Ciîko 11
11
Petero nîweyarîrîrie arî Jerusalemu
1Nao atûmwa na etîkia arîa maarî Judea nîmegwire atî wana andû a ndûrîrî nîmaamûkîrîte kiugo Kîam Ngai. 2Na rîrîa Petero aaunûkirie Jerusalemu, etîkia arîa meetîkîtie atî kwarî na ûvatari wa kûrua nîmaamwonirie mavîtia make na makîmwîra atîrî, 3“We wîthîrîtwe ûkînyitwa ûgeni mîciî kwa andû arîa matarî aruu, na ûkîrîcanîra nao!” 4Kwoguo Petero nîwambîrîrie kûmataarîria waro ûrîa maûndû meekîkîte kuuma Kîammbîrîria Kîammo.
5“Nie naarî îtûûrarî rîa Jopa. Na rîrîa naavoyaga, nînaagîre na kîoneki. Nînoonire kîndû gîkiuma îgûrû gîkariî ta cuka nene îkînyûrûrûkua kuuma îgûrû înyitîtwe mîthiia yayo îna. Nayo cuka îo nîyaûkire vakuvî mûno nanie. 6Na rîrîa naamîroririe waro ndaarî, nînoonire nyamû irîa cigagwa mîciî na ngîona nyamû irîa ciîkaraga kîthakarî. Nînoonire nyamû irîa irî nthakame ngiru mvevo, na iconi irîa ciûmbûkaga rîerarî. 7Nînaacokire ngîgua mûgambo ûkîmbîra atîrî, ‘Petero, Ûkîra; ûthînje na ûrîe!’ 8Nwatî nie nînaugire atîrî, ‘Naarî Mwathani! Kîndû kîrî na mûgiro kana gîtarî kîtheru gîtianatonya kanyuarî gakwa.’ 9Naguo mûgambo kuuma îgûrû nîwambîrire rîngî atîrî, ‘Kîrîa Ngai atheretie we ndwagîrîrwe nî kuga kîrî na mûgiro.’ 10Ûndû ûyû wekîkire maita mathatû na indo icio cionthe ikîguucua icoketue îgûrû. 11Na kavinda wa kau, andû athatû arîa maatûmîtwe kûrî nie kuuma Kaisarea nîmaakinyire nyomba kûrîa twarî. 12Nake Roho nîwambîîrire nthiîcanie nao ndarî na nganja. Nîtwathiîcanirie na etîkia aya atandatû na tûgîtonya nyomba kwa Korinelio. 13Nake nîwatwîrire ûvoro wîgiî mûraika ûrîa oonire arûngamîte kûu nyomba gwake. Nake mûraika ûcio nîwamwîrire atîrî, ‘Tûma andû mathiî Jopa makagîre Simoni ûrîa wîtagwa Petero. 14Ke nîagûkûva ndûmîrîri îrîa îgûtûma we na andû onthe a mûciî waku mûvonoke.’ 15Rîrîa naambîrîrie kwaria, Roho Mûtheru nîwamanyûrûrûkîre wata ûrîa aatûnyûrûrûkîre Kîammbîrîriarî. 16#Ciîko 1.5 Nanie nînaacokire ngîririkana ciugo cia Mwathani. Ke aaugire atîrî: ‘Johana aavatithanirie na manjî, nwatî mue nîmûkaavatithua na Roho Mûtheru.’ 17Ngai nîwavere andû a ndûrîrî kîveo wata kîrîa aatûvere vîndî îrîa twetîkirie Mwathani Jesû Kristû. Nie naarî û vi wa kûgiria Ngai eke ûrîa eendaga gwîka!”
18Nao etîkia acio megua ûguo nîmaathiririe ngarari na makîgooca Ngai makiugaga atîrî, “Kwoguo Ngai nîavete wana andû a ndûrîrî kanya ga kwîrira nîguo matûûre mwoyo!”
Kanitha wa Antiokia
19 #
Ciîko 8.1-4
Nao etîkia nîmaanyaganirie nîûndû wa kûnyariirwa kûrîa kwagîîre kuo vîndî îrîa Stefano aarîkirie kûûragwa. Amwe gatagatîrî kao nîmaathiîre nginya magîkinya Foenike, Kuporo na Antiokia. Nao maathiîre kûu kuonthe makîvunjagia ndûmîrîri kûrî Ayahudi onga. 20Amwe gatagatîrî ka etîkia acio maarî andû a kuuma Kuporo na Kurene. Na rîrîa o maakinyire Antiokia, nîmaarîrie wana Angiriki na makîmavunjîria Ûvoro Mwaro wîgiî Mwathani Jesû. 21Nao etîkia acio maarî na vinya wa Mwathani na andû gîkundi kînene magîtîkia na makîrûmîrîra Mwathani.
22Naguo kanitha wa Jerusalemu nîwegwire ûvoro wîgiî maûndû mau monthe, na kwoguo nîwatûmire Baranaba athiî Antiokia. 23-24Baranaba aarî mûndû mwaro, wecûrîtwe nî Roho Mûtheru na wîtîkio. Na rîrîa ke aakinyire Antiokia na akîona ûrîa Ngai aarathimîte andû, nîwacanjamûkire mûno na akîmathaitha onthe mekarage mevokete Mwathani vîndî cionthe na ngoro ciao cionthe. Nao andû eengî mûno nîmaatuîkire arûmîrîri a Mwathani.
25Nake Baranaba nîwacokire akîthiî Tarishisi gûcaria Saûlo. 26Rîrîa aamwonire, nîwamûvirire Antiokia, na kwa îvinda rîa mwaka mûgima Saûlo na Baranaba nîmaatûnganire na andû a kanitha na makîthomithia andû gîkundi kînene. Antiokia nîkuo etîkia meetirwe Akristiano rîrî riita rî mbere.
27Vîndî wa îo arathi amwe nîmaanyûrûrûkire kûu Antiokia maumîte Jerusalemu. 28#Ciîko 21.10 Nake ûmwe gatagatîrî kao wetagwa Agabo, nîwarûngamire, na ke atethetue nî Roho nîwarathire akiuga atî nthî kuonthe nîgûkûgîa na yûra rînene. (Ûndû ûyû wekîkire vîndî ya wathani wa Kilaudio.) 29Nao arutwa nîmaatwire marute mbeca kûringana na ûvoti wa mûndû wa mûndû nîguo matethie etîkia arîa maatûûraga Judea. 30Kwoguo nîmaarutire mbeca na makîinenganîra kûrî Baranaba na Saûlo nîguo maivire kûrî athuuri a kanitha.
موجودہ انتخاب:
Ciîko 11: KKB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Bible Society of Kenya, 2019