YOHANA 6

Okoragerigwa kw’abanto chilifu isano

(Mat 14:13–21; Mar 6:30–44; Luk 9:10–17)

1Nyuma ase aya Yeso akagenda ng’umbu y’enyancha ya Galili, nero enyancha ya Tiberia. 2Omoganda omonene okamotunyana, ekiagera baroche ebikone abakorerete abarwaire. 3Yeso agatiira gochia egetuawa, agaikaransa aroro amo naborokigwa baye. 4Na Epasaka, rituko rinene ri’Abayahudi, nigo yarenge ang’e. 5Nabo Yeso agachia koimokia amaiso aye, akarora omoganda omonene ogocha asare, akaboria Filipo, “Ng’ai togochia kogora emegati, aba banyare koria?” 6Igo amoboretie aya, erinde amoteeme, ekiagera namanyete ere omonyene eki arakore.

7Filipo akamoiraneria, “Emegati ye chidinari amagana abere tekobaisana, kera oyomo anyore moke igo.” 8Oyomo bw’aborokigwa baye, Anderea, momura omwabo Simion Petero, akamotebia, 9“Nare aa omosae, obwate emegati etano y’engano ne chinswe ibere, korende ebi inki biraisane ase abanto abange buna aba?”

10Yeso akabora, “Ikaransia abanto.” Mbwarenge aroro obonyansi obonge aase aria. Igo abasacha bagaikaransa, barabwo nigo barenge chilifu isano. 11Yeso akabogoria emegati; kayesesenirie, akagabera abaikaransete; naboigo ne chinswe chiria, koreng’ana buna barigetie. 12Kobachia koigota, agatebia aborokigwa baye, “Sangereria ebisamunye biatigaire, gento tigesira.” 13Nabo bakabisangereria, bagaichoria ebitonga ikomi na bibere ase ebisamunye bi’emegati etano y’engano, ebiatigaretigwe na baria bariete. 14Ekero abanto baria bachia korora egekone keria Yeso akorete, bakabora, “Oyo ekeene nomobani oria orenge gocha ase ense!”

Yeso ogweatanana na gotaara ase enyancha igoro

(Mat 14:22–27; Mar 6:45–52)

15Nabo Yeso namanyete ng’a mbarigetie gocha komoira, erinde bamobeke abe omoruoti. Ase ayio akerusanania, akagenda naende egetunwa ere bweka.

16Rigachia koba mogoroba, aborokigwa baye bagatirimboka gochia nyancha, 17bakariina obwato ime, bagachaka kwamboka enyancha kogenda Kapernaumu. Naende omosunte konya obeire, na Yeso konya taracha asebare. 18Enyancha egachaka koimoka ase engencho y’omwaga omonge orenge kogusa. 19Nabo kabang’usire obwato chimaeli isato gose inye bakarora Yeso ogotaara ase enyancha igoro, ogoika ang’e ase obwato. Erio bakairoka, 20korende Yeso akabatebia, “Ninche. Timoiroka!”

21Bagancha komosoyia obwato ime, erio kegima obwato bogaika ase barenge kogenda.

Abanto bakorigia Yeso

22Inkio yaye omoganda oteneine ng’umbu y’enyancha bakarora ng’a obwato bonde tibwarenge aroro, otatiga boria obomo bwoka, naende ng’a Yeso tasoete ase obwato boria amo naborokigwa baye, korende naborokigwa baye bagendete boka. 23Korende amaato ande agacha korwa Tiberia ang’e naase aria bariete emegati ekero Omonene ayesesenetie. 24Ekero omoganda ochia korora ng’a Yeso tari aroro, nonya naborokigwa baye, barabwo abanyene bagasoa amaato ime, bakagenda Kapernaumu, bakorigia Yeso.

Yeso nomogati bw’obogima

25Goika bagachia komorora ng’umbu y’enyancha bakamoboria, “Omworokia, indi gwachete aa?”

26Yeso akabairaneria, “Ekeene, ekeene, nabatebirie: Iga mokondigia, tari ekiagera mwaroche ebikone, korende nekiagera mwariete emegati eria, mokaigota. 27Timokorera endagera egosareka korende, endagera ekobao goika obogima bwa kare na kare, eye Omwana‐o‐mwanyabanto aranyare kobaa, ekiagera Nyasae Tata obekire ekemanyererio kiaye asare.”

28Nabo bakamoboria, “Ninki togokora tonyare gokora emeremo ya Nyasae?”

29Yeso akabairaneria, “Eye nero emeremo ya Nyasae, ng’a momwegene ere oyotomirwe nere.”

30Bakamotebia, “Mbikone ki ogokora, erinde torore tokwegene? Meremo ki ogokora? 31Chisokoro chiaito nchiariete mana ase erooro, buna yarigetwe: Nabaete omogati korwa igoro bakaria.”

32Yeso akabatebia, “Ekeene, ekeene, nabatebirie: Tari Musa obaete omogati oria orwete igoro, korende n’Tata one ore kobaa omogati bw’ekeene okorwa igoro. 33Naki omogati o Nyasae noria ogoika korwa igoro na koa ense obogima.”

34Nabo bakamotebia, “Omonene, amatuko onsi otoe omogati oyio.”

35Yeso akabatebia, “Inche nomogati bw’obogima; ere oyogocha asende takoigwa enchara nonya ng’ake, na ere oyoranyegene takorang’a nonya ng’ake. 36Korende nabatebirie ng’a mwandorire, ko timonyegeneti. 37Bonsi aba Tata akong’a nabache asende, na ere oyogocha asende tinkomotuguta isiko nonya ng’ake. 38Naki naikire korwa igoro, tari ase ogokora ogwancha kwane omonyene, korende ogwancha kwaye oyontomete. 39Naende ogwancha kwaye Tata oyontomete nakwo oko, ng’a ase bonsi ang’eire tinsiria nonya noyomo, korende mbabokie ase rituko ri’omoerio. 40Nogwancha kwaye oyontomete nakwo oko, ng’a kera oyokorigereria Omwana na komwegena, nabe nobogima bwa kare na kare, na inche nimobokie ase rituko ri’omoerio.” 41Abayahudi bakamwemurunganeria, ekiagera atebete, “Inche nomogati oigete korwa igoro.” 42Bakabora, “Oyo tari Yeso, omwana o Yusufu? Ntomanyete ise na ng’ina. Naki rende akobora: Naikire korwa igoro?”

43Yeso akabairaneria, “Timwemurunganerania inwe ase inwe. 44Omonto onde tari oranyare gocha asende, atang’usiri na Tata oyontomete, na inche nimobokie ase rituko ri’omoerio. 45Nerikire nababani: Bonsi naborokererigwe na Nyasae. Kera oyoigure na kworokererigwa na Tata, nigo agocha asende. 46Tari ng’a monto ororire Tata, otatiga ere oyorure ase Nyasae, oyio nere ororire Tata. 47Ekeene, ekeene, nabatebirie: Ere oyonyegenete inche nare nobogima bwa kare na kare. 48Inche nomogati bw’obogima. 49Chisokoro chiaino nchiariete mana ase erooro, na barabwo bagakwa. 50Oyo noro omogati oikire korwa igoro ng’a monto onde bwensi orayorie, tagokwa. 51Inche nomogati bw’obogima oyoigete korwa igoro; omonto kararie omogati oyio, nabe moyo goika kare na kare; na omogati ndarue inche, ase engencho y’obogima bw’ense, nomobere one.”

52Erio Abayahudi bakaamererania barabwo ase barabwo, bakabora, “Naki omonto oyo aranyare gotoa omobere oye toyorie?”

53Yeso akabatebia, “Ekeene, ekeene nabatebirie: Motarieti omobere oye Omwana‐o‐mwanyabanto na konywa amanyinga aye, timori nobogima ime yaino. 54Oyokoria omobere one na konywa amanyinga aane nare nobogima bwa kare na kare, na inche nimobokie ase rituko ri’omoerio, 55ekiagera omobere one nendagera y’ekeene, na amanyinga aane nekenyugwa gi’ekeene. 56Oyokoria omobere one na konywa amanyinga aane nigo akomenya ime yane, na inche ime yaye. 57Buna Tata are moyo antomete, na inche inde moyo ase engencho ya Tata, naboigo oyokondia, nabe moyo ase engencho yane. 58Oyio nomogati oigete korwa igoro, tari buna chisokoro chiaino chiariete mana, bagakwa; oyorarie omogati oyio nabe moyo goika kare na kare.”

59Amang’ana aya nigo ayakwanete ase esinagogi, kaare kworokereria aria Kapernaumu.

Abande ase aborokigwa bakaba ne chitang’u‐tang’u

60Abange ase aborokigwa baye ekero bariigwa, bakabora, “Ring’ana eri nerikong’u, ning’o oranyare koritegerera?” 61Ko Yeso akamanya ase omoyo oye ng’a aborokigwa baye bemurunganeirie ring’ana eri, akababoria, “Ring’ana eri ndiabagochire? 62Naki erabe rende, komorarore Omwana‐o‐mwanyabanto okogenda aaria aase arenge ritang’ani? 63Omoika noro okobeka obogima, omobere togwenereti gento; amang’ana nabatebirie nomoika, naende nobogima. 64Korende mbare abande ase egati yaino bategeneti.” Naki Yeso amanyete korwa omochakano mbarabi abategeneti, naende ning’o orache komorua. 65Akabora, “Eke nakio gekogera nabatebia, ng’a omonto onde tari oranyare gocha asende, otatiga oeirwe na Tata one.”

66Nyuma y’ayio abange ase aborokigwa baye bakairana nyuma, tibamotunyana naende.

Okoorokia gwa Petero igoro ya Yeso

67Erio Yeso akaboria baria ikomi na babere, “Nainwe boigo morigetie kogenda?”

68Simion Petero akamoiraneria, “Omonene! Togende ase ng’o? Aye nore namang’ana ’obogima bwa kare na kare. 69Na intwe twegenire na komanya ng’a aye naye Omochenu o Nyasae.”

70Yeso akabairaneria, “Inee! Tinabachorete inwe ikomi na babere, na oyomo oino nekerecha?” 71Nigo akwanete igoro ya Yudas, omwana o Simion Iskariota, ekiagera oyo nere orache komorua; na ere noyomo bwa baria ikomi na babere.

موجودہ انتخاب:

YOHANA 6: EKEGUSIIBBLE

سرخی

شئیر

کاپی