YOHANA 17
17
Ogosaba kwa Yeso
1Ekero Yeso akwanete amang’ana ayio akaimokia amaiso aye, akarigereria igoro, akabora, “Tata, ensa yaikire. Mobake Omwana oo, erinde Omwana nere akobake aye, 2buna kwamoete okobua igoro ase mwanyabanto bonsi, erinde bonsi aba kwamoeire, abae obogima bwa kare na kare. 3Na obogima bwa kare na kare nabwo obo: bakomanye aye Nyasae bw’ekeene bweka, naende Yeso Kristo gwatomete. 4Inche nakobakire ase ense, emeremo eria kwang’ete gokora nayekoorire. 5Na bono Tata, ombake inche amo naye, ase obonene boria narenge nabwo amo naye ritang’ani ense etaratongwa.
6“Erieta riao nariorokeirie abanto baria kwang’ete korwa ase ense. Barabwo nigo barenge abao, okabang’a inche, ne ring’ana riao baribwatire. 7Bono bamanyire ng’a onsi aya kwang’ete nigo akorwa asore. 8Naki amang’ana kwang’ete nabayaeire, na barabwo bayabwatire, mbamanyete ekeene ng’a nigo narure asore, bakeegena ng’a naye gwantomete. 9Inche nabasabeire barabwo; tindi gosabera ense, korende barabwo aba kwang’eire ekiagera barabwo nabao. 10Na bonsi abare abaane nabao, na abare abao nabaane, na inche nabakirwe ime yabo. 11Inche tinkoba ase ense ime naende, korende aba nao bare ase ense ime, na inche ngocha nde asore. Tata Omochenu, obarende ase okobua kw’erieta riao baria kwang’ete, babe abamo buna intwe tore oyomo. 12Ekero narenge amo nabarabwo ase ense, nigo nabarendete ase okobua kw’erieta riao baria kwang’ete. Igo nabaritete, gose tari nonya noyomo obo osirire, otatiga oria omwana bw’obosiru, erinde ririko rinyare goikeranigwa. 13Na bono ngocha nde asore, na aya nkoyakwana, inde ase ense ime, erinde omogoko one obe oikeranigwe ime yabo. 14Inche nabaeire ring’ana riao; ense yabagechire, ekiagera barabwo tibari abanto b’ense, buna inche ntari oyo bw’ense. 15Tinsabeti ng’a obarusie korwa ase ense, korende obarende korwa ase oria omobe. 16Barabwo tibari ab’ense, buna inche ntari oyo bw’ense. 17Obachene ase ekeene; ring’ana riao nario ekeene. 18Buna gwantomete inche ime ase ense, na inche naboigo nabatomire barabwo ase ense ime. 19Na ase engencho yabo nechenire, erinde nabarabwo bachenwe ase ekeene.
20“Gose tari barabwo boka nasabeire, korende na baria baranyegene ase engencho ye ring’ana riabo, 21bonsi babe abamo, buna aye Tata ore ime asende, na inche ime yao, erinde na aba babe abamo ime yaito; ense enyare kwengena ng’a naye gwantomete. 22Na obonene boria kwang’ete nabaeire, babe abamo, buna intwe tore oyomo; 23inche ime yabo, na aye ime yane, banyare goikerana babe abamo. Igo ense emanye ng’a naye gwantomete, okabancha barabwo, buna kwanyanchete inche. 24Tata, abwo kwang’ete, ninganetie babe amo nainche aase aande onsi inde, banyare korigereria obonene bwane kwang’ete, ekiagera nigo kwanyanchete ritang’ani ense etarabekwa oboroso. 25Tata omonyene oboronge, ense tiyakomanyete, korende inche nakomanyete; na aba bamanyire ng’a naye gwantomete. 26Nabamanyetie erieta riao, naende nimbarimanyie, erinde obwanchani boria kwanyanchete inche bobe ime yabo, na inche imbe ime yabo.”
موجودہ انتخاب:
YOHANA 17: EKEGUSIIBBLE
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
