngî, anene, athuuri na arimû a watho nîmaagomanire kûu Jerusalemu. 6Maagomanire vamwe na Anasi mûthînjîri-Ngai ûrîa mûnene, Kaiafa, Johana, Alekisanda na andû onthe a mûciî wa Mûthînjîri-Ngai ûcio mûnene. 7Nao nîmaarûngamirie Petero na Johana mbere yao na makîmaûria atîrî, “Mûrekire ûguo na vinya ûrîkû kana na rîîtwa rîa û?”
8Nake Petero ecûrîtwe nî Roho Mûtheru nîwamerire atîrî: “Mue anene a vûrûri na athuuri, 9nî ma nîmûratûûria ûvoro wîgiî gîîko Kîamro kîrîa mûndû ûyû ûratûûrîte onjete magûrû arekirwe na mûgatûria ke aravonirue atîa. 10Tûrenda mue muonthe na andû onthe a Isiraeli mûmenye atî, mûndû ûyû aravonirue na rîîtwa rîa Jesû Kristû wa Nazarethi. Mue mwambire Jesû mûtharavarî îgûrû, nwatî Ngai nîwamûriûkirie. Mûndû ûyû ûronjete magûrû arûngamîte ava mbere yenyu nîûndû wa vinya wa Jesû. 11#Tha 118.22 Jesû nîke mandîko matheru maugaga atîrî;
‘Îthiga rîrîa rîaregirwe nî atumi a nyomba,
nîrîo rîtuîkîte rîa vata mûno gûkîra marîa mengî monthe.’
12Jesû wenga tu nîke ûvotaga kûvonokia andû na gûkû nthî kuonthe gûtirî mûndû wîngî Ngai anavecana ûngîvota gûtûvonokia.”
13Nao athuuri a Kîamma nîmaamakire moona ûrîa Petero na Johana maaûmîrîrîtie. Nîmaamenyire atî o maarî andû mataarî ngûrani na andû arîa engî na matiarî athomu. Kwoguo nîmaamenyire atî Petero na Johana nîmaatûûranîtie na Jesû. 14Nwatî rîrîa moonire mûndû ûcio wavonirue arûngamîte vau rwarurî rwa Petero na Johana, athuuri acio nîmaaturire ûndû mangiuga. 15Na rîrîa Petero na Johana meerirwe maume kûu mûcemaniorî, athuuri acio a Kîamma nîmaacokanirie ndundu na makîûrania atîrî, 16“Tue nîtwîka atîa na andû aya? Andû onthe gûkû Jerusalemu nîmamenyete atî andû aya nîmaringîte Kîamma na tue tûtingîvota kûregana na ûvoro ûcio. 17Nwatî nîguo ûvoro ûyû ndûgatambe makîria gatagatîrî ka andû, tigani tûmakaanie matikarîrie mûndû wana ûrîkû rîngî na rîîtwa rîa Jesû.”
18Kwoguo nîmeetire Petero na Johana kûu Kîammarî na makîmeera matikanacoke kwaria kana kûthomithania na rîîtwa rîa Jesû. 19Nwatî Petero na Johana nîmaamacokerie atîrî, “Mue ene tuani ûndû ûrîa mwagîrîru methorî ma Ngai. Tuani kana nîmue tûkwathîkîra kana nîtwathîkîra Ngai. 20Nîûndû tue tûtingîtiga kwaria ûvoro wîgiî maûndû marîa twonete na twîguîte.” 21Kwoguo athuuri a Kîama nîmaamakaanirie na vinya na makîmarekereria makîthiî. Athuuri acio nîmaaturire njîra ya kûmaverithia nîûndû andû onthe nîmaakumagia Ngai nîûndû wa ûndû ûcio wekîkîte. 22Mûndû ûcio wavonirue na njîra îo ya kûringîrwa Kîamma aarî na ûkûrû wa makîria ya mîaka mîrongo îna.
Etîkia nîmaavoire mavewe ûmîrîru
23Nao Petero na Johana marekererua wa rîo nîmaacokire kûrî arata ao na makîmamenyithia maûndû monthe marîa meerîtwe nî anene a athînjîri-Ngai na athuuri. 24#Ntha 20.11; Neh 9.6; Tha 146.6 Rîrîa etîkia meegwire ûvoro ûcio, nîmaavoire Ngai marî na ngoro îmwe makiugaga atîrî, “Mwathani na Mûmbi wa îgûrû na nthî, îria na indo cionthe irîa irî kuo! 25#Tha 2.1-2 Na vinya wa Roho Mûtheru we nîwaririe na njîra ya Daudi Ndungata yaku, îthe wetû wa tene, ciugo rîrîa aaugire atîrî:
‘Andû a Ndûrîrî maarakarîte nîkî?
Andû maathondekire mîvango ya mana nîkî?
26Athamaki a gûkû nthî nîmeevarîrie,
na anene nîmaagomanire vamwe nîguo maregane na Mwathani na Mesaya wake.’
27 #
Mat 27.1-2; Mar 15.1; Luka 23.1,7-11; Joh 18.28-29 Nîûndû ûguo nîguo gwekîkire rîrîa Herode, Pontio Pilato, andû a Ndûrîrî na andû a Isiraeli, maatûnganire vamwe îtûûrarî rîîrî rîa Jerusalemu. Nîmaaregire Jesû ndungata yaku ntheru îrîa we watuire Mesaya. 28Maatûnganire nîguo meke maûndû monthe marîa we na vinya na wendi waku wavangîte kuuma wa Kîammbîrîria atî nîmagekîka. 29Na rîu Mwathani, ta roria wone ûrîa maratûmakia. Tue tûrî ndungata ciaku. Tûvotithie tûvecanage ndûmîrîri yaku tûrî na ûmîrîru. 30Kûnjûra njara yaku nîguo ûvonanie. Onania magegania na ûringe ciama na njîra ya rîîtwa rîa Jesû ndungata yaku ntheru.”
31Rîrîa maarîkirie kûvoya ûguo, nthî nîyainainire varîa maagomanîte. Nao andû onthe nîmecûrirwe nî Roho Mûtheru na makîanîrîra ndûmîrîri ya Ngai marî na ûmîrîru.
Etîkia nîmaatûmagîra indo ciao cionthe vamwe
32 #
Ciîko 2.44-45
Etîkia onthe maarî na ngwatanîro ya ngoro na meciria. Gûtirî mûndû wana ûmwe gatagatîrî kao waugaga atî arî na kîndû gîake arî wenga. Maatûmagîra indo ciao cionthe marî vamwe. 33Nao atûmwa nîmaarutaga ûira wa kûriûka kwa Mwathani Jesû marî na vinya nyîngî. Nake Ngai nîwamavecaga onthe irathimo nyîngî. 34Gûtirî mûndû wana ûmwe gatagatîrî kao waturaga kîndû wana kîrîkû. Arîa maarî na mîgûnda yao kana nyomba nîmaaciendagia, na mbeca irîa moona, 35nîmainenganagîra kûrî atûmwa. Na wa mûndû wa mûndû nîwagaagîrwa mbeca icio kûringana na ûvatari wake.
36Kwarî na mûndû ûmwe Mûlawi waciarîrîtwe îtûûrarî rîa Kuporo. Mûndû ûcio eetagwa Josefu. Atûmwa maamûtuîrîrîte rîîtwa Baranaba (naguo nî kuga “Ke ûrîa ûmanagîrîria.”) 37Josefu nîwendirie mûgûnda wake na mbeca irîa oonire akîivira na akîinenganîra kûrî atûmwa.
موجودہ انتخاب:
Ciîko 4: KKB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Bible Society of Kenya, 2019