Mataio 9
9
1Wia Iesuro na’u peito naibaha orouvia wia ata hapuoito naibaha abumo wia nou himia oopoito naibaha idiai. 2Wia muo ramu dubu neiio nouido naibaha owoumo uwo dodoo ohuwa orou. Wia nou ta’uwa nei kiraromodio na’i Iesuro naibaha iauri nou naibaha iaowa: Mo mere, giopo pupuo taiti ro, ro himia ubauba kidia auwoha tau ripiti. 3Wia Titi kiati oubi amida nei himia himia naibaha iaowaumo: Dubu nouri ubauba wade riao. 4Wia Iesu nei himia imini nou umori wia neido naibaha iaowa: Ubauba nana rio iminiwa teiri riraromodiodumo. 5Touwai pauwo na, naiba aroi, ro himia ubauba kidia tau ri’piti e naiba aroi, Tatoa ta’u. 6Oubihamere ubauba kidia airipitidio nou pupuo ramuri mo niro rio umo naiba oitimoi, ina nouri muo ramu dubuido nou naibaha iaowa: Roido mainaro, taiibua, dodoo taotai wia ro motoito ta’u. 7Wia nou naibaha o’ibua wia nou himia motoito naibaha o’uwa. 8Ina keauri oubi horohoro’i neiio tore iatiwaumo ina neiio Iehovaido naibaha emabitiwaumo, mabu nouri pupuo nana nou aibo nouro oubido tau imaati.
9Wia nou ta’uwa Iesu nou mabudo ida‐o’u, na’u dubu nou paina Levi, nouro naibaha eauriwa gavana wiha motowa emidiowa, wia nou nouido naibaha iaowa: Mo tanabodoro. Wia nou naibaha otoa ina Iesu dooudo obodowa.
10Ina Iesu motowa naibaha emi dou ihoi, gavana wiha keauri oubi wia ubauba oubi godo, noumu wia nou kitomudio meremu nei naibaha emiwaumo. 11Wia nou ta’uwa Parisea oubio naibaha iauriwaumo, nou himia kitomudio mereido nei naibaha iaowaumo: Gavana wiha keauri oubimu wia ubauba oubimu Iesu wia teiri riho wia teiri ridio. 12Ina Iesuro naibaha orowai nou neido naibaha iaowa: Pupupuo oubi doketa nei niro imahebidioumo biahai, teme teme oubi nei himia gauwoha. 13Ata rio ta’umo, tararomomo taiba imini nouri wade’i; Niainiai kidia mo auwo niro nemahebidio, pauwo kimaati nana mo niro biahai. Mea mea oubi imini imowaimoi ituai mo ko’u biahai; ubauba oubido gauwoha mo aino’uro.
14Ina Ioane kitomudio mere’i nouido naibaha o’umo naibaha iaowaumo: Teiriri imo wia Parisea oubi iho tato nemidiodumo wia ro himia kitomudio mere neiio naiba idodiai biahai. 15Wia Iesu neido naibaha iaowa: Orio kidabuai mere neimu emidiowa taiba na mabu roadodidiodumo nei? Ina doo ta’u o’uwa orio kidubuai mere nei aue’udo aiwatateai, hiwio nouri nei ihotato aiwaimo‐emidioi. 16Dubu ata orio hipura pamo uduuduowa nou owateai aue, nouri orio hipurari pamo uduuduo aiwarekekeai wia pituu auwo uba aiwaiti. 17Ina nou aibo dubu ata orio wine tauo koko tama wauraubuwa karate biahai mabu nouri, doo winero wauraubu aiwapoiiai wia wine naibaha waruodoi wia wauraubu uba naibaha waiti. Nouri orio wine orio wauraubuwa neiio naibaha arateumo ina neiti meahari.
18Nou ta’uwa wade nouri Iesu neido naibaha iaowa, sunago pai dubu na’u naibaha o’uro wia nou hohowa naibaha oroboria naibaha iaowa: Mo behera doihabuo roihiai ata ta’uro wia ro tu nou ohuwa otomai ina nouro kiiro oweai. 19Wia Iesu naibaha otoa wia nou dooudo orobodo wia nou kitomudio mere naiba. 20Ina na’u o’bo, nou himia temeteme sawi kihupo iworohotuti 12 konobori, Iesu ipiudo naibaha otoa wia nou uduuduo opudo naibaha ematibodoi. 21Nouri nou himia naibaha iaowa: Ina nou uduuduo opu moro idanematibodoidai mo meaha ainoitidai. 22Wia Iesu naibaha iremeteai wia o’boi naibaha eauri naiba iaowa: Behera e geii taiti! ro himia kiraromodio na’i ro mea taurowaidumo. Wia nou ta’uwa o’bo nouri mea naibaha oitiwa. 23Wia Iesuro pai dubu motoito naibaha odorowa ina sovirowiro kimurio oubii wia oubi piipiiha diamo gema idodiaiwaumo nouro naibaha iauriwa. 24Ina nou neido naiba iaowa: Taroworuomo, behenu koihai biahai nou uwo rorou, wia neiio nouido aiomobuodiowaumo. 25Ina nou oubi piipiiha hito idaiaho’iuti, nou naibaha odoro wia behe tuudo naibaha ouviai wia behe naibaha o’ibuo. 26Ina nouri paii batibati auwoha naibaha oboo.
27Ina nou ta’uwa Iesu nouri bati naibaha emeheai, idomai tato mere neewa nou dooudo orobodoudo. Neiti aimakakaiwadiowaudo naibaha iaowaudo: Davida mere imeitido ro niainiai tanimahebidiomamaro. 28Ina motoito nou naibaha odoro, idomai tato dubu neewa nouido naibaha o’udo wia neitido Iesu naiba aro: Rieitio aiarararomodudo mo naiba na’i kidodiai umori? Wia neiti nouido naibaha iaowaudo: I’o Pai‐dubu e. 29Nou ta’uwa neiti idomaiwa nouro naibaha iatibowamama wia nou naibaha iaowa: Nana rio kiraromodio na’i nou aibo rietitido mododiai. 30Wia neiti idomai idairawodaiudo wia Iesuro neitido modoboito iao, nou naibaha iaowa: Taiauritoi oubi nei umo biahai. 31Ata neiti naibaha ihuoudo wia nou himia paina nouri batiwa auwoha neiti naibaha owaduutiwaudo.
32Wia nou ta’uwa neiio naibaha ihuodutiwaumo, na’u mubaruo dubu, uba urio ramu, neiio nouido naibaha owoumo. 33Ina uba urio Iesuro idamaho’iuti, mubaruo dubu nouri nou wade naibaha iaowa wia oubi gemao aiemaeawaumo naiba iaowaumo: Ata nana nou aibo imo eaurimo biahai, Isaraela batibatinu nouowa. 34Wia Parisea oubi naibaha iaowaumo: Uba urio’i nouro naibaha rimaho’iuti, uba urio mere pupuito.
35Wia Iesuro auwo oopo wia keke oopo auwoha naibaha orohowa. Nei himia sunagowa nouro naibaha iatomuaiwa wia uba kirouti oubii wia temeteme oubii auwoha nouro nei meaha naibaha iwaiwa. 36Ina oubi gema nou naibaha iauri, nou neiido niainiai emahebidio mabu nouri nei imini godogodoha iraromodioumo wia nei mamoe aibo aratuutiumo, dabi dubu tatori. 37Ina nou himia kitomudio mereido nou naibaha iaowa: Maara iopu nei godo godori ata kiwaati oubi nei godo biahai. 38Rioo maara iopu bati Pai‐dubido pupuito ratodoidumo kowaati merei nou himia bati mabuito nou taitiodoi.
موجودہ انتخاب:
Mataio 9: KXW1941
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the British and Foreign Bible Society in 1941.
