YOHANA 9
9
Yeso okogwenia omonto oiboretwe ore omouko
1Yeso agachia goeta akarora omonto orenge omouko korwa okoiborwa kwaye. 2Aborokigwa baye bakamoboria, “Rabii, ning’o okorete ebibe, nomonto oyo, gose nabaibori baye, goika akaiborwa ore omouko?”
3Yeso akairaneria, “Oyo takorete ebibe, nonya nabaibori baye, korende aya akorekire, erinde emeremo ya Nyasae eorokigwe asare. 4Netogwenerete tokore emeremo yaye oyontomete ekero rire mobaso; obotuko ngocha bore, omonto atanyare gokora emeremo. 5Ekero inde ase ense, inche nomobaso bw’ense.”
6Agachia gokoora gokwana aya, agatwera amate inse, agakora etintira ase amate aria, agaaka omouko oria amaiso netintira eria, 7akamotebia, “Genda bwesibie ase ritibo ria Siloamu” (okoonchorwa kwaye, oyotomirwe). Erio akagenda agesibia, akairana okorora. 8Nabo abagisangio baye, na baria bamoroche ekero arenge omosabereri bakabora, “Inee! Oyo tari ere oria orenge oikaransete gosaba?” 9Abande bakabora, “Nere”; abande bakabora, “Yaya, nigo agwekaine nere.” Ere omonyene akabora, “Ninche ere.”
10Nabo bakamoboria, “Amaiso ao naki rende aramogetigwe?”
11Ere akairaneria, “Omonto okorokwa Yeso okorete etintira, akang’aka amaiso aane, agantebia: Genda ase ritibo ria Siloamu, bwesibie; nabo nkagenda ngesibia, nkanyara korora.”
12Bakamoboria, “Ng’ai are oyio?” Akabora, “Timanyeti.”
13Bakamoira oria orenge omouko ritang’ani ase Abafarisai.
14Nigo riarenge rituko ri’Esabato ekero Yeso akorete etintira na komoramokia amaiso. 15Erio Abafarisai nabarabwo bakamoboria naende buna anyorete okorora. Akabatebia, “Nigo abegete etintira igoro ase amaiso aane, ngesibia, na bono nkorora nde.”
16Erio abande b’Abafarisai bakabora, “Omonto oyo tarwete ase Nyasae, ekiagera tabwateti Esabato.” Abande bakabora, “Naki omonto omonyene ebibe aranyare gokora ebikone buna ebi?” Ogwatananekana gokaba ase egati yabo. 17Bakaboria omouko oria eria kabere, “Aye naki okobora asare, ekiagera akoramokia amaiso?”
Akabora, “Nigo are omobani.”
18Erio Abayahudi tibeegena amang’ana aye, ng’a nigo arenge omouko, naende anyarete korora, goika bakarangeria abaibori baye oria onyorete okorora, 19bakababoria, “Oyo nere omwana oino mogoteba ng’a nigo aiboretwe ore omouko? Naki akora orora bono?”
20Abaibori baye bakairaneria, “Twamanyire ng’a oyo nomwana oito, naende ng’a nigo aiboretwe ore omouko; 21korende buna anyara korora bono, titomanyeti, gose ning’o omoramokia amaiso, titomanyeti. Ere nomonto omogima, moborie omonyene, nekwanere.” 22Abaibori baye nigo bakwanete aya ase okoiroka Abayahudi, ekiagera Abayahudi konya babwatanire, ng’a monto onde bwensi oramoorokie ng’a nere Kristo aserigwe korwa ase esinagogi. 23Nero engencho yagerete abaibori baye bakabora, “Ere nomonto omogima, moborie.”
24Erio eria kabere bakarangeria omonto oria orenge omouko, bakamotebia, “Moe Nyasae ogotogia; intwe twamanyire ng’a omonto oyio nomonyene ebibe.”
25Erio omonto oria akairaneria, “Onye ere nomonyene ebibe, timanyeti; ring’ana erimo namanyire, inche nigo narenge omouko, korende bono nkorora nde.”
26Bakamoboria, “Naki agokorerete? Naki akoramogetie amaiso?”
27Akabairaneria, “Naikire kobatebia, ko timontegerereti. Naki morigetie koyaigwa eria kabere? Inwe boigo morigetie koba aborokigwa baye?”
28Erio bakamorama, bakabora, “Naye ore omworokigwa oye, korerende intwe nigo tore aborokigwa ba Musa. 29Intwe twamanyire ng’a Nyasae nigo arenge gokwana na Musa, korende oyo titomanyeti aase arure.”
30Omonto oria akairaneria, “Ring’ana eri neri’ogokumia, ng’a inwe timomanyeti aase arure, na ere ondamokirie amaiso. 31Twamanyire ng’a Nyasae tari koigwa abanyene ebibe; korende omonto karabe omosasimi Nyasae, na gokora ogwancha kwaye, oyio nere Nyasae akoigwa. 32Korwa omochakano teraigugwa ng’a omonto oramokirie amaiso ’omouko oiboretwe engencho eye. 33Onye oyo tarwete ase Nyasae, anga takonyara gokora gento.”
34Bakamoiraneria, “Aye nigo kwaiboretwe ase ebibe ebinene, na intwe ngotworokereria ore?” Bakamosokia isiko.
35Yeso akaigwa ng’a bamosokirie isiko, akamorora, akamoboria, “Aye kwamwegenire Omwana‐o‐mwanyabanto?”
36Ere akairaneria, “Ning’o oyio, Omonene, nyare komwegena?”
37Yeso akamotebia, “Kwamororire, naende nere oyogokwana naye nere oyio.”
38Akabora, “Omonene, negenire”; akamosasima. 39Yeso akabora, “Inche nigo nachire ase ense eye ase ekina, erinde abatari korora barore, na barabwo abakorora babe emeuko.”
40Abande ase Abafarisai abarenge amo nere bakaigwa aya, bakamoboria, “Inee! Naintwe nigo tore emeuko?”
41Yeso akabairaneria, “Onye mwarenge emeuko, anga timori nebibe; korende bono nigo mogoteba: Nkorora tore; gaki ebibe biaino biagendereire kobao.
موجودہ انتخاب:
YOHANA 9: EKEGUSIIBBLE
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
