Lk 24

Kũthayũũka kwa Yesũ

(Mat 28.1-10; Mk 16.1-8; Yoa 20.1-10)

1Wakyumwa vaa kũitheatheana, aka nĩmaendie mbũanĩ makuĩte mĩtĩ ĩnyungaa nesa ĩla maseũvĩtye. 2Nĩmeethĩie ĩvia yĩla yavingĩte mũomonĩ yĩvingilitĩtw'e yĩkauma vau mbũanĩ. 3Ĩndĩ yĩla malikile nthĩnĩ mayaaĩthĩa mwĩĩ wa Mwĩai Yesũ.#24.3 wa Mwĩai Yesũ Maandĩko amwe ma tene ma Ndeto ya Ngai nĩmatiĩte ndeto ii 4Maendee na kũsaanĩw'a nĩ ũndũ ũsu, aũme elĩ mekĩĩte ngũa ikũtisatisa nĩmaũngamie vakuvĩ namo. 5Aka asu me na w'ĩa mwingĩ nĩmakumanĩie nthĩ, namo aũme asu mamakũlya atĩĩ, “Nĩkĩ mũũmantha mũndũ wĩ thayũ katĩ wa ala akw'ũ? 6#Mat 16.21; 17.22-23; 20.18-19; Mk 8.31; 9.31; 10.33-34; Lk 9.22; 18.31-33 Nde vaa nũthayũũkie. Kwa lilikanai ũndũ wamũtavisye yĩla waĩ Kalilii: 7‘Mwana wa Mũndũ no nginya anenganwe kwa avĩtany'a ambwe, na ĩtina wa mĩthenya ĩtatũ aithayũũka kuma kwa akw'ũ.’ ”

8Nĩmalilikanile ndeto isu sya Yesũ, 9na mauma mbũanĩ mathi matavany'a maũndũ asu onthe kwa ala amanyĩw'a ĩkũmi na ũmwe na kwa andũ ala angĩ. 10Aka asu matavisye atũmwa ũvoo ũsu nĩ Meli Makitalene, Yoena, na Meli inyia wa Yakovo o vamwe na aka angĩ maĩ namo. 11Ĩndĩ amanyĩw'a moosa ndeto isu ta sya mana na malea kũĩkĩĩa aka asu. 12Ĩndĩ Vetelo ookĩla asemba mbũanĩ. Nĩwakumanie akunĩkĩla nthĩnĩ, na oona ila ngũa sya kũthika mũndũ syĩ syoka. Nĩvo ĩndĩ wasyokie mũsyĩ aseng'etw'e nĩ kĩla kĩthĩwa kĩkĩkie.#24.12 Maandĩko amwe ma tene ma Ndeto ya Ngai nĩmatiĩte mũsoa ũũ

Yesũ Ayumĩlĩĩla Amanyĩw'a Make Elĩ Maendete Emaũ

(Mk 16.12-13)

13Mũthenyanĩ o ũsu, amanyĩw'a elĩ ma Yesũ nĩmaendete ndũanĩ yĩtawa Emaũ, yĩ kĩlomita ta ĩkũmi na kĩmwe kuma Yelũsalemu. 14Maendete makĩea ngewa ĩũlũ wa maũndũ onthe ala maneekĩkie. 15Maendee na kũea ngewa na ũkũlany'a maũndũ, Yesũ nĩwamathengeeie na aendany'a namo. 16Nĩmamwonie, ĩndĩ mayaamũmanya. 17Yesũ nĩwamakũlilye atĩĩ, “Nĩ kyaũ kĩĩ mũendete mũkĩea ngewa ĩũlũ wakyo?”

Namo maũngama, matukĩtye mothyũ moo. 18Nĩvo ĩndĩ ũmwe woo ũla weetawa Kĩliovasi wamũkũlilye atĩĩ, “Noue mũeni ũla wĩkalaa Yelũsalemu ũtesĩ maũndũ ala mekĩkĩte kũu ĩvindanĩ yĩĩ?”

19Nake Yesũ amakũlya, “Nĩ maũndũ maũ?”

Namo mamwĩa atĩĩ, “Maũndũ ala maneekĩkie kwa Yesũ ũla wumĩte Nasaleti. Anaĩ mwathani na nũneesĩkĩe nĩ Ngai na andũ ta mũndũ ũnai na ũkũmũ mekonĩ make na ndetonĩ syake. 20Athembi anene na atongoi maitũ nĩmanamũnenganie atw'ĩĩwa kũawa na ambwa ngelany'onĩ. 21Ithyĩ tũneekwatasya kana nĩwe wĩetee andũ ma Ĩsilaeli ũthasyo! Na vamwe na ũu, ũũ nĩw'o mũthenya wa katatũ kuma maũndũ asu meethĩwa. 22Ũndũ ũngĩ, ve aka ma nguthu yaitũ matũseng'isye mũno. Maendie mbũanĩ vaa kũitheatheana, 23ĩndĩ mainethĩa mwĩĩ wake. Masyokie mayasya nĩmaumĩlĩĩlwa nĩ alaĩka woninĩ mamea kana nũthayũũkie. 24Amwe ma nguthu yaitũ nĩmaendie mbũanĩ, na meethĩa maũndũ mailyĩ o ũndũ aka meĩwetete, ĩndĩ mainamwona.”

25Nĩvo ĩndĩ Yesũ wameie atĩĩ, “Inyw'ĩ ko mũtumanĩte ata, na ko mũĩkĩĩaa na vinya ata maũndũ onthe ala maneenetwe nĩ athani! 26Nĩkũlya, ndũnaĩ ũndũ mwaĩlu Klĩsto kũthĩnw'a na ĩndĩ ailika ũkumyonĩ wake?” 27Nĩvo ĩndĩ Yesũ wamaeleisye maũndũ onthe ala mawetetwe ĩũlũ wake nthĩnĩ wa Maandĩko Matheu, kwambĩĩa mavukunĩ ma Mwose kũthi kũvika momanyĩsyo ma athani onthe.

28Yĩla mathengeeie ndũanĩ ĩla maendete, Yesũ nĩweekie ta ũkũendeea na kyalo, 29ĩndĩ amanyĩw'a asu mamwĩsũva maimwĩa atĩĩ, “Ĩkala naitũ nũndũ mũthenya nĩwathela na kĩvindu kĩendee na kwĩkusĩanĩsya.” Kwoou Yesũ ekala namo. 30Yĩla wekalile nthĩ namo maathĩw'e, nĩwoosie mũkate na atũnga mũvea; nĩwaũtilangile na amanenga. 31Nĩvo ĩndĩ masalukilw'e metho mamũmanya, nake aa maeka kũmwona. 32Nĩmaneenanisye me elĩ makũlany'a atĩĩ, “Tũinew'a ngoo sitũ syambĩĩa kũvyũva yĩla ũkũneenaa naitũ twĩ nzĩanĩ aitũelesya Maandĩko Matheu?”

33Nĩmookĩlile saanĩ o ũsu na masyoka Yelũsalemu, na meethĩa ala amanyĩw'a ĩkũmi na ũmwe mombanĩte na andũ ala angĩ maĩ namo, 34mayasya atĩĩ, “Kwa w'o Mwĩai nũthayũũkie; nũmumĩlĩĩile Simioni!”

35Nĩvo ĩndĩ amanyĩw'a asu elĩ namo mamaeleisye kĩla kĩkĩkie nzĩanĩ, na ũndũ mamũmanyie Yesũ yĩla ũtilangile mũkate.

Yesũ Aimaumĩlĩĩla Amanyĩw'a Make

(Mat 28.16-20; Mk 16.14-18; Yoa 20.19-23; Meko 1.6-8)

36O maendee na kũea ngewa ĩsu, Yesũ mwene nĩwaumĩlile aũngama katĩ woo na amea, “Mũuo nĩwĩthĩwe nenyu!”#24.36 na amea, “Mũuo nĩwĩthĩwe nenyu”: Maandĩko amwe ma tene ma Ndeto ya Ngai mai na ndeto ii

37Ĩndĩ nĩmatelemile na makwatwa nĩ w'ĩa maisũanĩa nĩ ĩimũ. 38Yesũ nĩwamakũlilye atĩĩ, “Mũtelemetw'e nĩ kyaũ? Nĩkĩ mwĩ na nzika ngoonĩ syenyu? 39Kwa sisyai moko makwa na maũũ, na nĩmũũmanya kana kwa w'o Ninyie. Ngwatangei na nĩmũũmanya, nũndũ ĩimũ yĩi mwĩĩ kana mavĩndĩ ũndũ mũũmbona nyie nĩ nasyo.”

40Amina kwasya ũu, nĩwamonisye moko make na maũũ make.#24.40 Maandĩko amwe ma tene ma Ndeto ya Ngai nĩmatiĩte mũsoa ũũ 41O maendee kũlea kũĩkĩĩa nĩ mũyo na kũseng'a nĩwamakũlilye atĩĩ, “Vaa mwĩ na kĩndũ kĩĩwa?” 42Nĩmamũnengie ĩkũyũ ĩkaange, 43nake oosa aya masyaĩĩsye.

44Nĩvo ĩndĩ wameie atĩĩ, “Maũndũ aa nĩmo namũtavasya yĩla naĩ nenyu, kana maũndũ onthe ala maandĩkĩtwe ĩũlũ wakwa mavukunĩ ma Mwose, ma Athani, o vamwe na ma Savulĩ, no nginya meanĩw'e.”

45Nĩwaamũkisye ilĩko syoo maelewe nĩ Maandĩko Matheu, 46na amea atĩĩ, “Ũũ nĩw'o kũandĩkĩtwe: Klĩsto no nginya akw'e, na no nginya athayũũke kuma kwa akw'ũ ĩtina wa mĩthenya ĩtatũ. 47O ta ũu no nginya andũ matavw'e ũvoo ĩũlũ wa kwĩlila kwondũ wa naĩ syoo, na kũekewa naĩ ĩsyĩtwanĩ yake kwambĩĩa Yelũsalemu. 48Inyw'ĩ mwĩ ngũsĩ sya maũndũ aa. 49#Meko 1.4 Nyie ngamũtũmĩa ũla Ĩthe wakwa wathanie, ĩndĩ ĩkalai vaa mũsyĩnĩ kũvika mũnengwe vinya kuma ĩũlũ.”

Yesũ Ayambata Ĩtunĩ

(Mk 16.19-20; Meko 1.9-11)

50 # Meko 1.9-11 Nĩvo ĩndĩ Yesũ watongoeisye aatĩĩi asu make onthe mauma Yelũsalemu amatwaa Mbethani, na me vau ookĩlya moko make amaathima. 51Aendee na kũmaathima nĩwoosiwe kuma vala maĩ ambatw'a ĩtunĩ.#24.51 ambatw'a ĩtunĩ: Maandĩko amwe ma tene ma Ndeto ya Ngai nĩmatiĩte ndeto ii 52Nĩmamũthaithie na masyoka Yelũsalemu me na ũtanu mwingĩ. 53Ĩvinda yonthe mekalaa Ĩkalũnĩ maimũtũngĩa Ngai mũvea.

موجودہ انتخاب:

Lk 24: KAMBA

سرخی

شئیر

کاپی