YOHANA 14
14
Enchera egochia ase Tata
1“Timoichana ase chinkoro chiaino; momwegene Nyasae, nainche monyegene. 2Ase enyomba ya Tata nere nobomenyo obonge; onye taibo, anga nabatebia. Nkogenda nde kobaroiseria aase. 3Kondagende kobaroiseria aase, ninchiche naende, nimbaroisie asende, erinde asende inche, nainwe mobeo. 4Naase nkogenda inche, mwamanyire enchera.”
5Tomas akamoboria, “Omonene, titomanyeti aase ogochia, naki toramanye enchera?”
6Yeso akamoiraneria, “Inche ninche enchera, na ekeene, na obogima; monto onde tagocha ase Tata otatiga goetera asende. 7Onye imwamanyete inche, anga imwamomanyete Tata boigo; korwa bono mwamomanyire, naende mwamororire.”
8Filipo akamotebia, “Omonene, tworokie Tata, toisaneke.”
9Yeso akamotebia, “Nabeire amo nainwe amatuko aya onsi, na aye tomanyeti, Filipo? Oyondorire inche, ororire na Tata; naki aye ogoteba: Tworokie Tata? 10Tibwegeneti ng’a inche nigo inde ime ya Tata, na Tata ime yane? Amang’ana aya inche nkobatebia, tindi gokwana ase okobua kwane, korende n’Tata ore ime yane nigo agokora emeremo yaye. 11Inyegene ng’a inche nigo inde ime ya Tata, na Tata ime yane; gose inyegene ase engencho y’emeremo emenyene.
12“Ekeene, ekeene, nabatebirie: Oyoranyegene inche, emeremo ngokora inche, nere nayekore; nakore naende emenene kobua eye, ekiagera nkogenda nde ase Tata. 13Kende gionsi morasabe ase erieta riane, ekio nangekore, erinde Tata abakwe ime ase Omwana. 14Komorasabe kende gionsi ase erieta riane, ekio ningekore.
Yeso okoriera aborokigwa baye eira ng’a nabatomere Omoika Omochenu
15“Komoranyanche namobwate amachiko aane. 16Naende inche ninsabe Tata, na ere nabae Omokonyi onde oyoramenye amo nainwe goika kare na kare, 17Omoika bw’ekeene. Ense etanyare komwancha, ekiagera temorochi, nonya nkomomanya. Korende inwe mwamomanyire, ekiagera namenyete amo nainwe, naende nabe ime yaino.
18“Tinkobatiga inwe buna chintakana; ninchiche asemore. 19Nkere ekero egeke, ense etandore naende; korende inwe namondore, ekiagera inche moyo inde, na inwe namobe moyo. 20Ase rituko riria namomanye ng’a inche nigo inde ime ase Tata, na inwe ime yane, na inche ime yaino. 21Oyore namachiko aane, na koyabwata, oyio nere onyanchete; ere oyonyanchete nanchwe na Tata one, na inche nimwanche na kweorokia asare.”
22Yudas (tari oria o Iskariota) akamoboria, “Omonene, naki yaba ng’a norigetie kweorokia asetore, gose tari ase ense?”
23Yeso akamoiraneria, “Omonto karanyanche, abwate ring’ana riane, naende Tata one namwanche, na intwe natoche asare, tokore obomenyo bwaito amo nere. 24Oyotanyancheti, tabwateti amang’ana aane; naende ring’ana mwaigure tari eriane, korende neria Tata oyontomete.
25“Aya nabatebirie ekero inde asemore. 26Korende Omokonyi, Omoika Omochenu, oyo Tata aratome ase erieta riane, ere naborokererie onsi, na kobainyoria onsi aya nabatebirie. 27Omorembe nabatigeire; omorembe one nabaeire; tinkoyobaa buna ense ekoyobaa. Timoichana ase chinkoro chiaino, gose timoba nobwoba. 28Mwaigwete inche nkobatebia: Nkogenda nde, na ninchiche naende asemore. Onye mwanyanchete, anga mwagogete, ekiagera nkogenda nde ase Tata, ekiagera Tata nomonene kombua. 29Na bono nabatebirie ritang’ani ataraba, erinde ekero akoba, mwegene. 30Tingokwana nainwe amana’ana amange naende, ekiagera omonene bw’ense ngocha are. Tari nokobua asende; 31korende nigo ngokora buna Tata anchigete, erinde ense emanye ng’a nimwanchete Tata. Imoka, torue aa!
موجودہ انتخاب:
YOHANA 14: EKEGUSIIBBLE
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
